Mulepepa Fye Yehova Eka

 1. Mulandu nshi tulingile ukulapepela fye Yehova eka?

TUFWILE ukulapepa fye Yehova eka pantu e Kabumba kabili e upeela ubumi. (Ukus. 4:11) Lelo kwaliba ubwafya bumo. Nangu ca kuti twalitemwa Yehova kabili twalimucindika, nalimo kuti twapumbulwa ica kuti twafilwa no kulamupepa fye eka. Finshi fingatupumbula? Ilyo tushilafilandapo, natubalilepo ukulanda pa fyo cipilibula ukupepa fye Yehova eka.

 2. Nga fintu ilembo lya Ukufuma 34:14 lilanda, finshi tukacita nga ca kuti twatemwa fye Yehova eka?

² Baibolo nga yalanda pa kupepa fye Lesa eka, ninshi ilepilibula ukuti tufwile ukumutemwa nga nshi. Nga ca kuti twatemwa sana Yehova ninshi e o tukalapepa fye eka. Na kabili tatwakatemwe umuntu nangu umo nelyo icintu ukucila ifyo twamutemwa.—Belengeni Ukufuma 34:14.

 3. Finshi fyalenga tutemwe sana Yehova?

³ Yehova tatwamutemenwa fye ico cine. Cinshi twalandila ifi? Ni co ifishinka ifyo twaishiba pali ena e fyalenga tumutemwe. Twalitemwa imibele yakwe iisuma nga nshi. Twalishiba ifyo atemwa ne fyo apata. Na ifwe bene twalitemwa ifyo atemwa kabili twalipata ifyo apata. Twalishiba ifyo afwaya fwe bantunse tukaleikala kabili ifi fine e fyo tutungilila. Alitusuminisha ukuba ifibusa fyakwe kabili ifi filenga tuleumfwa ukuti alitucindamika sana. (Amalu. 25:14) Fyonse ifyo tusambilila pali Kabumba wesu filenga twabelako ifibusa fyakwe.—Yako. 4:8.

 4. (a) Finshi Satana Kaseebanya acita pa kuti ciletukosela ukutemwa fye Yehova eka? (b) Finshi twalasambilila muli cino cipande?

⁴ Satana Kaseebanya e uteka cino calo, kabili afwaya twalabika amano ku fintu ifyo abantu bamona ukuti fyalicindama sana. Ifi filenga calatukosela ukuleka ukuba no lunkumbwa. (Efes. 2:1-3; 1 Yoh. 5:19) Ico afwaisha kulenga twatemwa ne fintu fya muli cino calo ica kuti catukosela ukutemwa fye Yehova eka. Natulande pa fintu fibili ifyo Satana Kaseebanya engatupumbwilako. Ica kubalilapo fyuma, ne ca bubili fya kuleseshamo icitendwe.

 5. Finshi fingacitika nga twatemwisha indalama?

⁵ Mu cifyalilwa fye tulafwaya ukukwata ifya kulya ifyalinga, ifya kufwala ifisuma, e lyo no mwakwikala umusuma. Nomba tufwile ukuba abacenjela pa kuti tatutendeke ukutemwisha indalama. Abantu abengi muno nshiku, ‘balitemwa indalama’ kabili balitemwa ne fintu ifyo abantu bashita ne ndalama. (2 Tim. 3:2) Yesu alishibe ukuti abasambi bakwe nabo nalimo bakatendeka ukutemwisha indalama. E ico atile: “Takuli uwingabombela bashikulu babili; pantu kuti apatapo umo no kutemwa umbi, nalimo kuti aba uwa cishinka kuli umo no kusuula umbi. Te kuti mubombele Lesa ne Fyuma.” (Mat. 6:24) Umuntu uubombela Yehova uku ninshi alapoosa inshita iikalamba na maka pa kuti anonke ifyuma fya muli cino calo, kuti twatila abombela bashikulu babili. Umuntu wa musango uyu te kuti alepepa fye Yehova eka.

