1 Tesaloanyanz

2 Bradaz, unu noa dat wi vizit tu unu mi ga sokses. 2 Kaaz unu noa dat eevn doa wi mi sofa bikaaz peepl mi chreet wi bad da Filipai, Gaad mi gi wi di korij fi tel unu di gud nyooz, eevn doa adaz mi deh gens wi. 3 Weh wi di advaiz unu fi du noh rang, ahn wi noh di giv unu dis advais fi di rang reezn er fi chrai chrik unu. 4 Bot sins Gaad chros wi wid di gud nyooz, wi noh taak fi pleez peepl bot fi pleez Gaad, hoo egzamin wi haat.

5 In fak, unu noa dat wi neva chrik unu wid eni fansi werdz, ahn wi neva priten fi bee gud peepl jos fi geh sohnting fahn unu needa. Gaad noa dis da chroo! 6 Ahn wi neva waahn unu gi wi gloari, ahn wi neva waahnt it fahn ada peepl needa, eevn doa wi kuda mi put wahn ekspensiv berdn pahn unu sins wee da Krais apasl dehn. 7 Bot insted, wi mi jentl wid unu, jos laik wen wahn ma ners ih chiljren ahn tek kayr a dehn eena wahn lovin way.* 8 Soh bikaaz wi lov unu soh moch, wi mi hapi fi shayr di gud nyooz a Gaad wid unu ahn gi wi oan laif* fi help unu, bikaaz unu dyaa tu wi.

9 Bradaz, fi shoar unu memba aala di haad werk an efoat wi mi mek monks unu. Wi mi-di werk day ahn nait fi tek kayr a wi needz, soh dat wi wudn put wahn ekspensiv berdn pahn eni wan a unu wen wi mi preech di gud nyooz a Gaad tu unu. 10 Unu noa dat wi laayal, raichos, an inosent eena di way wi help unu weh da bileevaz, ahn Gaad noa it tu. 11 Unu noa dat wi mi kip aan di inkorij unu, di komfert unu, ahn di waan eech wan a unu, jos laik weh wahn pa wuda du wid ih chiljren. 12 Wi mi du dat soh dat unu ku liv di way how Gaad waahn unu liv, bikaaz hihn di kaal unu fi bee paat a ih Kingdom ahn fi giv unu gloari.

13 Az a mata a fak, dat da wai wi neva stap tank Gaad, bikaaz wen unu mi hyaa Gaad werd fahn wi, unu neva aksep it az di werd a man, bot reeli, az di werd a Gaad, weh di werk eena unu. 14 Kaaz bradaz, unu mi fala di egzampl a di kangrigayshan dehn a Gaad weh deh da Judeeya weh da wan wid Krais Jeezas. Unu mi staat tu sofa sayka weh unu oan peepl mi du unu di saym tingz weh di Jooz mi du tu di bradaz da Judeeya. 15 Dehn mi eevn kil di Laad Jeezas, jos laik how dehn mi kil di prafit dehn, ahn dehn mi persikyoot wi. Pahn tap a dat, di tingz weh dehn du noh pleez Gaad ahn dehn noh benifit nobadi. 16 Kaaz dehn chrai stap wi fahn taak tu di peepl a di nayshan dehn, eevn doa dis werk wahn help dehndeh peepl fi geh sayv. Bikaaz dehn du dis, dehn kantinyu fi sin moa ahn moa. Bot at laas Gaad anga deh pahn dehn.

17 Bradaz, sohn peepl mi foas wi fi separayt fahn unu, bot da mi jos fi wahn lee wail, soh wi kudn dehdeh wid unu bot wi mi stil memba unu. Ahn bikaaz wi mi reeli waahn kohn si unu, wi mi du evriting weh wi kud fi goh.* 18 Dat da wai wi mi waahn kohn si unu agen. Ahn mee, Paal, mi chrai kohn si unu noh jos wan taim bot too taim; bot Saytan blak wi way. 19 Kaaz hoo da wi hoap er wi jai er wi krong? Da hoo wi wahn bee prowd a fronta wi Laad Jeezas wen da taim fi ih kohn bak? Da unu, noh chroo? 20 Yes, unu da wi praid ahn jai fi shoar.