KABETÔLÔ 17
Kele’ ôsu a ba’ale womien nye’ane Zambe été
“Vôm mi alôñ miabebien mbamba mbunan a dañedañ yôp . . . mi [ke ôsu a ba’ale] miabebien nye’ane Zambe été.”—JUDE 20, 21.
1, 2. Nge bia kômbô ba’ale biabebiene nye’ane Zambe été, jé bia yiane bo?
BIA bese bia kômbô bo ngul a mvo’é minsôn. Ajô te nde bia ve ngule ya di mbamba bidi, ngule ya bo sport, a nyoñe ngap a nyule jangan. Bia ve ngule ya bo mame mete mese amu nalé a ne asu mvo’é jangan, jôm éte nje bi ne teke bili atek. Bia yiane fe ve ngule ya bo mvo’é a ngule mfa’a ôfe.
2 To’o amvôé dangan a Yéhôva é mbe nya ngulu éyoñe bi nga taté na bia yé’é Mejô mé a yeme nye, bia yiane ke ôsu a yemete de. Éyoñe Jude a jô Bekristene na be ke ôsu a ‘ba’ale bebien nye’ane Zambe été,’ a kate fe be avale be ne bo de. A jô na: “Vôm mi alôñ miabebien mbamba mbunan a dañedañ yôp.” (Jude 20, 21) Nde ñhe, aval avé bi ne wônô mbunane wongan?
KELE’ ÔSU A WÔNÔ MBUNANE WÔÉ
3-5. (a) Satan a yi na ô yene miñye’elane mi Yéhôva aya? (b) Wo yene metiñ, a miñye’elane mi Yéhôva aya?
3 E ne nya mfi na, womien ô yeme na, mezene me Yéhôva mme ma dañe mvo’é. Satan a yi na ô yene na miñye’elan mi Yéhôva mi ne angôndô ya ayaé ya tôñ, a na ô ne dañe nyiñe meva’a été nge womiene wo top jam é ne mvo’é nge di é ne abé. A nga kui na a bo de afub Éden. (Metata’a 3:1-6) A ngenane fe a bôndé’é mefe’e ya bo de den.
4 Ye Satan a bele éyoñ a jô na miñye’elan mi Yéhôva mia kamane bia na bi belane éto fili jangan? Momo. Asu na ô kôme wô’ô de, bia zu nyoñ éve’an. Bi tame jô na wo wulu mbamba park (vôme bôte ba ke yene betit), éyoñ éte wo yen beta nka’ale vôm éziñ. Éko éziñ wo ye sili womiene na, ‘Amu jé ba te futi beta nka’ale nyi?’ Ve nté ô ngenan ô sili’i womien nsili ôte, ñgbweñgbwem é nga bam nka’ale été. Ye wo ye yene mfi ya nka’ale ôte? Ôwé, wo ye wô’ô mevak amu wo ba’ale wo, wo kamane ñgbweñgbwem na é zu landé wo! Miñye’elane Yéhôva a ve bia mi ne ane nka’ale ôte, Satan ke nnye a ne ñgbweñgbwem éte. Bible a ve bia abendé di: “Mi taba’an nkôman, mi momba’an: nsiñe wônan Diable a ke a wulu’ aval ane ñgbweñgbwem je abam, a jeñe nyô a ne ngule ya bi.”—1 Pierre 5:8.
5 Yéhôva a yi na bi bi ényiñe ja dañe mvaé. A nji yi na Satan a landé bia. Jôm éte nje a ve bia metiñ, a miñye’elane mié, na mi ba’ale bia a bo na bi nyiñe mevak été. (Beéphésien 6:11) Jacques a nga tili na: “Ve nyô a tu’a fombô benya metiñ été, metiñ ya éto [fili], a bo mbane ya bo nalé . . . môt ate a ye nyoñ ébotan a mboane wé.”—Jacques 1:25.
