“Mukaba Fye Abasamwa”

“Mukacite umutebeto we lambo kuli Yehova . . . , na imwe mukaba fye abasamwa.”—AMALANGO 16:15.

 1. (a) Fikansa nshi Satana acitile? (b) Cinshi Yehova asobele ilyo Adamu na Efa bapondweke?

ILYO Satana alengele Adamu na Efa ukupondokela Kabumba wabo, acitile ifikansa pa milandu ibili iyacindama nga nshi. Umulandu wa kubalilapo, Satana acitile ifikansa fya kuti Yehova alibepele Adamu na Efa ubufi, e lyo imitekele ya kwa Lesa na yo tayaweme. Umulandu wa bubili, Satana mu bucenjeshi atile icilenga abantu ukubombela Lesa mulandu fye wa kuti alabacitila ifisuma. Uyu mulandu wa bubili waishibikwe bwino mu nshiku sha kwa Yobo. (Ukutendeka 3:1-6; Yobo 1:9, 10; 2:4, 5) Nangu cali ifyo, bwangu bwangu Yehova alicitilepo fimo pali ubu bwafya. Ninshi Adamu na Efa bacili na mwi bala lya Edene mwine, Yehova asobele ifyo akacita pa kuti ifikansa fya kwa Satana fikapwe. Asobele ukuti kukesa umuntu umo uo aitile ukuti ulubuto nelyo “ubufyashi,” kabili pa numa ya kumulasa ku citende, ena akalasa Satana ku mutwe no kumwipaya.—Ukutendeka 3:15.

 2. Finshi na fimbi Yehova alandile ifyalengele abantu ukwishiba ifyo akacita pa kufikilisha ubusesemo bwalembwa pa Ukutendeka 3:15?

² Mu kuya kwa nshita, Yehova alilandile na fimbi pali bulya busesemo, ukulanga ukuti ifyo asobele fikacitika. Cimo ico Lesa acitile, aebele Abrahamu ukuti uwaleitwa ulubuto nelyo “ubufyashi,” akafuma mu lupwa lwakwe. (Ukutendeka 22:15-18) Yakobo umwishikulu wa kwa Abrahamu akwete abana 12 abapangile imikowa 12 iya bena Israele. Mu 1513 B.C.E., ilyo ilya mikowa yaishileba abantu baipeela kuli Lesa, Yehova alibapeele amafunde, kabili pa mafunde abapeele pali na ya kuti bafwile ukulasefya imitebeto yalekanalekana cila mwaka. Umutumwa Paulo atile ilya mitebeto yali nge “cinshingwa ca fikesa.” (Abena Kolose 2:16, 17; AbaHebere 10:1) Yalelanga abantu ifyo Yehova akafikilisha ubufwayo bwakwe ukupitila mu Lubuto ulwali no kwisa. Abena Israele balesekelela nga nshi pa kusefya ilya mitebeto cila mwaka. Ukusambilila pali fimo fimo ifyalecitika ilyo balesefya ilya mitebeto kwalatwafwa ukucetekela sana ukuti Yehova alafikilisha amalayo yakwe.

Uo Baibolo Itila E Lubuto Aisa

 3. Nani aali Ulubuto lwali no kwisa, kabili bamulashile shani ku citende?

³ Ilyo imyaka 4,000 no kucilapo yakumene ukufuma apo Yehova alandiile bulya busesemo, alishile uo Baibolo yatile e Lubuto. Lulya Lubuto aali ni Yesu. (Abena Galatia 3:16) Yesu aali uwapwililika kabili aali ne cishinka kuli Lesa mpaka ne mfwa. Ifyacitile Yesu e fyalengele ifikansa fya kwa Satana ukwishibikwa ukuti fyali fya bufi. Na kabili, apo Yesu tabalile acita ulubembu, imfwa yakwe yali lilambo lya kulubula abantu ilyacindama nga nshi. Imfwa ya kwa Yesu yalengele abana ba kwa Adamu na Efa aba cishinka ukupokololwa ku lubembu na ku mfwa. Imfwa ya kwa Yesu pa cimuti ca kucushiwilwapo, e filya Baibolo yatile Satana ‘akalasa Ulubuto ku citende.’—AbaHebere 9:11-14.

