kubeleleka kwa ciko konse—caandatilwa no bubifi. Mu kwangufyanya cene na bonse ababa ulubali lwa ciko bakaloba. (Ilumbo 92:7) Beni abapampamina ukukanaonawilwa pamo ne bumba lya kwa Satana.

¹⁸ Pa kwishibe co, mufwile lyonse ukubebeta amabuyo yenu, ukufwaisha, ne fyo mwatemwa. Ipusheni mwe bene ukuti, ‘Bushe ndasungilila ifipimo fyasumbukisha ifya milandile ne myendele lintu abafyashi bandi ne filundwa fya cilonganino bashilemona? Musango nshi uwa fibusa nsala? Bushe abanandi ba ku calo balama imifwalile yandi ne misakwile? Mabuyo nshi naimikila ne mwine? Bushe umutima wandi waimikwa pa butumikishi bwa nshita yonse—nelyo incito mu micitile ya fintu iya kwa Satana iilefwa?’

19, 20. (a) Mulandu nshi untu umusepela ashilingile ukuyumfwila uwacimfiwa ku fifwaikwa fya kwa Yehova? (b) Ni ku kupayanya nshi imisepela balingile ukuisansalika?

¹⁹ Nakalimo mwamona ukukabila kwa kupanga ukuteuluka mu mitontonkanishishe yenu. (2 Abena Korinti 13:11) Mwiyumfwa abacimfiwa. Ibukisheni, Yehova tenekela ifyacila pa fyalinga ukufuma kuli imwe. Kasesema Mika aipwishe ukuti: “Cinshi cimbi ico Yehova alefwaya kuli iwe, kano ukucito bupingushi, no kutemwo luse, no kwenda bufuke bufuke na Lesa obe?” (Mika 6:8) Ici tacakabe icaafya nga nshi nga ca kuti mwashukila ukupayanya kwa kwa Yehova ku kumwaafwa. Ikalilileni mu kupalamisha ku bafyashi benu. Lyonse bishanyeni ne cilonganino ca Bwina Kristu. Ukucilisha, bombesheni ku kwishiba baeluda ba mu cilonganino. Baliba abayangwako pa lwa butuntulu bwenu kabili kuti baba ni ntulo ya kutungilila no kusansamusha. (Esaya 32:2) Pali fyonse, lundululeni ukwampana kwapalamisha, ukwakaba na Yehova Lesa. Akamupeela ubukose na maka ya kusupila icalungama!

²⁰ Imisepela imo, nangula ni fyo, ilashimaisha ukubombesha kwa iko ukwa kukula lwa ku mupashi pa kukutika ku nyimbo shishalinga. Icipande cikonkelepo cikapeela uyu mutwe ukusakamana kwaibela.

Ibakeni ku Nyimbo Shishalinga!

“Cenjeleni pa kwenda kwenu, te kwenda nga batumpa iyo, kano nga ba mano; mube ababomfye nshita, ico ishi nshiku sha bubifi.”—ABENA EFESE 5:15, 16.

 1. Mulandu nshi inyimbo shingetilwa “ica bupe ca bulesa”?

“INYIMBO . . . ca bupe ca bulesa.” E fyalembele Lulu Rumsey Wiley mu citabo cakwe Bible Music. Ukufuma ku nshita sha mu kubangilila nga nshi, abaume na banakashi abatiina Lesa balishiba aya mashiwi. Ukupitila mu nyimbo, umuntu alilumbulula inkuntu shakwe ishashika nga nshi—ubuseko, ubulanda, ubukali, no kutemwa. Muli ifyo inyimbo shabombele ulubali lwakatama mu nshita sha Baibolo, ukulumbulwa ukupulinkana muli ici citabo cashila.—Ukutendeka 4:21; Ukusokolola 18:22.

