Nehemia

6 Kenca ikataken man Sanballat, Tobia,+ Gesem kalak Arab,+ ras musuh-musuh kami si debanna maka enggo kubangun mulihi tembok+ e janah lanai lit lubang bas tembok e, amin gia sanga si e pintu-pintu gerbangna lenga kupasang,+ 2 mis kirim Sanballat ras Gesem pesan man bangku, “Mari siban waktuna ndigan kita jumpa i kuta-kuta bas Lembah Ono.”+ Situhuna, enda rencana kalak e guna ncilakai aku. 3 Emaka kusuruh kalak guna ngataken man kalak e, “Sangana aku sibuk ndahiken pendahin si mbelin, emaka la aku banci lawes ku jah. Sebap adi lawes aku, ngadi kari pendahin enda.” 4 Lit empat kali kirim kalak e pesan man bangku janah lalap seri jawapenku.

5 Pelima kaliken, suruh Sanballat anak buahna ndahi aku alu pesan si seri, tapi sekalenda, babana surat terbuka. 6 Isina, “Enggo begi bangsa-bangsa, janah enggo ka kataken Gesem,+ maka kam ras kalak Jahudi enggo erban rencana guna mberontak.+ E me sebapna maka bangunndu tembok e. Menurut laporen, kam pagi jadi raja kalak e. 7 Enggo ka lantikndu nabi-nabi guna ngumumken kerna kam i belang-belang Jerusalem, maka lit raja i Juda. Gundari, si enda nandangi ilaporken man raja. Emaka rehlah kam gelah sicakapken kerna si enda.”

8 Tapi bagenda jawapen si kukirim, “Labo tuhu sada pe katandu e. Ban-banndu* saja nge e kerina.” 9 Sebap usahaken kalak e pebiar-biar kami alu ngataken, “Lanai pagi kalak e pang ndahiken dahin e,* ngadi nge kari dahin e.”+ Emaka ertoto aku, “Pegegehi min aku.”*+

10 Kenca si e, lawes aku ku rumah Semaya anak Delaya kempu Mehetabel, sanga si e la ia banci nadingken rumahna. Nina, “Mari siban waktuna ndigan kita banci jumpa bas rumah Dibata si benar, bas rumah pertoton, situtup pintu-pintu rumah pertoton, sebap ibunuh kalak ah atena kam. Pasti reh kalak ah berngi-berngi guna munuh kam.” 11 Tapi ningku, “Me labo mungkin kalak si bagi aku enda kiam? Banci kin dilaki si bagi aku enda masuk ku rumah pertoton janah la ibunuh?+ La aku nggit masuk.” 12 Kenca si e, sadar aku maka labo Dibata si nuruh ia, tapi ia enggo isogok Tobia ras Sanballat+ guna nipu aku. 13 Isogok ia guna pebiar-biar aku gelah kulakoken dosa, alu bage lit alasen kalak e ncedai gelarku janah erban aku mela.

14 O Dibataku, ingetlah perbahanen Tobia+ ras Sanballat, bage pe Noadia eme nabi si diberu ras nabi-nabi si debanna si lalap usahakenna erban aku mbiar.

15 Dung me tembok e bas wari si pe-25-ken bulan Elul.* Lit 52 wari dekahna ndungisa.

16 Kenca begi musuh-musuh kami kerna si e janah kerina bangsa-bangsa si lit i sekeliling kami ngidah si e, mela kel akap kalak e.+ Teh kalak e maka dahin e dung alu penampat Dibata kami. 17 Sanga si e, bangsawan-bangsawan+ Juda lalap ngirim melala surat man Tobia, janah balas Tobia surat-surat kalak e. 18 Enterem kalak si lit i Juda ersumpah ndukung ia, perban ia kela Sekanya anak Arah,+ janah Jehohanan anakna ngempoi anak Mesullam. Mesullam+ e anak Berehia. 19 Selain si e, rusur kataken kalak e kai si mehuli kerna ia man bangku janah laporken kalak e man bana kai si kukataken. Kenca si e kirim Tobia surat guna pebiar-biar aku.+