 4. Cinshi calecitika mu Israele icali e cilangililo ca fyo Yesu aipeele nge lambo?

⁴ Yesu afwile pa Nisani 14, mu 33 C.E.a Mu Israele, pa Nisani 14 bwali bushiku bwa kusansamuka ubo balesefya Ica kucilila. Cila mwaka pa Nisani 14, ulupwa lumo lumo lwaleliila pamo ica kulya, kabili pa fyo balelya paleba na kana ka mpaanga akasuma. Ukucite fyo kwaleafwa abena Israele ukwibukisha ifyo babomfeshe umulopa wa kana ka mpaanga ukupususha amabeli yabo ilyo malaika aipeye amabeli ya bena Egupti pa Nisani 14, mu 1513 B.C.E. (Ukufuma 12:1-14) Yesu e waishileba nga kalya kana ka mpaanga ako balelya pa Ca kucilila, nge fyo umutumwa Paulo alandile pali Yesu ukuti: “Kristu ica kucilila cesu alipeelwa ilambo.” (1 Abena Korinti 5:7) Nga filya fine umulopa wa kana ka mpaanga uwa pa Ca kucilila wapuswishe amabeli, umulopa wa kwa Yesu uwasuumine na o wine ulapususha abantu abengi.—Yohane 3:16, 36.

‘Icisabo ca Ntanshi Ukufuma ku Bafwa’

5, 6. (a) Ni lilali Yesu abuushiwe, kabili mutebeto nshi uwa mu Mafunde uwali icilangililo ca fyo ukubuuka kwakwe kwali no kwisaba? (b) Bushe ukubuuka kwa kwa Yesu kwalengele shani ukuti ifyalembwa pa Ukutendeka 3:15 fikacitike?

⁵ Ilyo papitile inshiku shitatu, Yesu alibuushiwe pa kuti engaya ku muulu no kutwala kuli Wishi icilubula cakwe icacindama. (AbaHebere 9:24) Kwali umutebeto na umbi uo balesefya uwali e cilangililo ca fyo ukubuuka kwa kwa Yesu kwali no kwisaba. Ubushiku bwa Nisani 14 nga bwapita fye, ubwakonkapo bwali bwa kutendeka Umutebeto wa Fishatutumuka. Ubwakonkapo na bo, pa Nisani 16, abena Israele baletwala umwanshi wa barle pantu e yalebalilapo ukupya pa filimwa fyonse mu Israele. Nga batwala umwanshi kuli shimapepo, aleushinshika kuli Yehova. (Ubwina Lebi 23:6-14) Ico calingene bwino bwino ne fyacitike pa Nisani 16, mu 33 C.E., pantu pali bulya bwine bushiku e po Yehova aonawile amapange yashaibipila aya kwa Satana aya kufwaya ukwipaya ‘inte yakwe iya cishinka kabili iya cine’! Pa Nisani 16, mu 33 C.E., Yehova alibuushishe Yesu ku bafwa no kumupeela umweo uushingafwa uwa mupashi.—Ukusokolola 3:14; 1 Petro 3:18.

⁶ Yesu aishileba “icisabo ca ntanshi ku balaala utwa mfwa.” (1 Abena Korinti 15:20) Ena taali nga bambi ababuukile kale, pantu ilyo abuukile, taafwile na kabili iyo. Aninine ku muulu no kuyaikala ku kulyo kwa kwa Yehova, kabili atampile ukulolela ukumubika pa cipuna ca Bufumu no kuba Imfumu ya Bufumu bwa kwa Yehova. (Amalumbo 110:1; Imilimo 2:32, 33; AbaHebere 10:12, 13) Ukufuma fye ilyo bamubikile pa Bufumu, Yesu alikwata amaka ya kulasa umulwani wabipa Satana ku mutwe no kumwipaya e lyo no kulofya ubufyashi bwakwe.—Ukusokolola 11:15, 18; 20:1-3, 10.

