Cenjeleni Kuli Bakasambilisha wa Bufi!

“Na muli imwe mukaba bakasambilisha wa bufi.”—2 PETRO 2:1.

 1. Yuda afwaile ukulemba pa lwa cinshi, kabili mulandu nshi ayalwilile ilyashi lyakwe?

MWANDI ca kutulumusha! Bakasambilisha wa bufi ukuba mu cilonganino ca Bwina Kristu ica mu mwanda wa myaka uwa kubalilapo! (Mateo 7:15; Imilimo 20:29, 30) Yuda, munyina citika wa kwa Yesu aalibukiile pa lwa ici ca kucitika. Aatile aafwaile ukulembela abasumina banankwe “pe pusukilo lya fwe bonse,” lelo alondolwele ati: “Naobelwo kumulembela ukumupaapaata ukuti mulwile icitetekelo.” Mulandu nshi Yuda ayalwilile ilyashi lya kulandapo? Atile pantu “abantu bamo basokelelamo [mu filonganino] . . . abasangulo kusenamina kwa kwa Lesa wesu bucilende.”—Yuda 3, 4.

 2. Mulandu nshi 2 Petro icipandwa 2 na Yuda fyapalanina nga nshi?

² Cilemoneke fyo, Yuda alembele mu kwangufyanya fye pa numa Petro alembele kalata wakwe uwa cibili. Ukwabulo kutwishika Yuda aalibeleshenye no yo kalata. Mu kushininkisha, alumbulwile amatontonkanyo ayengi ayapaleeneko na ya muli kalata wakwe uwa maka uwa kukonkomesha. E ico, ilyo tulelanguluka 2 Petro icipandwa 2, tuli no kumona fintu apalana na kalata wa kwa Yuda.

Ififuma mu Fisambilisho fya Bufi

 3. Cinshi cacitike ku numa cintu Petro atile cili no kucitika na kabili?

³ Pa numa Petro abe nacincisha bamunyina ukwangwa ku cebo ca kusesema, atila: “Awe, kwaimine na bakasesema wa bufi mu bantu [muli Israele wa pa kale], ifyo na muli imwe mukaba bakasambilisha wa bufi.” (2 Petro 1:14–2:1) Abantu ba kwa Lesa aba pa kale balipokelele ubusesemo bwa cine, lelo na kabili baali no kulalwishanya ne fisambilisho fyakowela ifya bakasesema wa bufi. (Yeremia 6:13, 14; 28:1-3, 15) “Muli bakasesema ba ku Yerusalemu nimone ca makankamike; ukucito bucende no kwenda mu bufi,” e fyalembele Yeremia.—Yeremia 23:14.

 4. Mulandu nshi bakasambilisha wa bufi bawamina ubonaushi?

⁴ Pa kulondolola cintu bakasambilisha wa bufi bali no kucita mu cilonganino ca Bwina Kristu, Petro atila: “Abantu abakaletamo [mu mutalalila, NW] ifya bucaibela fya konaula, abakaana Cibinda wabo [Yesu Kristu] uwabashitile, abailetelela ku boni ubuleisa bwangu.” (2 Petro 2:1; Yuda 4) Icafuma muli bucaibela bwa musango yo ubwa mu mwanda wa myaka uwa kubalilapo ni Kristendomu nga fintu twamwishiba ilelo. Petro alanga umulandu bakasambilisha wa bufi bawaminwa ubonaushi bwa mupwilapo atila: “Abengi bakakonke fya bulalelale fyabo pa mulandu wa abo Inshila ya cine ikapontelwa.”—2 Petro 2:2.