6. Jé é ne yemete bia na, mezene me Yéhôva mme ma dañ abeñ?
6 Nge bia tôñe zene Yéhôva a liti bia, ényiñe jangan ja ye dañe bo mvo’é, amvôé dangan a nye da ye fe dañe bo ngul. Éve’an é ne na éyoñe bia ye’elane nye mban, bia bia yen mfi y’été. (Matthieu 6:5-8; 1 Bethéssalonicien 5:17) Bi ne mevak éyoñe bia bo nye mewôk a sulane vôme wua na bi kañe nye a veane ngule nyul, a éyoñe bia kañete a ye’ele bôte bevok. (Matthieu 28:19, 20; Begalate 6:2; Behébreu 10:24, 25) Nge bia nyoñ éyoñe ya fas avale mame mete mese me nga wônô mbunane wongan, nalé a ye yemete bia na, mezene me Yéhôva mme ma dañ abeñ.
7, 8. Jé é ne volô bia na bi bo teke koo meve’ele bia ye tôbane me melu ma zu woñ?
7 Bi ne koo meve’ele bia ye tôbane me melu ma zu woñ. Nge wo fe ô biya aval asimesan ete, simesa’ane mejô me Yéhôva ma: “Me ne Yéhôva Zambe wôé, nyô a ye’ele wo ane wo ye yen mvolan, nyô a wulu wo zen wo yiane ke. Ngo’o nge ô nga vô’ôlô metiñe mam! Éyoñ éte mvo’é jôé é nga ye bo aval ane ôsôé, a zôsô wôé aval ane mintyôa mi mañ.”—Ésaïe 48:17, 18.
8 Éyoñe bia bo Yéhôva mewôk, mvo’é jangan ja bo aval ane ôsôé ô ne teke kôt, zôsôô wongane ki a ye bo ane mintyôa mi mañ, mmie mia zu jimbi nsa’a mañ kom ése, teke tebe. To’o bia tôbane avale njuk avé, bi ne ngule ya bi mbunan. Bible a bo bia ngaka’a nyi: “Ke’e Yéhôva mbe’e wôé, a nnye a ye ba’ale wo. A vo’o [jô’é] na môt a ne zôsô a [ku si].”—Besam 55:22.
KELE’ ÔSU A YAÉ NSISIM
9, 10. E bo étôtôlô nsisim a tinan aya?
9 Wo yaé a bo étôtôlô nsisim éyoñe wo ve ngule ya yemete amvôé dôé a Yéhôva. (Behébreu 6:1) E bo étôtôlô nsisim a tinan aya?
10 Sa ke abime mimbu bi bili nde da bo na bi bo étôtôlô nsisim. Môt a kômbô bo étôtôlô nsisim, a yiane bo na Yéhôva a bo mvôé a dañe nye’e, a yiane fe jeñe na a yene mam ane Yéhôva a yene me. (Jean 4:23) Paul a nga tili na: “Ba be ne ba ya minsôn, be asimesane mame ya minsôn; ve ba be ne ba ya nsisim, mame ya nsisim.” (Beromain 8:5) Môt a ne étôtôlô nsisim a beme ki ôsimesane wé mimvôman nge ke biôme bi mo. A ve ngule jé ése na a bo Yéhôva ésaé, a na a nyoñe mbamba mintyi’an. (Minkana 27:11; lañe’e Jacques 1:2, 3.) A kañese ki na mbia b’asimesan be tindi nye na, a bo mbia be mam. Môt a ne étôtôlô nsisim a yem jam é ne zôsôô, a ve fe ngule ya bo de.
11, 12. (a) Paul a nga jô na bia yiane bo aya asu na bi bi “mefe’e ya yemelan mvaé a abé”? (b) Aval avé Kristen ja kômbô bo étôtôlô nsisim ja yiane vu beta mbo bivôé?
11 Da sili abui éyoñ asu ya na, môt a bo étôtôlô nsisim. Nlômane Paul a nga tili na: “Ayete bidi e ne jôme ya benya bôtô, e ne na, ba, amu be maneya yemban, be ntoo mefe’e ya yemelan mvaé a abé.” (Behébreu 5:14) Bifia “be maneya yemban” bi ne éfuse ji, bia bo na bi simesan môt a kômesan beta meve’ele asu bivôé biziñ.