Kwali na Bambi Abaali no Kufuma mu Bufyashi bwa kwa Abrahamu

 7. Bushe balesefya shani Umutebeto wa Milungu?

⁷ Yesu aali e Bufyashi nelyo Ulubuto uo Lesa alandilepo mu Edene ukuti akesa kabili e o Yehova akabomfya ‘ukubongolola imilimo ya kwa Kaseebanya.’ (1 Yohane 3:8) Na lyo line, ilyo Yehova alandile kuli Abrahamu, amashiwi alandile yalanga ukuti “ubufyashi” bwa kwa Abrahamu tabwali no kuba muntu fye umo. Bwali no kuba “nge ntanda sha mu muulu kabili ngo musensenga uuli pa nembenembe ya bemba.” (Ukutendeka 22:17) Abena Israele balesefya umutebeto na umbi uwa nsansa uwali e cilangililo ca kuti ku ntanshi kwali no kuba na bambi abakafuma mu “bufyashi” bwa kwa Abrahamu. Nga papita inshiku 50 ukufuma pa Nisani 16, abena Israele balesefya Umutebeto wa Milungu. Amafunde yalandile pali uyu mutebeto ukuti: “Mukapende inshiku amakumi yasano ukufika pa bushiku ubwakonkapo kwi sabata ilyalenga cinelubali; e lyo mukapalamike ica buunga ca bulimi bupya kuli Yehova. Mukafumye mu mekalo yenu imikate ya kushinshika, imipusa ibili iya twa pe kumi tubili kuli efa; ikabe iya buunga ubwapeleka, iya citutumushi, iyafumbikwa, ku kube ca fya kubalilapo ukupya kuli Yehova.”b—Ubwina Lebi 23:16, 17, 20.

 8. Cinshi icacindama sana icacitike pa Pentekoste mu 33 C.E.?

⁸ Ilyo Yesu aali pano calo, Umutebeto wa Milungu waleitwa ati Pentekoste (mu ciGriki e kutila “ubushiku bwalenga 50”). Pa Pentekoste mu 33 C.E., Yesu Kristu uwabuushiwe kabili Shimapepo Mukalamba uwacila bashimapepo bonse aba mu Israele, atumine umupashi wa mushilo pe bumba linono ilya basambi 120 abalongene mu Yerusalemu. Balya basambi baishileba abana ba kwa Lesa abasubwa no mupashi kabili bamunyina kwa Yesu Kristu. (Abena Roma 8:15-17) Baishileba uluko lupya, nelyo “Israele wa kwa Lesa.” (Abena Galatia 6:16) Pa kutampa bali fye abanono, nomba mu kuya kwa nshita, baali no kwisaba 144,000.—Ukusokolola 7:1-4.

9, 10. Bushe ifyalecitika pa Pentekoste fyali shani e cilangililo ca fyo icilonganino ca Bena Kristu basubwa cali no kwisaba?

⁹ Imikate ibili iyalebamo icitutumushi iyo baletambika Yehova pa mutebeto wa Pentekoste cila mwaka yali e cilangililo ca kuti ku ntanshi kukaba icilonganino ca Bena Kristu basubwa no mupashi. Filya imikate yalebamo icitutumushi cali cilangililo ca kuti Abena Kristu basubwa ilyo bali pano calo, bakakwata ulubembu lwa cifyalilwa ulwaba nge citutumushi. Na lyo line, kuti balanda na Yehova pa mulandu wa kucetekela mwi lambo lya cilubula ilya kwa Yesu. (Abena Roma 5:1, 2) Bushe filya imikate yaleba ibili calolele mwi? Nakalimo cali cilangililo ca kuti abana ba kwa Lesa abasubwa no mupashi wa mushilo mu kuya kwa nshita bali no kwisafuma ku mabumba ya bantu yabili, pa kubala bakafuma mu baYuda e lyo inshita imbi, kukaba na bambi abakafuma mu bena Fyalo.—Abena Galatia 3:26-29; Abena Efese 2:13-18.

