Jan

3 Dehn mi ga wahn Farisee weh mi naym Nikodeemos, ahn hihn da-mi wahn roola oava di Jooz. 2 Joorin di nait, hihn gaahn tu Jeezas ahn tel ahn: “Rabai, wee noa dat yoo da wahn teecha weh Gaad sen, kaaz nobadi ku du dehnya mirakl anles Gaad giv ahn di powa fi du dehn.” 3 Jeezas ansa di man ahn seh: “Ah di tel yu di chroot, di onli way wahn persn ku bee paat a Gaad Kingdom da if ih baan agen.”* 4 Nikodeemos aks ahn: “How wahn man ku baan agen if ih don oal aredi? Hihn kyaahn goh bak eena ih ma woom ahn baan agen, rait?” 5 Jeezas tel ahn: “Ah di tel yu di chroot, di onli way wahn persn ku bee paat a Gaad Kingdom da if ih baan fahn waata ahn spirit. 6 Hyoomanz baan hyoomanz, bot weh di hoali spirit baan da wahn son a Gaad. 7 Soh noh bee sopraiz bikaaz Ah tel yu: Unu haftu baan agen. 8 Di breez bloa wehpaat ih waahn bloa, ahn yu ku hyaa di song weh ih mek, bot yu noh noa wehpaat ih di kohn fram ner wehpaat ih gwehn. Saym way soh, yu kyaahn andastan how wahn persn ku baan fahn hoali spirit.”

9 Soh Nikodeemos aks ahn: “Da how dat pasabl?” 10 Jeezas tel ahn: “Yoo da wahn teecha eena Izrel, ahn stilyet, yoo noh noa dehnya tingz? 11 Ah di tel yu di chroot, wi taak bowt evriting weh wi noa ahn si, bot unu noh bileev weh wi seh. 12 Soh if Ai di tel unu bowt tingz weh deh pahn di ert, an unu stil noh bileev mi, den how unu wahn bileev mi if Ah tel unu bowt tingz weh deh da hevn? 13 Pahn tap a dat, nobadi eva yet gaan da hevn, eksep di Son a man weh kohn dong fahn hevn. 14 Ahn jos laik how Moaziz mi lif op di snayk pahn wahn poas eena di wildanes, saym way soh, peepl wahn lif op di Son a man, 15 soh dat evribadi weh bileev eena hihn ku ga evalastin laif.

16 “Kaaz Gaad lov di werl soh moch dat ih giv ih onli Son,* soh dat evribadi weh shoa fayt eena ahn noh wahn geh dischrai bot wahn liv fareva. 17 Kaaz Gaad neva sen ih Son eena di werl fi joj di werl, bot fi mek hihn sayv di werl. 18 Enibadi weh shoa fayt eena ahn noh wahn geh kandem. Enibadi weh noh shoa fayt don geh kandem aredi, bikaaz ih neva shoa fayt eena di onli Son* a Gaad. 19 Di lait kom eena di werl, bot peepl lov di daaknis insteda di lait bikaaz dehn di du wikid tingz. Dis da wai dehn wahn geh joj. 20 Kaaz enibadi weh praktis wikid tingz hayt di lait ahn noh kom eena di lait, soh dat di lait noh ekspoaz di wikid tingz weh ih du. 21 Bot enibadi weh du weh rait kom eena di lait, soh dat evribadi ku si dat weh ih di du da akaadn tu Gaad wil.”

22 Afta dis Jeezas an ih disaipl dehn gaan da di vilij dehn eena Judeeya, ahn rait deh ih mi spen sohn taim wid dehn, an ih mi-di baptaiz peepl. 23 Ahn Jan mi-di baptaiz peepl tu da Eenon kloas tu Saylim, bikaaz lata waata mi dehdeh, ahn peepl mi-di goh tu hihn, ahn hihn mi-di baptaiz dehn. 24 Da taim deh, Jan neva deh eena prizn yet.

25 Now som a Jan disaipl dehn mi-di aagyu wid wahn Jooish man bowt how fi bee kleen eena Gaad sait. 26 Soh dehn kohn tu Jan ahn tel ahn: “Rabai, yu noa di man weh yu mi-di tel wi bowt weh mi deh pahn di ada said a di Jaadn Riva? Hihn di baptaiz peepl, an evribadi di goh tu ahn.” 27 Jan tel dehn: “Wahn man onli ku geh sohnting if Gaad giv ahn. 28 Unu mi hyaa fi unuself dat Ai seh, ‘Ai da noh di Krais, bot Gaad sen mi heda da wan.’ 29 Di braid bilangz tu di groom. Bot wen di fren a di groom stan op kloas tu ahn an geh fi hyaa ih vais, ih rijais. Saym way, Ai ful op a jai. 30 Di minischri a di Krais wahn kip aan di groa, bot mai minischri wahn kip aan di geh les ahn les.”

31 Di wan weh kohn fahn hevn grayta dan evribadi. Di wan weh kohn fahn di ert taak bowt di tingz pahn di ert bikaaz hihn kohn fahn di ert. Di wan weh kohn fahn hevn grayta dan evribadi. 32 Hihn taak bowt weh ih si ahn hyaa, bot nobadi waahn bileev weh ih seh. 33 Enibadi weh bileev weh hihn seh wahn noa fi shoar dat Gaad seh di chroot. 34 Di wan weh Gaad sen seh evriting weh Gaad waahn ih seh, kaaz Gaad noh hoal bak notn wen ih giv ih hoali spirit. 35 Di Faada lov di Son an ih giv ahn atariti oava evriting. 36 Di wan weh shoa fayt eena di Son wahn liv fareva, bot di wan weh noh obay di Son noh wahn geh laif, ahn Gaad anga wahn stay pahn da persn.