12 Asu na môt éziñ a bo beta mbo bivôé, a yiane nyoñ abui éyoñ, a yiane fe kômesane asu ya na a bo ôden, a na nyule jé é mane yembane bivôé bite. A nji bialé a bo’o de. Éyoñe mon a bialé, a nji yeme belane mo mé nge ke mebo mé. Ve ane éyoñe ja lôt a yé’é na a bi biôm, a na a wulu. Mbôl a ne mbane ya ve’ele de, a ne su’ulane bo beta mbo bivôé. Aval ete fe, asu na bi bo Kristen é ne étôtôlô, bia yiane nyoñ éyoñ, a ve ngule ya yembane miñye’elane mi Yéhôva.
13. Jé é ne volô bia na bi yé’é fas ane Yéhôva a fas?
13 Kalate nyi a te ye’ele bia aval bi ne bi ôsimesane Yéhôva, a yene mam ane nye. Bia te fe yé’é mfi ya nye’e memvinda mé. Éyoñ ése bia nyoñe ntyi’an, bia yiane sili biabebiene na: ‘Metiñ a miñye’elan mivé ya Bible mia fombô ntyi’ane ma kômbô nyoñe wu? Aval avé me ne tôñe mie? Jé me ne bo asu na me ve Yéhôva nlem avak?’—Lañe’e Minkana 3:5, 6; Jacques 1:5.
14. Nge bia kômbô wônô mbunane wongan, jé bia yiane bo?
14 Bia yiane ke ôsu a wônô mbunane wongan. Aval ane mbamba bidi bia volô nyule jangan na é bo ngul, aval ete fe ayé’é ya Bible da wônô mbunane wongan. Éyoñe bi nga taté na bia yé’é Bible, bi nga yé’é mbôka’a ya miñye’elan mi Yéhôva a mezene mé. Ve ane éyoñe ja lôt, bia yiane ve ngule ya tu’a wô’ô bido’o bi mame bise bivok. Jam ete nde Paul a jôô de éyoñ a jô na: “Ayete bidi e ne jôme ya benya bôtô.” Éyoñe bia tôñe mame bia yé’é, bia bi fek. Bible a jô bia na: ‘fek é ne jame ya ôsu.’—Minkana 4:5-7; 1 Pierre 2:2.
15. Amu jé e ne mfi na bi tu’a nye’e Yéhôva a bobejañ?
15 Môt éziñ a ne bo ngul a mvo’é minsôn, ve asu na a ba’ale émiene mvo’é, a yiane ke ôsu a toñ émien. Aval ete fe, môt a ne étôtôlô nsisim a yeme na a yiane ve ngule na amvôé dé a Yéhôva é ke ôsu a bo ngul. Paul a ba’alane bia na: “Fomba’ane miabebien, nge mi ne mbunan été, ve’ela’ane miabebien.” (2 Becorinthien 13:5) Ve sa ke mbunane wongan étam ñwô wo yiane yaé. Nye’ane bia nye’e Yéhôva a bobejañe fe wo yiane yaé. Paul a nga jô na: “Nge me bili . . . ñyeman, a nge me bili mbunan ôse aval ane me ne va beta minkô, ve te bi nye’an, me se ke jôm.”—1 Becorinthien 13:1-3.
BEME’E MISE MÔÉ NDI NLEME JÔÉ
16. Satan a yi na bi wô’ôtan aya?
16 Satan a yi na bi buni na, bi vo’o ve Yéhôva nleme mvaé môs éziñ. A yi na bi bili atek, a yi na bi simesane na minju’u bia tôbane mie mi vo’o mane môs éziñ. A nji yi na bi tabe ndi a bobejañe ya nsisim, a nji yi na bi bo mevak. (Beéphésien 2:2) Satan a yeme na nge bia bi asimesane da te’e bia, nalé a ye fe te’e amvôé bia be Zambe. Ve Yéhôva a nga ve bia ékpwelé ja volô bia na, bi wosane asimesane da kômbô te’e bia. Ékpwelé éte é ne ndi nlem.
17. Aval avé ndi nleme jangan é ne volô bia?
17 Bible a ve’e ndi nleme jangan a afô’ôlô da kamane mon bezimbi éyoñ a ne bita, a loon afô’ôlô ete e kalate 1 Bethéssalonicien 5:8 na, “ndi nleme nyian.” Nge bi too ndi a benganka’a be Yéhôva, nalé a ye ba’ale asimesane dangan, a volô bia na bi wosan asimesan e ne te’e bia.
