Terzdeh, Maach 28
Yu gwehn bak tu dos.—Jen. 3:19.
Non a wi waahn mek di saym mistayk laik Adam ahn Eev, noh chroo? Fi mek wi noh en op di du di saym ting, wi need fi kip aan di laan bowt Jehoava, apreeshiayt fi hihn kwalitiz, an andastan di way how hihn tink. Wen wi du dat, fi shoar wi lov fi Jehoava wahn groa. Tink bowt Aybraham egzampl. Hihn mi reeli lov Jehoava. An eevn wen hihn neva andastan Jehoava disizhan dehn, ih neva gaahn gens dehn. Insteda dat, ih mi chrai geh fi noa Jehoava beta. Fi egzampl, wen Aybraham mi fain owt dat Jehoava, hoo da “di Joj oava aal di ert,” mi wahn dischrai Sadam ahn Gomora, hihn mi wori dat Jehoava mi wahn dischrai raichos peepl lang wid wikid peepl. Dat neva mek sens tu Aybraham, soh eena wahn hombl way hihn mi aks Jehoava lata kweschanz. Ahn Jehoava mi payshent wid ahn, an ih ansa aala ih kweschan dehn. Aftawodz, Aybraham mi geh fi andastan dat Jehoava egzamin eech persn haat ahn dat Hihn neva ponish di raichos wid di wikid.—Jen. 18:20-32. w22.08 28 ¶9-10
Fraideh, Maach 29
Yu ku chros wahn persn weh ku kip wahn seekrit.—Prov. 11:13.
Eena 455 B.C.E., afta Govna Nehimaiya mi finish bil bak Jeroosalem waal, hihn mi-di luk fi sohn rispansabl man weh wuda tek gud kayr a di siti. Wan a di man weh Nehimaiya pik da-mi Hananaiya, di cheef a di Kyasl. Di Baibl seh dat Hananaiya da-mi “wahn man weh peepl ku chros ahn weh mi ga moa rispek fi di chroo Gaad dan lata ada peepl.” (Neh. 7:2) Hananaiya mi lov ahn rispek Jehoava, soh ih mi werk haad pahn eni asainment weh ih mi get. Dehndeh kwalitiz ku help wi fi bee rispansabl ahn werk haad pahn eni asainment weh wi get eena Gaad servis. Noatis di egzampl a Tikikos, hoo da-mi wahn brada weh di apasl Paal mi chros. Paal mi pen pahn Tikikos, an ih mi kaal ahn wahn “faytful servant.” (Ifee. 6:21, 22) Paal neva onli chros ahn fi diliva di leta dehn weh hihn mi rait tu di bradaz da Efisos ahn Koloaseh bot hihn mi aalso chros ahn fi inkorij ahn komfert dehn. Tikikos egzampl mek wi tink bowt di faytful, rispansabl man dehn weh tek kayr a wi spirichwal needz tudeh.—Kol. 4:7-9. w22.09 9-10 ¶5-6
Satideh, Maach 30
Di persn weh ga lov aalwayz wilin fi fergiv adaz.—1 Peet. 4:8.
Joazef mi gaahn chroo lata ting fi bowt 13 yaaz. Joazef kuda mi staat dowt weda er nat Jehoava mi reeli lov ahn. Maybi ih mi eevn wanda if Jehoava mi lef ahn bai ihself wen ih mi reeli need ahn di moas. Bot Joazef neva mek dehnya tingz mek ih stay beks. Insted, hihn mi stay kaam, ahn dat mi mek hihn ak eena wahn sensabl way. Wen Joazef mi geh di chaans fi pay bak ih breda dehn fi weh dehn mi du ahn, hihn neva du dat. Insted, hihn mi shoa dat ih lov dehn ahn dat ih fergiv dehn. (Jen. 45:4, 5) Joazef kuda mi bihayv dis way bikaaz hihn mi-di tink schrayt. Insteda foakos pan ih oan prablemz, hihn mi foakos pahn weh Jehoava waahn. (Jen. 50:19-21) Weh wi ku laan fahn dis? If sohnbadi chreet yu bad, noh geh beks wid Jehoava er staat tu tink dat hihn abandan yu. Insted, tink bowt how hihn di help yu fi bayr op wid wateva yu di goh chroo. Pahn tap a dat, wen adaz chreet yu bad, chrai noh foakos pahn dehn mistayk bot chreet dehn wid lov. w22.11 21 ¶4