 2. Ni shani fintu inyimbo shabomfiwe ku kulumbanya Yehova mu nshita sha Baibolo?

² Cali ni mu kupepa kwa kwa Yehova e mo inyimbo shasangile inumbwilo sha shiko ishakulisha. Inumbwilo shimo ishasansabalisha isha malumbo ishabalilwe ashicitwa kuli Yehova Lesa mu kutendekelako shali mu musango wa nyimbo. “Nkatashishe shina lya kwa Lesa ku lwimbo,” e fyalembele kemba wa malumbo Davidi. (Ilumbo 69:30) Inyimbo shalibomfiwe lintu umo ali eka nge sha kwendela pamo no kwetetula kwabamo ipepo. “Ndeibukisho lwimbo lwandi ubushiku, ku mutima wandi e ko ndeisosha, no mweo wandi ulefwayafwaya,” e fyalembele Asafi. (Ilumbo 77:6) Mwi tempele lya kwa Yehova, inyimbo shateyanishiwe pa cipimo cakulisha. (1 Imilandu 23:1-5; 2 Imilandu 29:25, 26) Pa nshita shimo, amabumba yakalamba aya nyimbo yaleteyanishiwa, pamo nga pa kukupawila itempele, lintu bakalisha ba mapenga 120 babomfiwe. (2 Imilandu 5:12, 13) Tatwakwata icalembwa ica fintu ishi nyimbo shaleumfwika bwino, lelo icitabo The Music of the Bible cilandapo ukuti: “Te kuti cibe icaansha ku kupanga imimwene ya kusonga kwa cinkumbawile ukwa nyimbo sha pe Tempele pa tushita twakatama . . . Nga ca kuti umo uwa ifwe nomba engatwalwa pa kati na nkati ka kumoneka kwa musango yo, itontonkanyo lya maka ilya katiina kabili ilyakulisha te kuti lisengaukwe.”a

Ukubomfya Bubi Bubi Inyimbo

3, 4. Ni mu nshila nshi umo ica bupe ca nyimbo cabomfiwe bubi bubi ku bantu ba kwa Lesa na bena mupalamano babo abasenshi?

³ Te lyonse inyimbo shalebomfiwa mu kusansabala ifyo, nangu cibe fyo. Pa lupili lwa Sinai, inyimbo shalibomfiwe ku kukolomona ukupepa kwa tulubi ukwa mutepa wa ŋombe uwa golde. (Ukufuma 32:18) Inyimbo na kabili pa kashita kamo shali ishasuntinkanishiwa ne myendele ya bucakolwa kabili nelyo fye bucilende. (Ilumbo 69:12; Esaya 23:15) Abena mupalamano ba bena Israele abasenshi mu kulinganako baali aba mulandu wa kubomfya bubi bubi ici ca bupe ca bulesa. “Mu Foinike na Suria,” e fisosa The Interpreter’s Dictionary of the Bible, mupepi ne nyimbo ishalumbuka shonse shabelebeshe ukupepa kwa kwa Ishtar, lesa mwanakashi uwa kusanda. Muli ifyo, inyimbo shali ishalumbuka ilingi line shaletangilila ukusefya kwa cipalakata ukwa kwampana kwa bwamba.” AbaGreek ba pa kale mu kupalako babomfeshe inyimbo ku kwendela pamo no “kucinda kubimbula.”

⁴ Ee, inyimbo shalikwata amaka ku kukunta, ukwandatila, no kusonga. Amakumi ya myaka ayapitapo, icitabo ca kwa John Stainer The Music of the Bible cafikile fye no kwalepa ku kutungo kuti: “Takwaba ubutukushi ububelesha ukusonga kwa maka ngo ku pa mushobo wa buntunse pali ndakai nge ficita ubutukushi bwa Nyimbo.” Inyimbo shitwalilila ukubelesha ukusonga kwa maka ilelo. E co, umusango walubana uwa nyimbo kuti waletako ubusanso bwa cine cine ku misepela abatiina Lesa.

Ukukabila kwa Kuba Abacenjela

 5. (a) Lwakula shani ulubali inyimbo shibomba mu bumi bwa bapungwe abengi? (b) Mimwene nshi iya kwa Lesa iya kuipakisha kwa bacaice?

