Ukufyalwa Libili

Ubulondoloshi: Ukufyalwa libili cisanshamo ukubatishiwa mu menshi (“ukufyalwa ku menshi”) no kufyalwa ku mupashi wa kwa Lesa (“ukufyalwa ku . . . mupashi”), muli ifyo ukusanguko mwana wa kwa Lesa mu kuba ne cilolelo ca kwakana mu Bufumu bwa kwa Lesa. (Yoh. 3:3-5) Yesu alikwete ici ca kukumanya, nge ficita ba 144,000 ababa impyani pamo nankwe mu Bufumu bwa mu mulu.

Mulandu nshi cabele cafwaikwa ku bena Kristu bamo “ukufyalwa libili”?

Lesa afwaile ukubishanya impendwa yapimwa iya bantunse ba busumino pamo na Yesu Kristu mu Bufumu bwa mu mulu

Luka 12:32: “Mwilatiina, mwe mukuni unono; ico Shinwe abekelwa ukumupeelo bufumu.”

Ukus. 14:1-3: “E lyo naloleshe, kabili moneni, Umwana wa mpaanga [Yesu Kristu] naiminina pa lupili lwa Sione, kabili pamo nankwe pali aba makana umwanda umo na makana amakumi yane na makana yane, . . . abalubwilwe pe sonde.” (Mona amabula 398, 399, pe samba lya “Umulu.”)

Abantunse te kuti baye ku mulu ne mibili ya munofu no mulopa

1 Kor. 15:50: “Awe ndemwebe ci, mwe ba bwananyina, ica kuti umubili no mulopa te kuti fipyane ubufumu bwa kwa Lesa; nangu kubola te kuti kupyane ukukanabola.”

Yoh. 3:6: “Icafyalwa ku mubili mubili, ne cafyalwa ku mupashi mupashi.”

Bantu fye beka “abafyalwa libili,” muli ifyo ukusanguka abana ba kwa Lesa, e bengaakana mu Bufumu bwa mu mulu

Yoh. 1:12, 13: “Abo bene abamusekelele, [Yesu Kristu] abatetekele ishina lyakwe, abapeele amaka aya kuba abana ba kwa Lesa: abafyelwe, te ku mulopa, nangu ni ku kufwaya kwa mubili, nangu ku kufwaya kwa mwaume, lelo kuli Lesa.” (“Abo bene abamusekelele” talepilibula abantunse bonse abatetekela Kristu. Mona abaleloshiwako, nga fintu cilangililwe ku Yohane 1 cikomo 11 [“aba ku mwabo,” abaYuda]. Ishuko limo line lyalitambululwa kuli bambi aba mutundu wa muntu, lelo ni ku “mukuni unono” fye.)

Rom. 8:16, 17: “Umupashi wine uleshimikilo bunte pamo [no mupashi wesu] ukuti tuli bana ba kwa Lesa; kabili nga tuli bana, ninshi tuli impyani, impyani sha kwa Lesa, impyani shinankwe sha kwa Kristu; nga mu cine cine tuleculila pamo nankwe, ukuti no kucindamikwa tukacindamikilwe pamo nankwe.”

1 Pet. 1:3, 4: “Abe uwapaalwa Lesa kabili Wishi wa kwa Shikulwifwe Yesu Kristu! Umwabelo luse lwakwe ulwingi atufyalile libili ku kuba [ne subilo lyabamo ubumi] mu kubuuka kwa kwa Yesu Kristu ku bafwa, ku kukwato bupyani ubushingabola, ubushingakowela, ubushingabonsa, ubwabakilwa imwe mu mulu.”

Cinshi bakacita mu mulu?

Ukus. 20:6: “Bakaba bashimapepo ba kwa Lesa kabili ba kwa Kristu, kabili bakateka pamo nankwe imyaka ikana limo.”

1 Kor. 6:2: “Tamwaishiba ukuti aba mushilo bakapingula aba pano isonde?”

Bushe umuntu ‘ushafyalwa libili’ kuti apusuka?