 6. Finshi twingasambilila ku fyo Yesu aebele abali mu cilonganino icali mu musumba wa Laodikea?

⁶ Ilyo umwaka wa 100 ninshi Yesu alibwelelamo ku muulu ushilafika, abali mu cilonganino icali mu musumba wa Laodikea baleyumfwa abati: “Ndi mukankaala kabili nalinonka ifyuma kabili nshikabila akantu nangu kamo.” Lelo Yehova na Yesu bena balebamona ukuti bali aba ‘nkumbabulili kabili abalanda kabili abapiina kabili impofu kabili abenda fye ubwamba.’ Icalengele Yesu abafunde te pa mulandu wa kuti bali bakankaala, lelo ni co balitemwishishe icuma ica kuti bucibusa bwabo na Yehova bwali mu kupwa. (Ukus. 3:14-17) Nga ca kuti twailuka ukuti natutendeka ukutemwisha ifyuma, tufwile ukuleka ukufitemwisha ilyo line. (1 Tim. 6:7, 8) Nga tatulekele, te kuti tulepepa fye Yehova eka kabili Yehova na o te kuti atemwe ifyo tumubombela. Yehova ‘afwaya ukupepwa fye eka.’ (Amala. 4:24) Nomba kuti twatendeka shani ukutemwisha indalama?

7-9. Finshi mwasambilila ku lyashi lya ba David?

⁷ Natulande pali ba David baeluda ababombesha abekala ku United States. Ba David bailandiile ukuti balebombesha pa ncito. Pa kampani apo balebomba balibapeele icifulo icikalamba kabili balebamona ukuti mu calo ca United States bali pa baishibishe imilimo iyo balebomba. Ba David batile, “Pali iyi nshita nalemona kwati icalengele ukuti bampeele icifulo icikalamba pa ncito kabili balemona ukuti nali pa bantu abaishibishe imilimo nalebomba, ni co Yehova alempaala.” Lelo bushe ni Yehova alebapaala?

⁸ Mu kupita kwa nshita ba David bailwike ukuti incito yalengele bucibusa bwabo na Yehova bubwelele pa nshi. Ba David batile: “Nga tulelongana nangu nga ndebila imbila nsuma, naletontonkanya fye pa mafya ya pa ncito. Nalefola indalama ishingi, lelo nalesakamikwa sana, kabili ine no mwina mwandi twatendeke ukukwata amafya.”

⁹ Ba David bailwike ukuti balingile ukusalapo ifyo balingile ukubikako sana amano. Batile: “Nalisalilepo ifyo nalingile ukucita pa kuti ntwalilile ukuba cibusa wa kwa Yehova.” Balefwaya ukwalula ifyo balebomba incito, kabili balyebele na babengishe incito ifyo balefwaya. Finshi ababengishe incito bacitile? Balitamfishe ba David incito! Finshi ba David bacitile? Balandile abati: “Ubushiku bwakonkelepo nalipeele baeluda formu ya kwipushishapo ukubomba bupainiya bwa kwafwilisha, ubo nali no kutwalilila fye ukubomba.” Ba David na bena mwabo batendeke ukubomba incito ya kuwamya mu fikuulwa pa kuti balekwata umwakuliila. Pa numa balitampile bupainiya bwa nshita yonse kabili mu kupita kwa nshita abena mwabo nabo balitendeke bupainiya. Ba David na bena mwabo basalilepo ukulabomba incito iyo abantu abengi basuula, lelo ico bacindamika sana kubombela Yehova, te ncito iyo. Nangu ca kuti indalama bakwata shinono sana nga kushilinganya ku sho balefola kale, cila mweshi balakwata isha kushitamo ifyo bakabila. Bafwaya ukubika sana amano ku kubombela Yehova kabili baliimwena ukuti Yehova alasakamana ababika Ubufumu bwakwe intanshi.—Mat. 6:31-33.

10. Kuti twacingilila shani imitima yesu?

¹⁰ Nampo nga twakwata indalama ishinono nelyo nga twakwata ishingi, tufwile ukucingilila imitima yesu. Kuti twaicingilila shani? Te kwesha ukutendeka ukutemwisha indalama. Kabili te kwesha ukulabika sana amano ku ncito tubomba ukucila ukubika amano ku kubombela Yehova. Kuti mwaishiba shani nga ca kuti namutendeka ukubika sana amano ku ncito mubomba? Amepusho yamo ayo mwingayipusha ni aya: ‘Bushe ilingi line ndatontonkanya pa ncito lintu ndelongana na lintu ndebila imbila nsuma? Bushe ndasakamana nampo nga nkakwata indalama ishalinga ku ntanshi nelyo iyo? Bushe indalama ne fyo nakwata filelenga ine no mwina mwandi tulekwata amafya? Bushe kuti naitemenwa ukubomba incito iyo abantu bambi basuula nga ca kuti e ingalenga nalakwata inshita iikalamba iya kubombela Yehova?’ (1 Tim. 6:9-12) Ilyo tuletontonkanya pali aya amepusho, tuleibukisha ukuti Yehova alitutemwa kabili alilaya abamutemwa ukuti: “Nshakakushe nakalya nangu ukukulekelesha nakalya.” E co umutumwa Paulo alembeele ati: “Mu mikalile yenu mwilatemwa indalama.”—Heb. 13:5, 6.

