Mwe Bacaice Ifyo Mucita Filakuma Abafyashi Benu

UMUTUMWA umukoloci Yohane alembele ukuti: “Nshikwete ica kunenga ukutootela icacila pali ifi, pa kuumfwa ukuti abana bandi benda mu cine.” (3 Yohane 4) Nangu ca kutila abana abo Yohane alelandapo pali ici cikomo ca mu Baibolo bali basambi, abafyashi abatiina Lesa kuti basumina aya mashiwi ayo Yohane alandile. Filya fine ciba abafyashi nga bakusha bwino abana babo, abana balaba bwino sana, na bana bene nga balecita ifisuma abafyashi balomfwa bwino sana. Lelo abana nga balecita ifyabipa, abafyashi kuti baleumfwa ububi sana.

Imfumu Solomone iya ku Israele yalishibe ukuti ifyo abana bacita filakuma sana abafyashi babo. Solomone alembele ukuti: “Umwana mwaume wa mano alenga wishi ukusamwa, lelo umwana mwaume umuwelewele bulanda kuli nyina.” (Amapinda 10:1) Kanshi abana bonse fye, kumo na bana abakalamba, kuti cawama batontonkanya pa fyo bashibo na banyinabo bomfwa pa fyo bacita. Mulandu nshi cacindamina ukutontonkanyapo?

Tala tontonkanya fye pa fyo abafyashi bobe abatiina Lesa babombesha ukukusakamana pa kuti ukule! Batampile ukukusakamana no kukupepela kale sana ninshi no kufyalwa taulafyalwa. Ilyo wafyelwe, abafyashi bobe bonse babili balekusakamana bwino bwino pa kuti icitemwiko pali bena na iwe cikose. Kabili nalimo abafyashi bobe balitashishe na Lesa pa fyo bakwete umwana na pa mulimo usuma kabili uwacindama uwa kukukusha. Wali fye akacece akashingacita nangu cimo, lelo abafyashi bobe e balekusakamana kabili apo balapepa Yehova, balishibe ukuti uyu mulimo walicindama.

Apo abafyashi bobe Bena Kristu ba cine, balebelenga Baibolo ne mpapulo shimbi pa kuti beshibe ifya kukukusha bwino, e lyo baleipushako na bafyashi bambi ukuti babapandeko amano. Na kabili tabalekele ukupepa kuli Lesa ukuti abaafwe ukukukusha bwino. (Abapingushi 13:8) Ilyo waleya ulakula, batampile ukumona imibele yobe iisuma e lyo balemona ne fyo walelufyanya. (Yobo 1:5) Ilyo wafikile pa bupungwe, watendeke ukukwata amafya na yambi. Inshita shimo, nalimo tawaleumfwila abafyashi bobe, kabili abafyashi bobe batampile ukupepa sana, ukubelenga na fimbi no kutontonkanya sana pa fyo bengakwafwa ukutwalilila ukupepa Wiso wa ku muulu Yehova.

Nangu wakula, abafyashi bobe balatwalilila ukutontonkanya pali iwe pantu uli mwana wabo. Balatontonkanya pa mikalile yobe, pa fyo uletontonkanyapo ne filekusakamika, e lyo na pali bukapepa bobe. Nangu cibe fyo, ilyo balecita fyonse fi, abafyashi bobe balebukisha no kuti walikwata amaka ya kuisalila kabili tabeshiba ne fyo ukaba. Pa kulekelesha, ni we we mwine ufwile ukusala ifya kucita mu mikalile.

Apo abafyashi balatemwa sana ukumfwa ukuti abana babo baleenda mu cine, bushe te kuti tutile balomfwa ububi sana nga ca kuti abana babo baleka ukwenda mu cine? Ca cine, abana abacita ifya buwelewele balalenga abafyashi ubulanda. Solomone atile: “Umwana mwaume umuwelewele kafiisha mutima kuli wishi, kabili malulu ku wamufyele.” (Amapinda 17:25) Ala mwandini abafyashi balomfwa ububi sana nga ca kuti umwana wabo aleka ukupepa Lesa wa cine!

Kanshi mwe bacaice, ifyo mucita filakuma aba mu lupwa lwenu e lyo na bambi fye. Ifyo mucita filakuma sana abafyashi benu. Nga mwakaana Lesa ne fishinte fya mafunde yakwe, abafyashi benu bakomfwo bubi sana. Nomba nga mwaba ne cishinka kuli Yehova no kuba ne cumfwila kuli wena, abafyashi benu bakasekelela. Pampamineni pa kulenga imitima ya bafyashi benu ukusamwa! Ala ukumfwila abafyashi benu e cacindama sana ico mwingabacitila, pantu balemukusha, ukumucingilila no kumutemwa!