⁵ Nga ca kuti uli wacaice, lyene walishiba ifyo inyimbo—ukucilisha imisango misango ya sha congo ne sha cipalakata—shaba ishakatama ku bengi aba mushinku obe. Inyimbo kuti shaitwa fye no kuti “ulubali lwa mikulile ya bapungwe.” Calipimwa ukuti mu myaka yakwe iya kulekeleshako mutanda iye sukulu, umusepela wa cipimo ca pa kati mu United States akakutika ku maawala ukucila pali yane aya nyimbo sha cipalakata mu bushiku bumo! Ico mu kushininkisha cilangilila ukubulisha kwa kushikatala. Te mu kuti kwaliba icili conse icalubana no kuipakisha icintu cimo icikulenga ukuyumfwa bwino nelyo uwa nsansa. Mu kushininkisha Yehova, Kabumba wa nyimbo sha kulenga ubuseko, tenekela abacaice ukuba ababombomana kabili ababulwe nsansa. Na kuba, akambisha abantu bakwe ukuti: “Samweni muli Yehova, no kwanga, mwe balungama; kabili auleni, mwe batambalalo mutima bonse.” (Ilumbo 32:11) Ku bacaice Icebo cakwe cisoso kuti: “Samwa mu bulumendo bobe, we mulumendo, no mutima obe ukusekeleshe mu nshiku sha bulumendo bobe.”—Lukala Milandu 11:9.

 6. (a) Mulandu nshi imisepela bakabila ukuba abacenjela mu kusala kwabo ukwa nyimbo? (b) Mulandu nshi ubwingi bwa nyimbo ilelo shabela ishabipa ukucila inyimbo sha mu nkulo sha ku numa?

⁶ Nangu ni fyo, kwalibako umulandu usuma ku kuba uwacenjela mu kusala kobe ukwa nyimbo. Umutumwa Paulo pa Abena Efese 5:15, 16 atile: “Cenjeleni pa kwenda kwenu, te kwenda nga batumpa iyo, kano nga ba mano; mube ababomfye nshita, ico ishi nshiku sha bubifi.” Imisepela imo kuti pambi bapaasha, nge fyacitile umukashana umbi ukuti: “Abafyashi besu balekutika ku nyimbo shabo lintu baali abaice. Mulandu nshi tushingakutikila ku shesu?” Inyimbo shimo isho abafyashi bobe baipakishe pa mushinku obe na sho shine nalimo shalikwete imbali sha shiko ishabipa. Pa kubebeta kwapalamisha, ifingi ifya fipimo fyalumbuka fisangwa ukukwata amashiwi ya manshoko aya pa lwa bwamba no kuloshako kuli bucisenene ukwasokama. Lelo ico inshita imo icali fye ca kuloshako nomba cilalondololwa mu kumonekesha. Kalemba umo alandapo ukuti: “Abana nomba balasanswa no bukombe bwa kulonsha pa cipimo cikalamba ukucila icili conse ico ulutambi lwesu lwatala alumonapo.”

Inyimbo sha Kuputawisha Amashiwi—Inyimbo sha Bucipondoka

7, 8. (a) Cinshi caba inyimbo sha kuputawisha amashiwi, kabili mulandu nshi shalumbukila? (b) Cinshi cingeshibisha umuntu ngo ukakatila ku musango wa bumi uwa nyimbo sha kuputawisha amashiwi?

⁷ Languluka, ku ca kumwenako, ukwanana kwa ndakai ukwa nyimbo sha kuputawisha amashiwi. Ukulingana na magazini ya Time, inyimbo sha kuputawisha amashiwi shasanguka “bumwaluka bwa nyimbo shasuminishiwa, isha mu cibulungwa” kabili shalilumbuka apakalamba mu Brazil, Europe, Japan, Russia, na United States. Ilingi line ishishabamo ukwimba, amashiwi ya shiko yalandwa fye, te kwimbwa, ukwendela pamo no kulila kwa filimba ukwa maka. Ni uku kulila kwa filimba ukwa maka ukusesha, nangu ni fyo, e kumoneka ukuba e nkama ya kushitwa kukalamba ukwa nyimbo sha kuputawisha amashiwi. “Lintu nakutika ku nyimbo sha kuputawisha amashiwi,” e fyasosa umusepela umo umwina Japan, “ndayumfwa uwacincimuka, kabili lintu ndecinda, ndayumfwa umuntungwa.”

