May
Sunday, May 1
Ọ kegha họn ẹmwẹ ne iran.—Luk 2:51.
Vbe Jesu waan dee, te ọ wa gha họn ẹmwẹ ne evbibiẹ ọre. Ọ ma mwẹ ẹghẹ ọkpa nọ ya he ẹmwẹ ye iran obọ, nọ gha kha wẹẹ irẹn ẹre ọ rẹn sẹ iran. Ọmwa rhọkpa ma kpikpi Jesu ya ru ọna, irẹn tobọre ẹre ọ zẹ ne egbe ẹre wẹẹ, irẹn gha họn ẹmwẹ ne evbibiẹ ọre. Zẹvbe ọmọ ọdiọn, Jesu wa gha mwẹ iwinna nibun nọ bi yọ re izabọ. Ẹi mwẹ Jesu ma hia vbene ẹtin ẹnrẹn sẹ nọ ya sẹtin ru iwinna na. Ọ keghi hia nọ ruẹ iwinna ekabita vbe obọ erhae, nọ mieke na sẹtin gha ru iyobọ ne ẹgbẹe ọre. Ọ gha kẹ, e Josẹf vbe Meri tama e Jesu vbekpae odẹ ọghe ọyunnuan na ya biẹ ọre, kevbe emwi ne eguọmwadia Osanobua eso tae vbekpa ẹre. (Luk 2:8-19, 25-38) Sokpan e Jesu ma wa hẹwẹ vberriọ, ọ na vbe tobọre gha zanzan Evbagbẹn Nọhuanrẹn. Vbe ima ya rẹn hẹ? E Baibol gi ima rẹn wẹẹ, vbe Jesu ye kherhe, “unu keghi yan [avbe ọmamwaemwi ni rre Jerusalẹm] ni danmwehọ ẹre, ye ẹwaẹn ne ọ ya rhie ewanniẹn ye inọta.” (Luk 2:46, 47) Agharhemiẹn wẹẹ, ukpo 12 kẹkan ẹre Jesu ghaa ye vbe ẹghẹ nii, ọ rẹn nẹ wẹẹ e Jehova ọre Erha irẹn.—Luk 2:42, 43, 49. w20.10 29-30 ¶13-14
Monday, May 2
A huẹn Jesu kpaegbe vbe idin nẹ.—1 Kọr 15:12.
Ne ima na rẹn wẹẹ Jesu gele rhiọ kpaegbe, ẹre ọ si ẹre ne ima na yayi wẹẹ emwa ni wulo gha vbe rhiọ kpaegbe. E Pọl ghi suẹn gha guan kaẹn arhiọkpaegbe vbe elẹta nọ gbẹn, ọ na sunu ye emwi eha ne kpataki: (1) “Kristi wu ba ẹmwẹ orukhọ mwa,” (2) “a ree ẹre,” (3) “a keghi vbe dọlọ huẹn ọnrẹn kpaegbe vbe ikpẹdẹ ne ogieha zẹvbe na gbẹn ọnrẹn ye Ebe.” (1 Kọr 15:3, 4) De vbene emwi eha na ya dekaẹn ima hẹ? Akhasẹ Aizaia ghi guan kaẹn Mẹzaia, ọ na wẹẹ a gha “gbe ẹre rua,” a ghi vbe “muẹn ye idin ba emwa dan.” Ọ na vbe kha wẹẹ te ọ khian “rhie ihe emwa orukhọ nibun.” Odẹ ne Jesu ya ru ọna, ọre nọ na ya arrọọ ọghẹe dẹ ima werriegbe. (Aiz 53:8, 9, 12; Mat 20:28; Rom 5:8) Ne Jesu na wu, ne a na ree ẹre kevbe nọ na rhiọ kpaegbe, ẹre ọ si ẹre ne ima na mwẹ ilẹkẹtin wẹẹ, ma gha miẹn afanvbimu vbe obọ ẹtin orukhọ kevbe uwu, kevbe wẹẹ ma gha dọlegbe miẹn emwa ima ni wulo. w20.12 2-3 ¶4-6; 5 ¶11
Tuesday, May 3
Adeghẹ ọmwa rhọkpa mwẹ emwi vbe ikinnegbe ne ọ gha yae rhuọ, mẹ nọ. Adeghẹ ọmwa ọvbehe roro ẹre wẹẹ, irẹn mwẹ emwi vbe ikinnegbe ne ọ gha yae gha rhuọ, ne imẹ mwẹ ẹre ọ sẹ re.—Fil 3:4.
Uwu e sinagọg ọghe Ivbi e Ju ẹre ukọ e Pọl na mobọ gha kporhu. Vbe igiemwi, “ẹdẹ ikẹtin eha” ẹre ukọ e Pọl ya gu Ivbi e Ju ziro yan Evbagbẹn Nọhuanrẹn vbe sinagọg nọ rre Tẹsalonaika. (Iwinna 17:1, 2) Zẹvbe Ovbi e Ju, te Pọl wa gha kpẹkpẹ vbuwe sinagọg, rhunmwuda ọni, ikporhu na kpe vba, ma zẹdẹ gha lọghọ ọre. (Iwinna 26:4, 5) Ugbẹnvbe a miẹn wẹẹ Ovbi e Ju ẹre Pọl ghaa khin, te ọ wa gha si agbada vbe unu guan, vbe ọ kporhu ma Ivbi e Ju ne ihua re. (Fil 3:5) Vbe emwa ghi zẹ kpokpo ukọ e Pọl vbe Tẹsalonaika, ọ na gha rrie Bẹrea, sokpan iran ma vbe gi egbe rọkhọ ọre vba, rhunmwuda ọni, ọ na lẹẹ gha rrie Atẹns. Vbe ọ ghi sẹ evba, ọ na suẹn gha “gu avbe Ju kevbe emwa nẹi re Ju ni vbe ga Osanobua” ziro vbuwe sinagọg. (Iwinna 17:17) Sokpan vbe ọ ghi kporhu vbe adesẹ ẹki, emwa ni rri egie ebe kevbe emwa ni ma rẹn Osanobua ẹre Pọl ghi dekun. Iran kegha ghee ikporhu ọghe Pọl zẹvbe “iruẹmwi ọgbọn.” Iran keghi tama e Pọl wẹẹ: “Eso vbuwe ẹmwẹ ne u ta, ẹmwẹ ọgbọn wa nọ vbe ehọ [ima].”—Iwinna 17:18-20. w20.04 9 ¶5-6
Wednesday, May 4
Mẹ gha wẹ ne I ru emwi esi, emwi dan ọkpa ọre ẹtin mwẹ sẹ.—Rom 7:21.
Ọ ghaa mwẹ ako eso ne u winna yan vbe arrọọ ruẹ, ghẹ roro ẹre wẹẹ, ọghuẹ wa fo nẹ. Yerre wẹẹ, ai miẹn ọmwa nọ fo na. Vbe ẹi re ne Jehova na tohan ima, nọ na gie Ovbi ẹre gha dee nọ do wu ne ima, ma rhọkpa i ghẹ te sẹtin gha re ọsiọre. (Ẹfis 1:7; 1 Jọn 4:10) Ma gha sẹtin miẹn igiọdu vbe obọ etẹn ni rre uwu iko! Ma ghaa gualọ ọmwa ne ima khian ta enegbe ima ma, etẹn ni rre uwu iko mu egbe ne iran ya rhie ehọ ne ima ta yi kevbe ne iran ya rhie igiọdu ne ima. (Itan 12:25; 1 Tẹs 5:14) Ọ mwẹ ọtẹn nokhuo ọkpa vbe Nigeria na tie ẹre Joy, nọ ghaa mwẹ ọlọghọmwa eso nọ ya iro han rẹn. Ọ khare wẹẹ: “Etẹn ni rre uwu iko ẹre ọ zẹe vbe egbe mwẹ. E Jehova wa gele loo iran ya họn erhunmwu mwẹ. Nia, te imẹ tobọ mwẹ ghi vbe rẹn vbene a ya rhie igiọdu ne emwa ne iro han rẹn.” Ọ khẹke ne ima kọe ye orhiọn wẹẹ, ẹi re ẹghẹ hia ẹre etẹn ima khian wa ya rẹn wẹẹ, ma gualọ igiọdu. Rhunmwuda ọni, ọ khẹke ne ima zẹ owẹ nokaro, ne ima tama ọtẹn nọ deziẹn vbe odẹ ọghe orhiọn, vbene emwi ye ima hẹ. w20.12 23-24 ¶7-8
Thursday, May 5
Ọse mwẹ ẹre I ghi tie uwa re.—Jọn 15:15.