11. Finshi fingacitika nga ca kuti umuntu tasalile ifya kuleseshamo icitendwe ifisuma?

¹¹ Yehova afwaya tulesekelela, kabili ifya kuleseshamo icitendwe kuti fyalenga twalasekelela. Na kuba, Icebo ca kwa Lesa citila “ku muntu takwaba icisuma icacila pa kulya no kunwa no kusekelamo mu kubombesha kwakwe.” (Luk. Mil. 2:24) Nomba ifya kuleseshamo icitendwe ifingi ifyaba muli cino calo kuti fyalenga twaba ne mibele iyabipa. Filalenga abantu abengi batemwa imibele iyo Icebo ca kwa Lesa cakaanya.

12. Ukulingana na 1 Abena Korinti 10:21, 22, mulandu nshi tulingile ukusalila ifya kuleseshamo icitendwe ifisuma?

¹² Tufwaya ukulapepa fye Yehova eka, kanshi te kuti tulelya “ifya kulya fya kwa Yehova e lyo ne fya kulya fya fibanda.” (Belengeni 1 Abena Korinti 10:21, 22.) Ilingi line ifibusa e fyo tuliila pamo nafyo ifya kulya. Kanshi nga twasala ifya kuleseshamo icitendwe umwaba ulukakaala, ukupupa imipashi, ubulalelale, nelyo ulunkumbwa lwa mubili ne mibele imbi iyabipa, ninshi tulelya ifya kulya ifyo abalwani ba kwa Lesa bapekanya. Ne cikafumamo ca kuti tukaba ne mibele yabipa kabili bucibusa bwesu na Yehova bukapwa.

13-14. Nga fintu ilembo lya kwa Yakobo 1:14, 15 lilanda, mulandu nshi tufwile ukupooselako amano ilyo tulesala ifya kuleseshamo icitendwe? Langilileni.

¹³ Ifya kuleseshamo icitendwe kuti twafipashanya ku fya kulya. Ilyo tulelya ifya kulya, kuti twasala ifyo twalabika mu kanwa. Lelo nga twamina, te kuti tusale ifyo ifya kulya fyalabomba mu mibili yesu. Ifya kulya ifisuma kuti fyalenga twaba no bumi ubusuma; lelo ifya kulya ifishili bwino kuti fyatulwalika. Nalimo ifyo ifya kulya ficita mu mubili te kuti fimoneke ilyo line twalya, kuti papita inshita.

¹⁴ Ifi fine e fyo caba na ku fya kuleseshamo icitendwe. Kuti twasala ifyo tulefwaya ukuleseshamo icitendwe. Lelo ifya kuleseshamo icitendwe ifyo twasala filakuma ifyo tutontonkanya ne fyo tumfwa. Ifya kuleseshamo icitendwe ifisuma kuti fyatusansamusha, nomba ifyabipa fyena kuti fyatonaula fye. (Belengeni Yakobo 1:14, 15.) Nalimo te kuti tumone ilyo line ififuma mu kulesesha icitendwe mu fintu ifyabipa, lelo icishinka ca kuti mu kupita kwa nshita fikamoneka. E mulandu wine Baibolo itusokela ukuti: “Mwilufiwa: Lesa tatumpikwa. Pantu ico umuntu alebyala, e co akalobolola; pantu uulebyala ku buntunse akalobololako imfwa.” (Gal. 6:7, 8) Kanshi tatufwile ukulalesesha icitendwe mu fintu umwaba ifyo Yehova apata!—Amalu. 97:10.

