Heebrooz

11 Now fayt da weh gi yu kanfidens dat weh yu di hoap fa wahn kohn chroo, an ih kanvins yu fi bileev eena di tingz dehn weh yu kyaahn si. 2 Ahn bikaaz a weh wi ansesta dehn mi ga da kaina fayt, Gaad mi shoa dehn dat hihn mi pleez wid dehn.

3 Ahn bikaaz a wi fayt, wi andastan dat evriting eena hevn ahn pahn di ert* deh eena dehn plays bikaaz a Gaad koman. Soh Gaad yooz di tingz weh wi kyaahn si fi mek di tingz weh wi kud si.

4 Ahn bikaaz a Aybl fayt, hihn mi aafa op wahn beta sakrifais tu Gaad dan di wan weh Kayn mi aafa op. Gaad mi si ahn az wahn raichos persn sayka ih fayt, ahn Hihn mi aksep ih gif dehn. An eevn doa Aybl ded, wi ku kantinyu fi laan fahn fi hihn fayt.

5 Ahn bikaaz a Eenak fayt, Gaad mi kehr ahn tu wahn nada plays soh dat ih wudn sofa wahn kruwil det. Ahn nobadi kuda mi fain ahn, kaaz Gaad mi kehr ahn. Bot bifoa Gaad mi kehr ahn, ih mi shoa Eenak dat ih pleez wid ahn. 6 Moroava, widowt fayt, wahn persn kyaahn pleez Gaad. Kaaz di persn weh waahn geh kloas tu Gaad need fi bileev dat Gaad egzis ahn dat hihn wahn bles di wan dehn weh di chrai dehn bes fi du ih wil.

7 Ahn bikaaz a Noawa fayt, hihn mi shoa dat ih fyaa Gaad wen ih bil wahn aak fi sayv ih famili afta Gaad mi waan ahn bowt di ting dehn weh mi wahn hapm. Ahn sayka ih fayt, hihn mi shoa dat di werl dizerv fi geh dischrai ahn dat hihn da-mi wahn raichos persn.

8 Ahn bikaaz a Aybraham fayt, hihn mi obay Gaad wen Gaad mi kaal ahn fi goh da wahn plays weh hihn mi pramis fi giv ahn. Hihn mi lef ih konchri aldoa hihn neva eevn noa wehpaat ih mi gwehn. 9 Ahn sayka ih fayt, hihn mi liv laik wahn farina eena di lan weh Gaad mi pramis ahn. Hihn mi-di liv eena sohn tent lang wid ih son dehn, Aizak ahn Jaykop. Ahn Gaad mi giv aala dehn di saym pramis. 10 Kaaz hihn mi-di wayt fi di siti weh ga reel fongdayshan; ahn Gaad da di wan weh bil ahn dizain da siti.

11 Ahn bikaaz a Saara fayt, shee mi geh pregnant, eevn doa shee mi don paas di ayj fi ga chiljren. Shee mi bileev dat di Wan weh mek da pramis faytful. 12 Ahn fi dis reezn, wahn lata chiljren mi baan fahn wan man weh mi don paas di ayj fi ga chiljren. Da mi soh moch a dehn dat yu kudn konk dehn, jos laik di staar dehn eena di skai er laik di san pahn di seeshoar.

13 Aala dehnya peepl mi faytful til di day dehn ded, eevn doa di pramis dehn weh Gaad mi gi dehn neva kohn chroo eena fi dehn laiftaim. Bot dehn mi si dehndeh pramis fahn faar ahn dehn mi-di luk faawod fi get dehn. Ahn dehn mi tel adaz dat dehn da-mi schraynjaz ahn farinaz weh di liv eena di lan fi jos wahn lee wail. 14 Kaaz peepl weh taak laik dat mek it playn dat dehn reeli waahn wahn plays fi dehnself. 15 Ahn yet, if dehn mi kip aan di tink bowt di plays weh dehn mi kohn fram, dehn wuda mi fain wahn way fi goh bak. 16 Bot dehnya peepl mek wahn efoat fi get tu wahn beta plays, wahn plays weh bilangz tu hevn. Ahn dat da wai Gaad neva shaym fi mek dehn kaal hihn fi dehn Gaad, kaaz hihn mi eevn geh wahn siti redi fi dehn.

17 Ahn bikaaz a Aybraham fayt, hihn mi redi fi aafa op Aizak wen Gaad mi tes ahn. Aybraham mi glad fi geh di pramis dehn fahn Gaad, bot hihn mi stil chrai fi aafa op ih onli son, 18 eevn doa Gaad mi tel ahn: “Aala yu disendant dehn* wahn kohn chroo Aizak.” 19 Bot hihn mi bileev dat Gaad kuda bring ahn bak tu laif, ahn Gaad mi did sayv ih son fahn det; dis shoa wi weh mi wahn hapm eena di fyoocha.

20 Ahn bikaaz a Aizak fayt, ih mi bles Jaykop an Eesaa, an ih mi tel dehn bowt di tingz weh mi wahn hapm eena di fyoocha.

