Lolesha Bushilya bwa Fintu Ulepitamo!

UKUMONA bwino kwaba lipaalo. Na kuba, abantu abengi kuti batila ukumona e cintu cacindamisha pali fyonse ifyo bakwata. Nangu cibe fyo, ku Bena Kristu kwaliba umusango wa kumona uwalandilwepo ku mutumwa Paulo uwaumo mutengo ukucila ukumona bwino ukwa menso yesu. “Tatulolekesha ifimoneka, lelo ifishimoneka,” e fyalembele Paulo. (2 Abena Korinti 4:18) Uku kufwile ukuba kumona kwaibela ukwa kuti kulelenga no muntu ukumona ifintu ifishimonwa! Kuti twatila ni kulya beta ukumona ukwatwa 20/20 ukwa ku mupashi.

Mulandu Nshi Kwabela Ukwakabilwa?

Abena Kristu ba mu mwanda wa myaka uwa kubalilapo balekabila sana ukukwata uyu musango wa kumona. Baalebomba ubutumikishi bwabo mu mafya ayengi. Paulo acilumbulwile muli iyi nshila: “Monse monse tuli abacushiwa lelo abashimaninkishiwa, tuli abasanswasanswa lelo abashipelelwa, tuli abapakaswa lelo abashilekeleshiwa, tuli abafuntulwa lelo abashonaika.”—2 Abena Korinti 4:8, 9.

Te mulandu ne mibele ya musango yo, abasambi ba busumino balishangile. Mu kuba ne citetekelo cakosa muli Lesa, baali na maka ya kusosa nga fintu Paulo asosele ati: “Tatunenuka; lelo nelyo ubuntu bwesu bwa ku nse boonaika, ubwa mu kati bwena bulengwa cipya cipya ubushiku no bushiku.” Nangula ni fyo, cinshi caleletako uku kulengwa cipya cipya ukwa bushiku no bushiku? Paulo akonkenyepo ukuti: “Pantu ubucushi ubwayanguka ubwa kashita akanononono, buletuteyanishe cintu ca bukata icapulishamo ica muyayaya, pa kuti tatulolekesha ifimoneka, lelo ifishimoneka; pantu ifimoneka fya kashita fye, lelo ifishimoneka fya muyayaya.”—2 Abena Korinti 4:16-18.

Paulo alekoselesha bamunyina ba ku mupashi ukukanasuminisha amafya, ukupakasa—te mulandu bucushi bwa musango nshi—ukukanabacinga ukumona icilambu ca bukata icaimikilwe bene. Balingile ukulolesha bushilya bwa mibele ya ndakai, ukutonta amenso yabo pa ca kufumamo ca nsansa ica nshila ya Bwina Kristu. Ico e cabaafwile ukulalenga umupampamina wabo uwa kutwalilila mu bulwi ukulengwa cipya cipya ubushiku no bushiku. Abena Kristu ilelo na bo bene balekabila ukumwene fintu mu nshila ya ku mupashi iya musango yo.

Mona Amacushi ya Ndakai nga ya Kashita Akanononono!

Cila bushiku, nangu tulefwaya nangu tatulefwaya, tulamona ifintu ifyo te kuti tutemwe ukumona. Ilyo twaceba mu cilola citulangisha ifiko no bulema bwa mubili wesu, ifilangililo fya kukanapwililika kwa mubili. Lintu twaceba mu cilola ca Cebo ca kwa Lesa, tumona ifiko fya ku mupashi no bulema, muli fwe bene na muli bambi. (Yakobo 1:22-25) Kabili lintu twalolesha mu nyunshipepala ya bushiku no bushiku nelyo ukutamba televishoni, ilyo line ifya kucitika fya lufyengo, ubunkalwe, no tuyofi filamonwa no kutwikata ku mutima.

Satana kuti atemwa ukutulenga ukupelelwa pa mulandu wa fintu tumona nelyo ukutulenga ukupumbulwa no kutendeka ukupungaila mu citetekelo. Ni shani fintu twingaleshe ci ukucitika? Tufwile ukukonka ica kumwenako icaimikwe na Yesu Kristu, nga fintu catashiwe no mutumwa Petro lintu atile: “Pantu ni ’ci cine mwaitiilweko; pa kuti na Kristu aculiile imwe no kumushile ca kumwenako, ukuti mukonke mu makasa yakwe.” (1 Petro 2:21) Yesu Kristu aali ca kumwenako capwililika, mu mbali shonse isha mikalile ya Bwina Kristu.

