Maak

10 Ih lef fahn deh ahn reech da di boada a Judeeya weh mi deh kraas di Jaadn Riva, an agen wahn krowd a peepl get deh. Rait away, ih staat teech dehn, kaaz dat da-mi ih kostom. 2 Di Farisee dehn kom op tu ahn kaaz dehn mi waahn tes ahn. Dehn aks ahn: “Ih gens di Laa a Moaziz fi mek wahn man divoas ih waif?” 3 Ih ansa dehn: “Weh Moaziz mi koman unu fi du?” 4 Dehn seh: “Moaziz mi alow wahn man fi giv ih waif wahn divoas sertifikayt ahn mek shee goh.” 5 Bot Jeezas tel dehn: “Hihn mi rait da laa bikaaz unu stobant. 6 Bot, fahn di biginin a kriyayshan, ‘Gaad* mi mek man an uman. 7 Bikaaz a dis, wahn man wahn lef ih ma an ih pa, 8 ahn di too a dehn wahn bee wan persn.’ Soh dehn noh wahn bee too nohmoh, bot wan persn. 9 Soh den, noh mek nobadi separayt weh Gaad jain tugeda.” 10 Laytaraan, wen dehn mi deh eena di hows, di disaipl dehn staat tu aks ahn bowt dis. 11 Ih tel dehn: “Wahn man weh divoas ih waif ahn marid wahn nada uman komit adolchri* gens ih waif. 12 An if wahn uman divoas ih hozban ahn marid wahn nada man, shee komit adolchri tu.”

13 Now sohn peepl staat bring dehn yong chiljren fi mek ih bles dehn,* bot ih disaiplz skoal dehn. 14 Wen Jeezas si dis, ih neva hapi ataal bowt dat, an ih tel dehn: “Noh chrai stap di yong chiljren; mek dehn kohn tu mi, kaaz peepl weh da laik chiljren wahn geh fi bee paat a di Kingdom a Gaad. 15 Bileev mi, enibadi weh noh aksep di Kingdom a Gaad di way wahn yong chail aksep tingz wahn neva geh fi goh eena di Kingdom.” 16 Den ih hog op di chiljren dehn an ih lay ih han pahn dehn ahn staat bles dehn.

17 Wen Jeezas mi-di lef fahn di hows, wahn man ron op tu ahn an neel dong fronta ahn, an aks ahn: “Gud Teecha, weh Ah need fi du fi get evalastin laif?” 18 Jeezas tel ahn: “Wai yoo di kaal mee Gud Teecha? Nobadi gud; onli Gaad gud. 19 Yu don noa di komanment dehn: ‘Yu noh fi merda, yu noh fi komit adolchri, yu noh fi teef, yu noh fi tel lai, yu noh fi cheet peepl owta dehn oan tingz, yu fi aana yu ma ahn yu pa.’” 20 Di man tel ahn: “Teecha, Ai di kip aala dehndeh komanment fan Ah smaal.” 21 Jeezas luk pahn di man an ih mi feel lov far ahn eena ih haat, an ih tel ahn, “Yu ga wan ting weh yu noh du yet: Goh ahn sel evriting weh yu oan ahn gi di moni tu poa peepl, ahn yu wahn ga chrezha da hevn. Wen yu don du dat, kohn bee mi disaipl.” 22 Bot wen ih hyaa Jeezas ansa, ih geh sad an ih lef fahn deh dipres kaaz ih mi rich rich.

23 Jeezas luk rong ahn tel ih disaipl dehn: “Ih wahn bee haad fi mek peepl wid lata moni get eena di Kingdom a Gaad!” 24 Bot di disaipl dehn mi sopraiz fi hyaa Jeezas seh dat. Soh ih tel dehn agen: “Ih wahn bee haad fi mek peepl get eena di Kingdom a Gaad! 25 In fak, ih wuda bee eeziya fi mek wahn kyamil paas chroo di aiy a wahn needl dan fi mek wahn rich persn get eena di Kingdom a Gaad.” 26 Dehn get eevn moa sopraiz an aks ahn:* “Wel, if da soh, hoo ku geh sayv den?” 27 Soh Jeezas luk schrayt pahn dehn ahn seh: “Di tingz weh pasabl fi Gaad, noh pasabl fi hyoomanz.” 28 Den Peeta tel ahn: “Bot memba, wee mi lef evriting fi fala yoo.” 29 Jeezas seh: “Ah di pramis unu, enibadi weh lef dehn hows er breda er sista er ma er pa er chiljren er lan bikaaz dehn da mai falowaz ahn fi di sayk a di gud nyooz 30 wahn geh 100 taimz moa now. Dehn wahn geh moa hows, breda, sista, ma, chiljren, ahn lan. Bot saym taim, dehn wahn fays persikyooshan tu. An eena di fyoocha,* dehn wahn get evalastin laif. 31 Bot wahn lata peepl weh da fers wahn bee laas, ahn wahn lata peepl weh da laas wahn bee fers.”

