Muleleka ‘Ubupe bwa kwa Lesa Ubushaikulila’ Bulemucincisha

1, 2. (a) Finshi fyaba mu ‘bupe bwa kwa Lesa ubushaikulila’? (b) Mepusho nshi twalalandapo muli cino cipande?

YEHOVA alilanga ukuti alitutemwa nga nshi pa kutupeela ubupe ubukalamba sana, no bu bupe, Mwana wakwe Yesu uo atumine pano isonde! (Yohane 3:16; 1 Yohane 4:9, 10) Umutumwa Paulo aitile ubu bupe ati ‘bupe ubushaikulila.’ (2 Abena Korinti 9:15) Mulandu nshi Paulo alandiile aya mashiwi?

² Paulo alishibe ukuti ilambo lya kwa Yesu e lyali no kulenga fyonse ifyo Lesa atulaya ukufikilishiwa ku ntanshi. (Belengeni 2 Abena Korinti 1:20.) Ici cilolele mu kuti mu ‘bupe bwa kwa Lesa ubushaikulila’ mwaba ilambo lya kwa Yesu ne cikuuku ca kwa Yehova no busuma ubo atulanga. Te kuti tukwate na mashiwi ya kulondolola ifyo ubupe bwa kwa Lesa bwacindama. Bushe ubu bupe bulingile ukutulenga ukumfwa shani? Kabili bulingile ukulenga twaipekanya shani ku Cibukisho ca mfwa ya kwa Kristu icikabako pali Citatu pa 23 March, 2016?

3, 4. (a) Bushe mumfwa shani nga umuntu amupeela ubupe? (b) Bushe ubupe bwaibela kuti bwalenga shani mwayaluka?

³ Tulatemwa nga nshi umuntu nga atupeela ubupe. Ubupe bumo bulacindama sana ica kuti bulalula no bumi bwesu. Ku ca kumwenako, elenganyeni ukuti mwacita umulandu uukalamba ica kuti bamupingwila ukufwa. E lyo ukwabula no kwenekela, umuntu uo mushaishiba no kwishiba aipeelesha ukuti e o bepailemo. Uyo muntu ninshi naitemenwa ukumufwila! Bushe kuti mwaumfwa shani pali ubu bupe ubwaibela?

⁴ Ubu bupe ubwaibela kuti bwalenga mwayalula ubumi bwenu. Na kabili kuti bwalenga mwaba bakapekape, kabili kuti mwatemwa abantu e lyo no kulaelela abengalamulufyanya. Kuti mwalacita ifingalalanga ukuti mulatasha pa fyo uyo muntu aipeeleshe ukumufwila.

 5. Bushe ubupe bwa kwa Lesa ubwa cilubula bwacila shani pa bupe bonse ubo twingapokelela?

⁵ Icilubula ico Lesa atupeela calicila pa bupe ubo tulandilepo mu ca kumwenako. (1 Petro 3:18) Taleni tontonkanyeni pali ici: Bonse twalipyana ulubembu lwa kwa Adamu, kabili tulafwa pa mulandu wa lubembu. (Abena Roma 5:12) Ukutemwa e kwalengele ukuti Yehova atume Yesu pano isonde pa kuti ‘afwile umuntu onse.’ (AbaHebere 2:9) Ilambo lya kwa Yesu likalenga kukabe ifintu ifisuma na fimbi! Likalenga imfwa ikafumepo umuyayaya. (Esaya 25:7, 8; 1 Abena Korinti 15:22, 26) Bonse ababa ne citetekelo muli Yesu nampo nga baba ne subilo lya kuteka na Kristu ku muulu nelyo nga baba ne subilo lya kwikala pano isonde ilyo Ubufumu bwa kwa Lesa bukalateka, bakekala umutende kabili bakaba ne nsansa umuyayaya. (Abena Roma 6:23; Ukusokolola 5:9, 10) Mapaalo nshi na yambi ayaba mu bupe ubo Yehova atupeela?

 6. (a) Mapaalo nshi ayaba mu bupe bwa kwa Yehova ayo mufwaisha ukumona yafikilishiwa? (b) Lumbuleni ifintu fitatu ifyo ubupe bwa kwa Lesa bulingile ukutucincisha ukulacita.