Mu kusonta kuli Yesu nge cipasho cesu, Petro alumbwile maka maka ukuti Yesu aliculile. Mu cine cine, Yesu aliculile nga nshi lintu aali pe sonde. Pamo nga “cibinda wa mulimo” (NW) uwa kwa Yehova uwaliko ilyo umutundu wa muntu walebumbwa, alishibe bwino bwino ico Lesa alefwaya abantunse ukuba. (Amapinda 8:30, 31) Lelo nomba aliimwenene cintu ulubembu no kukanapwililika kwabalengele ukuba. Cila bushiku alemona ukukanapwililika kwa bantu na mabunake yabo kabili aali no kubomba na fyene. Ico cifwile cali bwesho kuli wene.—Mateo 9:36; Marko 6:34.

Ukufumyako amacushi ya bambi, Yesu na o wine alipitile mu yakwe. (AbaHebere 5:7, 8) Lelo mu kuba no kumona kwapwililika ukwa ku mupashi, aloleshe bushilya bwa yako ku kumona icilambu ca kusumbwilwa ku kukwata ubumi bwa bumunshifwa pa mulandu wa nshila yakwe iya bumpomfu. Lyene pamo nge Mfumu Mesia, aali no kukwata ishuko lya kusumbwila umutundu wa buntunse uwacushiwa ukufuma mu mibele yakwe iyabotelela ukubwelela ku kupwililika ukwali e mifwaile ya kwamba iya kwa Yehova. Ukusungilila amenso yakwe ayatontwa pali ifi filolelo fishimoneka ifya ku ntanshi kwalimwaafwile ukusungilila ubuseko mu mulimo wa bukapepa te mulandu na macushi ayo alemona libili libili. Pa numa Paulo alembele ukuti: “Pa mulandu wa kusekelela ukwabikilwe pa ntanshi yakwe, ashipikishe ku [cimuti ca kucushiwilwapo, NW], ukusuule nsoni, no kwikala ku kulyo kwa cipuna ca bufumu ca kwa Lesa.”—AbaHebere 12:2.

Yesu tatalile asuminisha amacushi ne mibele ya fya kwesha ukumulenga ukupelelwa, ukupumbulwa, nelyo ukuungwaungwa mu citetekelo cakwe. Apo tuli basambi bakwe, tufwile ukukonka ica kumwenapo cakwe icasumbuka mu kupalamisha.—Mateo 16:24.

Tonta pa Fintu Fishimoneka Ifya Muyayaya!

Pa kulanda pa capeele Yesu amaka ya kushipikisha, Paulo na kabili alondolwele inshila ya kukonka lintu alembele ati: “Tubutuke no mukoosha ulubilo ulwabikilwa ifwe, ukutonta amenso kuli Yesu, kelenganya kabili kawaminisha wa citetekelo cesu.” (AbaHebere 12:1, 2) Ee, pa kuti tutunguluke ukubutuka mu nshila ya Bwina Kristu kabili mu kuba no buseko, tufwile ukulolesha bushilya bwa fintu ifipalamine pa ntanshi yesu. Lelo ni shani ‘twingatonta amenso’ pali Yesu, kabili ni shani fintu ico cikatwaafwa?

Ku ca kumwenako, mu 1914, Yesu alibiikilwe ukuba Imfumu ya Bufumu bwa kwa Lesa, kabili atekela mu muulu. Kwena, ifi fyonse, tafimoneka ku menso yesu aya buntunse. Lelo, nga ca kuti ‘twatonta amenso’ kuli Yesu, ukumona kwesu ukwa ku mupashi kukatwaafwa ukumona ukuti nomba ali uwaipekanya ku kubombelapo no kupwisha ino micitile ya fintu iibifi no kufumyapo Satana ne bumba lyakwe ilya fibanda ukubakaka mu fikakilo fya kukanabomba. Nga twalolesha ku ntanshi na kabili, ukumona kwesu ukwa ku mupashi kulangisha icalo cipya icawamisha umo “ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 19:11-16; 20:1-3; 21:4.

