1 Jan

4 Mi dyaa bradaz, noh bileev evri teechin weh luk laik ih kohn fahn Gaad,* bot tes di teechinz fi si if dehn reeli kohn fahn Gaad, bikaaz lata faals prafit deh eena di werl.

2 Dis da how unu wahn noa dat wahn teechin weh luk laik ih kohn fahn Gaad da reeli fahn Gaad: If di teechin seh dat Jeezas mi kohn pahn di ert az wahn hyooman, den da fahn Gaad. 3 Bot if wahn teechin noh seh dat Jeezas mi kohn pahn di ert az wahn hyooman, den da noh fahn Gaad. Pahn tap a dat, unu mi hyaa dat dehnya faals teechin wahn kohn, ahn dehn kohn fahn di Enimi a Krais,* ahn now dehn don spred eena di werl.

4 Mi dyaa chiljren, unu kohn fahn Gaad, an unu don win di vikchri oava di faals prafit dehn, bikaaz di Wan weh di sopoat unu schranga dan di wan weh di sopoat di werl. 5 Dehnya faals prafit kohn fahn di werl, soh dehn taak bowt di tingz a di werl, ahn di werl lisn tu dehn. 6 Wee kohn fahn Gaad. Enibadi weh noa Gaad lisn tu wee. Enibadi weh noh kohn fahn Gaad noh lisn tu wee. Dat da how wi wahn noa if wahn teechin reeli kohn fahn Gaad, er if ih onli luk laik ih kohn fahn Gaad.

7 Mi dyaa bradaz, mek wi kantinyu fi lov wan anada, bikaaz lov kohn fahn Gaad, an evribadi weh lov da wahn chail a Gaad, an ih noa Gaad. 8 Enibadi weh noh lov noh noa Gaad, bikaaz Gaad da lov. 9 Dis da how Gaad mi shoa ih lov tu wi: Hihn mi sen ih onli Son* eena di werl soh dat wee ku geh laif chroo hihn. 10 Ahn soh dis da weh wi noa bowt Gaad lov: Da noh dat wee mi lov hihn, bot da hihn shoa lov tu wee ahn sen ih Son az wahn sakrifais fi wi sin dehn soh dat wee ku ga pees wid Gaad.

11 Mi dyaa bradaz, if dis da how Gaad lov wi, den wee haftu lov wan anada tu. 12 Nobadi si Gaad yet. If wee kantinyu lov wan anada, den Gaad stil deh wid wi, ahn hihn reeli ahn chrooli lov wi. 13 Soh dis da how wi noa dat wee di liv akaadn tu di way hihn waahn ahn dat hihn deh wid wi, bikaaz hihn gi wi ih spirit. 14 Pahn tap a dat, di Faada mi sen ih Son az sayvya a di werl, ahn wi ku tel unu bowt ahn, bikaaz wi mi si ahn. 15 If sombadi seh eena ih haat dat Jeezas da Gaad Son, den ih di liv akaadn tu di way Gaad waahn, ahn Gaad deh wid ahn. 16 Ahn wee noa ahn bileev dat Gaad lov wi.

Gaad da lov, an enibadi weh kip aan di shoa lov di liv akaadn tu di way Gaad waahn, ahn Gaad deh wid ahn. 17 Eena dis way, hihn reeli ahn chrooli lov wi, soh wi ku taak wid kanfidens pahn di day a jojment, bikaaz eena dis werl wee da laik Krais. 18 If wi ga reel lov, wi noh haftu frayd, bikaaz reel lov jraiv owt fyaa. Adawaiz fyaa ku hoal wi bak. Sombadi weh frayd noh ga chroo chroo lov. 19 Wee lov, bikaaz hihn mi lov wi fers.

20 If enibadi seh, “Ai lov Gaad,” an ih stil di hayt ih brada er sista, den ih di tel lai. Kaaz if ih noh lov ih bradaz weh ih ku si, den ih kyaahn lov Gaad weh ih neva si yet. 21 Ahn hihn gi wi dis komanment, dat enibadi weh lov Gaad haftu lov ih bradaz tu.