Bekelweni mu Cebo ca kwa Lesa

WA NSANSA umuntu uo “mu malango ya kwa Yehova e mwabo kubekwa kwakwe.” Umuntu wa musango yo abelenga Icebo ca kwa Lesa “akasuba no bushiku.” (Amalu. 1:1, 2) Bushe na imwe mulabekwa nge fyo? Bushe kuti mwacita shani pa kuti ubuseko musanga pa kubelenga Icebo ca kwa Lesa bukulileko?

Mwilabelenga fye amashiwi. Elenganyeni ifyo mulebelenga. Elenganyeni uko abalembelwe balelanda. Ilyo mulebelenga ifipandwa fya kubalilapo ifya Baibolo, umfweni uko Yehova umwine alesokolola panono panono, ifyo alecita pa kulenga isonde likawamine abantunse. Umfweni uko aleeba Umwana wakwe, Cibinda wa Mulimo, ukuti nomba ni nshita ya kubumba abantunse ba kubalilapo. Elenganyeni ukuti Adamu na Efa bapondoka, Lesa abapingula, kabili abatamfya mu Paradise. (Ukutendeka, ifipa. 1-3) Beni na katiina na imwe ilyo mulebelenga ukuti ishiwi lyafuma mu muulu lileti Yesu Kristu Mwana wa kwa Lesa, uwatemwikwa, uwatumwa na Lesa ukufwila abantunse. (Mat. 3:16, 17) Esheni ukwelenganya ifyo umutumwa Yohane acitile ilyo aumfwile Yehova alebilisha ati: “Moneni, ifintu fyonse nafilenge fipya.” (Ukus. 21:5) Cine cine ukubelenga Icebo ca kwa Lesa muli yi nshila caba ca kubekelwamo!

Nga mwatwalilila ukubelenga ici calembwa capuutwamo, mukeshiba Yehova ngo muntu wa bukata kabili uwa kutiinya. Mukalafwaisha ukupalama sana kuli uyu Muntu watutemwa, uutwikatilwe nkumbu, uutwafwa nga ca kuti mu kuicefya tuleesha ukucita ukufwaya kwakwe, kabili uutulanga ifya kutunguluka muli fyonse tucita.—Yosh. 1:8; Amalu. 8:1; Esa. 41:10.

Ilyo mulebelenga sana Baibolo, e lyo mukacilapo ukusekelamo lintu muleishibilako ico Lesa afwaya kuli imwe. Lelo ukubekwa kukacilapo nga nshi. Ilyo ifyo mulebelenga filemwafwa ukupwisha amafya mano mano, mukomfwa kwati ni kemba wa malumbo uwatile: “Fyapesha amano ifishimiko fyenu; e ico umutima wandi ulafisunga.” (Amalu. 119:129) Na imwe bene mukasekelela ilyo muleiluka ifishinte fya mu Malembo ifingamwafwa ukumumunga ukutontonkanya kwenu no kufwaya kwenu mu nshila ya bukapepa.—Esa. 55:8, 9.

Baibolo ilatutungulwila mu mibele isuma iyo itucingilila ukuti twiiletelela kabili itulanga inshila yalungama. Ilyo tuleibelenga, tulamona ukuti Yehova ni Wishi waishiba amafya twingakwata nga twacite fyo imibili yesu iishapwililika ilefwaya. Tafwaya tulecula ku fibi ifyo fishifilwa kucitika ilyo twasuula ifipimo fyakwe ifyapulamo. Alatusakamana kabili afwaya tuleipakisha imikalile yawamisha. Ukubelenga Icebo cakwe kutwafwa ukutesekesha nga nshi ifyo caba lipaalo ukukwata wene nga Lesa wesu kabili Shifwe wa ku muulu.

