Revilayshan

22 Den di aynjel shoa mi wahn riva weh di waata gi laif; ih mi klyaa laik kristal an ih mi-di kohn fahn di chroan weh bilangz tu Gaad ahn tu di Lam. 2 Di riva mi-di ron dong di midl a di mayn schreet chroo di siti. Ahn pahn eech said a di riva sohn chree weh gi laif mi-di groa. Ahn 12 taimz a yaa dehn bayr froot, wan taim evri mont. Ahn di leef dehn a di chree mi heel di peepl a di nayshan dehn.

3 Ahn Gaad noh wahn put eni kers pahn notn ner nobadi eena dis siti. Di chroan weh bilangz tu Gaad ahn tu di Lam wahn deh eena di siti, ahn Gaad servant dehn wahn wership* ahn deh. 4 Dehn wahn si Gaad fays, ahn fi hihn naym wahn deh pahn dehn farid. 5 Ahn nait noh wahn egzis nohmoh; dehn noh wahn need no lamp ner di son, kaaz Jehoava Gaad wahn bee fi dehn lait. Ahn dehn wahn rool az kingz fareva an eva.

6 Den di aynjel tel mi: “Dehnya werdz da di chroot, ahn peepl ku bileev dehn. Jehoava Gaad, weh yooz di prafit dehn fi tel ih mesij, sen ih aynjel fi shoa ih servant dehn di ting dehn weh fi tek plays soon. 7 Ahn Jeezas seh: ‘Ah di kohn soon! Enibadi weh du weh di prafesi seh ahn du weh deh eena dis skroal wahn bee hapi.’”

8 Wel da mee, Jan, weh mi hyaa ahn si dehnya tingz. An az soon az Ah hyaa ahn si dehn, Ah bow dong fi wership di aynjel weh mi-di shoa mi dehnya tingz. 9 Bot hihn tel mi: “Bee kyaaful! Noh du dat! Ai da wahn slayv jos laik yoo ahn yu bradaz hoo da prafits, ahn laik di peepl weh du di tingz weh deh eena dis skroal. Yu fi wership Gaad.”

10 Den ih tel mi: “Yu noh fi kip dehnya werdz a di prafesi weh deh eena dis skroal wahn seekrit, kaaz di set taim fi mek dehnya tingz hapm deh kloas. 11 Ahn mek di wan weh noh raichos kip aan di du tingz weh noh raichos, ahn mek di wan weh praktis doti tingz kantinyu da way; bot mek di raichos wan kip aan di du raichos tingz, ahn mek di wan weh hoali kip aan di bee hoali.

12 Ahn Gaad seh: “‘Ah di kohn soon! An Ah wahn pay bak eech persn fi weh dehn du. 13 Ai da di Alfa ahn di Omayga,* di fers ahn di laas, di biginin ahn di en. 14 Di wan dehn weh wash dehn roab wahn bee hapi, ahn sayka dat, dehn wahn geh di rait fi eet di froot fahn di chree weh gi laif, ahn fi goh eena di siti chroo di gayt dehn. 15 Bot di peepl weh da laik daag,* ahn di wan dehn weh praktis spiritizm ahn weh sekshwali imoaral,* ahn di wan dehn weh merda ahn weh wership aidol, an evribadi weh lov fi tel lai ahn kip aan di lai, wahn stay owtsaida di siti.’”

16 Jeezas seh: “‘Ai da Jeezas, ahn da mee sen mi aynjel fi tel unu bowt dehnya tingz soh dat di kangrigayshan dehn ku benifit. Ai da Dayvid disendant, fi hihn son, ahn di brait maanin staar.’”

17 Ahn di hoali spirit ahn di braid kip aan di seh, “Kohn!” Soh mek evribadi weh hyaa dis seh, “Kohn!” Ahn mek evribadi weh tersti, kohn. Ahn mek evribadi weh waahn jrink di waata weh gi laif jrink it fi free.

18 Jeezas seh: “Dis da weh Ah tel evribadi weh hyaa di prafesi weh deh eena dis skroal: If enibadi ad aan eniting tu weh rait dong eena dis skroal, Gaad wahn mek di saym playg dehn weh deh eena dis skroal hapm tu da persn. 19 An if enibadi tek weh eniting fahn di prafesi weh deh eena dis skroal, Gaad noh wahn mek ih geh di gud tingz weh di skroal taak bowt. Gaad noh wahn alow ahn fi eet fahn di chree weh gi laif, ner alow ahn fi goh eena di hoali siti.

20 “Di wan weh tel di chroot bowt dehnya tingz seh, ‘Yes, Ah di kohn soon.’”

“Aymen! Kohn, Laad Jeezas.”

21 Ah pray tu Gaad dat di grayt kainis* a di Laad Jeezas Krais deh wid aala di hoali wan dehn.