⁶ Mu bupe ubo Lesa atupeela mwaliba no kulenga isonde ukuba paradaise, mwaliba no kuposha abalwala e lyo no kubuusha abafwa. (Esaya 33:24; 35:5, 6; Yohane 5:28, 29) Twalitemwa Yehova no Mwana wakwe pa kutupeela “ubupe ubushaikulila.” Finshi ubu ubupe bufwile ukutucincisha ukulacita? Bufwile ukutucincisha, (1) ukulapashanya sana Kristu Yesu, (2) ukutemwa aba bwananyina, na (3) ukulaelela abanensu.

7, 8. Bushe tufwile ukulaumfwa shani pa fyo Kristu atutemwa, kabili ukutemwa kufwile ukutucincisha ukulacita cinshi?

⁷ Ica kubalilapo, ukutemwa kufwile ukutucincisha ukulacita ifilanga ukuti twalicindika Yesu. Umutumwa Paulo alandile ukuti: “Ukutemwa kwa kwa Kristu e kutucincisha.” (Belengeni 2 Abena Korinti 5:14, 15.) Paulo alishibe ukuti nga twaishiba ukuti Yesu alitutemwa nga nshi, na ifwe tukamutemwa sana kabili tukamucindika. Nga twaishiba bwino ifyo Yehova atucitila pa mulandu wa kuti alitutemwa, tukalacita ifilanga ukuti twalicindika Yesu. Kuti twalacita shani ifyo?

⁸ Ukutemwa twatemwa Yehova kukatucincisha ukulapashanya Yesu no kulakonka sana mu ntampulo shakwe. (1 Petro 2:21; 1 Yohane 2:6) Nga tuleumfwila Lesa na Kristu, tukalanga ukuti twalibatemwa. Yesu atile: “Uwasumina amafunde yandi no kuyakonka, e wantemwa. Kabili uwantemwa, Tata akamutemwa, na ine nkamutemwa no kuisokolola apabuuta kuli ena.”—Yohane 14:21; 1 Yohane 5:3.

 9. Finshi abantu mu calo bafwaya ukuti tulecita?

⁹ Muli ino inshita ya Cibukisho, tulingile ukutontonkanya pa fyo tucita. Kuti cawama mwayipusha aya mepusho: ‘Finshi ifyo ncita ifilanga ukuti ndapashanya Yesu? Ni muli finshi mfwile ukuwamyako?’ Cisuma ukuyipusha ifi fipusho pantu abantu mu calo bafwaya ukuti tulecita ifyo bacita. (Abena Roma 12:2) Nga tatucenjele kuti twatendeka ukupashanya abasambilila sana, abalumbuka, e lyo na bateya amangalo abo abantu abengi batemwa. (Abena Kolose 2:8; 1 Yohane 2:15-17) Kuti twacita shani pa kuti tatulepashanya abantu ba muli cino calo?

10. Mepusho nshi ayo tulingile ukuyipusha muli ino nshita ya Cibukisho, kabili amasuko kuli aya mepusho yafwile ukutucincisha ukucita cinshi? (Moneni icikope pa ntendekelo ya cino cipande.)

¹⁰ Muli ino inshita ya Cibukisho kuti cawama twalatontonkanya na pa mifwalile yesu, pa mafilimu ayo tutamba, na pa nyimbo isho tukutikako e lyo ne fyo twabika pa kompyuta, pa foni nelyo pa tabuleti. Kuti cawama mwayipusha aya mepusho: ‘Yesu nga aali pano calo e lyo amona ifyo mfwele, bushe kuti naumfwa insoni?’ (Belengeni 1 Timote 2:9, 10.) ‘Bushe ifyo mfwala filalanga ukuti ndi musambi wa kwa Kristu? Bushe Yesu kuti atemwa ukutamba amafilimu ayo ntamba? Bushe kuti akutika ku nyimbo isho nkutikako? Nga ca kuti Yesu alyashime foni yandi nelyo tabuleti, bushe kuti naumfwa insoni nga amona ifyo nabikamo? Bushe kuti nafilwa ukulondolwela Yesu umulandu natemenwa ukuteya ifyangalo nteya ifya pa vidio?’ Ukutemwa twatemwa Yehova kulingile ukutucincisha ukupoosa fyonse ifyabipa ifyo Abena Kristu bashilingile ukukwata, nangu ca kuti twalipooselepo indalama ishingi pa ku fishita. (Imilimo 19:19, 20) Ilyo twaipeele kuli Yehova, twalimulaile ukuti twakulacita ifilanga ukuti twalicindika Kristu. Kanshi tatulingile ukukwata ifingalenga catwafya ukulapashanya Yesu.—Mateo 5:29, 30; Abena Filipi 4:8.