Ukus. 7:9, 10, 17: “Ilyo papitile ifi [pa numa lintu umutumwa Yohane aumfwile impendwa ya abo abali no “kufyalwa libili,” abo abengapanga Israele wa ku mupashi kabili abengaba pamo na Kristu mu mulu; linganyako Abena Roma 2:28, 29 na Abena Galatia 3:26-29] naliloleshe, moneni, kwali ibumba likalamba ilishingapendwa ku muntu nangu umo, abafuma ku luko lonse ne mikowa ne misango ya bantu na bantu na ba ndimi, nabeminina ku menso ya cipuna ca bufumu, na ku menso ya Mwana wa mpaanga, nabafwala amalaya yabuuta, bali ne misambo ya tuncindu mu minwe yabo; kabili balebilikishe shiwi likalamba, abati, Ipusukilo lya kwa Lesa wesu uwaikala pa cipuna ca bufumu, ne lya Mwana wa mpaanga. . . . Umwana wa mpaanga [Yesu Kristu], uuli pa kati ka cipuna ca bufumu akabacema, no kubatungulula baye pa tumfukumfuku twa menshi ya mweo.”

Pa numa ya kutantika abantu abengi aba pa ntanshi ya buKristu, AbaHebere 11:39, 40 basoso kuti: “Abo bonse, pa kushimikwa bwino ku citetekelo cabo, tabapokelele icalailwe, pa kuti Lesa amwenene ifwe kabela icintu cimo icawamisha, ukuti belengwa abapwililila ukwabula ifwe.” (Ni bani pano baloshiwa nga “ifwe”? AbaHebere 3:1 balanga ukuti ni abo “abakumako ku bwite bwa mu mulu.” Abantu ba pa ntanshi ya bwina Kristu abakwete citetekelo, lyene, bafwile bakwete isubilo lya bumi bwapwililika kumbi ukucila mu mulu.)

Amalu. 37:29: “Abalungama bakapyaninine calo, no kwikalamo inshiku pe.”

Ukus. 21:3, 4: “Moneni, ubwikalo bwa kwa Lesa buli pamo na bantu, kabili akekalilila pamo na bo; na bo bakaba abantu bakwe, na Lesa umwine akaba pamo na bo: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”

Bushe kuti cacitika ku muntu ukukwata umupashi wa kwa Lesa; lelo ukukanaba “uwafyalwa libili”?

Ukukuma kuli Yohane kabatisha, malaika wa kwa Yehova asosele ukuti: “Akesulamo no mupashi wa mushilo ukufuma na mu nda muli nyina.” (Luka 1:15) Kabili Yesu pa numa asosele ukuti: “Mu bafyalwa ku banakashi tamwaimine uwacila pali Yohane Kabatisha; lelo uwacepesha mu bufumu bwa mu mulu mukalamba kuli wene [Mulandu nshi? Pa mulandu wa kuti Yohane takabe mu myulu e co takwali kukabila kuli wene ukwa kuba ‘uwafyalwa libili’]. Ukufuma pa nshiku sha kwa Yohane Kabatisha ukufika pali nomba [lintu Yesu alondolwele ici] ubufumu bwa mu mulu [e buyo ubo abantu batinamina].”—Mat. 11:11, 12.

Umupashi wa kwa Yehova “walompokele” pali Davidi kabili ‘wasosele’ muli wene (1 Sam. 16:13; 2 Sam. 23:2), lelo takwaba ukuli konse uko Baibolo isoso kuti ‘alifyelwe libili.’ Takwali kukabila kwa kuti wene ‘afyalwe libili,’ pa mulandu wa kuti Imilimo 2:34 isoso kuti: “Davidi taninine mu mulu.”

Cinshi cishibisha abantu ilelo abakwata umupashi wa kwa Lesa?

