ISAMBILILO 09
Mulepepa Kuli Lesa pa Kuti Mupalame Kuli Ena
Bushe mulakabila uwa kumwafwa pa kuti mupingule bwino pa fintu? Bushe mwalikwata amepusho ayacindama ayo mufwaya ukusanga amasuko? Bushe mulakabila ukumusansamusha nelyo ukumukoselesha? Bushe mulafwaya ukupalama sana kuli Yehova? Ipepo kuti lyamwafwa muli ifi fyonse twalandapo. Nomba ni nshila nshi iisuma iya kupepelamo? Bushe Lesa alakutika ku mapepo yonse? Finshi mufwile ukucita pa kuti Lesa alekutika ku mapepo yenu? Natumone.
1. Ni kuli nani tufwile ukupepa, kabili finshi twingapepelapo?
Yesu alandile ukuti tufwile ukupepa fye kuli Shifwe wa ku muulu. Yesu umwine alepepa kuli Yehova. Alandile ukuti: “Mufwile ukulapepa nge fi: ‘Shifwe wa mu muulu . . .’” (Mateo 6:9) Nga tulepepa kuli Yehova, bucibusa bwesu na ena bulakoselako.
Ilyo tulepepa kuti twalomba Lesa icili conse, cikulu fye nacilingana no kufwaya kwakwe. Nga twacita ifi Lesa akasuka amapepo yesu. Baibo itila: “Cikulu fye nacilingana ne fyo Lesa afwaya, alatumfwa.” (1 Yohane 5:14) Yesu alilandile pa fintu fimo ifyo twingapepelapo. (Belengeni Mateo 6:9-13.) Ilyo tulepepa kuli Lesa pa fya pa lwesu, tatufwile ukulaba ukumutasha pa fyo atucitila no kupepelako abantu bambi ukuti nabo abafwe.
2. Bushe tufwile ukupepa shani?
Baibo itukoselesha ‘ukweba Lesa fyonse ifili mu mitima yenu.’ (Amalumbo 62:8) Kanshi amapepo yesu yafwile ukulafuma panshi ya mutima. Kuti twapepa ninshi natwikatishako ishiwi nelyo mu mutima. Nomba bushe tufwile ukucita fimo ifyaibela ilyo tulepepa? Yehova tatweba nga tufwile ukwikala, ukwiminina, nelyo ukufukama ilyo tulepepa. Lelo icacindama sana, kulanga umucinshi kuli ena ilyo tulepepa. Kuti twapepa inshita iili yonse kabili ku cifulo icili conse.
3. Bushe Lesa asuka shani amapepo yesu?
Yehova alasuka amapepo yesu mu nshila ishalekanalekana. Alitupeela Icebo cakwe Baibo umo tusanga amasuko ku mepusho tukwata. Ukubelenga Icebo ca kwa Lesa kuti “[kwalenga] uushaishiba ifingi aba na mano.” (Amalumbo 19:7; belengeni Yakobo 1:5.) Kabili Yehova kuti alenga twateka imitima nga twaba na mafya. Na kabili kuti alenga ababomfi bakwe batwafwa ilyo tulekabila ubwafwilisho.
SAMBILILENI NA FIMBI
Moneni ifyo mwingacita pa kuti mulepepa amapepo ya kufuma panshi ya mutima kabili ayengasekesha Lesa. Lyena moneni ne fyo ukupepa kwingamwafwa.
4. Kwaliba ifyo tufwile ukucita pa kuti Lesa asuke amapepo yesu
Finshi fingalenga Lesa ayasuka amapepo yesu nelyo akaana ukwasuka amapepo yesu? Tambeni VIDIO.
Yehova afwaya tulepepa kuli ena. Belengeni Amalumbo 65:2, lyena lanshanyeni aya mepusho:
Bushe mulemona ukuti ‘Uumfwa amapepo’ alafwaya mulepepa kuli ena? Cinshi mulemwena ifyo?