18, 19. Aval avé ndi nleme Yésus é nga ve nye ngule ya jibi?
18 Ndi nleme Yésus a mbe a bili nje é nga bo na a bo ngul. Alu a nga kandane lôte si va, a nga tôban abui minjuk. Mvôé jé jia é nga koñe nye. Nyi fok é nga kate nye. Bemvôé bé bevo’o ki be nga tub a li’i nye étam. Bôte ya ayoñe dé be nga ke nye ngame yat, a jô jô na be tyelé nye élé mintaé. Jé é nga volô nye na a jibi minju’u mite mise? “Amu meva’a me mbe nye ôsu a nga jibi [élé mintaé], a biasé ôson, a a tabeya si mbo nnôme ya éto njôane ya Zambe.”—Behébreu 12:2.
19 Yésus a mbe a yeme’e na, nge a ke ôsu a wulu ba’aba’a a Ésa wé, aye ve Nye duma, a liti fe na Satan a ne nlaa minsos. Ndi nlem éte nje é nga ve nye beta mevak. A mbe fe a yeme’e na ana’ana, a ye ke koon Ésa yôp été. Ndi nlem éte é nga volô nye na a jibi. Aval ane Yésus, bia yiane kabetane ndi nleme jangan. Ja ye volô bia na bi jibi minju’u mise bi ne tôbane mie.
20. Jé é ne volô wo na ô bi mbamba b’asimesan?
20 Nge ô ne mbane ya jibi, a nge mbunane wôé ô ne ngul, yeme’e na Yéhôva a lôô de. (Ésaïe 30:18; lañe’e Malachie 3:10.) A ka’a na, “a ye ve wo mam nleme wôé w’akômbô.” (Besam 37:4) Nde ñhe, kabeta’ane ndi nleme jôé. Satan a nji yi na ô bi ndi nlem, a yi na ô simesane na bengaka’a be Yéhôva b’aye ke tôébane môs éziñ. Ve te jô’é aval asimesan ete e te’e wo! Nge wo tem ndi nleme jôé é nga tek, ye’elane Yéhôva, sili’i nye mvolan. Te ve’ele vuane mejô ma so kalate Bephilippien 4:6, 7 ma: “Te tyelane minleme yôp a jam éziñ, ve mfa’a ya jam ese, mam mi asili me kateba’ane be Zambe a meye’elan a nja’an a mvean akeva. A mvo’é Zambe, nje éte je adañe fe’ ése, je aye ba’ale minlem mienan a minsimesane mienan be Krist Yésus.”
21, 22. (a) Nsôñan ôvé Zambe a bili asu si? (b) Ntyi’an ôvé ô nyoñeya?
21 Bo’o mbane ya bindi mbamba be mam ba yange bia melu ma zu. Ana’ana si nyi ja ye bo njalan v’a bôt ba kañe Yéhôva. (Nlitan 7:9, 14) Fase’ aval ényiñe ya mfefé émo ja ye bo. Ja ye bo abeñ adañe abim ô ne simesan! Satan, mimbia minsisime mié, a mbia be mam bese ba ye man. Teke fe ôkon, teke fe awu. Wo ye kôlô si môs ôse a ngule jôé ése, a meva’a nlem. Bôt bese ba ye saé a nleme wua na si ése é bo paradis. Bia ye bi mbamba bidi, môt ase a ye bi étaba’a jé. Môt éziñ a ye ke beta bo njet nge évô, ve môt ase a ye bo mbamba nlem, wua a nyu mbok. Éyoñ éte nje ñhe bone be bôte bese ba ye bu’uban “eto [fili] ya étôto’o ya bon be Zambe.”—Beromain 8:21.
22 Yéhôva a yi na ô tobe nye ane mvôé jôé wo dañe nye’e. Nde ñhe, môs ôse ya yôp, va’a ngule na ô bo nye mewôk, a tu’a subu nye bebé. Ôwé, bia bese, enkelan ñhe ôsu a ve ngule ya ba’ale biabebiene nye’ane Zambe été nnôm éto a nnôm éto!—Jude 21.