STODI POINT 2

Taak Eena Wahn Nachral Way

2 Korintyanz 2:17

WEH FI DU: Taak eena wahn nachral ahn sinsyaa way weh shoa how yu feel bowt di tapik ahn bowt yu aadyans.

Pray ahn tek yu taim fi pripyaa. Pray fi help soh dat yu ku foakos pahn yu mesij ahn noh pahn yuself. Mek shoar yu noa di mayn point dehn weh yu need fi get kraas tu yu aadyans. Seh tingz eena yu oan werdz; noh jos reed werd fi werd aafa wahn payj.

If yu plan fi reed fahn di Baibl er eni ada poblikayshan, geh fi noa di pasij gud soh dat yu ku reed schrayt chroo eena wahn nachral way. If yu wahn reed weh ada peepl mi rait, put laif intu yu reedin ahn reed wid feelin, bot noh oavadu it.
Taak fahn yu haat. Tink bowt wai yu aadyans need fi hyaa di mesij. Foakos pahn dehn. Den yu hoal atichood—di way yu stan op, yu jescha dehn, ahn di luk pahn yu fays—wahn shoa dat yu kain, sinsyaa, ahn frenli.

Noh geh tu komfatabl wid peepl kaaz yu mait seh sohnting weh noh shoa rispek. Gi di mesij di aana weh ih dizerv. Soh taak eena wahn klayr way ahn yooz prapa grama.
Luk pahn yu aadyans. Wen yu di gi wahn taak, noh jos glans pahn di hoal groop er fahn said tu said, luk pahn wan persn at a taim.