Ebe Mak
13 Vbe Jesu khian ghi ladian vbe ọgua Osa, ọkpa vbe erhuanegbe ẹre na tama rẹn wẹẹ: “Ọmamwaemwi, u miẹn vbene avbe owa na kevbe avbe okuta na ya bọe mose hẹ!” 2 Vbọrhirhighayehẹ, Jesu na tama rẹn wẹẹ: “U bẹghe avbe owa nikhua na? Okuta ọkpa i rrọọ na khian zẹdẹ sẹrae ye uhunmwu okuta ọvbehe vbe emwa na, te a khian guọghọ ehia sotọ.”
3 Vbe ọ ghi tota ye uhunmwu Oke Ọliv, ọ na ke evba gha bẹghe ọgua Osa; ẹre Pita, e Jems, e Jọn kevbe Andru na do nọ rẹn ọta. Iran ọkpa ẹre ọ bu ẹre gha dee. Iran na nọ rẹn wẹẹ: 4 “Tama ima, de ẹghẹ ne avbe emwi na khian ya sunu? De ama nọ khian rhie ẹre ma wẹẹ, ẹghẹ ne emwi na hia khian ya sẹ ufomwẹ sẹ nẹ?” 5 Ẹre Jesu na suẹn gha tama iran wẹẹ: “Wa gha begbe, ne ọmwa rhọkpa ghẹ mu uwa rẹrẹ. 6 Emwa nibun gha rre, iran ghi mu eni mwẹ gue aro, iran ghi gha kha wẹẹ, ‘Mẹ ẹre nọ,’ iran ghi vbe mu emwa nibun rẹrẹ. 7 Yevbesọni, deghẹ uwa na họn vbe emwa ghaa khọn okuo, wa na vbe họn iyẹn ọghe okuo ne emwa khọn vbe ihe ọvbehe, wa ghẹ fian afianma; ẹ i mwẹ ena hia ma sunu, sokpan, ọni ma rhie ma wẹẹ, ufomwẹ rre nẹ.
8 “Agbẹnvbo ghi gha gu agbẹnvbo khọn, arriọba ghi vbe gha gu arriọba khọn; igbohiotọ ghi gha sunu vbe ehe ughughan; ukhunmwu ghi gha fi.* Ena ọre omuhẹn ọghe ẹghẹ ibavbaro.*
9 Nọ ne uwa, wa gha begbe. Emwa gha silo uwa gha rrie ekọtu, iran ghi vbe ya ugbemwẹ yan uwa vbe sinagọg,* iran ghi vbe viọ uwa mudia vbe odaro avbe gọvinọ kevbe avbe ọba rhunmwuda mwẹ, nọ gha re osẹ ne iran. 10 Deba ọni, te a gha ka kporhu iyẹn nọ maan nẹ, vbe agbẹnvbo hia. 11 Vbe ẹghẹ ne iran ya silo uwa khian, ne iran ya viọ uwa ne emwa ni rre ukpo ọdakha, wa ghẹ si osi ye ẹmwẹ ne uwa khian ta; sokpan, ẹmwẹ ke ẹmwẹ na rhie ye uwa unu vbe ẹghẹ nii, wa ghi tae, rhunmwuda, ẹ i re uwa tobọ uwa ẹre ọ guan, sokpan, orhiọn nọhuanrẹn nọ. 12 Yevbesọni, ọtẹn gha mu ọtiọnrẹn ladian na gbe ẹre rua, erha gha vbe mu ọmọ ladian na gbe ẹre rua, emọ ghi gha gu evbibiẹ iran khọn, iran ghi vbe silo iran ladian na gbele iran rua. 13 Emwa hia ghi vbe gha khẹko uwa rhunmwuda mwẹ.* Sokpan, ọmwa nọ zin egbe sẹ ufomwẹ, ẹre ọ khian miẹn fan.
14 “Vbọrhirhighayehẹ, wa gha miẹn wẹẹ, emwi osọnnọ nọ si ọfuan, mudia ye ehe nọ ma khẹke nọ mudia yi (ọmwa nọ tie ẹmwẹ na, ghi hia nọ rẹn otọ re), ẹghẹ nii, gi emwa ni rre Judia wa lẹẹ gha rrie uhunmwu oke. 15 We ne ọmwa nọ rre uhunmwu owa* ghẹ tuorre, amaiwẹ te ọ khian gha rrie uwu owa, nọ ya rhie emwi ke emwi ladian vbe owa ẹre; 16 we ne ọmwa nọ rre ugbo ghẹ vbe werriegbe gha rrie eke ne emwi nọ sẹrae ye, nọ ya mu ẹwu nọ yọ ke odukhunmwu. 17 U miẹn vbene ọ gha baa so ikhuo ni hanmwa hẹ kevbe ikhuo ni mwẹ emobọ vbe ẹghẹ nii! 18 Wa gha na erhunmwu, nẹ ghẹ sunu vbe ẹghẹ oni;* 19 rhunmwuda, ẹghẹ orueghe ẹre ẹghẹ nii khian gha khin, egbe na ma he miẹn ẹdẹ, ke ẹghẹ ne Osanobua ya bu agbọn tu agbọn gha dee do sẹ ẹghẹ na, a i khian ghi vbe dọlegbe miẹn egbọre. 20 Vbene ẹmwata, vbe ẹ i re te Jehova* fian ẹghẹ nii kanmwa, orhunmwu ọkpa i rrọọ nọ khian miẹn uhunmwu. Sokpan, rhunmwuda emwa ne irẹn hannọ zẹ,* ọ fian ẹghẹ nii kanmwa nẹ.