Mona amabula 401, 402, pe samba lya mutwe ukalamba “Umupashi.”

Nga Umo Asoso Kuti—

‘Nalifyalwa libili’

Pambi kuti wayasuko kuti: ‘Ico cipilibulo kuti mwenekela kasuba kamo ukuba na Kristu mu mulu, bushe te ifyo? . . . Bushe mwalibala amulanguluka ico abo bakaya ku mulu bakacita kulya?’ Lyene nakalimo lundapo ukuti: (1) ‘Bakaba ishamfumu kabili bashimapepo, ukuteka pamo na Kristu. (Ukus. 20:6; 5:9, 10) Yesu asosele ukuti aba baali no kuba fye “umukuni unono.” (Luka 12:32)’ (2) ‘Nga bali ishamfumu, kufwile na kabili ukubako abatekwa abo bakatekapo. Ni bani aba? . . . Pano pali ifishinka fimo ifyo nasanga ukube fya kusekesha nga nshi lintu fyaletelwe ku kusakamana kwandi. (Amalu. 37:11, 29; Amapi. 2:21, 22)’

‘Bushe walifyalwa libili?’

Pambi kuti wayasuko kuti: ‘Nalisanga ukuti cintu abantu bapilibula ku “kufyalwa libili” taciba lyonse cimo cine. Bushe kuti mwanjebako ico cipilibula kuli imwe?’

Nelyo kuti wasoso kuti: ‘Mulefwaya ukwishiba nampo nga nalipokelela Yesu ngo Mupusushi wandi no kupokelela umupashi wa mushilo, bushe e ifyo? Shi lekeni mwebekeshe ukuti icasuko ni Ee; nga te ifyo te kuti ndelanda kuli imwe pa lwa kwa Yesu.’ Lyene nakalimo lundapo ukuti: (1) ‘Lelo lintu natontonkanya pa lwa kukwata umupashi wa mushilo, nsanga ubo bushininkisho ukubulila mu nshila ya bulanda ku bengi abaitunga ukuba abena Kristu. (Gal. 5:22, 23)’ (2) ‘Bushe kuti mwaipakisha ukwikala pali ili sonde nga ca kuti uuli onse abelebeshe iyo mibele ya bukapepa? (Amalu. 37:10, 11)’

Ukucitikako kumbi: ‘Nga mulepilibula ukuti, “Bushe nalipokelela Kristu ngo Mupusushi wandi?” icasuko ni Ee. Inte sha kwa Yehova bonse balicite fyo. Lelo, kuli ifwe, ukufyalwa libili kusanshamo ifyacila pali ico.’ Lyene nakalimo lundapo ukuti: (1) ‘Lintu Yesu alandile pa lwa kufyalwa libili asosele ukuti kwali ukwafwaikwa pa kwingila mu Bufumu bwa kwa Lesa, uko e kuti, pa kuba ulubali lwa Bufumu bwa kwa Lesa, kamfulumende wakwe uwa ku mulu. (Yoh. 3:5)’ (2) ‘Baibolo na kabili ilanga ukuti abantu abengi abacita ukufwaya kwa kwa Lesa bakekala pano pe sonde, pamo nga batekwa ba nsansa aba ubo Bufumu. (Mat. 6:10; Amalu. 37:29)’

Ukutubululwa kwalundwapo: Abo aba mwi bumba lya ku mulu kuti bayasuko kuti: ‘Ee, nalifyalwa libili. Lelo Baibolo ilatusoka bonse ukukanaba abacilamo ukuicetekela ku lwa cifulo cesu. Tulekabila ukutwalilila ukuibebeta fwe bene pa kushininkisha ukuti mu cituntulu tulecita cintu Lesa na Kristu bafwaya kuli ifwe. (1 Kor. 10:12)’ Lyene nakalimo lundapo ukuti: ‘Cishingamo nshi Yesu abikile pa basambi bakwe aba cine? (Mat. 28:19, 20; 1 Kor. 9:16)’