 5. Bakasambilisha wa bufi e baashingemwe cinshi?

⁵ Citontonkanyeni! Pa mulandu wa kusonga kwa bakasambilisha wa bufi, abengi mu filonganino baali no kuyobeka mu fya bulalelale. Ishiwi lya ciGriki ilyapilibulwa ukuti “ifya bulalelale” lilangilila ukupuusauka, ukubulisha ukuikaanya, ukuilekelesha, ukucite fya nsoni, ne myendele yapama. Petro mu kubangilila atile Abena Kristu “[baalifulumwike] ukufuma mu kubola kwa mu lunkumbwa ululi pano isonde.” (2 Petro 1:4) Lelo bamo baalebwelela kuli kulya kubola, kabili abashingemwe maka maka ni bakasambilisha wa bufi abaali mu filonganino! Muli fyo inshila ya cine yali no kusebanishiwa. Mwandi ca bulanda! Mu cine cine, uyu uli mulandu uo Inte sha kwa Yehova bonse balingile ukwangwako sana. Tatulingile ukulabo kuti, ifyo imyendele yesu ikaba, kuti twaleta ilumbo kuli Yehova Lesa na pa bantu bakwe nelyo ukuleta umuseebanya pali bene.—Amapinda 27:11; Abena Roma 2:24.

Ukuletamo Ifisambilisho fya Bufi

 6. Cinshi cikunta bakasambilisha wa bufi, kabili ni nshila nshi bafwailamo ukusanga cintu balefwaya?

⁶ Mano mano, tulebukila ulwa nshila bakasambilisha wa bufi baletelamo imitontonkanishishe yabo iyabola. Petro intanshi atila bacite fyo mu mutalalila, nelyo mu bumfisolo, mu nshila ya bufumfuntungu. Alundako ati: “Mu lunkumbwa lwabo bakamunonka ku fyebo fya malele.” Icikunta bakasambilisha wa bufi caba kufwaisha kwa kaso, nga fintu caebekeshiwa ku bupilibulo bwa The Jerusalem Bible ukuti: “Mu kucincila bakesha ukumoongwela ku lubali lwabo ku mashiwi ya lulembulo.” Mu kupalako, ubupilibulo bwa kwa James Moffatt butila: “Mu lunkumbwa lwabo bakamuliila pa mutwe mu kupaasha kwa bucenjeshi.” (2 Petro 2:1, 3) Ififuma mu tunwa twa bakasambilisha wa bufi kuti pambi fyamoneka nge fingabomba bwino kuli umo uushili uwalola lwa ku mupashi, lelo amashiwi yabo yaleelenganishiwa mu kusakamana ku ‘koongola’ abantu, ukubakulila mu kubombela imifwaile ya kaso iya bakabepa.

 7. Mano nshi aya buntunse yatendeke ukupokelelwa ku cinabwingi mu mwanda wa myaka uwa kubalilapo?

⁷ Ukwabulo kutwishika, bakasambilisha wa bufi aba mu mwanda wa myaka uwa kubalilapo basongelwe ne mitontonkanishishe ya ku calo iyaliko pali iyo nshita. Mupepi ne nshita lintu Petro alembele kalata wakwe, amano ya buntunse ayainikwe Gnosticism yatendeke ukupokelelwa ku cinabwingi. BaGnostic basumine ukuti icintu fye conse ciibi kabili icintu fye icakuma ku mupashi e cisuma. Muli fyo, bamo aba bene batile tacili mulandu na cintu umuntu engacita no mubili wakwe. Mu kupita kwa nshita, bapaashishe abati, umuntu tali na kuba no yu mubili. Kanshi, basondwelele ukuti, imembu sha ku mubili—e kuti ukusanshako ne sha kwampana kwa bwamba—tashaba na mulandu. Cilemoneko kuti, imimwene ya musango yo yatendeke ukusonga bamo abaitungile ukuba mu buKristu.

8, 9. (a) Kupelulula nshi ukwapondama ukwayambukile Abena Kristu ba mu kubangilila bamo? (b) Ukulingana na Yuda, cinshi cintu bamo mu cilonganino baalecita?

⁸ Uwasoma ifya Baibolo umo alandilepo ati “kwaliko bamo aba mwi Calici abayalwile icifundisho ca luse,” nelyo “ukusenamina.” (Abena Efese 1:5-7) Ukulingana no yu wasoma, ukupaasha kwa bamo kwali muli iyi nshila: “Bushe mutila [ukusenamina] kwa kwa Lesa kwalikulisha ica kuti kuti kwafimba pa lubembu lonse? . . . Kanshi natutwalilile ukubembuka, pantu [ukusenamina] kwa kwa Lesa kuti kwafuutapo ulubembu ululi lonse. Na kuba ilyo twacishapo kubembuka e lintu [ukusenamina] kwa kwa Lesa kukashukila apa kubombela apengi.” Bushe mwalitala amumfwapo ukupelulula kwapondama ukucila pali uko?

