Ifeezhanz

1 Dis leta da fahn mee, Paal, wahn apasl a Krais Jeezas bikaaz a di wil a Gaad. Ah di rait dis leta tu di hoali peepl weh deh da Efisos, hoo faytful ahn hoo da wan wid Krais Jeezas:

2 Ah pray dat Gaad wi Faada ahn di Laad Jeezas Krais shoa unu grayt kainis* ahn giv unu pees.

3 Mek wi prayz di Gaad ahn Faada a wi Laad Jeezas Krais, kaaz hihn bles wi wid evri spirichwal blesin eena hevn bikaaz wi da wan wid Krais. 4 Fahn eevn bifoa eni pikni mi baan eena dis werl,* Gaad mi chooz wi fi bee wan wid Krais soh dat wi ku bee hoali widowt no faalt fronta Gaad ahn shoa ahn lov. 5 Gaad mi disaid heda taim dat hihn mi wahn adap wi az ih oan chiljren sayka Jeezas Krais. Ahn dat pleez hihn ahn da akaadn tu fi hihn wil. 6 Dat mi hapm soh dat peepl ku prayz Gaad, bikaaz hihn yooz ih Son weh ih lov fi shoa wi ih grayt kainis. 7 Ahn Gaad mi yooz di blod a fi hihn Son fi pay di ransom* weh set wi free soh dat wi ku geh fergivnis fi wi sin dehn. Di grayt kainis a Gaad reeli grayt fi chroo!

8 Ahn Gaad jenaros wen ih gi wi ih grayt kainis lang wid aal wizdom an andastandin, 9 an ih mek wi noa di hoali seekrit* a fi hihn wil. Ahn bikaaz hihn tek plezha eena da hoali seekrit, hihn mi disaid 10 fi set op wahn way fi manij tingz, ahn dat wahn hapm wen di taim weh hihn set kohn tu wahn en, soh dat hihn ku gyada tugeda aala di tingz eena hevn an aala di tingz pahn di ert fi deh anda Krais. An evriting kohn tugeda sayka Krais, 11 ahn wee weh da wan wid hihn wahn inherit weh Gaad pramis wi. Gaad mi chooz wi heda taim akaadn tu fi hihn perpos, kaaz evriting weh hihn disaid fi du da akaadn tu fi hihn wil. 12 Wee da-mi di fers wan dehn fi ga hoap eena Krais, ahn Gaad chooz wi heda taim fi giv ahn prayz ahn gloari. 13 Bot unu mi hoap eena Krais tu, afta unu mi hyaa di werd a chroot weh da di gud nyooz bowt unu salvayshan. An afta unu mi bileev eena Krais, Gaad put wahn seel pahn unu wen ih mi maak unu wid di hoali spirit weh ih pramis, an ih yooz Krais fi du dat. 14 Di hoali spirit da laik wahn dong payment* weh mek wi shoar dat wi wahn geh weh Gaad pramis wi. Gaad gi wi da maak soh dat hihn kuda mi pay di prais fi set ih oan peepl free fahn sin, ahn dat wahn mek ih geh wahn lata prayz.

15 Dat da wai fahn eva sins Ah hyaa bowt unu fayt eena di Laad Jeezas ahn di way how unu chreet aala di hoali peepl dehn wid lov, 16 Ah noh stap tank Gaad fi unu. Ah kantinyu pray fi unu, 17 soh dat di Gaad a wi Laad Jeezas Krais, di Faada weh aal gloari bilangz tu, ku giv unu wahn spirit a wizdom an andastandin a di tingz weh hihn shoa unu, ahn laik dat unu ku noa di hoal chroot bowt ahn. 18 Hihn oapm op unu main,* soh dat unu ku andastan di hoap weh hihn giv unu, di wandaful blesin dehn weh hihn wahn giv tu di hoali peepl az wahn inheritans, 19 ahn how grayt fi hihn powa weh ga kanchroal oava unu laif. Ahn wi si how grayt ih powa eena di tingz weh ih du 20 wen hihn rayz Krais bak op fahn di ded ahn mek ih sidong pan ih rait han said da hevn. 21 Ahn Gaad put ahn faar haiya dan eni ada govament, haiya dan eni ada peepl wid atariti, haiya dan eni ada roola er king, wid wahn naym weh haiya dan evri ada naym, ahn noh onli eena dis sistem a tingz* bot eena di fyoocha tu. 22 Gaad put evriting anda Krais fut ahn mek ahn hed oava evriting eena di kangrigayshan. 23 Di kangrigayshan da fi hihn badi weh ful op wid hihn, ahn hihn da di wan weh kompleet evriting.