⁸ Amashiwi ya nyimbo sha kuputawisha amashiwi—ilingi line ukusakana kwakowela ukwa musaalula ne milandile yanyongana—kumoneka ukuba umulandu na umbi ku kulumbuka kwa nyimbo sha kuputawisha amashiwi. Ukukanapala amashiwi ya nyimbo sha cipalakata isha cishilano, ayengi aya yene ayatonta pa mutwe wa cintemwa ca bapungwe, amashiwi ya mu nyimbo sha kuputawisha amashiwi ilingi line yalikwata ubukombe bwabipisha. Inyimbo sha kuputawisha amashiwi shimo shilanda mu kushipa ukulwisha ulufyengo, akapaatulula ka mushobo, no bukatu bwa bakapokola. Limo limo, nangula ni fyo, ukwankulana kwaumfwana kulumbululwa mu lulimi lwacilapo ukukowela, ulwa kutulumusha ulwingelenganishiwa. Inyimbo sha kuputawisha amashiwi na kabili shimoneka ukwimika ukupondokela ifipimo fya mifwalile, imisakwile, na bucisenene bwa kwampana kwa bwamba. Tacili ca kusungusha, inyimbo sha kuputawisha amashiwi shalisuminishiwa nge nshila ya bumi. Abakakatila kuli shene beshibikilwa ku kulangisha kwabo ukwa mataki, imilandile yanyongana, ne mifwalile—amatoloshi ayakalamba, bakanifa bafika mu nkolokoso ababulwa ukukakwa intambo, iminyololo ya golde, utusote twa cangalo ca baseball, na maglasi ya mu menso ayafiita.

9, 10. (a) Fya kusangwilako nshi ifyo imisepela balingile ukulanguluka mu kupima nga ca kuti inyimbo sha kuputawisha amashiwi no musango wa shiko uwa bumi ‘filatemuna Shikulu’? (b) Cinshi ico imisepela ya Bwina Kristu bamoneka ukusenda mu kwanguka?

⁹ Pa Abena Efese 5:10, Abena Kristu baebwa “ukwishibe fintu ifitemuna Shikulu.” Ukulanguluka ukushimikwa inyimbo sha kuputawisha amashiwi shakwata, bushe uletontonkanya ukuti kuti ‘catemuna Shikulu’ ukuibimba muli shene? Bushe umusepela wa Bwina Kristu kuti afwaya ukwishibikwa no musango wa bumi uyo umonwa uushapokelelwa nelyo fye ku bantu abengi aba ku calo? Mona fintu uupitulukamo umo alondolwele iciila ca nyimbo sha kuputawisha mashiwi: “Bakemba ba nyimbo sha kuputawisha mashiwi balecimfyanishisha ukuba abacilapo ukuba aba kutulumusha ku musaalula na mashiwi yalondolola ukwampana kwa bwamba . . . Abalecinda abaume na banakashi balepekanya incitilo sha kwampana kwa bwamba pa cisebele.” Ukulosha ku ncitilo ikalamba, uutungilila ifiila umo asosele ukuti: “Mupepi na mashiwi ayali yonse ayafuma mu kanwa kabo yaba (lusele).”

¹⁰ Nangu ni fyo, inyimbo shalishiwe cilya cungulo bushiku tashalangulwikwe nge nyimbo sha kuputawisha amashiwi ishacisha mu cipimo. E fyasosele umukalamba wa cikuulwa ca fiila ukuti: “Cintu muleumfwa ni nyimbo sha kuputawisha amashiwi isha cipimo ca pa kati—shimo shine nga shintu baleshita mu matuuka.” Fintu cili ica bulanda ukucita lipoti ukuti pa kati ka misepela abasangilwe ku ciila 4,000 pali bamo abaitunga ukuba Inte sha kwa Yehova! Bamo mu kumonekesha balyangusha icishinka ca kuti Satana e “kateka wa bucibinda bwa mu lwelele.” Atungulula “umupashi [nelyo, imibele yapulamo iya muntontonkanya] uulebomba nomba mu bana ba bucintomfwa.” (Abena Efese 2:2) Mabuseko ya kwa ani wingalabombela nga ca kuti waibimbile mu nyimbo sha kuputawisha amashiwi nelyo umusango wa shiko uwa bumi? Ca cine, inyimbo sha kuputawisha amashiwi shimo te kuti pambi shikwatemo ifyabipa. Lelo bushe cilapanga amano ukulundulula ukutemwa ku nyimbo sha musango uuli onse isho mu kumonekesha ishisansa ifipimo fya Bwina Kristu?