Owẹ nokaro na ka zẹ deghẹ a na gha hoo na gu ọmwa ru ọse ọre wẹẹ, a ghi hia na sikẹ ọre. Uwẹ vbe ọmwa gha ghi suẹn gha guan nẹ, wa ghi do gha fannọ otọ ẹko ma egbe. U ke rẹn emwi nọ sunu, uwa khian ọse nẹ. Sokpan na do gha re ọsie Jesu i khuẹrhẹ vberriọ. Vbọsiẹ? Emwi nokaro nọ yae lọghọ ne ima sẹtin gha re ọsie Jesu ọre wẹẹ, ima ma he ka miẹn Jesu ẹdẹ. Ivbiotu e Kristi ni ghaa rrọọ vbe orre nokaro vbe werriẹ aro daa isievẹn vbenian. Ọrheyerriọ, ukọ e Pita keghi kha wẹẹ: “Egbe ne uwa ma rhe ya miẹn ọre aro, wa ye hoẹmwẹ ọnrẹn, egbe ne uwa ma he rhe ya miẹn ọnrẹn nian, wa ye yaeyi.” (1 Pit 1:8) Ọna rhiema wẹẹ, ma gha sẹtin gha gu e Jesu mwẹ asikẹgbe ne khuankhuankhuan, agharhemiẹn wẹẹ, ima ma he ka miẹn ọnrẹn ẹdẹ. Deba ọni, ma i sẹtin gu Jesu guan. Ma ghaa na erhunmwu, e Jehova ẹre ima gu guan. Agharhemiẹn wẹẹ, eni Jesu ẹre ima ya na erhunmwu, ẹi irẹn ẹre ima na erhunmwu gie. Ẹmwata nọ rrọọ ọre wẹẹ, Jesu ma hoo ne ima gha na erhunmwu gie irẹn. Vbọzẹe? Rhunmwuda, erhunmwu keghi re odẹ ọkpa ne ima ya rhie ugamwẹ ne Jehova, deghẹ ima na gha na erhunmwu gie Jesu, ọni rhiema wẹẹ, te ima ghi rhie ugamwẹ nọ khẹke Jehova ọkpa ne ọmwa ọvbehe. (Mat 4:10) Ọrheyerriọ, ma gha ye sẹtin rhiẹre ma wẹẹ, ma hoẹmwẹ Jesu. w20.04 20 ¶1-3
Friday, May 6
[Osanobua] ghi rhie a mudia gbain nuẹn, ẹtin kevbe ẹyotọ ne ọ de ziẹn.—1 Pit 5:10.
Emwa ni ghaa rhie ulẹ ọghe osuan ọghe Ivbi e Grik nẹdẹ ghaa werriẹ aro daa isievẹn eso; vbe igiemwi, iran ghaa rhulẹ, egbe sẹtin wọọ iran, iran sẹtin vbe miẹn ikuanegbe. Sokpan rhunmwuda ne iran na ka mu egbe yotọ kevbe ne a na ka rhie adia ne iran, iran ghi ye gha ziga, iran ghi vbe ya ẹtin iran hia gha rhulẹ. Erriọ ima vbe ye, adia ne ima miẹn keghi ru iyobọ ne ima ya gha ziga vbe ulẹ ọghe arrọọ. Sokpan, ne ọghe ima ya maan sẹ ọghe emwa ni rhie ulẹ ọghe osuan ọre wẹẹ, ẹi re ẹtin obọ ima ẹre ima ya rhie ulẹ na, e Jehova ne Osa ne olẹtin ẹre ọ rhie ẹtin ne ima. Ma gha mu ẹtin yan e Jehova, ọ gha rhie adia nọ khẹke ne ima, ọ ghi vbe ya ima khian nọ wegbe! Ẹi re avbiẹ isievẹn ẹre ukọ e Pọl werriẹ aro daa. Emwa rhovbiẹ ọre, ọ miẹn ukpokpo, ọ ghaa mwẹ ẹghẹ ne egbe ya wọọ re; deba ọni, ọ vbe werriẹ aro daa ọlọghọmwa nọ yevbe igban nọ solo ọmwa vbuwe egbe. (2 Kọr 12:7) Sokpan e Pọl ma gi ẹtin fuẹ, rhunmwuda avbe isievẹn nọ werriẹ aro daa, nọghayayerriọ, ọ kegha ghee avbe isievẹn na zẹvbe ẹkpotọ nọ kie ne irẹn, ne irẹn ya mu ẹtin yan e Jehova. (2 Kọr 12:9, 10) Rhunmwuda ne Pọl na gha mwẹ egbe iziro vberriọ, e Jehova keghi ru iyobọ nẹẹn ya la avbe isievẹn na gberra. w20.04 29 ¶13-14
Saturday, May 7
Ọmwa ne ọ gha sẹtin bu mwẹ gha dee ẹ i rrọọ, vbe ẹ i re wẹ Erha mwẹ ọre ọ si ẹre re.—Jọn 6:44.
Ma keghi gu e Jehova, Jesu kevbe avbe odibosa “winna” kugbe. Ukpamuyọmọ nọkhua ẹre ọna wa khin! (2 Kọr 6:1) Ẹghẹ ke ẹghẹ ne ima ya kporhu, te ima gu e Jehova, Jesu kevbe avbe odibosa winna kugbe. E Pọl ghi gbẹn ebe gie etẹn ni ghaa rre Kọrinti, ọ na kha wẹẹ, te irẹn vbe iran gu Osanobua winna. (1 Kọr 3:9) Ẹghẹ ke ẹghẹ ne ima ya kporhu iyẹn nọ maan, te ima vbe gu e Jesu winna. Vbe Jesu ghi tama erhuanegbe ẹre nẹ, ne iran “gha ya [emwa] khian erhuanegbe” irẹn, ọ na vbe tama iran wẹẹ: “I gha gu uwa gha rrọọ vbe ẹghẹ hia.” (Mat 28:19, 20) Avbe odibosa vbe vbo? Iran ẹre ọ dia ima, ne ima na sẹtin kporhu “iyẹn nọ maan ọghe ẹdẹdẹmwẹdẹ . . . ma emwa nagbọn.” Ukpamuyọmọ nọkhua ẹre ọna wa khin! (Arhie 14:6) De emwi ne ima he fiangbua vbe iwinna ikporhu iyẹn nọ maan, rhunmwuda iyobọ ọghe Jehova, Jesu kevbe avbe odibosa? Zẹvbe ne ima ya kọ ikpẹ ọghe ẹmwata ye ekhọe emwa, eso ghi miẹn ọnrẹn yi, iran ghi vbe gha mwẹ alaghodaro. (Mat 13:18, 23) Sokpan de ọmwa nọ ya ikpẹ ọghe ẹmwata zọ vbe ekhọe emwa, sẹrriọ wẹẹ, iran ghi do gha mwẹ alaghodaro? Ọna ẹre Jesu ghaa guan kaan vbe ako evbagbẹn nọhuanrẹn ne ebe ẹdẹ ọghe ẹdẹnẹrẹ ke ladian. w20.05 30 ¶14-15
Sunday, May 8
Wa ghẹ ya egbe ba emwi ne agbọn na ru.—Rom 12:2.
Te ọdọ vbe amwẹ nibun ghi wa sọ ebe orọnmwẹ. Uhiẹn ẹgbẹe eso ma ghi mobọ rẹn egbe iran, agharhemiẹn wẹẹ owa ọkpa ẹre iran koko ye. Okpia ọkpa nọ rhie ibude ne ẹgbẹe khare wẹẹ, “Ke erha, ke iye, ke emọ, nọ ghi mwẹ ẹghẹ ne egbe i rrọọ; ẹmwẹ ekọmputa, efoni kevbe gem i ghi gi iran bẹghe odẹ. Te iran rre owa ọkpa kẹkan, sokpan iran ma mobọ rẹn egbe iran.” Ma ma hoo ne agbọn Esu na, ya ima khian nẹi ghi mwẹ ahoẹmwọmwa. Nọghayayerriọ, te ọ khẹke ne ima hia, ne ima gha mwẹ agiẹngiẹn daa ẹgbẹe ima kevbe etẹn ne ima gba ga. (Rom 12:10) Vbọ re agiẹngiẹn? Agiẹngiẹn ọre ẹmwẹ na gha sẹtin ya gie ahoẹmwọmwa nọ wegbe ne emwa vbuwe ẹgbẹe mwẹ ne egbe. Egbe ahoẹmwọmwa na, ẹre ọ vbe khẹke ne ima gha mwẹ ne etẹn ne ima gba ga, ni re ẹgbẹe ima vbe odẹ ọghe orhiọn. Ma ghaa mwẹ agiẹngiẹn daa egbe, ma ghi do gha mwẹ akugbe sayọ vbuwe iko ọghe Jehova.—Mai 2:12. w21.01 20 ¶1-2
Monday, May 9
Gu mwẹ sẹtin gha ya ekhọe hia mu ohan eni ruẹ.—Psm 86:11, NW.