32 Now Jeezas an ih disaipl dehn mi-di goh pahn di road tu Jeroosalem. Hihn mi deh heda dehn, ahn di disaipl dehn mi-di kohn bihain ahn, an dehn mi sopraiz, bot di res a peepl weh mi-di fala mi frayd. Agen ih kehr di 12 apasl wan said ahn rimain dehn bowt weh mi wahn soon hapm tu ahn: 33 “Wi gwehn da Jeroosalem, ahn dehn wahn han oava di Son a man tu di cheef prees ahn skraib dehn. Dehn wahn joj ahn an sentens ahn tu det ahn dehn wahn han ahn oava tu peepl fahn ada nayshanz. 34 Dehn wahn mak ahn, spit pan ahn, flag ahn wid wahn wip,* ahn kil ahn, bot ih wahn rayz op bak fahn di ded chree dayz layta.”

35 Den Jaymz ahn Jan, Zebidee too son dehn, kohn tu Jeezas ahn tel ahn: “Teecha, wi wuda waahn mek yu du sohnting fi wi.” 36 Ih tel dehn: “Weh unu waahn Ah du fi unu?” 37 Dehn seh: “Wen yoo di rool eena yu Kingdom, pleez mek wi sidong saida yu; put wan a wi pahn yu rait han said ahn wan pahn yu lef han said.” 38 Bot Jeezas tel dehn: “Unu noh noa weh unu di aks fa. Unu ku jrink fahn di kop weh Ai di jrink fram er geh baptaiz wid di kaina baptizm weh Ai di geh baptaiz wid?” 39 Dehn tel ahn: “Yes, wi kud.” Den Jeezas tel dehn: “Di kop weh Ai di jrink fram, unu wahn jrink fram fi chroo, ahn di kaina baptizm weh Ai di geh baptaiz wid, unu wahn get tu. 40 Bot da noh mee fi disaid hoo wahn sidong pahn mi rait han said er mi lef han said. Da mai Faada wahn disaid hoo wahn sidong deh.”

41 Wen di ada apasl dehn hyaa bowt it, dehn neva hapi ataal wid Jaymz ahn Jan. 42 Soh Jeezas kaal aala dehn tugeda ahn tel dehn: “Unu noa dat di king dehn weh rool di nayshan dehn baas op di peepl, ahn di powaful ofishal* dehn rool wid wahn hevi han. 43 Bot unu noh fi bee laik dat; hooeva waahn bee grayt monks unu fi serv adaz, 44 ahn hooeva waahn bee fers monks unu, mek ih bee wahn slayv tu evribadi. 45 Kaaz di Son a man kohn fi serv adaz, noh fi serv ihself. Ih kohn fi giv ih laif* az wahn ransom* fi sayv lata peepl.”

46 Den Jeezas an ih disaipl dehn gaan da Jeriko. An az dehn mi-di lef Jeriko, wahn krowd a peepl mi-di goh lang wid dehn. Wahn blain man weh naym Bartimayos (son a Timeeyos) mi-di sidong bai di roadsaid di bayg peepl. 47 Wen ih hyaa dat da mi Jeezas di Nazareen di paas bai, ih staat hala ahn seh: “Jeezas, Son a Dayvid, ga mersi pahn mi!” 48 Wel, som a di peepl staat tu skoal ahn op; dehn tel ahn fi bee kwaiyet, bot ih hala owt eevn haada: “Son a Dayvid, ga mersi pahn mi!” 49 Soh Jeezas stap ahn seh: “Kaal ahn ya fi mi.” Soh dehn kaal di blain man; dehn tel ahn: “Noh frayd! Get op; hihn di kaal yu.” 50 Wel, ih haal aaf ih jakit, jomp op, ahn gaan tu Jeezas. 51 Den Jeezas aks ahn: “Da weh yu waahn Ah du fi yu?” Di blain man seh: “Teecha, pleez mek Ah get bak mi sait.” 52 Jeezas tel ahn: “Yu ku goh hoam now, bikaaz a yu fayt, yu geh heel.” Ahn rait away, ih geh bak ih sait, ahn staat fala Jeezas.