Inyimbo sha Ciunda Cabesha pa Muulu—Ubwamba, Ulukaakala, no Kupepa Satana

11, 12. Cinshi caba inyimbo sha ciunda cabesha pa muulu, kabili ni mbali nshi shabipa ishishibisha shene?

¹¹ Umusango na umbi uwa nyimbo shalumbuka waba ni nyimbo sha ciunda cabesha pa muulu. Inyimbo sha ciunda cabesha pa muulu shalicila pa nyimbo sha ciunda ca pa muulu isha lyonse. E fisosa lipoti muli The Journal of the American Medical Association ukuti: “Inyimbo sha ciunda cabesha pa muulu . . . shabamo imililile ya filimba iyabesha pa muulu kabili shaisulamo amashiwi ayo yasumbula ulupato, umusaalula, ukupuuluka kwa bwamba, no kupepa satana ukwa mu tushita mu tushita.” Pantu, amashina yeka fye aya mabumba ya bakemba ayacilapo ukulumbula yacitilo bunte ku kubotelela kwa uyu musango wa nyimbo. Yasanshamo amashiwi ya musango yo pamo nga sumu, imfuti na imfwa. Nalyo line, inyimbo sha ciunda cabesha pa muulu shimoneka ishatalalila lintu shalinganishiwa ku shabamo ukuilishanya ne shilanda pa lwa mfwa—umusango wa nyimbo ishaisulamo inyimbo sha fiunda fyabesha pa muulu. Amashina ya aya mabumba yashukila amashina pamo nga mulya bantu na ifilembwa pa lwa muntu wafwa. Imisepela mu fyalo ifingi pambi te kuti bamwensekese ifyo aya mashina yaba aya makankamike pantu yaba mu ciNgeleshi nelyo mu lulimi lumbi ulweni.

¹² Inyimbo sha ciunda cabesha pa muulu libili libili shalisuntinkanishiwa no kuipaya kwa bapungwe, ukupopomenwa, no kubomfya imiti ikola. Ukulundana kwa shiko ne mibele ya lukaakala kwalengele uupanda amano wa ku mulabasa ukwinika shene “inyimbo sha kwipailako abafyashi bobe.” Caba kulundana kwa shiko ku kupepa Satana e kutiinya abafyashi abengi—na bakapokola. Kafwailisha umo atungile ukuti imisepela imo iiyobeka mu kupepa satana yalisongelwe ukwingila mu fibelesho fya maanga ukupitila muli ishi nyimbo. “Tabaishiba ico baleingilamo,” e fintu asondwelela.

13. Busanso nshi bwaba mu kuibimba mu nyimbo sha ciunda cabesha pa muulu?

¹³ Imisepela ya Bwina Kristu, nangu cibe fyo, tailingile ‘ukuluba amapange [ya kwa Satana].’ (2 Abena Korinti 2:11) Na kuba, ‘tushomboka ne fimipashi fya bubifi ifya mu lwelele.’ (Abena Efese 6:12) Ifyo cingaba buwelewele, ku kusala kwa umo ukwa nyimbo, ukuiletela ifibanda mu bumi bwakwe! (1 Abena Korinti 10:20, 21) Nalyo line, imisepela ya Bwina Kristu abafulilako mu kumonekesha balitemwisha ishi nyimbo. Bamo balyalukila fye na ku nshila sha mu bumfisolo ku kwikusha ukusala kwabo ukwa nyimbo. Umukashana umo asumino kuti: “Nalekutika ku nyimbo sha ciunda cabesha pa muulu, inshita shimo mupepi no bushiku bonse. Nali no kushita bamagazini ba nyimbo sha ciunda cabesha pa muulu [abafwilisha] no kubafisa ukufuma ku bafyashi bandi mu fibokoshi fya nsapato. Nalebepa abafyashi bandi. Nalishiba ukuti Yehova tatemenwe ico nalecita.” Alikutulwike pa numa ya kubelenga icipande ukufuma muli magazini wa Loleni! Misepela inga abacili balikatwa mu nyimbo sha musango yo?

