Nehemia

4 Kenca begi Sanballat+ enggo bangun kami tembok e, mis ia merawa janah segat kel atena, emaka lalap tokoh-tokohina kalak Jahudi. 2 Ngerana ia i lebe senina-seninana ras pasuken Samaria, nina, “Kai kin si lakoken kalak Jahudi si lemah e? Akap kalak e kin ngasup kalak e ngelakoken pendahin si bage belinna? Persembahken kalak e kin atena korban? Banci kin dungi kalak e bas sada wari? Banci kin pake kalak e batu-batu si meseng ras si hancur arah bangunen si runtuh e?”+

3 Ngerana ka Tobia+ kalak Ammon,+ si sangana tedis i deherna, nina, “Biang kerangen pe banci ngeruntuhken tembok batu si bangun kalak ah.”

4 Emaka ertoto aku, “O Dibata kami, begiken min, sebap enggo ihina kami.+ Ban min hinan kalak e mulihken ku kalak e.+ Ban min kalak e bali bagi barang jarahen ras jadi tabanen bas negri si deban. 5 Ula tutupi kesalahen kalak e janah ula pediat dosa kalak e ihapus arah lebeNdu nari,+ sebap enggo hina kalak e kalak si mbangun.”

6 Emaka terus bangun kami tembok, janah kerina tembok enggo tersambung, ganjang tembok e pe enggo dung setengah. Tutus kel ate rakyat ndahiken dahin e.

7 Kenca Sanballat, Tobia,+ kalak Arab,+ kalak Ammon, ras kalak Asdot+ megi maka dahin mpekena tembok-tembok Jerusalem terus ilanjutken janah lubang-lubangna pe enggo itutupi, merawa kel kalak e. 8 Sekongkol kalak e guna nyerang Jerusalem ras ngganggusa. 9 Tapi ertoto kami man Dibata kami, janah aturken kami gelah lalap lit sekalak penjaga si njaga kami arah kalak e suari ras berngi.

10 Tapi nina kalak Juda, “Enggo keri gegeh kalak si erdahin, janah melala kel batu arah bangunen si enggo runtuh. Emaka lanai kami ngasup mbangun tembok e.”

11 Lalap nina musuh-musuh kami bagenda, “Sanga la idah kalak ah kita ntah pe la tehna, mis kita masuk ku tengah-tengah kalak e janah sibunuh kalak e ras sipengadi pendahin e.”

12 Selain si e, tiap reh kalak Jahudi si tading i deher musuh-musuh kami ku Jerusalem, lalap* nina kalak e man kami, “Pasti kalak e reh nyerang kita arah japa pe.”

13 Emaka kuaturken gelah lit lalap kalak si erjaga bas belakang tembok si inganna rendah ras terbuka. Kuaturken kalak e menurut keluarga kalak e, lengkap alu pedang, tombak, ras panah. 14 Sanga kuidah kalak e mbiar, mis kukataken man bangsawan-bangsawan,+ pejabat-pejabat, ras man kalak si debanna, “Ula kena mbiar man kalak e.+ Ingetlah Jahwe, si mbelin ras si luar biasa.+ Erjuanglah guna senina-senina kena, anak-anak kena si dilaki ras si diberu, diberu kena, ras rumah kena.”

15 Kenca begi musuh-musuh kami maka enggo teh kami kai rencana kalak e, janah enggo gagal rencana kalak e iban Dibata si benar, mulihken kami kerina mpekena tembok e. 16 Mulai bas wari e, setengah anak buahku erdahin+ janah setengah nari njemak tombak, perisai,* panah, ras make baju perang. Peminpin-peminpin pe+ ndukung* kerina kalak Jahudi 17 si sangana mbangun tembok. Kalak si dahinna ngangkati barang, erdahin alu sada tan janah tanna si sada nari njemak senjata. 18 Tiap kalak si mbangun lit pedang iiketken ku awakna sanga ia erdahin, janah kalak si ngembus trompet tanduk+ lit i sampingku.

19 Kenca si e ningku man bangsawan-bangsawan, pejabat-pejabat, ras kalak si debanna, “Seh kel lalana pendahin bas mpekena tembok e, emaka merap me kita i sekeliling tembok e, sirang ndauh arah sada ras si debanna. 20 Sanga begi kena sora trompet tanduk, pulunglah kena ku ingan kami. Dibatata pagi si erperang guna kita.”+

21 Emaka setengah arah kami erdahin janah setengah nari njemak tombak, mulai pagi-pagi si lampas seh ngasa teridah bintang-bintang. 22 Sanga si e ningku man rakyat, “Tiap dilaki arus erberngi i Jerusalem ras anak buahna. Kalak e njaga kita bas berngi wari janah erdahin bas ciger wari.” 23 Emaka aku, senina-seninaku, anak buahku,+ bage pe penjaga-penjaga si ngikutken aku, la pernah ganti kami uis kami, janah tiap kalak arah kami lalap njemak senjata bas tan kanan kami.