Kai si banci nampati kalak Kristen Heber megenggeng ngadapi tentangen? Iteh Rasul Paulus maka perlu benar cara rukur kalak e kerna ujin si iadapi kalak e. Ijelaskenna maka sanga kalak Kristen ngadapi tentangen, banci saja ipediat Dibata tentangen e terjadi guna ngelatih kalak e. Pelatihen si bage banci nampati kalak e mpebelin sipat-sipat Kristen. Jelas me, sipat kalak e si megenggeng banci mereken melala manpaat. Adi fokus kalak e ku manpaatna, pasti reh nukahna akap kalak e megenggeng. (Heb. 12:11) Inasehati Paulus kalak Kristen Heber gelah terus perpang ras megenggeng ngadapi penindasen. Cocok kel Paulus si mereken nasehat e. Engkai? Perban mbarenda pernah isiksana kalak Kristen, emaka tehna kai si iadapi kalak e. Kenca ia jadi kalak Kristen pe, iadapina erbage-bage penindasen.—2 Kor. 11:​23-25. w24.09 12-13 par. 16-17

Tambah warina, dahin erberita reh pentingna. Engkai? Perban waktu erberita reh sitikna. Cuba siinget kai si ikataken Jesus kerna dahin erberita bas wari-wari pendungi bagi si icatat bas Markus 13:10. Bas cataten Matius pe ikataken Jesus maka berita si meriah iberitaken pagi i belang-belang doni sope reh “kedungen e.” (Mat. 24:14) Enggo itetapken Jahwe “wari ras jamna” si e terjadi. (Mat. 24:36; Perb. 1:7) Tiap wari, kedungen e reh deherna. (Rom. 13:11) Emaka, arus terus kita erberita seh ngasa reh kedungen e. Lit penungkunen si perlu siukuri, eme: Engkai maka kita nggit erberita si meriah? Lit telu alasenna. Si pertama, perban meherga siakap kebenaren. Si peduaken, keleng ateta kerina kalak. Si peteluken, keleng ateta Jahwe ras gelarNa, janah enda me alasen si pentingna. w24.05 14 par. 2-3

Kam orang tua, sampatilah anakndu ngukuri ciptan Jahwe. Sanga kena gawah-gawah ngenen pemandangen, ntah sanga kena ku juma, cidahkenlah man anakndu bentuk-bentuk si mejile si lit bas alam semesta enda. Bentuk si bage pasti iban Pencipta si luar biasa pentarna. Contohna, bentuk spiral. Melala bentuk spiral si lit bas alam semesta enda. Contohna, galaksi, keong, bulung-bulung, ras bunga matahari. Enggo ertahun-tahun ipereksa ilmuwan bentuk e. Sekalak ahli biofisika si gelarna Nicola Fameli njelasken maka adi sikira bentuk spiral si lit bas sada benda bas alam semesta enda, banci sidat angka bas deret Fibonacci. w24.12 16 par. 7