Ọ gha lọghọ ne ọkpa gbe ifuẹn ne ẹbu ni koko gbe ibọru nẹi mwẹ akugbe. Sokpan, deghẹ ẹbu emwa ni koko gbe ibọru na gha mwẹ akugbe, ẹi mwẹ iran ma musọe. Uwẹ tobọ ruẹ gha vbe sẹtin musọe deghẹ iziro ọghe ekhọe ruẹ, emwi ne u hoo kevbe aro ne u ya ghee emwi na gua ilele ọghe Jehova ro. Ghẹ mianmian wẹẹ, Esu gha hia vbe odẹ ke odẹ nọ mu ruẹ ekhọe rhia. Ma sẹtin rẹn emwi nọ khẹke ne ima ru, nọ gha ya ẹko rhiẹnrhiẹn e Jehova, sokpan Esu hoo nọ ghae ekhọe ima, ọ hoo ne iziro ọghe ekhọe ima gbodan ghee ilele ọghe Jehova. Vbọrhirhighayehẹ, ekhọe hia ẹre ọ khẹke ne ima ya gha ga e Jehova. (Mat 22:36-38) Nọnaghiyerriọ, ghẹ kie ẹkpotọ ne Esu, nọ ya mu ruẹ ekhọe rhia! Vbe na ghee Devid, rinmwian e Jehova nọ ru iyobọ nuẹn, ne u “sẹtin gha ya ekhọe hia mu ohan eni” ẹnrẹn. U ghi vbe gha hia ne emwi ne u rhirhi gha ru gua erhunmwu nii ro. Nọnaghiyerriọ, gi emwi ke emwi ne u ru vbe ẹdẹgbegbe gha rhiẹre ma wẹẹ, u ya aro nọ ghaan ghee eni nọhuanrẹn ọghe Jehova. Ma hia ghaa ru vberriọ, te ima rhie ọghọ ne eni ọghe Jehova zẹvbe emwa ni ya eni nii wan egbe. (Itan 27:11) Ẹghẹ nii, ma hia fẹẹrẹ ghi sẹtin deba akhasẹ ighẹ e Maika kha wẹẹ, te ima khian “gha họn ẹmwẹ ne Nọyaẹnmwa ne Osanobua ima ẹdẹdẹmwẹdẹ.”—Mai 4:5. w20.06 13 ¶17-18
Tuesday, May 10
Ọ ghi wa ye ọkpankpan gha gbinna, ọ ghi gbele emwa nibun.—Dan 11:44.
Ọba ọghe okuọ kevbe arriọba nikẹre gha werriẹ aro daa eguọmwadia Osanobua, ẹko i khian rhiẹnrhiẹn Osa Ne Udazi hiehie. Ohu nọ khian gha mu e Jehova, ẹre ọ khian ya okuo ọghe Amagẹdọn mu sa. (Arhie 16:14, 16) Vbe okuo Amagẹdọn, Osanobua gha fuẹn iran rua ighẹ ọba ọghe okuọ kevbe arriọba nikẹre ni mudia ye ihe Gọg ọghe Magọg. Ọmwa rhọkpa i rrọọ nọ khian ye ọba ọghe okuọ obọ vbe ẹghẹ nii.” (Dan 11:45) Ebe Daniẹl 12:1 gi ima rẹn vbene ọba ọghe okuọ kevbe avbe arriọba ni ye ẹre ike khian ya gbẹro hẹ kevbe vbene Osanobua khian ya miẹn ima fan hẹ. De emwi ne ẹmwẹ nọ rre ako na demu? E Maikẹl ọre eni ọvbehe na tie Jesu Kristi ne Ọba mwa. Te Maikẹl wa “gbaroghe” emwa ọghe Osanobua, ke obọ na ya mu Arriọba Osanobua gbọọ vbe ẹrinmwi vbe ukpo 1914. Vbe okuo Amagẹdọn, e Maikẹl “gha yegbe ladian,” nọ gbinna ne emwa ọghe Osanobua. Okuo na, ẹre ọ khian muẹn sẹ ufomwẹ, ẹghẹ ne Daniẹl tie ẹre “ẹghẹ orueghe . . . nọ he khọrhiọn sẹ, ke na ya bu agbọn tua agbọn.” Vbe Jọn ghi guan kaẹn ẹghẹ nọ khian su fi okuo Amagẹdọn, ọ na tie ẹre “ukpokpo nọkhua,” ra orueghe nọkhua.—Arhie 6:2; 7:14. w20.05 15-16 ¶16-17
Wednesday, May 11
Ivbi Ismẹl keghi mu e Josẹf gha rrie Igipt.—Gẹn 39:1.
Agharhemiẹn wẹẹ, e Josẹf ma sẹtin guọnmwẹ egbe, nọ fan egbe ẹre zẹvbe ọviẹn kevbe oleghan, vbọ ru iyobọ nẹẹn ya sẹtin zin egbe? E Josẹf ma rhie aro tua emwi nẹi sẹtin ru, nọghayayerriọ, ọ na gha ya ekhọe hia winna iwinna na waa re. Emwi nọ gha ya e Jehova ghọghọ ẹre Josẹf ghaa ru vbe ẹghẹ hia. Rhunmwuda ọni, e Jehova kegha fiangbe emwi hia ne Josẹf rhie obọ yi. (Gẹn 39:21-23) Okha ọghe Josẹf ye ima ẹre rre wẹẹ, emwa sẹtin gha ya obọ dan mu ima vbe agbọn ne ima ye na. Uhiẹn, etẹn ne ima gba ga sẹtin ru ima emwi eso nọ da ima sẹ ugboloko. Sokpan deghẹ ima na gha ghee Jehova zẹvbe Ugue ọghe ima, iro i khian han ima sẹrriọ wẹẹ, ne ima sẹ e Jehova rae. (Psm 62:6, 7; 1 Pit 5:10) Yerre wẹẹ, odẹ ukpo 17 ẹre Josẹf ghaa ye, vbe Jehova yae minna iminna eva nii. Igbama nibun rrọọ vbe ẹdẹnẹrẹ ni yevbe Josẹf. Iran mwẹ amuẹtinyan dae Jehova. Eso vbuwe iran rre eghan rhunmwuda imudiase ọghe iran. E Jehova wa mwẹ ilẹkẹtin wẹẹ, avbe igbama na kevbe igbama nibun ọvbehe i khian ya ekhue mu irẹn.—Psm 110:3. w20.12 16 ¶3; 17 ¶5, 7
Thursday, May 12
Iran ghi gbe iran asan nẹ, iran keghi dọlegbe yan ma iran ne iran ghẹ ghi ta ẹmwẹ rhọkpa vbe eni Jesu.—Iwinna 5:40.
Ukọ e Pita kevbe ukọ e Jọn kegha ghọghọ, vbe ẹghẹ ne emwa na gha zẹ iran kpokpo, rhunmwuda ne iran na gha lele Jesu kevbe ne iran na gha maa emwa emwi vbekpa re. (Iwinna 4:18-21; 5:27-29, 41, 42) Iran ma gi ekhue mu iran hiehie. Vbene ẹmwata, emwi ne iran fiangbua vbe okiekie, sẹ emwi ne avbe eghian ọghe iran fiangbua. Vbe igiemwi, ebe ne Osanobua loo eso vbuwe iran ya gbẹnnẹ wa ye ru iyobọ ne ọkhọngborrie emwa vbe ẹdẹnẹrẹ. Arriọba ne iran vbe ya gha wewe vbe ẹghẹ nii, suẹn gha khaevbisẹ nẹ vbe ẹrinmwi, vbe nẹi khian ghi kpẹẹ gbe, ọ gha vbe gha khaevbisẹ yan uhunmwu otagbọn hia. (Mat 24:14) Avbe arriọba ni ghaa zẹ Ivbiotu e Kristi kpokpo vbe ẹghẹ nii ghi vbo nia? Iran i ghi rrọọ! Sokpan, Ivbiotu e Kristi ne iran ghaa kpokpo vbe ẹghẹ nii rre ẹrinmwi nia, iran gha kha zẹvbe ọba. Sokpan, iran ni ghaa zẹ iran kpokpo vbe ẹghẹ nii wulo kua nẹ; iran na dobọ rhiọ kpaegbe, Ivbiotu e Kristi ne iran te gha zẹ kpokpo ẹre ọ khian ghi gha kha yan iran.—Arhie 5:10. w20.07 15 ¶4
Friday, May 13
Te Ebraham gha mudia khẹ ẹvbo nii ne Osanobua mwamwaẹn, ọ na vbe bọe, ẹvbo nii ne ọ mwẹ ẹyotọ etẹbitẹ.—Hib 11:10.