Ukulobolola Cintu Ubyala

14, 15. Mulandu nshi twingabela abashininkisha ukuti ukukutika ku nyimbo shishalinga kukakwata ukusonga kwabipa? Langilila.

¹⁴ Wicefya ubusanso inyimbo sha musango yo shingaletako. Ca cine, te kuti pambi ukongamine ku kwipaya umuntu nelyo ukucita bucisenene bwa kwampana kwa bwamba pa mulandu fye wa kuti walikutike ku lwimbo. Nangu ni fyo, pa Abena Galatia 6:8 pasoso kuti: “Uubyala ku mubili wakwe wine, ku mubili akalobololako ukubola.” Ukukutika ku nyimbo sha pano nse, isha bunama, kabili nelyo fye isha buciwa kuti kwakwata fye ukwambukila kwabipa pali iwe. (Linganyeniko Yakobo 3:15.) Profesa wa nyimbo Joseph Stuessy ayambulwa ngo ulesosa ukuti: “Umusango uuli onse uwa nyimbo wambukila imibele yesu iya cila kasuba, inkuntu, imibele ya mutima ne mibele ya buntu iifumamo . . . Uuli onse uwasosa ukuti, ‘kuti nakutika ku nyimbo sha ciunda cabesha pa muulu, lelo tashinyambukila,’ naluba. Shambukila fye abantu balekanalekana mu fipimo fyalekanalekana ne nshila shalekanalekana.”

¹⁵ Umusepela umo uwa Bwina Kristu asumino kuti: “Naliketwe mu nyimbo sha ciunda cabesha pa muulu icabipisha ica kuti ubuntu bwandi bonse bwalyalwike.” Mu kwangufyanya atendeke ukukumanya impika ne fibanda. “Mu kupelako nalipoosele amaseleti yandi yonse na matepu kabili nalilekelweko ku fibanda.” Umusepela na umbi asumino kuti: “Inyimbo isho naleumfwako shalelanda atemwa pa kupupe mipashi, imiti ikola, nelyo ubwamba. Imisepela iingi basosa ukuti tashibambukila, lelo mu cituntulu shilabambukila. Nali fye mupepi no kufuma mu cine.” Ipinda lipusho kuti: “Bushe umuntu kuti asendelo mulilo pa cifuba cakwe, na malaya yakwe ukupya iyo?”—Amapinda 6:27.

Twalilileni Ukuba Abalola

16. Cinshi cingasoswa pa lwa bakalemba na bakalisha ba nyimbo ishafulilako ilelo?

¹⁶ Paulo alembele Abena Kristu mu Efese wa pa kale ukuti: “E ico ndesosa no kushimikila muli Shikulu, nati, mwilaenda ifyo Abena fyalo benda mu buwelewele bwa mitima yabo, aba amano yabo yayaluke mfifi, pa kuba abanunuka ku mweo wa kwa Lesa, pa mulandu wa kukanaishiba ukuli muli bene, pa mulandu wa buumununu bwa mitima yabo.” (Abena Efese 4:17, 18) Bushe ici te kuti cisoswe pa lwa bakemba na bakalisha ba nyimbo sha lelo? Ukucila kale lyonse, inyimbo sha misango yonse shibelebesha ukusonga kwa kwa “[lesa, NW] wa nshita ino,” Satana Ciwa.—2 Abena Korinti 4:4.