11. (a) Bushe ukutemwa Yehova na Yesu kufwile ukulenga tulebomba shani umulimo wa kubila imbila nsuma? (b) Bushe ukutemwa kuti kwalenga shani tuleyafwa bamunyinefwe mu cilonganino?

¹¹ Ukutemwa twatemwa Yesu kulatucincisha ukulabila imbila nsuma no kuba abacincila pa kusambilisha. (Mateo 28:19, 20; Luka 4:43) Muli ino nshita ya Cibukisho, bushe kuti mwapekanya bwino ifintu pa kuti mwingabombako bupainiya bwa kwafwilisha ubwa ama-awala 30 nelyo 50? Munyinefwe uwali ne myaka 84 uwafwilwa umwina mwakwe alemona kwati te kuti abombeko bupainiya pa mulandu no mushinku e lyo no kulwalilila. Lelo bapainiya mu ncende aleikala balimwafwile. Balisalile icifulo ca kubombelamo icalinga kabili balemusendako muli motoka pa kuya mu mulimo. Ifi bacitile fyalengele uyu munyinefwe umukalamba ukubomba ama-awala 30. Bushe kuti mwayafwako bamunyinefwe na bankashi mu cilonganino ukubombako bupainiya mu March nelyo mu April? Kwena te bonse mu cilonganino abengabombako bupainiya bwa kwafwilisha, lelo kuti twapekanya ukuti tukabombeshe mu mulimo wa kwa Yehova. Nga twacita ifi, tukalanga ukuti ukutemwa kwa kwa Yesu kulatucincisha nga filya kwalecincisha Paulo. Finshi fimbi ukutemwa kwa kwa Lesa kulingile ukutucincisha ukucita?

12. Bushe ukutemwa kwa kwa Lesa kutucincisha ukucita cinshi?

¹² Ica bubili, ukutemwa kwa kwa Lesa kufwile ukutucincisha ukutemwa aba bwananyina. Umutumwa Yohane alembele ukuti: “Mwe batemwikwa, nga ifi e fyo Lesa atutemenwe, kanshi na ifwe tufwile ukutemwana.” (1 Yohane 4:7-11) E ico nga twalishiba ukuti Lesa alitutemwa, na ifwe tulingile ukutemwa aba bwananyina. (1 Yohane 3:16) Kuti twalanga shani ukuti twalibatemwa?

13. Bushe Yesu alangile shani ukuti alitemenwe abantu?

¹³ Ifyo Yesu alecita filatulanga ifyo tufwile ukutemwa abantu. Ilyo aali pano calo, aleyafwa abantu maka maka abaicefya. Aleposha abalwele, abalemana, impofu, bankomamatwi, na bacibulu. (Mateo 11:4, 5) Yesu tali nga bashimapepo, ena alitemenwe ukusambilisha abantu abalefwaya ukusambilila pali Lesa. (Yohane 7:49) Alitemenwe abantu abali abaicefya kabili alebombesha pa kuti abafwe.—Mateo 20:28.

14. Finshi mwingacita pa kulanga ukuti mwalitemwa aba bwananyina?

¹⁴ Mu nshita ya Cibukisho mufwile ukutontonkanya na pa fyo mulingile ukwafwa bamunyinefwe na bankashi mu cilonganino mwaba, maka maka abakalamba. Nalimo kuti mwatandalilako aba aba bwananyina, ukubatwalilako ifya kulya, ukubafwako imilimo ya pa ng’anda, ukubasendako muli motoka nelyo pa ncinga pa kuya mu kulongana, nelyo ukuya nabo mu mulimo wa kubila imbila nsuma. (Belengeni Luka 14:12-14.) Ukutemwa kwa kwa Lesa kufwile ukumucincisha ukutemwa aba bwananyina!

15. Cinshi bonse fye tufwile ukwishiba?

¹⁵ Icalenga butatu, ukutemwa kwa kwa Yehova kufwile ukutucincisha ukulaelela aba bwananyina. Bonse fye twalipyana ulubembu ne mfwa kuli Adamu, kanshi takwingaba uwingalanda ukuti, “Ine nshikabila icilubula.” Nangu fye babomfi ba kwa Lesa aba cishinka balakabila icilubula. Bonse fye Lesa alitulekelela inkongole ishingi nga nshi! Mulandu nshi cacindamina ukwishiba ici cishinka? Twalasanga icasuko mu cilangililo ico Yesu alandile.