Ebraham wa gha mwẹ amuẹtinyan wẹẹ, eyan ne Osanobua yan rẹn gha mwẹ amusẹ. Ọ na yevbe na miẹn wẹẹ, te Ebraham ghi wa bẹghe Mẹzaia nọ khian gha re Ọba ọghe Arriọba Osanobua. Ẹi khabe ne Jesu na tama Ivbi e Ju ni ghaa rrọọ vbe ẹghẹ nii wẹẹ: “Ẹko sẹ Ebraham ne erha uwa ọyẹnmwẹ wẹẹ, aro ọre gha sẹ ẹghẹ mwẹ, aro ọre sẹ ọre, ọ keghi ghọghua.” (Jọn 8:56) Vbene ẹmwata, te Ebraham wa rẹn wẹẹ, ivbi irẹn eso gha rri ọba, vbe Arriọba ne Jehova khian mu gbọọ, rhunmwuda ọni, ọ na wa muegbe nọ ya zin egbe khẹ ẹghẹ ne Jehova khian ya mu eyan ọghẹe sẹ. De vbene Ebraham ya rhiẹre ma wẹẹ, irẹn yaro ye ẹvbo nii, ra Arriọba ne Osanobua ru emwamwa rẹn? Vbe okaro, Ebraham ma gbokhuo, nọ ya gha re ọmọ otọ ọghe agbẹnvbo rhọkpa. Ọ ma gha mwẹ ẹghẹ nọ wa ya dia ẹvbo ọkpa ya, amaiwẹ te ọ khian ye ọba ọghẹe ike, ọ ghaa ke ẹvbo ọkpa kpa, ọ ghi gha rrie ọvbehe. Deba ọni, ọ ma gha mwẹ ẹghẹ ọkpa ne Ebraham ya gha hoo nọ mu arriọba obọ re gbọọ. Nọghayayerriọ, ọ na ye gha họn ẹmwẹ ne Jehova, ọ na vbe fẹko gha diakhẹ ẹghẹ ne Jehova khian ya mu eyan ọghẹe sẹ. Ọna ya ima rẹn wẹẹ, ọmwa nọ gele mu ẹtin yan e Jehova ẹre Ebraham ghaa khin. w20.08 3 ¶4-5
Saturday, May 14
Ọmwa gha wu nẹ, a faẹn ye otọ hin obọ ẹtin orukhọ rre.—Rom 6:7.
E Jehova yan rẹn wẹẹ, ma ghaa rre ototọ ukhamwẹ ọghe Kristi, orhunmwu ọkpa i rrọọ nọ khian kha wẹẹ, “irẹn khuọnmwi.” (Aiz 33:24) Ọna rhiema wẹẹ, egbe ne emianmwẹ i ye, ẹre emwa ni wulo khian gha mwẹ vbe iran gha rhiọ kpaegbe nẹ. Vbọrhirhighayehẹ, iran i khian wa khian emwa ni gbae vbobọvbobọ nii. Iran gha wa khian emwa ni gbae vbobọvbobọ, ọ sẹtin do gha lọghọ ne emwa iran yi iran ẹro. Ọ khọ wẹẹ, kherhe kherhe, ẹre emwa nagbọn khian ya fẹko gha khian emwa ni gbae, vbe Ukpo Arriaisẹn Ọkpa Ne Kristi Khian Ya Kha. Vbe ufomwẹ ọghe Ukpo Arriaisẹn Ọkpa Ne Kristi Khian Ya Kha, e Kristi ghi werriegbe mu emwi hia fẹẹrẹ ye obọ Erhae. Ẹghẹ nii, emwamwa ne Jehova mwẹ ne uhunmwu otagbọn na mwẹ amusẹ nẹ, emwa nagbọn hia ghi do khian emwa ni gbae. (1 Kọr 15:24-28; Arhie 20:1-3) De vbene ọ khian gha ye ruẹ hẹ, vbe u gha bẹghe ẹre wẹẹ, emwa ruẹ ni wulo rhiọ kpaegbe? Te u khian gha viẹ ra, ra te u khian gha giẹ? Ra te u khian zẹ ihuan so, ne u ya rho e Jehova? Vbe nọ rhirhi gha ye hẹ, u gha bẹghe iyobọ nọkhuọkhua ne Jehova kevbe Ovbi ẹre ighẹ Jesu ru nuẹn, ne iran na huẹn emwa ruẹ kpaegbe, ẹi mwẹ u ma hoẹmwẹ iran sayọ. w20.08 16-17 ¶9-10
Sunday, May 15
Sokpan dọmwade ọghọe ọre ọ mwẹ emwi ne Osanobua ya wẹe, ọghe ọna ughaẹn, ọghe nọkpa ughaẹn.—1 Kọr 7:7.
Ukọ e Pọl rhie igiọdu ne Ivbiotu e Kristi, ne iran mu ukpa mu uwerhẹn ghee ẹre, deghẹ iran gha sẹtin gha re okhiọnkpa, ne iran mieke na rhie aro tua iwinna ugamwẹ ọghe Jehova. (1 Kọr 7:8, 9) Vbene ẹmwata, e Pọl ma zẹdẹ ya aro gbe iran re, ighẹ Ivbiotu e Kristi ni ghaa re okhiọnkpa. Uhiẹn, te ukọ e Pọl wa waa iwinna nibun ne kpataki ne Timoti, agharhemiẹn wẹẹ okhiọnkpa ghaa nọ. (Fil 2:19-22) Nọnaghiyerriọ, ọ ma khẹke ne ima gha roro ẹre wẹẹ, ọtẹn nokpia ghaa re okhiọnkpa, ẹre ọ khian na gbegba nọ khian ru iwinna ne kpataki eso vbuwe iko. Erriọ vbe ye, ọ ma vbe khẹke ne ima gha roro ẹre wẹẹ, ọtẹn nokpia gha ru orọnmwẹ nẹ, ẹre ọ khian na gbegba nọ khian ru egbe iwinna vberriọ. (1 Kọr 7:32-35, 38) Jesu kevbe Pọl ma kha wẹẹ, esalẹbẹ ẹre nọ ne Ivbiotu e Kristi gha ru orọnmwẹ ra ne iran gha re okhiọnkpa. Nọnaghiyerriọ, de aro nọ khẹke ne ima ya gha ghee emwa ni ru orọnmwẹ nẹ kevbe emwa ni re okhiọnkpa? The Watchtower ọghe October 1, 2012, keghi kha wẹẹ: “Vbene ẹmwata, [ọre te ima ru orọnmwẹ nẹ, ra okhiọnkpa ẹre ima ye khin], ẹse nọ ke obọ Osanobua rre ẹre ehia khin. . . . E Jehova i ghee ẹre wẹẹ, emwi ekhue nọ deghẹ ọmwa na gha re [okhiọnkpa].” Vbene ima na mwẹ ena hia vbe ekhọe, ọ khẹke ne ima gha ya aro nọ ghaan ghee etẹn ima nikpia kevbe etẹn ima nikhuo ni re okhiọnkpa, ni rre uwu iko. w20.08 28 ¶8-9
Monday, May 16
Sokpan, ọmwa ọkpa ne ọ rẹn ẹdẹ ra ẹghẹ ne emwi na gha ya sẹ, ẹ i rrọọ, . . . gberra Evbavba ọkpa.— Mat 24:36.
