Jan

20 Pahn di fers day a di week, Mayri Magdaleen gaan da di toom;* shee gaan erli eena di maanin wail ih mi stil daak. Ahn wen ih get deh, shee noatis dat di stoan mi don roal weh fahn di enchrans a di toom.* 2 Soh shee ron gaahn tu Saiman Peeta ahn tu di ada disaipl weh Jeezas mi lov, ahn tel dehn: “Dehn kehr di Laad fahn di toom, ahn wee noh noa wehpaat dehn put ahn.”

3 Den Peeta ahn di ada disaipl lef fahn deh ahn gaan da di toom tu. 4 Di too a dehn staat tu ron, bot di ada disaipl mi-di ron faasa dan Peeta soh hihn reech di toom fers. 5 Ih stup dong an ih luk eensaid ahn si di linen klaat dehn een deh, bot ih neva gaan een. 6 Den Saiman Peeta, weh mi-di fala ahn, reech di toom ahn gaan eensaid. Hihn si di linen klaat dehn een deh tu. 7 Di klaat weh mi rap rong Jeezas hed mi deh roal op bai ihself, ih neva deh wid di ada klaat dehn. 8 Den di ada disaipl weh mi reech di toom fers gaan een, an ih mi si an bileev weh dehn tel dehn. 9 Kaaz di too a dehn neva andastan yet dat di skripcha mi seh dat Jeezas fi rayz op bak fahn di ded. 10 Soh di disaipl dehn gaahn bak da dehn hows.

11 Bot Mayri mi-di stan op owtsaida di toom di krai. Wail shee mi-di krai, ih stup dong ahn luk eensaida di toom, 12 ahn shee si too aynjelz eena wait di sidong bai weh Jeezas badi mi deh. Wan mi deh bai weh ih hed mi deh, ahn di ada wan mi deh bai weh ih fut mi deh. 13 Ahn dehn aks ahn: “Wai yu di krai?” Shee tel dehn: “Sombadi kehr weh mi Laad, an Ai noh noa wehpaat dehn put ahn.” 14 Afta shee seh dis, ih ton rong ahn si Jeezas di stan op deh, bot shee neva noa dat da mi hihn. 15 Jeezas aks ahn: “Wai yu di krai? Hoo yu di luk fa?” Shee mi tink dat hihn da-mi di gyaadna, soh ih tel ahn: “Ser, if da yoo kehr ahn, pleez tel mi wehpaat yu put ahn, an Ah gwehn goh get ahn.” 16 Jeezas tel ahn: “Mayri!” Shee ton rong ahn seh eena di Heebroo langwij: “Raboani!” (weh meen “Teecha!”) 17 Jeezas tel ahn: “Stap hoal aan tu mi, kaaz Ai noh di goh op tu mi Faada yet. Bot goh tu mi bradaz ahn tel dehn dat Ai gwehn op tu mai Faada, weh da fi unu Faada tu, ahn tu mai Gaad weh da fi unu Gaad tu.” 18 Mayri Magdaleen gaahn tu di disaipl dehn ahn tel dehn di nyooz; ih seh: “Ah si di Laad!” Ahn shee tel dehn weh Jeezas mi tel ahn fi seh.

19 Laytaraan da saym day, weh da-mi di fers day a di week, Jeezas disaipl dehn mi gyada tugeda da wahn hows. Ahn dehn lak op di doa dehn gud gud kaaz dehn mi frayd fi di Jooz. Ahn Jeezas apyaa tu dehn ahn seh: “Ah pray dat di pees a Gaad deh wid unu.” 20 Afta Jeezas seh dis, ih shoa dehn ih han dehn an ih said. Di disaipl dehn mi onli hapi wen dehn si di Laad. 21 Den Jeezas tel dehn agen: “Ah pray dat di pees a Gaad deh wid unu. Jos laik how di Faada sen mee intu di werl, da rait soh Ai di sen unu intu di werl.” 22 Afta ih seh dis, ih bloa pahn dehn ahn seh: “Ah di giv unu hoali spirit. 23 If unu fergiv enibadi fi dehn sin dehn, den Gaad don fergiv dehn tu. Bot if unu noh fergiv dehn fi dehn sinz, den Gaad noh fergiv dehn needa.”

24 Bot Tamas, wan a di 12 apasl dehn, weh peepl mi aalso kaal di Twin, neva mi dehdeh wen Jeezas mi kom. 25 Soh di ada disaipl dehn mi-di tel ahn: “Wi si di Laad!” Bot hihn tel dehn: “Ai noh wahn bileev dat anles Ai si di hoal* dehn eena ih han dehn ahn put mi finga een deh ahn toch ih said wid mi oan han.”

26 Wel, ayt dayz layta ih disaipl dehn mi deh eena di hows agen, ahn dis taim Tamas mi deh wid dehn. An eevn doa di doa dehn mi lak op gud, Jeezas apyaa tu dehn ahn seh: “Ah pray dat di pees a Gaad deh wid unu.” 27 Den ih tel Tamas: “Toch mi han dehn wid yu finga, ahn toch mi said wid yu han, ahn stap di dowt, bot bileev.” 28 Tamas seh: “Mi Laad ahn mi Gaad!” 29 Jeezas tel ahn: “Yu bileev now bikaaz yu si mi? Di peepl weh noh si, ahn stilyet bileev, wahn bee hapi.”

30 Af koars, Jeezas mi du wahn lata ada mirakl fronta ih disaipl dehn, bot dehn neva geh rait dong eena dis skroal.* 31 Bot dehnya wan geh rait dong soh dat unu ku bileev dat Jeezas da di Krais, di Son a Gaad. Ahn bikaaz unu bileev eena ahn, unu wahn geh evalastin laif.