⁹ Umutumwa Paulo acilingenye imitontonkanishishe yalubana pa lwa nkumbu sha kwa Lesa lintu aipwishe ati: “Bushe twikalilile mu lubembu, ku kulenga ukusenamina kufule?” Na kabili aipwishe ati: “Bushe tubembuke ico tatuli bena Malango, lelo abena kusenamina?” Ku cipusho cimo cimo Paulo ayaswike mu kwebekesha ukuti: “Nakalya!” (Abena Roma 6:1, 2, 15) Mu kumonekesha, nga fintu Yuda alanda, bamo “[baalesangulo] kusenamina kwa kwa Lesa wesu bucilende.” Nangu cibe fyo, Petro alando kuti ‘ubonaushi bwa kubonaula tabushipula.’—Yuda 4; 2 Petro 2:3.

Ifya Kumwenako fya Kusoka

10, 11. Fya kumwenako nshi ifya kusoka fitatu fintu Petro apayanya?

¹⁰ Pa kwebekesho kuti Lesa akacitapo cimo ukulwisha bakacita wa fibi aba ku mufulo, Petro apayanya ifya kumwenako fya kusoka fitatu ukufuma mu Malembo. Ica kubalilapo, alemba ati: “Lesa tatengele bamalaika ilyo babembwike.” Yuda alando kuti ni aba “abashaikele mu ncende yabo, lelo bashile ubwikalo bwabo” mu muulu. Baishile pe sonde pa ntanshi ya Lyeshi no kufwale mibili ya munofu pa kuti bengayobeka mu kwampana kwa bwamba na bana banakashi ba bantu. Pamo nge nshila ya kubakandilamo pa mulandu wa ncitilo shabo ishishayana, ishishili sha cifyalilwa, baapooselwe mu “Tartari,” nelyo nga fintu Yuda alanda, “balindilwo kupingulwa kwa Bushiku bukalamba mu fikakilo fya pe mwi samba lya mfifi.”—2 Petro 2:4; Yuda 6; Ukutendeka 6:1-3.

¹¹ Mu kukonkapo, Petro alosha ku bantu ba mu kasuba ka kwa Noa. (Ukutendeka 7:17-24) Atila mu nshita ya kwa Noa, Lesa “tatengele aba pano isonde aba kale . . . ilyo aletele ilyeshi pano isonde pa bashipepa.” Mu kulekelesha, Petro alemba ati Lesa aimike “ica kumwenako ca filesungamino kuponena abashipepa” ukupitila mu ‘kulenga imisumba ya Sodomu na Gomora ukube mito.’ Yuda alundako ifyebo na fimbi ukuti balya bantu “[bacitile] bucilende no kukonke fye shiku.” (2 Petro 2:5, 6; Yuda 7) Abantu tabaleibimba fye mu kwampana kwa bwamba na banakashi ukushili kwa mwi funde lelo balekonke fye shiku na baume bambi, nakalimo nangu fye ne nama sha mpanga.—Ukutendeka 19:4, 5; Ubwina Lebi 18:22-25.

12. Ukulingana na Petro, ni shani fintu imyendele yalungama ilambulwa?

¹² Lelo, pa nshita imo ine, Petro alando kuti Yehova aba kalambula wa abo bamubombela mu busumino. Ku ca kumwenako, ashimika fintu Lesa “abakile Noa kabila wa bulungami na bambi cinelubali” ilyo Aletele Mulamba. Na kabili alanda pa lwa kupususha uko Yehova apuswishe “Lote umulungami” pa nshita ya Sodomu, no kusondwelelo kuti: “Shikulu aishibo kupokolola bakapepa ku ca kwesha, no kulinda abashalungama ukufika ku bushiku bwa bupingushi.”—2 Petro 2:5, 7-9.