Otọ ẹvbo eso rrọọ ne emwa i na mobọ mwẹ ẹkorhiẹnrhiẹnmwẹ ye emwi nọ dekaan Osanobua ra e Baibol, rhunmwuda ọni, iran i mobọ danmwehọ vbe u ghaa kporhu ma iran. Vbọ vbe ye hẹ vbe ẹdogbo ne uwẹ na kporhu? Vbe nọ rhirhi gha ye hẹ, e Jehova hoo ne ima ye rhiegbe ye iwinna ikporhu iyẹn nọ maan, a te miẹn wẹẹ, ọ sẹ ẹghẹ ne irẹn khian ya kha wẹẹ, ne ima dobọ yi. Iwinna ikporhu iyẹn nọ maan gha sẹ ufomwẹ, vbọ gha sẹ ẹghẹ ne Jehova mwamwa yọ, iyeke ọni, “ufomwẹ ghi do rre.” (Mat 24:14, 36) Jesu tae yotọ, emwi eso ni khian gha sunu, ni khian rhiẹre ma wẹẹ okiekie ẹdẹ, ẹre ima ye. Ọ rẹnrẹn wẹẹ avbe emwi ni khian gha sunu na, sẹtin mu idobo ye erhuanegbe ẹre egbe, ne iran ghẹ ghi rhiegbe ye iwinna ikporhu iyẹn nọ maan. Ọni ẹre ọ si ẹre nọ na tama erhuanegbe ẹre wẹẹ, ne iran “gha ba odẹ.” (Mat 24:42) Iwinna ughughan ẹre ọ wa mu emwa ni ghaa rrọọ vbe ẹghẹ ọghe Noa, ọni ẹre ọ si ẹre ne iran ma na sẹtin rhie aro tua igiuhunmwu ne Noa ya gha wewe ma iran. Erriọ ẹre ọ wa vbe ye vbe ẹdẹnẹrẹ, emwi nibun rrọọ ni gha sẹtin rhie ima ekhọe hin iwinna ugamwẹ ọghomwa rre. (Mat 24:37-39; 2 Pit 2:5) Rhunmwuda ọni, te ọ khẹke ne ima mu aro ye iwinna ne Jehova waa ima re. w20.09 8 ¶1-2, 4
Tuesday, May 17
Emwa hia ni ho ne iran gha yin uyinmwẹ ne ọ yẹẹ Osanobua, vbe a ya egbe ba Kristi, a gha zẹ iran kpokpo.—2 Tim 3:12.
Setan rẹnrẹn wẹẹ, ovbi ẹghẹ kherhe ẹre ọ ghi kẹ ne irẹn, rhunmwuda ọni, “ohu dan” ẹre ọ wa muẹn. Nọnaghiyerriọ, ọ ma khẹke ne ima wa gha roro ẹre wẹẹ, te emwi hia khian wa gha rhiẹnrhiẹn khian, rhunmwuda te ima hia khian wa họẹn vbe egbe. (Arhie 12:12) Vbe nẹi khian ghi kpẹẹ gbe, ma hia gha werriẹ aro daa edanmwẹ nọ gha rhiẹre ma, deghẹ ima gele mwẹ amuẹtinyan. E Baibol gi ima rẹn wẹẹ, “Ọkhọ nọ ra sunu . . . keghi re egbe ne a ma he miẹn ke ne a ya bu agbọn tua agbọn gha dee do sẹ ẹdẹnẹrẹ na.” (Mat 24:21) Ẹghẹ ne ako na guan kaẹn na, ọre ẹghẹ orueghe nọkhua. Vbe ẹghẹ nii, emwa eso vbuwe ẹgbẹe ọghe ima sẹtin werriẹ aro nọ khọọ daa ima, arriọba sẹtin vbe mu awua ye iwinna ọghe ima. (Mat 10:35, 36) Ọ ghaa ye vberriọ, ma gha ya egbe taa Asa ra, ne ima gha mwẹ ilẹkẹtin wẹẹ, e Jehova gha ru iyobọ ne ima kevbe wẹẹ, ọ gha gbinna ne ima ra? (2 Krọ 14:11) Ọ kpẹẹ re ne Jehova ke mu ima egbe yotọ khẹ emwi ni khian sunu vbe odaro. Ọ keghi loo “ọviẹn nọ gia mu ẹtin yan kevbe nọ fuẹro” ya kpemehe evbare orhiọn ne ima vbe ẹghẹ nọ khẹke, ne ima mieke na sẹtin da imudiase ọghe ima yi. (Mat 24:45, NW ) Sokpan, obọ ima ẹre ọ ghi ye, deghẹ ima gha ya amuẹtinyan ne ima mwẹ dae Jehova wegbe sayọ.—Hibru 10:38, 39. w20.09 18 ¶16-18
Wednesday, May 18
Vbene ẹ i lọghọ e Nọyaẹnmwa, vbe ọ gha ta ehe ne ẹzẹ gha lẹ la, erriọ ẹre ẹ i vbe lọghọ vbe ọ a gha dia ekhọe ọba ye odẹ.—Itan 21:1.
E Jehova sẹtin loo orhiọn nọhuanrẹn ọghẹe ya fi ekhọe emwa ni rre ukpo ọdakha werriẹ, ne iran mieke na ru ahoo ọghẹe. Emwa nagbọn gha sẹtin fian uro amẹ ra uvun ye ọkpẹn ẹzẹ, ne amẹ ẹzẹ nii suẹn gha lẹẹ ghee ehe ne iran hoo nọ lẹẹ la. Erriọ vbe ye, e Jehova gha sẹtin loo orhiọn nọhuanrẹn ọghẹe ya fi ekhọe emwa ni rre ukpo ọdakha werriẹ, ne iran mieke na mu ahoo ọghẹe sẹ. E Jehova gha ya obọ kaẹn iran ekhọe vbe odẹ vbenian, iran ghi ru atamuolọyan eso nọ gha fu eguọmwadia e Jehova egbe rre. (Yae taa Ẹzra 7:21, 25, 26) De emwi ne ima gha sẹtin ru? Ma sẹtin na erhunmwu ne Osanobua ya obọ kaẹn ekhọe “avbe ọba kevbe emwa hia ni rre ọdakha” vbe iran gha khian ru atamuolọyan nọ dekaẹn iwinna ugamwẹ ọghe ima. (1 Tim 2:1, 2; Neh 1:11) Ma sẹtin vbe gha mu ẹmwẹ etẹn ima ni rre eghan ye erhunmwu, zẹvbe ne etẹn ni ghaa rrọọ vbe orre nokaro ru ẹre.—Iwinna 12:5; Hib 13:3. w20.11 15 ¶13-14
Thursday, May 19
Wa bu emwa hia gha rrie ehe hia, ne uwa gha ya iran khian erhuanegbe mwẹ, wa ghi gha dinmwi iran ye amẹ.—Mat 28:19, NW.
Adeghẹ uwẹ ẹre ọ wa gu ọmwa nii ruẹ e Baibol ghi vbo? Ọyẹnmwẹ nọ khian gha sẹ ruẹ i gia gie! (1 Tẹs 2:19, 20) Te emwa ni da dinmwiamẹ yevbe “elẹta na ya tian” emwa ni gu iran ruẹ e Baibol kevbe emwa hia ni rre uwu iko. (2 Kọr 3:1-3, NW ) Ke ukpo enẹ gha dee na, odẹ orhunmwu 10,000,000 ẹre Avbe Osẹe Jehova ni rre ehe hia vbe uhunmwu otagbọn gu ruẹ e Baibol vbe uki uki. A ghi muẹn ye omwa ighẹ inu emwa ni dinmwiamẹ vbe ukpo ukpo zẹvbe Osẹe Jehova, a na do bẹghe ẹre wẹẹ, ọ gberra 280,000. Nọnaghiyerriọ, de vbene ima khian ghi ya ru iyobọ ne emwa nikẹre ne ima gu ruẹ e Baibol, ne iran vbe do sẹtin dinmwiamẹ? Ugbẹnvbe a miẹn wẹẹ, e Jehova ye kie ẹkpotọ ne emwa, ne iran do khian erhuanegbe Kristi, te ọ khẹke ne ima hia vbe odẹ ke odẹ ne ima ru iyobọ ne iran ya rherhe ru vberriọ, rhunmwuda, ovbi ẹghẹ kherhe ẹre ọ ghi kẹ!—1 Kọr 7:29a; 1 Pit 4:7. w20.10 6 ¶1-2
Friday, May 20
Te Osanobua mu aro ne ọkhọ da iran ni tọn egbe mu, sokpan ọ ghi gha rhie ẹseọhẹ ne iran ni mu egbe rriotọ.—Jems 4:6.