21 “Deba ọni, adeghẹ ọmwaikọmwa na tama uwa wẹẹ, ‘Do ghee Kristi mwa!’ ra, ‘Ya ghee ẹre vba!’ wa ghẹ yaeyi. 22 Rhunmwuda, avbe Kristi ọghe ohoghe kevbe avbe akhasẹ ohoghe gha rre, iran ghi gha winna iwinna ọyunnuan ughughan, ne iran mieke na bibi emwa odẹ; deghẹ ọ gha gi iran ru, iran ghi kue bibi emwa na hannọ zẹ odẹ. 23 Nọnaghiyerriọ, wa gha bodẹ. I tama uwa yotọ nẹ, emwi hia ni khian sunu.
24 “Sokpan, vbe ẹghẹ nii, orueghe nii gha ghi dobọ yi nẹ, ovẹn ghi wa so ebiebi, uki i khian ghi gha baa, 25 avbe orhọnmwẹ ghi gha ke iso kharha kua, a ghi vbe mu avbe ẹtin ni rre ideghedeghe iso rueghe. 26 Ẹghẹ nii, iran ghi bẹghe Ovbi ọmwa, vbe ọ ghaa ke okuku dee, ke irẹn kevbe ẹtin nọkhua kevbe uyi nọ mwẹ. 27 Ẹghẹ nii, ọ ghi gie avbe odibo ẹre ladian, ọ ghi si emwa rẹn na hannọ zẹ koko vbe igienenẹ ọghe agbọn na,* ke ehe ne agbọn sẹ, ya sẹ ehe ne ẹrinmwi rhanmwẹ.
28 “Nian, wa ghee igiemwi ọghe erhan e fig: Ọ gha wa suẹn gha zẹlẹ abọ ne sọguọsọguọ nẹ, ọ na vbe suẹn gha họọn ebe ladian, wa ghi rẹn wẹẹ, ẹghẹ uyunmwu* bu otọ nẹ. 29 Erriọ vbe ye, wa gha bẹghe ẹre wẹẹ avbe emwi na sunu nẹ, wa ghi rẹn wẹẹ, ọ sẹ ẹghẹ ne Ovbi ọmwa khian ya rre nẹ.* 30 Ne I ta ẹmwata ma uwa, orre na i khian wulo fo,* a te miẹn wẹẹ ena hia sunu. 31 Ẹrinmwi kevbe agbọn gha khian ena ho bẹkun, sokpan, ẹmwẹ ne I tae i khian de fua hiehie.
32 “Vbe nọ dekaẹn ẹdẹ ne ẹdẹrriọ, ra ẹghẹ nọ khin, ọmwa rhọkpa ma rẹn, avbe odibosa ni rre ẹrinmwi ma rẹn, Ọmọ ma vbe rẹn, vbọ gberra Evbavba. 33 Wa gha bodẹ, wa ghẹ vbiẹ,* rhunmwuda, wa ma rẹn ẹghẹ na bu yọ. 34 Te ọ yevbe okpia ọkpa, nọ khian kpa gha rrie isi, ọ na sẹ owa ẹre rae, ọ na rhie asẹ ne eviẹn ọnrẹn, ọ na mu iwinna ne dọmwadẹ ọghẹe, ọ na tama ukọ onurho, nọ gha bodẹ. 35 Nọnaghiyerriọ, wa gha bodẹ, rhunmwuda, wa ma rẹn ẹghẹ ne ọdafẹn nọ yan owa khian ya rre, deghẹ ẹghẹ ota nọ, ra ogiasọn nọ, ra ọ ghaa bu ẹghẹ ne ẹdẹ khian ya gbe* nọ, ra owiẹ fioro. 36 A i rẹn vbe ọ gha rre vbe udomwurri, nẹ ghẹ do vba uwa vbe uwa ghaa vbiẹ. 37 Sokpan, emwi ne I tama uwa, ẹre I vbe tama emwa hia: Wa gha bodẹ.”