Incitilo sha Kukandilwapo

13. Ni bani maka maka balindilo kupingulwa, kabili ni mu filooto nshi cilemoneke fyo e mo bayobeka?

¹³ Petro asoobolapo bamo abalindilo bupingushi bwa kwa Lesa, ukubalumbula nga, “abakonke fya mubili mu lunkumbwa lwa kukowesha, no kusuula Bukateka.” Ni cikanga fye tumfwe no bukali bwa kwa Petro ilyo alesoso kuti: “Bantu abapama, aba matutumuko, tabatiino kupontela bamalaika bakata.” Yuda alemba ati “bakaloota aba, bakowesho mubili . . . no kupontela bamalaika bakata.” (2 Petro 2:10; Yuda 8) Ifilooto fyabo kuti pambi fyasanshamo ifya kwelenganya fishasanguluka pa lwa kwampana kwa bwamba ifyo fibakoselesha ukukonkelela ukuisekesha kwa kwampana kwa bwamba. Nangu ni fyo, ni mu nshila nshi, ‘basuulila Bukateka’ no “kupontela bamalaika bakata”?

14. Ni mu nshila nshi bakasambilisha wa bufi ‘basuulila Bukateka’ no ‘kupontela bamalaika bakata’?

¹⁴ Bacite fyo mu kuti balasuula ubulashi bwaimikwa na bulesa. Baeluda ba Bwina Kristu bemininako Yehova Lesa wa bukata no Mwana wakwe kabili, pali uyo mulandu, balikwatako ubukata ubwabikwa pali bene. Kwena, balacite filubo, nge fyo na Petro wine aalecita, lelo Amalembo yacincisha ababa mu cilonganino ukunakila ku bakata ba musango yo. (AbaHebere 13:17) Ukupelebela kwabo te kwingalenga ukulabapontela. Petro atila bamalaika “tababaseba [bakasambilisha wa bufi] ukuseba kwa miponto,” nangu cingati kwalibawamina mu cituntulu. Petro atwalilila ati: “Lelo aba bantu baba nge finama ifishaba na mano, ifya mulosha fye, ififyalilwo kwikatwa no konaulwa, bapontele fintu ifyo bashaishiba, bakonaulwa mu kubola nga fyene.”—2 Petro 2:10-13.

“Ilyo Balyo Mutebeto . . . Na Imwe”

15. Ni nshila nshi bakasambilisha wa bufi babomfya, kabili ni kwi uko basupila ukubeleleka kwabo?

¹⁵ Nangu cingati aba bantu babola “batungo kuti musamwe ukucankilwe fya kwipakisha akasuba” kabili “fiko kabili bulema,” baliba na kabili aba kufutika. Bacitile fintu “mu mutalalila,” ukubomfye “fyebo fya malele,” nga fintu Petro alandilepo mu kubangilila. (2 Petro 2:1, 3, 13) Muli fyo te kuti pambi basuushe pa lwalaala ukubombesha kwa baeluda ukwa kusumbula ifipimo fya mibele isuma ifya kwa Lesa nelyo ukusupila apabuuta ukuisekesha kwa kwampana kwa bwamba. Mu cifulo ca ico, Petro atila baipoosa mu “[kucenancena] mu mitebeto yabo ya cisenena, ilyo balyo mutebeto pamo na imwe.” Kabili Yuda alemba ati: “Aba bantu mabwe ayabelama mu mitebeto yenu ya cintemwa.” (Yuda 12) Ee, pamo fye nge fyo amabwe yacenjemana ayaba pa nshi ya menshi yengalepula ubwato, ukulenga abali mu bwato abashaibukila ukunwena, e fyo bakasambilisha wa bufi baalebosha abashaibukila abo balelanga mu bumbimunda kwati balibatemwa mu “mitebeto . . . ya cintemwa.”

16. (a) Bushe ‘imitebeto ya cintemwa’ yali finshi, kabili ni mu mibele nshi yapalako umo aba bucisenene bengabombela ilelo? (b) Bakasambilisha wa bufi batonta ukusakamana kwabo pali bani, kanshi cinshi cintu aba musango yo bafwile ukucita?