¹⁰ Pa kufumbika imikate ibili iyo baletambika Yehova pa Pentekoste, balebomfya ubuunga bwa ng’anu balebalilapo ukuseepa uyo mwaka. E fyo caba na ku Bena Kristu basubwa, na bo bene betwa ukuti “umusango wa fisabo fya ntanshi ifya mu fibumbwa fyakwe.” (Yakobo 1:18) E babalilapo ukubelelwa uluse pa membu shabo pa mulandu wa kuti balacetekela umulopa wasuumine uwa kwa Yesu. Ne co cilalenga bena ukupeelwa umweo uushingafwa no kuya ku muulu mu kuteeka na Yesu mu Bufumu bwakwe. (1 Abena Korinti 15:53; Abena Filipi 3:20, 21; Ukusokolola 20:6) Ilyo bakaba ku muulu kwine, nomba line, bali no “kucema [inko] ku nkonto ya cela” no kumonako uko ‘Satana akashonaulwa mwi samba lya makasa yabo.’ (Ukusokolola 2:26, 27; Abena Roma 16:20) Umutumwa Yohane atile: “Aba e batwalilila ukukonka Umwana wa mpaanga konse uko aya. Aba bashitilwe mu bantunse ukuti babe ifisabo fya ntanshi kuli Lesa na ku Mwana wa mpaanga.”—Ukusokolola 14:4.

Ubushiku Baletontonkanya Sana pa Kulekelelwa Imembu

11, 12. (a) Finshi fyalecitika pa Bushiku bwa Kukonsolwela? (b) Busuma nshi abena Israele balemwenamo mu kupeela Lesa amalambo ya kwa cilume wa ng’ombe ne mbushi shibili?

¹¹ Pa bushiku bwalenga 10 mu mweshi wa Etanimu (uo inshita imbi batampile ukwita ati Tishri),c abena Israele balesefya umutebeto uwali e cilangililo ca fyo abantu bakamwenamo mwi lambo lya cilubula ilya kwa Yesu ilyali no kwisa ku ntanshi. Pali bulya bushiku, abena Israele bonse balelongana ku Bushiku bwa Kukonsolwela, e kutila ubushiku ubo bashimapepo baletuula amalambo kuli Lesa ayo abantu baletele pa kuti Yehova ababelele uluse pa membu.—Ubwina Lebi 16:29, 30.

¹² Pa Bushiku bwa Kukonsolwela, shimapepo mukalamba aleipaya cilume wa ng’ombe umuteku, kabili aleingila Umwa Mushilo, no kukana umulopa imiku cinelubali ku ntanshi ya nkupiko ya Cipao, e kutila mu mampalanya alepeela umulopa kuli Yehova. Ulya mulopa wali e lambo lyalefuuta pa membu sha kwa shimapepo mukalamba umwine na ‘ba mu ng’anda yakwe,’ e lyo na bashimapepo bambi na bena Lebi. E lyo shimapepo mukalamba alebuula imbushi shibili. Aleipaya imbushi imo ukuba ilambo lya kufuuta pa membu sha “bantu.” Alebuula no mulopa wa iko no kukana ku ntanshi ya nkupiko ya Cipao icali Umwa Mushilo. Shimapepo mukalamba alebika iminwe pa mutwe wa mbushi yalenga bubili no kusokolola imembu sha bena Israele. Lyena aleleka umuntu uwasontelwe ukusenda imbushi ukuitwala mu matololo, kabili cali kwati imbushi yasenda imembu sha bena Israele.—Ubwina Lebi 16:3-16, 21, 22.

13. Bushe ifyalecitika pa Bushiku bwa Kukonsolwela fyali shani e cilangililo ca fyo icilubula ca kwa Yesu cali no kwisabomba?