15. Bupe nshi ubo Yehova atupeela ubo tuipakisha?

¹⁵ Ababomfi ba kwa Yehova abengi balomfwa bwino ukutamba umulabasa wesu uusuma nga nshi uwa pa Intaneti uwa JW Broadcasting^®. Nkanshi uwe shina lya kuti Marilyn atile: “Umulabasa wa JW Broadcasting walilenga naba ne nsansa, kabili kuti natamba fyonse ifyabapo pantu fisuma. Nga natalalilwa nelyo nga nafuupulwa, ndasansamuka nga nakutika ilyashi nelyo nga natamba programu ya Mapepo ya Lucelo. Ifi filenga ndepalama sana kuli Yehova na ku cilonganino cakwe. Umulabasa wa JW Broadcasting walyalula ubumi bwandi.” Bushe na imwe mulanonkelamo muli ubu ubupe ubo Yehova atupeela? Ukulunda pa maprogramu ya cila mweshi, pali uyu mulabasa palaba ne fya kukutikako, amavidio ayo mwingatamba, ne nyimbo ishisuma nga nshi isho mwingakutika ilyo mulefwaya.

16-17. Mulandu nshi tulingile ukubela abacenjela pa nshita tupoosa ku kulesha icitendwe, kabili finshi twingacita pa kuti tatulepoosa inshita iikalamba ku kulesha icitendwe?

¹⁶ Tufwile ukuba abacenjela ne fya kuleseshamo icitendwe ifyo tusala kabili tufwile no kuba abacenjela ne nshita iyo tupoosa pa kulesha icitendwe. Pantu nga tatucenjele kuti twalapoosa inshita iikalamba ku kulesha icitendwe ukucila iyo twingalapoosa ku kubombela Yehova. Abantu abengi cilabakosela ukwishiba inshita iyo balingile ukupoosa ku kulesha icitendwe. Nkashi uwe shina lya kuti Abigail uuli ne myaka 18 atile: “Nga nabwela pa ng’anda ninaka, ndomfwako bwino nga natamba TV. Lelo nga nshicenjele, ndapoosa inshita iikalamba ndetamba fye TV.” Munyinefwe wacaice uwe shina lya kuti Samuel alandile ati: “Inshita shimo ndatamba amavidio ayepi pa nshita iikalamba sana pa Intaneti. Ntendekela fye pali imo, lelo ndaluba ne fyo amaawala yatatu nelyo yane yapwile.”

¹⁷ Kuti mwacita shani pa kuti mwilapoosa inshita iikalamba ku kulesha icitendwe? Ica kubalilapo, mufwile ukwishiba inshita mupoosa ku kulesha icitendwe. Kuti cawama mwalalemba inshita mupoosa ku kulesha icitendwe mu mulungu umo. Mulelemba inshita mupoosa mu kutamba TV, pa Intaneti, ne yo mupoosa mu kuteya ifyangalo pa foni nelyo pa tabuleti. Nga mwasanga ukuti mulapoosa inshita iikalamba ku kulesha icitendwe, kuti mwaesha ukutantika bwino ifya kucita. Kuti cawama mwatantika ukulapoosa inshita iikalamba ku fyacilapo ukucindama, e lyo ku kulesha icitendwe mulepoosa fye inshita iinono. Lyena mulelomba Yehova pa kuti engamwafwa ukulakonka ifyo mwatantika. Nga mulecita ifi, mukalakwata inshita na maka ica kuti mukalaisambilisha Baibolo, mukalakwata amapepo ya lupwa, mukalalongana, kabili mukalabila ne mbila nsuma. Na kabili tamwakaleumfwa ububi pa nshita mupoosa ku kulesha icitendwe pantu ninshi mupoosa inshita iikalamba ku kubombela Yehova.

18-19. Kuti twalanga shani ukuti tupepa fye Yehova eka?

¹⁸ Pa numa ya kulanda pa kupwa kwa calo ca kwa Satana e lyo na pa calo cipya icili no kwisa, umutumwa Petro alembele ati: “Mwe batemwikwa, apo mulelolela ifi fintu, ibikilisheniko ukuti akamusange ababula akabi, ababula akalema, kabili mu mutende.” (2 Pet. 3:14) Nga tulekonka ifyaba pali ili ilembo, tuleikala kabili tulepepa Yehova ukulingana ne fyo afwaya, ninshi tulelanga ukuti tupepa fye ena eka.

¹⁹ Satana na bantu ba muli cino calo bakatwalilila ukututunka pa kuti tulebika sana amano ku fintu fimbi ukucila ukulabika amano kuli Yehova. (Luka 4:13) Lelo tatwakaleke umuntu nangu umo akalenge tukaleke ukubombela sana Yehova, kabili tatwakaleke icintu nangu cimo cikalenge tukaleke ukulabombela sana Yehova. Tatwakaleke ukulapepa fye Yehova eka pantu e walinga ukulapepwa!