E co lyene, mu cifulo ca kufinininwa ku macushi aya kashita fye ayo pambi twingalolenkana na yo cila bushiku, mulandu nshi te kutontomesha pa fintu ifya muyayaya? Mu kuba na menso ya citetekelo, mulandu nshi te kulolesesha bushilya bwa malwele no bufunushi pali lino isonde lyakowela no kumona paradise waisula abantu aba butuntulu busuma, aba nsansa kabili abasakamana? Mulandu nshi te kulolesesha bushilya bwa bulema bwesu, ubwa ku mubili no bwa ku mupashi, no kwelenganya ukulubulwa kuli fyene kuli pe na pe ukupitila mwi lambo lya cilubula ilya kwa Kristu? Mulandu nshi te kulolesesha bushilya bwa fitumbi fya nkondo, imisoka, no lukaakala no kumona ababuushiwa abapya balefundwa umutende wa kwa Yehova no bulungami?

Mu kulundapo, ‘ukutonta amenso’ kuli Yesu na kabili kuti kwasanshako ukutontomesha ukumona kwesu ukwa ku mupashi pa fintu Ubufumu kale kale bwacita pa bantu ba kwa Lesa pe sonde, nangula ca kuti tabumoneka, ukufilumbula: ukwikatana, umutende, ukutemwa, icitemwishi ca bwananyina, no lubanda lwa ku mupashi. Umwanakashi wa Bwina Kristu umo mu Germany, ilyo atambile vidio wa United by Divine Teaching, alembele ukuti: “Iyi vidio ikanjafwa sana ukulaibukisha ukuti bamunyina ba Bwina Kristu abengi na bankashi ukupulinkana icalo conse pali ino ine nshita balebombela Yehova muli bucishinka—kabili balecite fyo te mulandu no kukaanya kwa bantu. Fintu ukwikatana kwesu ukwa bumunyina mu calo caisulamo ulukaakala no lupato kwaba ukwaumo mutengo!”

Bushe “ulamona” Yehova, Yesu, bamalaika ba busumino na Bena Kristu banobe amamilioni nabeminina ku lubali lobe? Nga ni fyo, tawakasakamikwe ku kucishamo pa lwa “kusakamana kwa pano isonde” uko kwingakulenga ukupomponteka pa mulandu wa kufuupula no kukulenga ukubo “ushitwala.” (Mateo 13:22) E co ‘tonta amenso’ kuli Yesu ukupitila mu kutontomesha amenso yobe aya ku mupashi pa Bufumu bwaimikwa na mapaalo ya buko, aya nomba na ya ku ntanshi.

Tukuta Ukumona Ifishimoneka!

Pa kumona ukupusana kukalamba pa kati ka calo cipya ica kwa Lesa ica ciyayaya ne calo ca ndakai icilebongoloka, tulingile ukuseshiwa ukwenda mu nshila ya kuti tukapendelwa pa bawaminwa ukwikala abomi no kuimwena mu cine cine ifintu ifyo ilelo twingamona fye ku menso ya citetekelo. Icinabwingi abakabuushiwa bakafilwa ukusumina lintu bakabuuka no kumona paradise wa pe sonde uwa bulungami uwapusanininako fye ku calo ico balimo ilyo tabalafwa. Elenganya ubuseko tukakwata ilyo tukalabasengela no kubalondolwela cintu Lesa acita!—Linganyako Yoele 2:21-27.

Ee, mwandi ukumona kwa ku mupashi kwalyumo mutengo, kabili fintu caba icakatama ukusungilila ukwatwa! Kuti twacite ci ukupitila mu kuibimba mu kusambilila Baibolo ukwa pa lwesu lyonse, ukusangwa ku kulongana kwa Bwina Kristu, ukwebako bambi pa lwe subilo lyesu ilyashimpwa pali Baibolo, na pali fyonse, ukupepela ubutungulushi bwa bulesa. Ici cikasungilila ukumona kwesu ukwa ku mupashi ukwatwa kabili ukwabula kafifi, ukutulenga ukulolesha bushilya bwa fintu tulepitamo!