¹³ Ukutuula cilume wa ng’ombe ne mbushi shibili kwali cilangililo ca kuti Yesu, Shimapepo Mukalamba uwacila bashimapepo bonse mu Israele, akalenga abantu ukubelelwo luse pa membu shabo pa mulandu wa cilubula ca mulopa wakwe uwacindama uwasuumine. Ica kubalilapo, icilubula ca mulopa wakwe uwacindama, cifimba pa membu sha ba 144,000 Abena Kristu basubwa aba mu ng’anda yakwe iya ku mupashi.’ Icilubula e cilenga Lesa ukubamona abalungama kabili abasanguluka nga balemupepa. (1 Petro 2:5; 1 Abena Korinti 6:11) Ilambo lya kwa cilume wa ng’ombe e lyali e cilangililo ca fyo icilubula ca kwa Yesu cali no kwisabomba kuli ba 144,000. Bena balakwata ishuko lya kuya ku muulu pa mulandu wa kuti balacetekela icilubula ca kwa Yesu. Ica bubili, filya abena Israele baletuula imbushi shibili, cali cilangililo ca fyo icilubula ca mulopa wa kwa Yesu uwasuumine cali no kufimba pa membu sha bantu na bambi abengi abakasumina muli Kristu. Na bo bene bakakwata ubumi bwa muyayaya pano pene pa calo ubukaba nge cikwatwa ico Adamu na Efa bayonawilile pa kubala. (Amalumbo 37:10, 11) Pa mulandu wa mulopa wakwe uwasuumine, Yesu alasenda imembu sha ba pano calo bonse, filya fine imbushi iituntulu mu mampalanya yalesenda imembu sha bena Israele ukushitwala mu matololo.—Esaya 53:4, 5.

Balesamwa pa Cinso ca kwa Yehova

14, 15. Finshi fyalecitika pa kusefya Umutebeto wa Nsakwe, kabili finshi uyu mutebeto waleibukisha abena Israele?

¹⁴ Ubushiku bwa Kukonsolwela nga bwapita, abena Israele balesefya Umutebeto wa Nsakwe, kabili uku kwali e kusefya kwa nsansa sana pa kusefya konse uko abaYuda balekwata mu mwaka. (Ubwina Lebi 23:34-43) Kwaleba mu mweshi wa Etanimu ukutampa pa 15 ukushinta pa 21, kabili pa kulekelesha kwaleba ukulongana kwa mushilo pa bwalenga 22 ulya wine mweshi. Uku kusefya kwali cishibilo ca kuti nomba nabapwa ukulobolola ifilimwa fyonse kabili yali ni nshita ya kutootela Lesa pa fisuma ifingi ifyo abacitile. E mulandu wine Yehova aebele abena Israele ukuti: “Yehova Lesa wenu akamupaalila mu cibwesha cenu conse, na mu mulimo onse wa minwe yenu, na imwe mukaba fye abasamwa.” (Amalango 16:15) Kanshi abena Israele balesekelela icine cine pali uku kusefya!

¹⁵ Pa kusefya uyu mutebeto, abena Israele baleikala mu nsakwe inshiku 7. Ukucite fyo kwalebebukisha ukuti inshita imo baikele mu nsakwe mu matololo. Pa kusefya umutebeto wa nsakwe baletontonkanya sana pa fyo Yehova alebasakamana ngo mufyashi wabo. (Amalango 8:15, 16) Na kabili, apo bonse fye, abakankaala na bapiina kumo, baleikala mu nsakwe ishalemoneka cimo cine, abena Israele bonse baleishiba ukuti ilyo balesefya uyu mutebeto, Lesa alebamona ukuti bonse balilingana.—Nehemia 8:14-16.