16, 17. (a) Finshi twingasambilila ku cilangililo Yesu alandile ica mfumu no musha waiko? (b) Pa numa ya kutontonkanya sana pa cilangililo ico Yesu alandile, cinshi mulefwaisha ukucita?

¹⁶ Yesu alandile icilangililo ca mfumu iyabeleele umusha uluse no kulekelela inkongole isho akongwele ishali amadenari 60,000,000. Lelo pa numa ulya musha ena tabeleele umusha munankwe uluse uo akongweseshe fye amadenari 100. Filya imfumu yabeleele ulya musha uluse fyalingile ukulenga na o abelela umusha munankwe uluse. Imfumu yalifulilwe nga nshi ilyo yaumfwile ukuti umusha wakwe tabelele umusha munankwe uluse. Imfumu yatile: “We musha mubi we, nacisuulako ku nkongole shobe shonse ilyo wacimpapaata. Bushe na iwe taufwile ukubelela umusha munobe uluse, ifyo na ine nkubelele uluse?” (Mateo 18:23-35, futunoti) Nga filya imfumu yalekelele umusha inkongole, e fyo na Yehova atulekelela imembu shesu. Bushe ukutemwa kwa kwa Yehova no luse lwakwe filingile ukutucincisha ukulacita cinshi?

¹⁷ Ilyo tuleipekanishisha ukusangwa ku Cibukisho, tufwile ukuyipusha atuti: ‘Bushe kwaliba uwa bwananyina uo napusana nankwe? Bushe calinkosela ukumwelela?’ Nga e fyo caba, ino e nshita tulingile ukupashanya Yehova, ‘uwaiteyanya ukwelela.’ (Nehemia 9:17; Amalumbo 86:5) Nga tulatasha pa fyo Yehova atubelela uluse, na ifwe twakulabelela abantu uluse no kulabako ku filubo fyabo. Nga tatwatemwa aba bwananyina kabili tatubeleela, na ifwe bene Yehova te kuti atutemwe no kulatweleela imembu. (Mateo 6:14, 15) Nga tuleelela abantu, tacipilibula ukuti ninshi bakaleka ukutulufyanya, lelo ukwelela kukalenga tukabe ne nsansa.

18. Bushe ukutemwa kwa kwa Lesa kwayafwile shani nkashi Lily ukulasuula ku filubo fya kwa nkashi nankwe?

¹⁸ Kwena calyafya ukusuula ku filubo fya bamunyinefwe na bankashi. (Belengeni Abena Efese 4:32; Abena Kolose 3:13, 14.) Nkashi Lily alisuulile ku filubo fya kwa nkashi nankwe.^[1] (Moneni ifyebo na fimbi.) Ba Lily baleyafwa sana ba Carol abafwililwe abena mwabo. Baletwala ba Carol konse fye uko balefwaya ukuya, balebafwa ukushita ifintu, e lyo no kubafwa mu fintu na fimbi ifyalekanalekana. Nangu ca kuti balebafwa sana, lyonse fye ba Carol balefwailisha ifilubo muli ba Lily, kabili limo caleyafya ukubafwa. Lelo ba Lily babikile fye amano ku mibele iisuma iyo ba Carol bakwete kabili balitwalilile fye ukubafwa mpaka nelyo bafwile. Nangu ca kuti calyafishe ukwafwa ba Carol, ba Lily batile: “Ndafwaisha ukwisamona ba Carol ilyo bakabuuka ku bafwa. Mfwaya nkabeshibe bwino ilyo bakapwililika.” Nga fintu twamona, ukutemwa kwa kwa Lesa kuti kwatucincisha ukulasuula ku filubo fya bamunyinefwe na bankashi, kabili tulafwaisha ukwisamona ifyo cikaba ilyo abantu bakapwililika.

19. Bushe ‘ubupe bwa kwa Lesa ubushaikulila’ bufwile ukutucincisha ukulacita finshi?

¹⁹ Cine cine Yehova alitupeela ‘ubupe ubushaikulila.’ Kanshi lyonse natuletasha pa bupe ubo atupeela! Inshita ya Cibukisho e nshita iisuma iya kutontonkanya sana pali fyonse ifyo Yehova na Yesu batucitila. E ico ukutemwa batutemwa nakuletucincisha ukulapashanya sana Yesu, ukutemwa aba bwananyina, no kulasuula ku filubo fyabo.