Ifipusho Ukufuma ku Babelenga

Bushe Amashiwi ya kwa Lesa ayalembwa pali Yeremia 7:16 yalola mu kuti Abena Kristu te kuti bapepele uwatamfiwa mu cilonganino ca Bwina Kristu pantu mubembu uushilapila?

Pa numa ya kupingula Yuda wabula ubusumino, Yehova aebele Yeremia ati: “We Yeremia, wipepela aba bantu, wibasanswila nkuuta nangu lipepo, kabili wipaapaata kuli ine; pantu nshakomfwe kuli iwe.”—Yeremia 7:16.

Mulandu nshi Yehova aleseshe Yeremia ukupepela abena Israele? Ukwabula no kutwishika ni co bakeene ukukonka Amalango yakwe. ‘Baleiba, balecita imisoka, ubucende, ukulapa bufi bufi, ukufutumwine fya kuninika kuli Baali, no kukonke milungu iyo bashaishibe.’ Balecite fi pa lwalala kabili ukwabula ukumfwako ne nsoni. E co, Yehova aebele abaYuda babule citetekelo ati: “Nkamufwintulo kufuma pa cinso candi, ifyo nafwintwile bamunyinenwe, ubufyashi bonse ubwa kwa Efraimu.” Kwena te kuti cibe bwino kuli Yeremia nelyo umuntu umbi, ukupepa ukuti Yehova alule ubupingushi Bwakwe.—Yeremia 7:9, 15.

Ukumfwana ne ci, umutumwa Yohane alembele pa lwe pepo lyalinga kuli Lesa. Intanshi aeba Abena Kristu ati: “Nga twalomba akantu akalingene no kufwaya kwakwe, atuumfwa.” (1 Yohane 5:14) Lyene pa lwa kupepela bambi Yohane asosa ati: “Ngo muntu amona munyina alebembuko lubembu ulushaba lwa kutwala ku mfwa, alombe, na Lesa kuti amupeelo mweo wa babembuko lubembu ulushaba lwa kutwala ku mfwa. Kuli ulubembu ulutwala ku mfwa; te ulo nsosele ukuti balulombele.” (1 Yohane 5:16) Yesu na o alandile pa membu ‘ishishingalekelelwa nakalya,’ e kuti ukubembukila umupashi.—Mateo 12:31, 32.

Bushe ici cilolele mu kuti bonse abatamfiwa mu cilonganino ca Bwina Kristu pa kubembuka no kukanalapila ninshi bacita imembu ‘ishitwala ku mfwa’ no kuti tatulingile ukubapepelako? Te fyo cifwile ukuba pantu limo imembu sha musango yo tashitwala ku mfwa. Na kuba, calyafya ukwishiba nga ca kuti imembu sha batamfiwa shitwala ku mfwa. Ica kumwenako ca musango yo ca Mfumu Manase uwa mu Yuda. Akuulile ifipailo ku milungu ya bufi, ukupeela abana bakwe nga malambo, alepupe mipashi, no kubiika ifipasho fyabaswa mwi tempele lya kwa Yehova. Na kuba Baibolo itila Manase na bantu bacitilo “bubi, ukucile nko isho Yehova afitile ku cinso ca bana ba kwa Israele.” Yehova akandile Manase pali conse ico acitile ilyo amutwele muli bunkole ku Babele mu makusu.—2 Ishamfumu 21:1-9; 2 Imilandu 33:1-11.

Bushe imembu sha kwa Manase nangu shabipishe, shali sha kutwala ku mfwa? Kwena te fyo iyo, pantu ilyashi litwalilila ati: “Mu kumanama kwakwe, asengwile ku cinso ca kwa Yehova Lesa wakwe, no kunakilila apakalamba ku cinso ca kwa Lesa wa bawishi; apepele kuli wene, na o Yehova apaapaatilwe kuli wene, aumfwile no kupaapaata kwakwe, no kumubwesesha ku Yerusalemu ku bufumu bwakwe, e lyo Manase aishibe ukuti Yehova e Lesa.”—2 Imilandu 33:12, 13.

E co, tatufwile ukwangufyanya ukusosa ukuti umuntu nga atamfiwa mu cilonganino ninshi abembwike ulubembu ulutwala ku mfwa. Limo kuti papite nshita pa kuti imibele ya mutima iya umo isokoloke. Na kuba ilingi twebwa ukuti umulandu umo uo kwabela ukutamfya kulenga uubembwike ukukutuluka pa kuti engalapila no kupilibuka.

Apo umuntu taba mu cilonganino, abapalamisha kuli wene pamo ngo mwina mwakwe na ba mu lupwa e bengabalilapo ukumona ukuti nalapila. Abalemona uko kwaluka kuti basondwelela ukuti umubembu tapangile lubembu ulutwala ku mfwa. Napamo kuti bafwaya ukumupepelako ukuti anonke ubukose ukufuma mu Cebo ca kwa Lesa icapuutwamo no kuti Yehova acitile uyu mubembu ukulingana no kufwaya Kwakwe.—Amalumbo 44:21; Lukala Milandu 12:14.

Nangu line bamo kuti bamona ubushinino bwa kuti umubembu nalapila, napamo icilonganino conse te kuti cishibe. Kuti basunguka no kukalifiwa, no kupunwishiwa fye nga baumfwa umo alepepela uwatamfiwa pa cintubwingi. E co, abalefwaya ukupepela umubembu kuti bacite co ilyo bali beka, ukushila imilandu imbi iingemako pa lwa uyu muntu mu maboko ya baeluda bashingamwa mu cilonganino.

[Icikope pe bula 31]

Imembu sha kwa Manase ishabipisha shalipashilwe ilyo aicefeshe kuli Yehova

[Abatusuminishe Ukubomfya Icikope pe bula 30]

Ukufuma muli Illustrirte Pracht-Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s