Ye é ne mvo’é na bi simesane na mame mese me nga boban éyoñe ya ndône mendime me ne ndeme ya mame ma ye bobane melu ma zu? Éyalan é ne na momo. Amu jé bia jô nalé? Amu Kalate Zambe a nji ye’ele de. É ne été na Yésus a nga ve’e “melu me Noé” a nsoone Mone môt, ve a nji jô na mame mese me nga bobane melu me Noé ma ye fe tôébane melu ma zu aval ane éyoñe Yéhôva a nga fete mbé ya arche. (Matt. 24:37-39) Nde Noé a nga bo aya éyon̂ a nga wô’ô foé Yéhôva a nga kate nye? A nga liti na a bili mbunan éyoñ a nga lôñ arche. (Héb. 11:7; 1 P. 3:20) Avale te fe, bôte ba wô’ô mbamba foé ya Éjôé Zambe ba yiane liti mbunane wop a zene ya mimboone mi mame miap. (Mame mi. 3:17-20) Pierre a nga loone Noé na “nkate foé ya zôsô.” Dene bia nyoñe ngap a ésaé nkañete ja bobane si ése meku’u menyin, a bia ve ngule ya bo je a ayôñ ése. Ve to’o bia ve abime ngul avé, bi vo’o kui na bi mane kañete môt ase a nyiñe si va ôsusua na asu’ulane da so. w24.05 af. 9-10 ab. 3-5

Bia yiane jeñ a mezene mese na bi bo mbamba nlem a bemvôé be Yéhôva a semé be. (Rom. 12:10) Aval avé? Jame da bi ne bo é ne kalate Besam 15:4, a liti na môt a ne nneñe ya nda éndélé Yéhôva a ne nyu a tôé ngaka’a jé, to’o da sili na a tôbane minjuk. Éyoñe bia tôé ki bengaka’a bangan, nalé a ne ndeñele bôte bevok. (Matt. 5:37) Éve’an é ne na, Yéhôva a yi na beyeñe bé be semé ngaka’a be nga bo éyoñe be nga luk. Yéhôva a wô’ô fe angôndô ya mevak éyoñe bebiaé ba ve ngule jap ése na be tôé bengaka’a ba bo bone bap. Amu bia nye’e Zambe a bôte bevok, bia ye ve ngule jangan ése na bi tôé bengaka’a bia bo. Zene fe bi ne liti na bia semé bemvôé be Yéhôva é ne éyoñe bia yeme nyoñe bôt a éyoñe bi ne akap. (Rom. 12:13) Ane ô vaa éyoñe bia lôte bisulan a minkañete a bobejañ a besita, nge bia lôte fe éyoñ a be na bi bo mame mefe, bia ye tu’a subu be bebé a subu fe Yéhôva bebé. Nde fe éyoñe bia yeme nyoñe bôt, bia vu Yéhôva. w24.06 af. 12 ab. 15-16

Yéhôva a volô bôte be ne éjote nyule na be yeme benya mejôô. (Matt. 11:25) Bi nga kañese yé’é benya mejôô a éjote nyul ése. (Mame mi. 8:30, 31) Ve bia yiane tabe ntyele ya bo mebun. Nge bi ne mebun, bi ne taté na bia simesane na asimesane dangane nde da dañe zôsô a lôte memvinda ya Kalate Zambe a mebendé ékôane Yéhôva ja ve bia. Nge bia yi na bi ke ôsu a bo éjote nyul, bia yiane yeme na bi ne zezé éyoñe ba ve’e bia a Yéhôva. (Bsa. 8:3, 4) Bi ne fe ye’elan asu na bi bo éjote nyul a na bi bi fulu ya kañese mame ba ye’ele bia. Yéhôva a ye volô bia na bi telé asimesane dé bia koone de Kalate Zambe a ji ékôane jé ja ve bia ôsu, sake éndangan. Nté wo lañe Kalate Zambe, jeñe’e na ô yene mame ma bo’olô na Yéhôva a nye’e fulu éjote nyul, a ma ma liti na a vini mebun, énguñ a éngelezek. Éyoñe ba ve wo ésaé éziñe ja bo na ô yené bôt été, éyoñe te nje wo yiane dañe ve ngule ya bo éjote nyul. w24.07 af. 10 ab. 8-9