Kemba wa malumbo alandile pa ubelenga Icebo ca kwa Lesa cila bushiku ati: “Conse ico acita cikalengwo kushuka.” (Amalu. 1:3) Ca cine, nangu fye tushapwililika, nangu twikala mu bwikashi bubifi ubwa kwa Satana, nangu Kaseebanya abombeshe shani ukufwaya ukutulufya, ukubelenga Icebo ca kwa Lesa lyonse no kubomfya ifyabamo kukatulenga ukushuka muli fyonse ifyakuma kuli bucibusa bwesu na Yehova.

Apo tulatitikishiwa muli buno bwikashi bukote, ukusambilila amatontonkanyo ya kwa Kabumba nangu fye pa nshita inono cila bushiku kuti kwatukosha. Bamo abakakilwe mu fifungo pa mulandu wa fisumino fyabo bakwete fye utupimfya twa fikomo uto basangile natwambulwa mu manyunshipepala. Baliputwile ifi fikomo, ukufisungila ku mutwe, no kulaetetulapo. Yehova alibapaalile pantu bacitile apapelele amaka yabo ukulingana ne mibele balimo pa kuti basambilile Icebo ca kwa Lesa. (Mat. 5:3) Lelo, fwe bengi twalikwata sana ubuntungwa ukucila balya. Tatufwile ukutontonkanya ukuti ukubelenga fye icikomo cimo ica mu Baibolo cila bushiku kukatucitila ifipesha amano. Lelo kuti twapaalwa nga ca kuti twateulula ifyo tutangishako pa kuti tulebelengako Baibolo cila bushiku, ukutontonkanyapo, no kubomfya ifyo twabelenga mu mikalile yesu.

Ukulanda fye cishinka, amapange yesu nangu yawame shani kuti yapumfyanishiwa. Nga cabe fyo, tutangishako ifintu fyacindama icine cine. Ku ca kumwenako, teti twikale ukwabula ukunwa amenshi ku mumbo ubushiku bumo nelyo shibili. Lyene, te mulandu ne fyo tupitamo cila bushiku, tulingile ukulubulako inshita no kuipembula ku menshi ya cine.—Imil. 17:11.

Bushe pa lwenu mwalibelenga Baibolo onse? Bamo cilabatiinya ukutampa ukubelenga ukufuma pa Ukutendeka ukuyafika ku Ukusokolola. E ico abengi abalefwaya ukubelenga Baibolo onse batendekele na Amalembo ya Bwina Kristu aya ciGriki. Mulandu nshi? Napamo calibangukile ukumona ifyo yalya mabuuku ya mu Baibolo yabakumine apo balefwaya ukukonka mu makasa ya kwa Kristu. Atemwa napamo cali pa mulandu wa kuti Amalembo ya Bwina Kristu aya ciGriki tayamoneke nga yafulisha—pantu tayafika na kuli hafu wa Baibolo onse. Lelo pa numa ya kupwisha ukubelenga ayo mabuuku 27, baile ku mabuuku 39 aya mu Amalembo ya ciHebere no kutendeka ukubelenga no kuipakisha. Ilyo bapwishishe ukubelenga Amalembo ya ciHebere, balitantika ukubelenga Baibolo cila bushiku, e co balitwalilile, babelengele Amalembo ya Bwina Kristu aya ciGriki umuku wa bubili, kabili tabatala abaleka. Shi na imwe bene belengeni Icebo ca kwa Lesa cila bushiku no kulenga ukuba e cintu mukalacita ubumi bwenu bonse.

Bushe kwaba abashaishiba kubelenga mu lupwa lwenu nelyo mu cilonganino mwaba? Mulandu nshi mushingaitemenwa ukulababelengelako Baibolo lyonse? Mukanonkelamo, kabili na bo bakanonkelamo ilyo baleetetula pa fyo bomfwa no kufibomfya mu mikalile yabo.—Ukus. 1:3.