Ọba e Sọl keghi he ẹmwẹ ye Jehova obọ. Uhiẹn vbe akhasẹ e Samuẹl ghi do tama rẹn wẹẹ, emwi nọ ru i maan, e Sọl ma miẹn kue wẹẹ, irẹn ru abakuru rhọkpa. Nọghayayerriọ, ọ na tilae rua, ọ na kue gha mu ne emwa ọvbehe. (1 Sam 15:13-24) Ọna i re ẹghẹ okaro ne Sọl ya yin uyinmwẹ vbenian. (1 Sam 13:10-14) Agharhemiẹn wẹẹ e Jehova te rhie adia nẹẹn, ọ ma rhie, rhunmwuda ekhọe itengbemu nọ ghaa mwẹ. Rhunmwuda ọni, e Jehova keghi fi iyeke gbe ẹre. Ma ma hoo ne ima gha yevbe Sọl, rhunmwuda ọni, ọ khẹke ne ima nọ egbe ima wẹẹ: ‘I gha tie ako eso vbe Baibol, nọ dekaẹn afiwerriẹ eso nọ khẹke ne I ru, mẹ roro ẹre wẹẹ, ako nii ma mobọ dekaan mwẹ ra? I gha ru emwi eso nọ ma deyọ, I tama egbe mwẹ wẹẹ emwi ne I ru, ma mobọ de emwi nọ rhia ra? Ra I vbe kha wẹẹ, emwa ọvbehe ẹre ọ si ẹre yọ mwẹ egbe?’ Adeghẹ ‘ẹẹn’ ọre ewanniẹn ne ima rhie ye avbe inọta na, ọni rhiema wẹẹ, ọ khẹke ne ima fi iziro ọghe ima werriẹ. Vbe ẹi erriọ, ma sẹtin do gha mwẹ ekhọe itengbemu, sẹrriọ wẹẹ, e Jehova ghi fi iyeke gbe ima. w20.11 20 ¶4-5
Saturday, May 21
Ye Ayi ne ọ yii ruẹ rre vbe ne u he na re ọvbokhan na, vbe ẹdẹ oya kevbe ukpo ẹhorriẹ nii ma he rre, ẹghẹ ne u gha na gha kha wẹẹ, “Ehia khan mwẹ nẹ.”—Asan 12:1.
Adeghẹ igbama ẹre u khin, ọ khẹke ne u zẹ ne egbuẹ, ọmwa ne u hoo ne u ga. Ọ khẹke ne u gha ru ezanzan ne egbuẹ, ne u mieke na rẹn aro ọmwa ne Jehova khin, emwamwa ọghẹe kevbe emwi nọ hoo ne u ya ẹdagbọn ruẹ ru. (Rom 12:2) Ẹghẹ nii, ẹre u khian na sẹtin zẹ ne egbuẹ wẹẹ, e Jehova ẹre u khian ya ẹdagbọn ruẹ ga; ọna ọre azẹ nọ ghi ru ekpataki sẹ. (Jọs 24:15) Adeghẹ u na gha tie Baibol ne egbuẹ vbe ẹghẹ hia, u na vbe gha ru erria yan rẹn, ahoẹmwọmwa kevbe amuẹtinyan ne u mwẹ dae Jehova ghi gha wegbe yọ. Ta mu olọ yan rẹn wẹẹ ahoo ọghe Jehova ẹre u khian gha mu ye okaro vbe arrọọ ruẹ. Emwa ni rre uwu agbọn yayi wẹẹ, ọmwa ghaa loo emwi ne Osanobua ya we ẹre, ya ru ọghe enegbe ẹre, ẹre ọ khian na gha mwẹ oghọghọ. Sokpan ẹmwata nọ rrọọ ọre wẹẹ, emwa ni khu emwi ewe ọghe agbọn na khian, “keghi ya akhiẹ nibun guọghọ ekhọe iran rua.” (1 Tim 6:9, 10) Sokpan, deghẹ u na gha họn ẹmwẹ ne Jehova, u na vbe gha mu ahoo ọghẹe ye okaro, ẹre agbọn khian na maan ruẹ, “u ghi vbe gha ru ne a gbaan.”—Jọs 1:8. w20.10 30 ¶17-18
Sunday, May 22
Ẹ i mwẹ I ma ya kpe orhu iyẹn ne ọ maan na ọghe Arriọba Osanobua . . . rhunmwuda, ọnii ọre Osanobua gie mwẹ ne I do ru.—Luk 4:43.
Vbe orre nokaro, igiuhunmwu ne Jesu ya gha wewe vbe ọ rre agbọn na keghi rhie ayayẹro ne emwa nagbọn hia. A te miẹn wẹẹ Jesu kpa hin agbọn na rre, ọ keghi tama erhuanegbe ẹre, ne iran ye gha ru ẹre khian ighẹ iwinna ne irẹn suẹn rẹn, ọ na wẹẹ ne iran kporhu iyẹn nọ maan “ya sẹ ehe ne agbọn sẹ.” (Iwinna 1:8) Ẹmwata nọ rrọọ ọre wẹẹ, ẹi re ẹtin obọ iran, ẹre iran khian ya ru iwinna na, sokpan iyobọ orhiọn nọhuanrẹn nọ; orhiọn nọhuanrẹn na ọre “nọyọmwaobọ nii,” ne Jesu wẹẹ, ọ khian ru iyobọ ne erhuanegbe ẹre ya musọe. (Jọn 14:26; Zẹk 4:6) Vbe ẹdẹ na do Ugie Pẹntikọst vbe ukpo 33 C.E., Osanobua keghi tue orhiọn nọhuanrẹn ọghẹe yan erhuanegbe Jesu. Ẹre iran na ghi suẹn gha kporhu iyẹn nọ maan vbobọvbobọ. Vbọ ma he kpẹẹ vba, arriaisẹn emwa nibun keghi khian erhuanegbe Jesu. (Iwinna 2:41, NW; 4:4) Vbe emwa ghi suẹn gha zẹ iran kpokpo, iran ma dobọ iwinna ikporhu yi, rhunmwuda ohanmumwẹ. Nọghayayerriọ, iran keghi hẹnhẹn egbe yan e Jehova nọ ru iyobọ ne iran. Iran keghi na erhunmwu gie ẹre wẹẹ: “Rhie ẹtin ne ima ne eguọmwadia ruẹ, ne ima sẹtin gha kporhu ẹmwẹ ruẹn vbe nai na fian afianma.” Osanobua na gele họn erhunmwu iran, ọ na ghi rhie orhiọn nọhuanrẹn ne iran, ne iran mieke na sẹtin gha “kporhu ẹmwẹ [ọnrẹn] vbe nai na fian afianma.”—Iwinna 4:18-20, 29, 31. w20.10 21 ¶4-5
Monday, May 23
Kristi wu ba ẹmwẹ orukhọ mwa zẹ vbene a gbẹn ọẹn ye Ebe. . . . A keghi vbe dọlọ huẹn ọnrẹn kpaegbe.—1 Kọr 15:3, 4.
Vbọ ya ima rẹn wẹẹ e Jehova gele huẹn Jesu kpaegbe? Emwa nibun ẹre ọ miẹn Jesu vbe ọ rhiọ kpaegbe nẹ, iran vbe gha tama emwa ọvbehe vbekpa ẹre. (1 Kọr 15:5-7) Vbe uko e Pọl ghi guan kaẹn emwa ni miẹn ọnrẹn, ọ na ka sunu ye ukọ e Pita. Erhuanegbe Jesu eso vbe so igiẹ yọ wẹẹ, e Pita gele miẹn ọnrẹn. (Luk 24:33, 34) E Pọl na vbe kha wẹẹ, avbe ukọ bẹghe Jesu vbe ọ rhiọ kpaegbe nẹ. Iyeke ọni, e Kristi na “rhiegbe ma iran nọ yan iyisẹn isẹn vbe uwu iran ni lelẹe khian.” Ọ gha kẹ, ẹghẹ ne Jesu ya rhiegbe ma iran na, ọre vbe iko nọ gu iran do vbe Galili, na guan kaẹn vbe ebe Matiu 28:16-20. Jesu vbe “rhiegbe ma e Jems.” Ọ gha kẹ, e Jems na ọre ovbi iyẹe nọ ma te ka yayi wẹẹ irẹn ọre Mẹzaia. (Jọn 7:5) Vbe Jesu ghi rhiegbe ma rẹn, ọ na do yaeyi. Odẹ ukpo 55 C.E. ẹre Pọl gbẹn elẹta na, iran nibun ni miẹn Jesu vbe ọ rhiọ kpaegbe ye gha rre agbọn vbe ẹghẹ nii. Rhunmwuda ọni, ọmwaikọmwa nọ ghaa gbawawẹ gha miẹn emwa nọ rẹn ọta. w20.12 3 ¶5, 7-8
Tuesday, May 24
Nọyaẹnmwa gha rhie iran lẹre vbe ẹghẹ egbe ne ọ ma rran.—Psm 41:3.
