Ifeezhanz

4 Soh den, mee, Paal, wahn prizna sayka di Laad, di bayg unu fi liv eena wahn way weh proov dat unu dizerv di kaal weh unu get. 2 Unu fi aalwayz bee hombl, ga wahn jentl haat, bee payshent, shoa lov, ahn put op wid wan anada. 3 Unu fi reeli werk haad fi kip di yooniti weh di spirit giv unu ahn liv eena pees wid wan anada. 4 Wan badi deh, ahn wan spirit deh, jos laik how wan hoap deh weh Gaad kaal unu fa. 5 Wan Laad deh, wan fayt deh, ahn wan baptizm deh. 6 Wan Gaad ahn Faada deh fi evribadi. Da hihn deh oava evribadi ahn werk chroo evribadi, an ih powa werk eena evribadi.

7 Now Gaad shoa eech wan a wi ih grayt kainis* akaadn tu how Jeezas gi wi da free gif. 8 Kaaz di Skripchaz seh: “Wen hihn gaan op tu wahn hai plays, ih set free sohn prizna an ih gi wi dehndeh bradaz weh da laik gifs.” 9 Now weh ih meen wen ih seh “hihn gaan op”? Ih meen dat hihn mi kohn dong tu di ert fers. 10 Di saym wan weh kohn dong da di saym wan weh gaan op haiya dan aala di hevn dehn,* soh dat hihn ku mek evriting kompleet.

11 Ahn hihn mi gi som a dehndeh gif tu di kangrigayshan fi serv az apasl, adaz az prafit, adaz az peepl weh preech di gud nyooz,* an adaz az shepad an teechaz. 12 Soh laik dat dehn ku chrayn di hoali peepl, ahn dehn ku serv adaz, ahn dehn ku schrentn di badi a di Krais. 13 Ahn dehn wahn du dat til aala wi ga di saym* fayt ahn noa di hoal chroot bowt di Son a Gaad, soh dat wi ku bee machoar peepl ahn bee laik Krais eena evri way. 14 Soh wi noh fi bee laik pikni nohmoh. Kaaz som peepl teech faals teechinz ahn plan op wikid tingz fi chrap adaz. Enibadi weh fala dehn da laik wahn boat weh di wayv dehn fling bowt ahn weh di breez bloa bowt fahn wan plays tu di neks. 15 Bot mek wi taak di chroot ahn shoa lov tu peepl, ahn laik dat wi wahn groa op eena evriting fi bee laik Krais, weh da di hed. 16 Bikaaz a hihn, aala di paats a di badi jain tugeda, an eech paat werk tugeda chroo eech jaint fi gi weh di badi need. Soh wen eech paat a di badi werk eena di rait way, dat wahn help di badi groa soh dat di hoal badi wahn bee schrang eena lov.

17 Soh den, Ah di seh dis tu unu an Ah di advaiz unu eena di naym a di Laad, dat unu noh fi liv laik how di peepl a di nayshan dehn liv nohmoh, kaaz dehn liv akaadn tu di wotlis* tingz weh deh eena dehn main. 18 Dehn main deh eena daaknis ahn dehn stay separayt fahn di laif weh bilangz tu Gaad, bikaaz dehn noh waahn noa Gaad, ahn bikaaz dehn haat haad. 19 Dehn noh feel no shaym bowt weh dehn du, ahn dehn goh aan brayzn* ahn dehn greedi fi du aal kaina dotinis.

20 Bot dat da noh weh unu mi laan bowt di Krais. 21 Jeezas mi teech di chroot, an if unu mi hyaa weh hihn teech ahn laan it fahn hihn, den unu wel ahn noa dehndeh tingz. 22 Unu mi laan fi geh rid a di oal way a laif* weh da di way unu yoostu bihayv, ahn di oal way a laif ga chriki dizaiyaz an ih korop. 23 Bot unu fi kantinyu chaynj tu wahn nyoo way a tinkin. 24 Unu fi put aan di nyoo way a laif* laik di kloaz weh unu wayr. Gaad mek da nyoo way a laif akaadn tu fi hihn wil, ahn da nyoo way a laif fi bee raichos ahn laayal.

25 Soh den, now dat unu stap tel lai, eech wan a unu fi taak di chroot wid ih nayba, bikaaz aala wi da paats weh jain tugeda fi mek wan badi. 26 If unu geh beks, noh sin. Ahn noh mek di son goh dong an unu stil beks. 27 Noh gi di Devl wahn chaans fi kanchroal unu.* 28 Enibadi weh teef noh fi teef nohmoh. Bot ih fi werk haad, di du gud werk wid ih han dehn, soh dat ih ku ga sohnting fi shayr wid enibadi weh need help. 29 Unu noh fi mek nat eevn wan ratn werd kom owta unu mowt, bot unu fi onli seh gud tingz weh wahn schrentn adaz akaadn tu weh dehn need ahn weh wahn benifit peepl weh di lisn. 30 An unu noh fi mek Gaad hoali spirit sad, kaaz Gaad yooz it fi put wahn maak pahn unu fi di day wen ih wahn set unu free bikaaz a di prais weh ih mi pay fi unu.

31 Unu fi geh rid a eni kaina haytful bitanis, anga, ahn raat. Unu noh fi hala op aata wan anada, insolt wan anada, ner du eni kaina wikidnis. 32 Bot unu fi bee kain tu wan anada, unu fi shoa kompashan fahn unu haat, an unu fi bee redi fi fergiv wan anada fahn unu haat, jos laik how Gaad mi redi fi fergiv unu bikaaz a weh Krais mi du fi wi.