Roamanz

10 Mi dyaa bradaz, eena mi haat Ah waahn di Izrelait dehn geh sayv, an Ah pray tu Gaad fi mek dat hapm. 2 Ah noa dat dehn reeli waahn pleez Gaad eevn doa dehn noh reeli noa di chroot bowt ahn. 3 Bikaaz dehn noh andastan Gaad raichosnis, dehn chrai mek dehnself raichos eena dehn oan way. Dehn noh wilin fi obay di raichosnis a Gaad. 4 Krais da di en a di Laa, soh dat evribadi weh put dehn fayt eena ahn ku bee raichos fronta Gaad.

5 Moaziz mi rait bowt weh raichos akaadn tu di Laa. Ih mi seh: “Enibadi weh du weh rait akaadn tu weh di Laa seh wahn liv.” 6 Bot di skripcha mi aalso seh dat sombadi haftu ga fayt fi bee raichos. Ih seh: “Noh seh eena yu haat, ‘Hoo gwehn op da hevn?’ In ada werdz, hoo gwehn da hevn fi bring Krais dong? 7 Ahn yu noh fi seh dis needa, ‘Hoo gwehn dong eena di deep deep hoal?’ In ada werdz, hoo gwehn dong eena di deep deep hoal fi bring Krais op fahn di ded?” 8 Bot weh di skripcha seh? “Di mesij deh kloas tu unu, ih deh eena unu mowt an eena unu oan haat.” Dis da “di mesij” weh wi di preech ahn weh wi bileev bikaaz a fayt. 9 Bikaaz if yu tel peepl dat Jeezas da di Laad, ahn shoa dat yu ga fayt eena yu haat dat Gaad rayz ahn op fahn di ded, yu wahn geh sayv. 10 Soh if sombadi shoa dat ih ga fayt eena ih haat, Gaad wahn aksep ahn az wahn raichos persn. An if ih waahn geh sayv, ih haftu tel peepl bowt weh ih bileev.

11 Di skripcha seh, “Hihn noh wahn let dong nobadi weh put dehn fayt eena ahn.” 12 Soh no difrens noh deh bitween di Joo ahn di Greek, bikaaz aala dehn ga di saym Laad, ahn hihn jenaros wid enibadi weh kaal pan ahn. 13 Da laik weh di skripcha seh: “Evribadi weh kaal pahn di naym a Jehoava wahn geh sayv.” 14 Bot how dehn wahn kaal pan ahn if dehn noh ga fayt eena ahn? Ahn how dehn wahn ga fayt eena ahn if dehn neva hyaa bowt ahn? Ahn how dehn wahn hyaa bowt ahn if nobadi preech tu dehn bowt ahn? 15 Ahn how dehn wahn preech bowt ahn anles sombadi sen dehn? Da jos laik weh di skripcha seh: “Da wahn byootiful sait fi si di fut a sombadi weh preech gud nyooz bowt gud tingz!”

16 Bot noh aala dehn mi obay di gud nyooz. Aizaiya mi seh: “Jehoava, hoo ga fayt eena di mesij weh wi mi preech?”* 17 Soh den, peepl haftu hyaa di mesij bifoa dehn ku ga fayt. Ahn di mesij weh dehn hyaa kohn fahn di werd bowt Krais. 18 Bot mek Ah aks unu dis: Dat meenz dat di Jooz neva hyaa di mesij? Yes, dehn mi hyaa di mesij. Az a mata a fak, “di mesij mi gaan owt aal oava di werl, ahn peepl aal oava di werl mi hyaa it.” 19 Bot mek Ah aks unu dis tu: Dat meenz dat Izrel neva andastan di mesij? Fers Moaziz mi seh: “Ah wahn yooz wahn nada nayshan fi mek unu geh jelos. Ah wahn yooz wahn foolish nayshan fi mek unu geh beks.” 20 Den Aizaiya neva frayd fi tel dehn: “Di peepl weh neva mi-di luk fi mi da di peepl weh mi fain mi. Ah mi shoa miself tu peepl weh neva mi-di aks fi mi.” 21 Bot den ih taak bowt di peepl a Izrel ahn seh: “Hoal day Ah spred owt mi han an invait wahn stobant set a peepl fi kohn bak tu mi, bot dehn noh obay mi.”