16. Bushe Umutebeto wa Nsakwe wali cilangililo ca cinshi?

¹⁶ Umutebeto wa Nsakwe wali wa kusefya ukulobolola kwa filimwa, kabili balesekelela pa fyo basombwele. Ulya mutebeto wali e cilangililo ca kuti ku ntanshi kukaba ukusekelela pa kulonganika abantu abakasumina muli Yesu Kristu. Ukulonganika abo bantu kwatampile pa Pentekoste mu 33 C.E., ilyo abasambi 120 aba kwa Yesu basubilwe no mupashi no kuba mwi bumba lya ‘bashimapepo ba mushilo.’ Filya fine abena Israele baleikala mu nsakwe inshiku shinono, abasubwa na bo balishiba ukuti “balebeshi” muli cino calo ca bashipepa. Bena basuubila ukuyaikala ku muulu. (1 Petro 2:5, 11) Umulimo wa kulonganika Abena Kristu basubwa upwa muli shino “nshiku sha kulekelesha,” ilyo kuba ukulonganika aba kulekelesha abakaba mwi bumba lya ba 144,000.—2 Timote 3:1.

17, 18. (a) Cinshi cilanga ukuti te Bena Kristu basubwa beka fye abamwenamo mu cilubula ca mfwa ya kwa Yesu? (b) Ni bani muno nshiku abamwenamo mu kusefya Umutebeto wa Nsakwe ukwa mampalanya, kabili ni lilali umutebeto wabo uwa nsansa ukafika pa kashongotwelo?

¹⁷ Kuti cawama sana ukwishiba ukuti pa Mutebeto wa Nsakwe pene baletuula na bacilume ba ng’ombe 70. (Impendwa 29:12-34) Impendwa 7 nga yaisa imiku 10 itupeela 70. Nomba impendwa 7 mu Baibolo yalola mu kuti ninshi ifintu nafikumanina ukulingana no kumona kwa kwa Lesa, e lyo impendwa 10 na yo mu Baibolo yalola mu kuti ninshi ifintu nafikumanina ukulingana no kumona kwa bantunse. Kanshi, icilubula ca kwa Yesu cali no kuleta ifisuma ku bantu bonse pano calo aba cishinka ukufuma mu ndupwa 70 ishafumine muli bamwana Noa. (Ukutendeka 10:1-29) Ifi fine e fyo caba na muno nshiku, umulimo wa kulonganika Abena Kristu walifika na ku bantu ba mu fyalo fyonse abasumina muli Yesu kabili abasuubila ukwikala mu paradaise pano pene pa calo.

¹⁸ Umutumwa Yohane amwene fimo mu cimonwa ifyakumine ukulonganika abantu ukulecitika ino ine nshita. Pa kubala, aumfwile amashiwi ayatile kukaba ukukakatika aba kulekelesha mwi bumba lya ba 144,000. Lyena amwene “ibumba likalamba, ilishingapendwa ku muntu nangu umo,” naliminina pa ntanshi ya cipuna ca kwa Yehova na Yesu, bali ne “misambo ya tuncindu mu minwe yabo.” Ibumba likalamba ‘lyafumine mu bucushi bukalamba’ no kwingila mu calo cipya. Na bo bene, caba kwati bekala mu nsakwe mu bwikashi bwa nomba ubuli no kupita kabili balafwaya sana buno bwikashi ukupwa. Balicetekela ukuti nga bwapwa, “Umwana wa mpaanga, . . . akabacema, kabili akabatungulula ku tumfukumfuku twa menshi ya bumi.” Na kabili, “Lesa akafuuta ifilamba fyonse ku menso yabo.” (Ukusokolola 7:1-10, 14-17) Ukusefya Umutebeto wa Nsakwe ukwa mampalanya kukafika pa kashongotwelo ku kupwa kwa Kuteka kwa Myaka Ikana Limo ukwa kwa Kristu ilyo aba mwi bumba likalamba na bakaba aba cishinka pali balya abakabuuka, bonse nomba bakakwata ubumi bwa muyayaya.—Ukusokolola 20:5.