21 Ahn bikaaz a Jaykop fayt, jos bifoa ih ded, ih mi bles eech wan a Joazef son dehn, eevn doa ih mi haftu leen pan ih waakin stik fi wership Gaad.

22 Bikaaz a Joazef fayt, wen ih mi soon ded, ih mi taak bowt di taim wen di Izrelait dehn mi wahn lef fahn Eejip ahn weh dehn fi du* wid fi hihn boanz.

23 Ahn bikaaz a di fayt weh Moaziz payrents mi gat, dehn mi haid Moaziz fi chree monts afta ih baan. Dehn mi du dis kaaz di lee baybi mi onli byootiful ahn dehn neva frayd fi brok di king laa. 24 Ahn bikaaz a Moaziz fayt, wen ih mi groa op, ih neva waahn enibadi kaal ahn di son a Fayro daata. 25 Insteda dat, hihn mi chooz fi sofa lang wid Gaad peepl ahn fays di injostis weh dehn mi-di fays. Hihn mi rada du dat dan fi injai di plezhaz a sin weh onli mi wahn laas fi wahn lee wail. 26 Hihn da-mi di wan weh Gaad mi chooz,* ahn hihn neva feel shaym bowt dis privilij, insted, tu hihn, da mi laik richiz weh mi grayta dan di chrezhaz weh mi deh da Eejip, kaaz hihn mi-di kip ih aiy pahn di riwaad. 27 Ahn bikaaz a ih fayt, ih mi lef Eejip, ahn hihn neva frayd fi mek di king geh beks, an ih mi kantinyu fi bayr op wid payshens az ih mi kip ih aiy pahn di Wan weh wi kyaahn si. 28 Ahn bikaaz a da fayt, hihn mi kip di Paasoava an ih splash blod pahn di doapoas soh dat di aynjel a Gaad neva kil* fi dehn fersbaan.

29 Ahn bikaaz a di fayt weh di Izrelait dehn mi ga, dehn paas chroo di Red See laik if dehn mi-di waak pahn jrai lan, bot wen di Eejipshan dehn mi chrai fi paas chroo tu, aala dehn jrongdid.

30 Bikaaz a di fayt weh di Izrelait dehn mi gat, di waal dehn rong Jeriko mi faal dong afta dehn mi maach rong di siti fi sevn dayz. 31 Ahn bikaaz a di fayt weh Rayhab di prastichoot mi shoa, shee neva ded lang wid di peepl weh neva lisn, bikaaz shee mi welkom di spai dehn eena ih hows.

32 Weh moa Ah kuda seh? Ah noh ga nof taim fi taak bowt peepl laik Gidiyan, Bayrak, Samson, Jefta, Dayvid, Samwel ahn di ada prafit dehn. 33 Bikaaz a dehn fayt, dehn mi fait ahn kanka difrent kingz, dehn mi ak eena wahn raichos way, dehn mi geh difrent pramis fahn Gaad, ahn dehn mi kloaz di mowt a sohn laiyan. 34 Aalso, bikaaz a dehn fayt, dehn owt wail faiya an eskayp fahn det bai di soad. Eevn doa som a dehn mi week, dehn mi geh powaful, ahn wen da mi taim fi fait, dehn neva frayd non ataal, ahn wen difrent aami wuda atak fi dehn konchri, dehn wuda ron dehn owt fahn deh. 35 Som a di laydi dehn mi get bak dehn ded relitiv bai rezorekshan, an eevn doa peepl mi taacha som a di faytful wan dehn tu det, dehn mi stay faytful tu Gaad soh dat dehn wuda mi bee free. Dehn mi du dis soh dat dehn ku kohn bak tu laif ahn geh wahn beta rezorekshan. 36 Ahn sohn ada wan mi fays difrent tingz weh tes dehn fayt, laik peepl weh mak dehn ahn beet dehn. Az a mata a fak, dehn mi du moa dan dat, dehn mi chayn op som a dehn ahn put dehn eena prizn. 37 Peepl mi stoan som a dehn, adaz mi geh temtid fi brok dehn fayt, adaz mi geh kot eena haaf, ahn dehn mi merda som a dehn wid di soad. Som a di faytful wan dehn yoostu wayr sheep skin er goat skin, wail dehn neva ga notn, wail dehn mi-di goh chroo haad taim, ahn wail dehn mi-di fays bad chreetment. 38 Bot bradaz, dis werl neva dizerv dehndeh man an uman. Dehn yoostu liv eena di dezert dehn, eena di mongtin ahn kayv dehn, an eena sohn hoal bitween sohn big rak.

39 Ahn yet, non a dehn mi geh fi si di pramis dehn kohn chroo, eevn doa Gaad mi proov tu dehn dat hihn mi pleez wid dehn bikaaz a di fayt weh dehn mi shoa. 40 Dis da bikaaz Gaad mi don si dat hihn mi ga sohnting weh beta fi wi. Hihn neva waahn dehn geh perfek bifoa wee.