1 Jan

2 Mi dyaa chiljren, Ah di rait dehnya ting tu unu soh dat unu noh sin. Bot, if wan a unu sin, wi ga wahn helpa* wid di Faada. Da di wan weh du weh rait eena Gaad sait, Jeezas Krais. 2 Ahn hihn da wahn sakrifais fi fi wee sinz soh dat wi ku ga pees wid Gaad, bot noh onli fi fi wee sinz, bot fi di sinz a di hoal werl tu. 3 Soh if wi kantinyu fi obay ih laa dehn, den wi wahn di shoa dat wee noa hihn. 4 If sombadi seh, “Ai noa hihn,” ahn stilyet noh obay ih komanment dehn, den ih di tel wahn lai, ahn di chroot noh deh eena ih haat. 5 Bot enibadi weh obay fi hihn werd di shoa dat dehn reeli ahn chrooli lov Gaad. Dis da how wi noa dat wee da wan wid hihn. 6 If sombadi seh dat ih da wan wid hihn, den ih haftu liv jos laik how Jeezas mi liv.

7 Mi dyaa bradaz, Ah noh di gi unu wahn nyoo komanment, bot wahn oal komanment weh unu mi geh fahn di biginin. Dis oal komanment da di werd weh unu mi hyaa. 8 Bot stil, Ah di rait tu unu wahn nyoo komanment, wahn komanment weh hihn mi obay ahn weh unu di obay, bikaaz di daaknis di disapyaa ahn di chroo lait don di shain.

9 If sombadi seh dat ih di liv eena di lait bot hayt ih brada, den ih stil di liv eena daaknis. 10 Sombadi weh lov ih brada stay eena di lait, ahn notn noh wahn mek ih sin.* 11 Bot sombadi weh hayt ih brada deh eena daaknis, an ih di waak eena daaknis. Hihn noh noa wehpaat ih gwehn, bikaaz di daaknis blain ih aiy dehn.

12 Mi dyaa chiljren, Ah di rait tu unu bikaaz Gaad fergiv unu sin dehn fi di sayk a ih naym. 13 Unu bradaz weh ga chiljren, Ah di rait tu unu bikaaz unu don geh fi noa Jeezas, hoo deh fahn di biginin. Unu yong peepl, Ah di rait tu unu bikaaz unu don win di vikchri oava di eevl wan. Mi dyaa chiljren, Ah di rait tu unu bikaaz unu don geh fi noa di Faada. 14 Unu bradaz weh ga chiljren, Ah di rait tu unu bikaaz unu don geh fi noa Jeezas, hoo deh fahn di biginin. Unu yong peepl, Ah di rait tu unu bikaaz unu schrang, ahn di werd a Gaad stay eena unu haat, an unu don win di vikchri oava di eevl wan.

15 Unu noh fi lov di werl ner di tingz eena di werl. If enibadi lov di werl, den di lov a di Faada noh deh eena dehn haat; 16 bikaaz peepl eena di werl onli goh afta weh dehn sinful badi* waahn ahn weh dehn aiy si ahn waahn, ahn dehn shoa aaf di tingz weh dehn gat. Aala dehnya ting noh kohn fahn di Faada, bot dehn kohn fahn di werl. 17 Pahn tap a dat, di werl an evriting weh di werl waahn di kohn tu wahn en, bot di wan weh du di wil a Gaad wahn liv fareva.

18 Mi dyaa chiljren, dis da di laas owa, ahn jos laik weh unu don hyaa, di Enimi a Krais* di kohn, an eevn now lata dehn don deh ya aredi. Dat da wai wi noa dat dis da di laas owa. 19 Dehn lef fahn monks wi bikaaz dehn da neva wan a wee.* If dehn da-mi wan a wee, dehn mi wahn stay wid wi. Bot dehn lef fahn monks wi fi shoa dat dehn da noh wan a wee. 20 Gaad yooz ih spirit fi pik unu, an aala unu noa di chroot. 21 Ah di rait tu unu, noh bikaaz unu noh noa di chroot, bot bikaaz unu noa it, ahn bikaaz no lai kohn fahn owta di chroot.

22 Da hoo di tel lai? Da di wan weh seh dat Jeezas da noh di Krais, noh chroo? Dis da di Enimi a Krais, di wan weh rijek di Faada ahn di Son. 23 Evribadi weh rijek di Son noh pleez di Faada needa. Bot enibadi weh aksep di Son pleez di Faada tu. 24 Bot unu mos mek shoar dat unu kantinyu liv akaadn tu weh unu mi hyaa fahn di biginin. If unu kantinyu liv akaadn tu weh unu mi hyaa fahn di biginin, den unu wahn aalwayz bee wan wid di Son ahn wid di Faada. 25 Pahn tap a dat, hihn pramis wi evalastin laif.

26 Ah rait dehnya ting tu unu fi waan unu bowt dehn wan weh di chrai chrik unu. 27 Bot az fi unu, Gaad mi chooz unu* wid ih spirit, ahn da spirit stay eena unu, an unu noh need nobadi fi teech unu. Bot dis spirit fahn hihn da chroo, an ih noh tel no lai, an ih di teech unu evriting. Kantinyu fi bee wan wid hihn jos laik how di spirit teech unu. 28 Soh now, mi dyaa chiljren, kantinyu fi bee wan wid hihn, soh dat wen ih apyaa wi wahn ga di korij fi taak ahn noh feel shaym ahn haid fan ahn joorin di taim wen ih deh ya.* 29 If unu noa dat hihn raichos, den unu aalso noa dat evribadi weh du weh rait kohn fahn Gaad.