Mu kupita kwa nshita, napamo kuti mwafwaya ukulundako ukusapika kwaibela mu kubelenga kwenu ukwa Baibolo. Kumo kuti kwamwafwa ukutesekesha ifyo ifiputulwa fyalekanalekana ifya Baibolo fyumfwana. Nga ca kuti Baibolo wenu alikwata ifya kuloshako, kuti fyamulangilila uko mwingasanga ifyebo fyashingulukako ne fyapalako. Kuti fyamwafwa ukwiluka ifyacitike pa kuti amalumbo yamo yamo yalembwe e lyo ne fyalengele ukuti bakalata ba batumwa ba kwa Yesu Kristu balembwe. Ifitabo fya Insight on the Scriptures fyabamo ifyebo ifingi pa lwa bantu, ififulo, ne mibele yalumbulwa mu Baibolo. Amacharti yalanda pa kufikilishiwa kwa kusesema kwa mu Baibolo, yalangilila ishamfumu na bakasesema baliko pa nshita imo ine, no kupeela imyaka iyo nakalimo ifintu fya mu Baibolo fyalecitikilapo.

Ilyo muleetetula pa fyo mulesambilila, mukomfwikisha umulandu ifintu fimo fyalecitikila pa bantu ba kwa Lesa. Muli no kwishiba umulandu Yehova alecitila ifintu fimo ku bantu bakwe. Mukeshiba ifyo Yehova amona imibombele ya mabuteko, imisango ya bantu, e lyo ne ncitilo sha bantu umo umo. Ici cikamulenga ukwishiba bwino sana imitontonkanishishe yakwe.

Ilyo mukalaelenganya incende umo ifintu fimo fyacitikile e lyo mukacishapo ukutemwa ilyashi lya mu Baibolo. Ba mapu balangisha ifyalo fya mu Baibolo balangilila imimonekele ya mpanga ne ntamfu pa kati ka fifulo. Ku ca kumwenako, kuti twatunganya atuti ni pi mu kulungatika abena Israele bayabukile Bemba Wakashika? Bushe Icalo Calaiwe cakulile shani? Ni kwi Yesu afikile ukwenda ilyo alebomba ubutumikishi bwakwe ubwa pe sonde? Fintu nshi Paulo alemona pa nyendo shakwe isha bumishonari? Ba mapu no bulondoloshi bwa mpanga fili no kumulundilapo ifishinka ifikalenga ukubelenga kwenu ukwa Baibolo ukubamo ubupilibulo. Ni kwi mwingasanga ba mapu ba fyalo fya mu Baibolo? Bamo basangwa muli Baibolo wa New World Translation of the Holy Scriptures. Ifitabo fya Insight fyakwata ba mapu mupepi na 70, kabili fyalikwata map index (Icisontelelo ca ba Mapu) ku mpela ya volyumu wa kubalilapo. Nga mulefwaya impapulo umwaba ba mapu bambi, bomfyeni icitabo ca Watch Tower Publications Index. Nga tamwakwata ishi mpapulo, kuti mwabomfya ba mapu bafuma mu Ulupungu lwa kwa Kalinda ku kumwafwa mu kubelenga kwenu ukwa Baibolo.

Mu Amalembo ya ciHebere, Imfumu Davidi yatatakwile Yehova aiti: “Ifyo yafinisha kuli ine amatontonkanyo yenu, mwe Lesa! Impendwa sha yako ubwingi!” (Amalu. 139:17) Mu Amalembo ya Bwina Kristu aya ciGriki, umutumwa Paulo alumbenye Yehova pantu “E wabalikile mu mitima yesu ukuti tubuutushe ku bantu ukwishibo bukata bwa kwa Lesa mu cinso ca kwa Yesu Kristu.” (2 Kor. 4:6) Pa kati ka kwa Davidi na Paulo papitile imyaka iingi; lelo, bonse babili babekelwe mu Cebo ca kwa Lesa. Na imwe kuti mwabekelwamo nga mwalubulako inshita ya kubelenga fyonse ifyo Yehova amupa mu Cebo cakwe icapuutwamo.