¹⁶ Iyi ‘mitebeto ya cintemwa’ cilemoneke fyo yaleba kukumana kwa kwangalila pamo lintu Abena Kristu ba mu mwanda wa myaka uwa kubalilapo balekumana ku kuipakisha ifya kulya no kubishanya. Inte sha kwa Yehova ilelo na bo limo limo balakumana capamo ku kwangalila pamo, nakalimo pa mitebeto ya bwinga, pa nyendo sha kusende fya kulya, nelyo pa kubishanya fye kwa mu cungulo bushiku. Ni shani fintu abantu baabola bengabomfya ifya kucitika fya musango yo ku kubelelekapo bamo? Petro alemba ati: “Baba na menso ayaisulamo bucilende . . .; babeleleka abashashangila.” “Imitima ya kutukuto mupusulo” bailosha pa bashashangila lwa ku mupashi abo baafilwa ukulenga icine ukuba icabo mu kukumanina. E co sokelweni kabela ku cacitike mu kasuba ka kwa Petro, kabili ibakeni! Cincintileni ukusengasenga kushasanguluka ukuli konse, kabili mwilatumpikwa no kuyemba nelyo ukucelebuka kwa umo uulebomfya ukusengasenga kwa bucisenene!—2 Petro 2:14.

“Inshila ya kwa Balaamu”

17. Cinshi cali “Inshila ya kwa Balaamu,” kabili yayambukile shani abena Israele 24,000?

¹⁷ Aba bantu “ba citiipu” baalishibe cine pa nshita iyalepako. Kuti bacili balemoneka ukuba abacincila mu cilonganino. Lelo Petro atila: “Baluba pa kushe nshila iyalungama, no kukonke nshila ya kwa Balaamu mwana Beore, uwatemenwe icilambu ca bubifi.” (2 Petro 2:14, 15) Inshila ya kwa kasesema Balaamu yali kupanda amano ukwa kubelelekela abantu muli bucisenene pa kuti wene engamwenamo. Aebele Imfumu ya bena Moabu Balaki ukuti Lesa ali no kutiipa Israele nga ca kuti abantu balilembwilwe ku kucito bulalelale. Pali uyu mulandu, abengi pa bantu ba kwa Lesa balibelelekwe ku banakashi abena Moabu, kabili 24,000 balipaiwe pa mibele yabo iya bucisenene.—Impendwa 25:1-9; 31:15, 16; Ukusokolola 2:14.

18. Balaamu aali no mukoosha wa musango nshi, kabili cinshi cintu icafuminemo cilangilila icikacitikila bakasambilisha wa bufi?

¹⁸ Petro atila Balaamu alicilimwe lintu impunda yakwe yamusoseshe, lelo Balaamu ‘alitemenwe icilambu ca bubifi’ nga nshi ica kuti nangu line ico cacitike, talekele “ubushilu” bwakwe. (2 Petro 2:15, 16) We bubifi we! Kalanda ku uli onse uwapala Balaamu uwesha ukubosha abantu ba kwa Lesa ukupitila mu kubatunka ukucita bucisenene! Balaamu afwilile pa bubi bwakwe, icalelangilila icili no kucitikila bonse abakonke nshila yakwe.—Impendwa 31:8.

Ukubeleleka Kwabo Ukwa kwa Kaseebanya

19, 20. (a) Bushe abapala Balaamu balinganishiwa kuli cinshi, kabili mulandu nshi? (b) Ni bani bantu babeleleka, kabili mu nshila nshi? (c) Mulandu nshi twingasoselo kuti ukubeleleka kwabo kwa bukaseebanya, kabili ni shani fintu twingaicingilila fwe bene na bambi?

¹⁹ Pa kulondolola abapala Balaamu, Petro alemba ati: “Aba bantu tumfukumfuku [nelyo ifishima] utushaba na menshi, kabili ni bafubefube [nelyo, amakumbi] abasendwa ku nkuuka.” Ku muyendo uuli ne cilaka mu ciswebebe, icishima cauma kuti capilibule mfwa. E mulandu wine “ukufiita kwa mfifi kwasungilwa” abo baapala ifintu fya musango yo! Petro atwalililo kulando kuti: “Pantu, pa kulande fya matutumuko fya fye, babelelekela ku lunkumbwa lwa mubili wa bucilende abo abapene bapusuke ku baleikala mu kuluba.” Babeleleka abashabelesha ukupitila mu ‘kubalayo buntungwa,’ e fyasosa Petro, “apo abene bacili abasha ku kubola.”—2 Petro 2:17-19; Abena Galatia 5:13.