19. Tumwenamo shani mu kwishiba umwalola imitebeto iyo abena Israele balesefya?

¹⁹ Na ifwe kuti ‘twaba fye abasamwa’ ilyo tule-etetula pa fyo imitebeto ya kale iya baYuda ipilibula kuli ifwe. Ala cilomfwika bwino ukwishiba ifyo Yehova ateyenye ifintu mu Israele ifyalengele abantu ukutampila kabela ukwishiba ifyo cikaba ilyo ubusesemo alandile kale mu Edene bukafikilishiwa. Na kabili, tulatemwa ukumona ifyo bulya busesemo buya bulefikilishiwa panono panono ilyo inshita ileya ilepita. Muno nshiku, twalishiba ukuti uo Baibolo itila Ulubuto alishile pano calo kabili balimulashile na ku citende. Nomba ni Mfumu ku muulu. Na kabili, abengi pali ba 144,000 baliba ne cishinka ukufika na ku mfwa. Nomba cinshi cisheleko ukucitika? Bushe ni lilali ubusesemo bwa Lesa ubwa mu Edene bukafikilishiwa bonse fye? Ifi fine, e fyo tukalandapo mu cipande cikonkelepo.

[Amafutunoti]

Kuti Mwalondolola Shani?

• Bushe akana ka mpaanga ako baleipaya pa Ca kucilila kali cilangililo ca cinshi?

• Kulonganika nshi ukwaishileba nga filya fine abena Israele balesefya Umutebeto wa Pentekoste?

• Finshi fyalecitika pa Bushiku bwa Kukonsolwela ifyali e cilangililo ca fyo icilubula ca kwa Yesu cali no kwisabomba?

• Bushe ukulonganika Abena Kristu muno nshiku kwaba shani nga filya fine fyalecitika ilyo abena Israele balesefya Umutebeto wa Nsakwe?

[Charti pe bula 22, 23]

(Nga mulefwaya ukumona charti, moneni muli magazini)

Ica kucilila

Nisani 14

Icalecitika:

Baleipaya akana ka mpaanga aka pa Ca kucilila

Calelangilila:

Imfwa ya kwa kwa Yesu

Umutebeto wa Fishatutumuka (Nisani 15-21)

Nisani 15

Icalecitika:

Isabata

Nisani 16

Icalecitika:

Baletambika Yehova umwanshi wa barle

Calelangilila:

Ukubuuka kwa kwa Yesu

Inshiku 50

Umutebeto wa Milungu (Pentekoste)

Sibani 6

Icalecitika:

Baletambika Yehova imikate ibili basubwa kuli Yehova

Calelangilila:

Yesu apeele bamunyina basubwa kuli Yehova

Ubushiku bwa

Tishri 10

Icalecitika:

Baletuula cilume wa ng’ombe ne mbushi shibili

Calelangilila:

Umulopa wa kwa Yesu uwacindama walisuumine ku kuba icilubula ca bantu bonse

Umutebeto wa Nsakwe (Uwa Kulobolola)

Tishri 15-21

Icalecitika:

Abena Israele baleikala mu nsakwe ne nsansa kabili balesekelela pa fyo basombwele, baletuula amalambo ya bacilume ba ng’ombe 70

Calelangilila:

Ukulonganika abasubwa ne “bumba likalamba”

[Ifikope pe bula 21]

Filya fine cali ku mulopa wa kana ka mpaanga ako baleipaya pa kusefya Ica kucilila, umulopa wasuumine uwa kwa Yesu ulapususha abengi

[Ifikope pe bula 22]

Umwanshi wa barle yalebalilapo ukupya uo baletambika Yehova pa Nisani 16 wali e cilangililo ca fyo ukubuuka kwa kwa Yesu kwali no kwisaba

[Ifikope pe bula 23]

Imikate ibili iyo baletambika Yehova pa Pentekoste yali e cilangililo ca fyo icilonganino ca Bena Kristu basubwa cali no kwisaba

[Ifikope pe bula 24]

Ukusefya Umutebeto wa Nsakwe kwali e cilangililo ca kuti kukaba ukulonganika ne nsansa abasubwa na ba mwi “bumba likalamba” abakafuma mu calo conse