Nga tulefwaya Lesa aleasuka amapepo yesu tufwile ukulacita ifyo afwaya. Belengeni Mika 3:4 na 1 Petro 3:12, lyena lanshanyeni ici cipusho:
Finshi tufwile ukulacita pa kuti Yehova aleasuka amapepo yesu?
Ilyo kuli inkondo, amabumba ya balelwishanya bonse kuti balepepa ukuti bacimfye. Nomba bushe kuti twaenekela Lesa ukwasuka amapepo ya musango uyu?
5. Amapepo yesu yafwile ukulafuma panshi ya mutima
Abantu bamo babasambilisha ukulapepa amapepo ya kusungila pa kuti baleyabwekeshapo libili libili. Nomba bushe ifi e fyo Lesa afwaya ukuti tulepepa kuli ena? Belengeni Mateo 6:7, lyena lanshanyeni ici cipusho:
Kuti mwacita shani pa kuti ‘mwilabwekeshapo ukulanda amashiwi yamo yene’ ilyo mulepepa?
Cila bushiku muletontonkanya pa fisuma ifyo Yehova amucitila kabili mulemutasha pali ifyo fintu. Nga mwacita ifi pa mulungu umo, ninshi namupepela pa fintu 7 ifyalekanalekana ukwabula ukubwekeshapo fimo fine ilyo mulepepa.
Umufyashi umwaume umusuma afwaya umwana wakwe alemweba ifili ku mutima. Yehova na o afwaya tulepepa kuli ena ukufuma pa nshi ya mutima wesu
6. Ipepo bupe ubo Lesa atupeela
Bushe ipepo kuti lyalenga shani twaba na maka, maka maka ilyo tuli na mafya? Tambeni VIDIO.
Baibo yalitulaya ukuti ipepo kuti lyalenga twateka umutima. Belengeni Abena Filipi 4:6, 7, lyena lanshanyeni aya mepusho:
Nangu ca kuti inshita shimo ukupepa te kuti kulenge amafya tukwete ukupwa, bushe ipepo litwafwa shani?
Fintu nshi fimo ifyo mwingatemwa ukupepelapo?
Bushe mwalishiba ici cishinka?
Ishiwi lya kuti “ameni” lipilibula ukuti “na cibe ifyo fine” nelyo “ca cine.” Ukufuma mu nshita balelemba Baibo, abantu balalanda ukuti “ameni” pa mpela ye pepo.—1 Imilandu 16:36.
7. Mulepaatulako inshita ya kupepa
Nalimo inshita shimo kuti twapamfiwa sana ica kuti twalaba no kupepa. Bushe ipepo lyacindeme shani kuli Yesu? Belengeni Mateo 14:23 na Marko 1:35, lyena lanshanyeni aya mepusho:
Bushe Yesu alecita shani pa kuti asangeko inshita ya kupepa?
Ni nshita nshi mwingapepa?
ABANTU BAMO BATILA: “Ukupepa kuicusha fye, pantu takwaba uwasuka amapepo.”
Imwe muletipo shani?
IFYO MUSAMBILILE
Amapepo ya kufuma panshi ya mutima yalalenga twapalama sana kuli Lesa, yalatwafwa ukuteka umutima, kabili yalatupeela amaka ya kulacita ifilenga Yehova ukusekelela.
Ukupitulukamo
Ni kuli nani tufwile ukupepa?
Bushe tufwile ukupepa shani?
Bushe ukupepa kutwafwa shani?
ISHIBILENIPO NA FIMBI
Sangeni amasuko ku mepusho ayo abantu bepusha sana pe pepo.
“Ifintu 7 Ifyo Mulingile Ukwishiba pa Ipepo” (Ulupungu lwa kwa Kalinda, October 1, 2010)
Sambilileni ico cacindamina ukulapepa, ne fyo mwingacita pa kuti mulepepa amapepo ayasuma.
Moneni ifyo Baibo isambilisha pa uo tulingile ukupepako.
“Bushe Mfwile Ukupepa ku Batakatifu?” (Icipande ca pa jw.org)
Muli iyi vidio ya lwimbo, moneni nga kuti twapepa ilyo tuli ku cifulo icili conse kabili pa nshita iili yonse.