Jenisiz

1 Eena di biginin Gaad mi mek di hevnz* ahn di ert.

2 Di ert mi emti, waata mi-di kova di ert, an evriway mi daak. Ahn Gaad powa* mi-di moov bowt oava di waata.

3 Den Gaad seh: “Mek lait apyaa.” Ahn den lait mi apyaa. 4 Afta dat Gaad mi si dat di lait da-mi sohnting gud, ahn hihn mi disaid wen lait mi wahn deh ahn wen daaknis mi wahn deh. 5 Gaad mi kaal di lait Day, an ih mi kaal di daaknis Nait. Ahn den eevnin kohn ahn maanin kohn, ahn dat da-mi di fers day.

6 Den Gaad seh: “Ah wahn divaid op di waata intu too paats. An Ah wahn put wahn big spays bitween di too paats.” 7 Den Gaad gaahn hed ahn mek di waata divaid op intu too. Ih mi mek som a di waata goh op ahn di res mi stay pahn di ert, ahn wahn big oapm spays mi deh bitween di too a dehn. Ahn dat da weh mi hapm. 8 Gaad mi kaal di spays bitween di waata, di Skai. Ahn den eevnin kohn ahn maanin kohn, ahn dat da-mi di sekant day.

9 Den Gaad seh: “Ah wahn mek di waata weh deh pahn di ert kohn tugeda eena wan plays, an Ah wahn mek jrai lan kom op.” Ahn dat da weh mi hapm. 10 Gaad mi kaal di jrai lan Ert, an ih mi kaal di waata weh mi kohn tugeda eena wan plays, di See. Ahn Gaad mi si dat da mi sohnting gud. 11 Den Gaad seh: “Ah wahn mek graas, plaants, ahn difrent kaina chree groa pahn di ert. Ahn di plaant dehn wahn projoos seed ahn di chree dehn wahn bayr froot weh gat een seed.” Ahn dat da weh mi hapm. 12 An aal kaina graas, plaants, ahn difrent kaina chree staat tu groa pahn di ert. Di plaant dehn mi projoos seed ahn di chree dehn mi projoos froot weh gat een seed. Ahn den Gaad mi si dat da mi sohnting gud. 13 Ahn den eevnin kohn ahn maanin kohn, ahn dat da-mi di terd day.

14 Den Gaad seh: “Ah wahn mek di son, di moon, ahn di staarz shain eena di skai. Dehn wahn dehdeh fi shoa wen da day ahn wen da nait. Ahn dehn wahn shoa di difrent seezn, di dayz, ahn di yaaz. 15 Ahn dehn wahn deh eena di skai, ahn dehn wahn shain lait pahn di ert.” Ahn dat da weh mi hapm. 16 Ahn Gaad mek di son shain pahn di ert joorin di day, an ih mek di moon ahn di staarz shain pahn di ert da nait. 17 Soh Gaad put dehn eena di skai fi shain pahn di ert; 18 ahn Gaad mi mek di son shain brait brait joorin di day, ahn hihn mi mek di moon ahn di staarz giv aaf dehn lait joorin di nait. Hihn mi du dis fi separayt di lait fahn di daaknis. Den Gaad mi si dat da mi sohnting gud. 19 Ahn den eevnin kohn ahn maanin kohn, ahn dat da-mi di foat day.

20 Den Gaad seh: “Ah wahn mek wahn lata animal* liv eena di waata, an Ah wahn mek wahn lata animal flai eena di skai.” 21 Soh Gaad mi mek sohn big see animal an aal difrent kaina animal fi liv eena di waata. Ahn hihn mi mek difrent kaina animalz weh ku flai eena di skai. Ahn Gaad mi si dat da mi sohnting gud. 22 Ahn soh, Gaad bles dehn ahn seh: “Mek di animal dehn weh liv eena di see ga lata yong wanz ahn ful op di see, ahn mek di animal dehn weh ku flai ga lata yong wanz pahn di ert.” 23 Ahn den eevnin kohn ahn maanin kohn, ahn dat da-mi di fif day.

24 Den Gaad seh: “Ah wahn mek aal kaina animal liv pahn di lan. Som wahn taym, som wahn wail, ahn som wahn kraal pahn di grong.” Ahn dat da weh mi hapm. 25 Soh Gaad mi mek aal kaina animal weh wail, weh taym, ahn weh kraal pahn di grong. Ahn Gaad mi si dat da mi sohnting gud.

26 Den Gaad seh: “Mek wi mek hyoomanz fi bee laik wee ahn wi wahn put dehn in chaaj a di hoal ert. Ahn dehn wahn tek kayr a di fish dehn weh liv eena di see, aala di difrent animal dehn weh ku flai, aala di animal dehn weh taym, an aala di difrent kaina animal dehn weh kraal pahn di grong.” 27 Ahn soh Gaad mi mek hyoomanz fi bee laik hihn. Hihn mi mek man ahn wuman. 28 Ahn soh Gaad bles dehn an ih tel dehn: “Unu fi ga lata pikni ahn ful op di ert, ahn tek kayr a it. An unu wahn bee in chaaj a di fish dehn eena di see, di animal dehn weh flai, an aala di animal dehn weh di liv pahn di ert.”

29 Den Gaad seh: “Ah di mek di ert giv unu aal kaina plaants weh projoos froot weh gat een seed. Dat wahn bee food fi unu. 30 An Ah wahn mek aala di wail animal dehn, di animal dehn weh flai, an evri ada animal weh alaiv* ahn weh di moov bowt pahn di ert eet green graas.” Ahn dat da weh mi hapm.

31 Afta dat, Gaad luk pahn aal weh ih mi mek, an evriting mi reeli gud. Ahn den eevnin kohn ahn maanin kohn, ahn dat da-mi di siks day.