17. Ni shani fintu imisepela bengapingulapo, nelyo ukulinga, inyimbo?

¹⁷ Ukukuma ku “nshiku sha kulekelesha,” Baibolo yasobele ukuti: “Abantu babifi kabili abafutika bakalundulukila ku kubipo kucila.” (2 Timote 3:1, 13) Ukucila kale lyonse, kanshi, ulekabila ukutwalilila ukusalulula pa musango wa nyimbo usala. Ilingi line, umutwe wabipa ukalangisha iseleti nge lishafikapo. Yobo 12:11 epusha ukuti: “Bushe ukutwi takulinge fya kulanda, ifyo akanwa komfwe filyo fya kako?” Mu nshila imo ine, kuti walinga inyimbo pa kukutika mu kuba no kutwi kwa kupimununa. Musango nshi uwa kuyumfwa imimbile imya muli iwe? Bushe ilalundulula imibele yapumbusa iyabotelela—umupashi wa bucipondoka? (Abena Galatia 5:19-21) Ni shani pa lwa mashiwi ya nyimbo? Bushe yalasumbula bucisenene bwa bwamba, ukubomfya imiti ikola, nelyo ifibi fimbi ifya “nsoni ukufilanda”? (Abena Efese 5:12) Baibolo isoso kuti ifintu fya musango yo tafilingile ‘ukulumbulwa’ pa kati ka bantu ba kwa Lesa, nelyo fye nga fyabikwa mu nyimbo no kubwekeshiwapo libili libili. (Abena Efese 5:3) Ni shani pa lwa fyalengwa pa nkupo? Bushe ukwetepo imitwe ya kupupe mipashi nelyo ifikope ifibimbula?

18. (a) Kwaluka nshi pambi imisepela bali no kubuula lintu caisa ku nyimbo? (b) Ni shani fintu imisepela ingalundulula ukutemwa inyimbo shacilapo ukuba ishituntulu?

¹⁸ Nakalimo ukabila ukupanga ukwaluka kumo mu musango wa nyimbo usala. Nga ca kuti walikwata amaseleti, amatepu, ama compact disc ayo yakwata imitwe ya bucisenene kabili iya fiwa, ulingile ukuyapoosa mu kwangufyanya. (Linganyeniko Imilimo 19:19.) Ici tacilepilibula ukuti te kuti uipakishe inyimbo; te shonse inyimbo shalumbuka ishabipa. Imisepela imo na kabili yalisambilila ukukusha ukusala kwabo ukwa nyimbo kabili nomba balaipakisha isha mutalalila, ishitwa folk, jazz ya mutalalila, ne misango imbi iya nyimbo. Amatepu ya Kingdom Melodies yalyafwa imisepela iingi ukusonda inyimbo sha mabumba isha kukoselesha.

19. Mulandu nshi cabela icakatama ukusungilila inyimbo mu cifulo ca shiko?

¹⁹ Inyimbo ca bupe ca bulesa. Ku bengi, nangula ni fyo, casanguka icintu bapamfiwa naco icishawama. Aba bapala abena Israele ba pa kale abaipakishe ukulishe “pango, akaoma ne cimpeta, . . . lelo umulimo wa kwa Yehova [tabawangilwe].” (Esaya 5:12) Cipange ukuba ubuyo bobe ukusungilila inyimbo mu cifulo ca shiko kabili leka imibombele ya kwa Yehova ibe e kwangwako kobe ukukalamba. Ba uusalulula kabili uwasakamanisha pa lwa nyimbo usala. Muli ifyo ukaba na maka ya kubomfya bwino—te kubomfya bubi bubi—ici ica bupe ca bulesa.

[Futunoti]

Bushe Uleibukisha?

◻ Mulandu nshi inyimbo shingetilwa ica bupe ca bulesa?

◻ Ni shani fintu inyimbo shabomfiwe bubi bubi mu nshita sha pa kale?

◻ Busanso nshi ubo inyimbo sha kuputawisha amashiwi ne sha ciunda cabesha pa muulu shileta ku misepela ya Bwina Kristu?

◻ Ni shani fintu imisepela ya Bwina Kristu bengabelesha ukusakamana mu kusala kwabo ukwa nyimbo?

[Icikope pe bula 23]

Mu nshita sha Baibolo, inyimbo ilingi line shalebomfiwa nge nshila ya kuletelamo amalumbo kuli Yehova