Emianmwẹ i maan! Ọ sẹtin ya iro han ọmwa, ọ sẹtin vbe ya ọmwa khian ne rudẹnrudẹn, katekate, deghẹ ọ na kpẹẹ gbe vbe otọ. Rhunmwuda ọni, nọ iyobọ vbe obọ e Jehova. Ẹmwata nọ wẹẹ, e Jehova i khian wa mu ima egbe rran vbe odẹ ọghe ọyunnuan. Sokpan, ọ keghi rhie ẹtin kevbe ifuẹko ne ima, ne ima mieke na sẹtin zin egbe. (Psm 94:19) Vbe igiemwi, ọ sẹtin loo etẹn vbuwe iko ya ru iyobọ ne ima. Vbene ọta ye, etẹn sẹtin do gu ima ru iwinna eso vbe owa, iran sẹtin gu ima yo ẹki, iran sẹtin vbe gu ima na erhunmwu. E Jehova sẹtin vbe ru iyobọ ne ima ya ye ẹmwẹ ifuẹko ni rre uwu e Baibol rre, vbe na ghee agbọn ne emianmwẹ i ye, ne ima yaro yi vbe odaro. (Rom 15:4) Egbọre ma i ghi sẹtin rhie egbe ye iwinna ikporhu vbene ima gualọe yi. Ọ mwẹ ọtẹn nokhuo ọkpa vbe United States na tie ẹre Laurel. Vbe ọwara ukpo 37, efẹn ọkpa ẹre ọ ghaa ye, rhunmwuda, e masini ẹre ọ ghaa loo ya hiọnrọn! Ọtẹn na ghaa mwẹ kansa kevbe emianmwẹ ọvbehe nibun, ẹi re avbiẹ inugba ẹre a vbe mwa rẹn egbe. Vbuwe ena hia, ọ na ye gha hia nọ gha kporhu ma avbe nọs kevbe emwa ọvbehe ni do gha gbaroghe ẹre vbe owa. De afiangbe nọ ghi miẹn? Odẹ orhunmwu 17 ẹre ọ ru iyobọ na ya miẹn odẹ ẹmwata na! w20.12 24 ¶9; 25 ¶12
Wednesday, May 25
E Nọyaẹnmwa rrọọ yaba mwẹ, ohan i ghi mu mwẹ, de emwi ne ọmwaikọmwa gha miẹn ru mwẹ re? —Psm 118:6.
Ọ mwẹ emwi eso nọ sunu vbe odẹ ukpo 56 C.E., nọ ya e Pọl gha gualọ iyobọ. Emwa eso ni gbe olighi keghi si ẹre ladian vbuwe Ọgua Osa, iran na gha hoo ne iran gbe ẹre rua. Ẹdẹ ghi gbe, iran na muẹn gha rrie ekọtu ọghe Ivbi e Ju na tie ẹre Sahẹndrin, iran na vbe gha hoo ne iran gbe ẹre rua vba. (Iwinna 21:30-32; 22:30; 23:6-10) Ọ gha kẹ, e Pọl ghaa nọ egbe ẹre wẹẹ, ‘Erriọ imẹ khian wa gha rri oya na khian ra?’ De iyobọ ne Pọl miẹn? Vbe a ghi mu e Pọl khui, “e Nọyaẹnmwa” ighẹ e Jesu na rhiegbe ma rẹn vbe asọn nọ lelẹe, ọ na tama rẹn wẹẹ: “Ghẹ fian afianma! U sẹ osẹe mẹ nẹ vbe Jerusalẹm vbe emwa na, u gha vbe ru vberriọ vbe Rom.” (Iwinna 23:11) Ẹmwẹ ne Jesu tae na wa kakabọ rhie igiọdu nẹẹn! E Jesu keghi tian rẹn ye ikporhu nọ kpee re vbe Jerusalẹm. Ọ na vbe gi ẹre rẹn wẹẹ, ọ gha sẹ e Rom vbe egbe hẹnẹdẹn, ẹkpotọ gha vbe kie nẹẹn ya kporhu vba. Vbe Pọl ghi họn ẹmwẹ na, ẹi mwẹ orhiọn rẹn ma sotọ, vbe na ghee ọmọ ne erhae mu ye izabọ. w20.11 12 ¶1; 13 ¶3-4
Thursday, May 26
Ma keghi mwẹ idaehọ na . . . , te ọ vbe deziẹn gbain.—Hib 6:19.
Avbe afiangbe ne ima yaro yi keghi yevbe “okpo ne ọ da owa yi,” nọ ya ima deziẹn vbe odẹ ọghe orhiọn, vbe ima ghaa rre uwu ọlọghọmwa. Gha muẹn roro, agbọn ne Jehova mwamwa khẹ ima, nai khian na gha miẹn emwi rhọkpa nọ gha mu ima ekhọe rhia. (Aiz 65:17) Ya ekhọe zomwa rẹn, vbene ọ khian gha ye hẹ vbe u ghaa rre agbọn ọgbọn nii, ne emwi rhọkpa i na kpokpo ọmwa orhiọn. (Mai 4:4) U ghaa tama emwa ọvbehe vbekpa emwi ne u yaro yi, ọ gha ru iyobọ nuẹn ya gha rhie aro tua re vbe ẹghẹ hia. U gha ya ekhọe hia rhiegbe ye iwinna ikporhu, u gha sẹtin gha mwẹ ilẹkẹtin wẹẹ, emwi ne u yaro yi gha sẹ ruẹ obọ. (Hib 6:11) Zẹvbe ne ima ya bu ufomwẹ agbọn na, ẹi mwẹ ima ma werriẹ aro daa ọlọghọmwa ughughan nọ gha sẹtin ya ima gha si osi. Ma gha sẹtin ko udu rre vbe ima ghaa werriẹ aro daa avbe ọlọghọmwa na, deghẹ ima na mu ẹtin yan e Jehova. Gi ima gha lele ibude ne Jehova rhie ne ima, nọ na wẹẹ: “Uwa hẹko mu ẹtin yan mwẹ. Ẹghẹ nii, wa gha wegbe, wa ghi vbe gha re ne ẹkun sẹ ọre otọ.”—Aiz 30:15. w21.01 7 ¶17-18
Friday, May 27
Nọyaẹnmwa vuọn ne itohan kevbe ẹnina.—Jems 5:11.
Vbe ebe Jems 5:11 ghi guan kaẹn ẹnina ne Jehova mwẹ, ọ na vbe ya unu kaẹn itohan ọghẹe; itohan keghi re akpa ọvbehe nọ ya ima sikẹ e Jehova. (Ẹks 34:6) Odẹ ọkpa ne Jehova ya tohan ima, ọre nọ na yabọ ima vbe ima gha ru orukhọ. (Psm 51:1) E Baibol ya ima rẹn wẹẹ ọmwa nọ mwẹ itohan keghi yabọ. Sokpan ẹi re ọni ọkpa. Ọ vbe gi ima rẹn wẹẹ, ọmwa nọ mwẹ itohan gha miẹn ọmwa nọ rre uwu ibavbaro, itohan nii ghi gua ẹre kpa ya ru iyobọ nẹẹn. E Jehova gi ima rẹn wẹẹ, agiẹngiẹn ne irẹn mwẹ ne ima gberra ne iye ọmọ mwẹ ne ovbi ẹre. (Aiz 49:15) Ma ghaa rre uwu ibavbaro, itohan ne Jehova mwẹ, ẹre ọ gua ẹre kpa ya ru iyobọ ne ima. (Psm 37:39; 1 Kọr 10:13) Ma ghaa yabọ etẹn vbe iran gha ru ima khọọ, ma na vbe gha rhie ẹmwẹ nii hin ẹko rre, te ima rhie ẹre ma wẹẹ ima mwẹ itohan daa iran. (Ẹfis 4:32) Odẹ ọvbehe ne kpataki ne ima ya rhie ẹre ma wẹẹ ima mwẹ itohan daa etẹn ima, ọre ne ima na ru iyobọ ne iran vbe iran ghaa rre uwu ibavbaro. Ma ghaa ru vberriọ, te ima ya egbe tae Jehova nọ re Osa nọ “vuọn ne itohan kevbe ẹnina.”—Ẹfis 5:1. w21.01 21 ¶5
Saturday, May 28
Kristi . . . keghi rhie igiemwi ne uwa wẹẹ, ne uwa gha lele ukpowẹ irẹn.—1 Pit 2:21.