²⁰ Ukubeleleka kwa bakasambilisha babola aba musango yo kwaba kwa bukaseebanya. Ku ca kumwenako, kuti balanda ukuti: ‘Lesa alishibo kuti twalinaka kabili tulanakila ku lunkumbwa. Kanshi nga twaibimbamo no kwikusha ulunkumbwa lwa kwampana kwa bwamba, Lesa akatubelele nkumbu. Nga twatumbulo lubembu lwesu, akatulekelela nga fintu fye atulekelele ilyo twaishile fye mu cine.’ Ibukisheni ukuti Kaseebanya abomfeshe inshila yapalako kuli Efa, ukumulaye fyo kuti abembuka ukwabulo kukandwa. Kuli Efa, atungile ukuti ukubembukila Lesa kwali no kumulenga ukwishiba no kumupeelo buntungwa. (Ukutendeka 3:4, 5) Nga twaumfwa umuntu wabola uubishanya ne cilonganino alelanda muli uyo musango, twalikakililwako ukuicingilila fwe bene pamo na bambi ukupitila mu kuseba uyo muntu ku bashingamwa mu cilonganino ca Bwina Kristu.—Ubwina Lebi 5:1.

Ukucingililwa ku Kwishiba Kwalungikwa

21-23. (a) Finshi fifuma mu kufilwa ukubomfya ukwishiba kwalungikwa? (b) Bwafya nshi na bumbi buntu Petro alandapo ubuli no kulangulukwa mu kukonkapo?

²¹ Petro asondwelela ulu lubali lwa kalata wakwe pa kulondolola ifingafuma mu kufilwa ukubomfya ukwishiba uko mu kubangilila atile kulafwaikwa ku “mweo na kuli bukapepa.” (2 Petro 1:2, 3, 8) Alemba ati: “Pantu ilyo bapusuka ku fya kukowesha fya pano isonde mu [kwishiba kwalungikwa ukwa kwa, NW] Shikulu kabili Umupusushi Yesu Kristu, nga bakobwa kabili no kwanshiwa, imiikalile ya kulekelesha yaba kuli bene iyabipisho kucile ya kutendeka.” (2 Petro 2:20) Mwandi ca bulanda! Abantu ba musango yo mu kasuba ka kwa Petro balisuulile isubilo likankaala ilya bumi bwa mu muulu ubwa kukanafwa ukukonka ukwikushiwa kwa pa nshita inono fye ukwa kwampana kwa bwamba.

²² Muli fyo Petro atila: “Nga cali eyefilya kuli bene ukubulo kwishibe Nshila ya bulungami, ukucilo kuiishiba no kufutuka kwi funde lya mushilo ilyo bashiililwe. Caponena bene umwasosele pinda lya cine, aliti, Imbwa ipilibukila ku malushi ya iko, na nakapoli uusambilwe abwelela ku kuikunkusha mu matipa.”—2 Petro 2:21, 22; Amapinda 26:11.

²³ Ubwafya na bumbi ubo cilemoneke fyo bwalitendeke ukwambukila Abena Kristu ba mu kubangilila bwalipalileko ku buleambukila ifilonganino fimo ilelo. Ku numa kulya, cilemoneke fyo bamo baleilishanya pa lwa calemoneka ngo kukanafika kwa kubapo kwa kwa Kristu ukwalaiwe. Natubebete cintu Petro alanda pali uyu mulandu.

Bushe Muleibukisha?

Fya kumwenako nshi fitatu ifya kusoka fintu Petro aloshako?

Ni shani fintu bakasambilisha wa bufi ‘basuula Bukateka’?

Inshila ya kwa Balaamu cinshi, kabili ni shani fintu abo baikonka besha ukubeleleka bambi?

Finshi fifuma mu kufilwa ukubomfya ukwishiba kwalungikwa?

[Icikope pe bula 16, 17]

Balaamu aba nge ca kumwenako ca kusoka