Te ọ khẹke ne uhunmwuta ẹgbẹe gha loo ẹwaẹn, na ghẹ do miẹn wẹẹ, ẹmwẹ iwinna, ẹre ọ ghi wa muẹn sẹrriọ wẹẹ, ẹi ghi miẹn obọ ya gha gbaroghe ẹgbẹe ọre vbe odẹ ọghe orhiọn, kevbe wẹẹ ẹi ghi vbe mwẹ ẹghẹ ne iran. E Jehova keghi maa ima emwi, erriọ ẹre ọ vbe ya dia ima, rhunmwuda ọ hoo ne agbọn maan ima. (Hib 12:7-9) Erriọ e Jesu vbe ya maa emwa ni rre ototọ re emwi, vbe odẹ ọghe ahoẹmwọmwa. (Jọn 15:14, 15) Ọ keghi rhie adia ne ọmwa vbe ẹghẹ nọ khẹke, sokpan ọ ghi ru ẹre vbe odẹ ne khuẹrhẹ. (Mat 20:24-28) Ọ rẹnrẹn wẹẹ, ma gha zẹdia gha ru emwi nọ ma deyọ, rhunmwuda emwa ni ma gba ẹre ima khin. (Mat 26:41) Uhunmwuta ẹgbẹe nọ ya egbe tae Jehova kevbe Jesu i khian wa yaro yọ wẹẹ, te ọvbokhan rẹn kevbe ivbi ẹre khian gha ru emwi nọ gbae vbe ẹghẹ hia. Rhunmwuda ọni, ẹi khian “gha khọ mu iran.” (Kọl 3:19) Nọghayayerriọ, ọ ghi ya “ọghọ vbe ute” dia iran, zẹvbe nọ rre ebe Galatia 6:1; ọ ghi vbe yerre wẹẹ, irẹn tobọ irẹn vbe ru abakuru. Vbe na ghee Jesu, ọ rẹnrẹn wẹẹ, odẹ nọ ghi maan sẹ na ya maa emwa emwi, ọre na gha rhie igiemwi esi yotọ. w21.02 6-7 ¶16-18
Sunday, May 29
Emwi ni rre agbọn hia, wa rho e Nọyaẹnmwa!—Psm 150:6.
Arrọọ ọghe Jesu, ẹre Jehova ya dẹ dọmwadẹ emwa ni rre uwu iko, ya sẹ egbe emwa ni khian do mu ẹtin yan e Jesu vbe odaro. (Mak 10:45; Iwinna 20:28; 1 Kọr 15:21, 22) Nọnaghiyerriọ, Jesu ọre ọmwa nọ khẹke nọ gha re uhunmwuta ọghe iko, rhunmwuda, arrọọ ọghẹe ẹre ọ ya dẹ ima werriegbe. Zẹvbe uhunmwuta ọghe ima, Jesu mwẹ asẹ nọ ya yi uhi ne dọmwadẹ ima, ẹgbẹe kevbe etẹn hia ni rre uwu iko, ọ vbe mwẹ asẹ nọ ya bu ohiẹn emwa ni ma lele uhi nii. (Gal 6:2) Sokpan, ẹi wa re uhi ọkpa ẹre Jesu gbe ne ima, ọ vbe gbaroghe dọmwadẹ ima, erriọ ẹre ọ vbe ya ya obọ esi mu ima. (Ẹfis 5:29) Etẹn nikhuo keghi rhie ẹre ma wẹẹ, iran rhie ọghọ ne Kristi, vbe iran ghaa lele adia ọghe ikpia ne Kristi zẹ nọ gha gbaroghe iran. Etẹn nikpia ghaa rhie ọghọ kevbe uyi nọ khẹke ne etẹn nikhuo, te iran rhie ẹre ma wẹẹ iran rẹn emwi ne emwamwa ọghe uhunmwuta gele demu. Emwa hia ni rre uwu iko gha gele rẹn emwi ne emwamwa ọghe uhunmwuta demu, iran na vbe miẹn ọnrẹn yi, ọfunmwegbe ghi gha rre uwu iko. Sẹ ehia, ma ghi sẹtin gha rhie uyi gie Erha mwa nọ rre ẹrinmwi ighẹ e Jehova. w21.02 18-19 ¶14-17
Monday, May 30
E Devid keghi nọ e Nọyaenmwa.—1 Sam 30:8.
Vbe ẹghẹ ne Devid vbe ivbiyokuo ẹre ya gha rhie uhunmwu lẹre khian, iran keghi sẹ ẹgbẹe iran rae ye owa, gha rrie okuo. Vbene iran te rre, avbe eghian keghi viọ ẹgbẹe iran kevbe emwi hia ne iran mwẹ kpa. E Devid gha te sẹtin kha wẹẹ, rhunmwuda ne irẹn na re ọmwa nọ gua khọn okuo, irẹn rẹn obẹlẹ ne irẹn gha la, ne irẹn ya miẹn emwa rẹn fan vbe obọ eghian, sokpan ọ ma ru vberriọ. Ọ keghi gualọ adia vbe obọ e Jehova. E Devid keghi nọ e Jehova wẹẹ: “Ne I khu emwa ni do khọn na ra?” Ẹre Jehova na wẹẹ ne ọ zẹ iran khu, wẹẹ obọ ẹre gha ke ukhunmwu ne iran. (1 Sam 30:7-10) Vbua miẹn ruẹ vbe emwi nọ sunu daa e Devid na? Gha gualọ adia vbe obọ emwa ọvbehe u ke ru azẹ rhọkpa. Avbe igbama, wa gha gu evbibiẹ uwa guan. Ma sẹtin vbe gu ediọn ni kpẹẹ re nẹ vbe otu e Jehova guan, iran gha sẹtin rhie ibude nọ khẹke ne ima. E Jehova mwẹ ilẹkẹtin yan avbe ikpia na ne irẹn zẹ, uwẹ gha vbe sẹtin ru vberriọ. Te Jehova ya ediọn ne rre uwu iko ru ima “ẹse.” (Ẹfis 4:8) U ghaa ya egbe taa iran, u na vbe gha lele adia ne iran rhie nuẹn, u gha sẹtin ru azẹ nọ khẹke. w21.03 4-5 ¶10-11
Tuesday, May 31
Emwi ọkpa i rrọọ . . . ne ọ gha sẹtin wannọ ima hin ahoẹmwọmwa Osanobua ne ọre ọghe ima rre.—Rom 8:38, 39.
Jesu khare wẹẹ, deghẹ ima i rhie emwi ne ima ruẹ ye uyinmwẹ, te ima yevbe okpia nii nọ bọ owa yan ekhae. Te okpia nii winna kua kẹkan. Vbe ima gu kha vberriọ? Rhunmwuda, okpẹhoho kevbe okpamẹ gha dekun owa nii, ọ ghi rẹnkhuan. (Mat 7:24-27) Erriọ vbe ye, deghẹ ima ma rhie emwi ne ima ruẹ ye uyinmwẹ, te ima wa mu ẹghẹ nii rhia. Edanmwẹ gha ghi rre ma i sẹtin zin ọnrẹn, rhunmwuda amuẹtinyan ọghe ima ma wegbe sẹ. Sokpan deghẹ ima na gha rhie emwi ne ima ruẹ ye uyinmwẹ, ma ghi sẹtin gha ru azẹ nọ maan, orhiọn ima ghi sotọ, ma ghi vbe gha mwẹ amuẹtinyan nọ wegbe. (Aiz 48:17, 18) Ma ghaa hoo ne ima sẹtin mudia gbain vbe ima gha werriẹ aro daa ukpokpo, ọ khẹke ne ima gha na erhunmwu vbe ẹghẹ hia, ma ghi vbe gha tie Baibol vbe ẹghẹ hia. Ọ khẹke ne ima kọe ye orhiọn wẹẹ, emwi nọ ru ekpataki sẹ, ọre ne ima ru emwi nọ gha rhie uyi gie Jehova. Uwa gi ima gha mwẹ ilẹkẹtin wẹẹ, e Jehova i khian yangbe ima ẹdẹ.—Hib 13:5, 6. w21.03 15 ¶6; 18 ¶20