STODI POINT 11

Put Laif Intu Yu Taak

Roamanz 12:11

WEH FI DU: Taak eena wahn way fi mek yu aadyans ak pahn weh dehn di hyaa.

Taak fahn yu haat. Wen yu pripyaa fi gi yu prezentayshan, tink bowt how impoatant yu mesij. Geh fi noa di infamayshan gud gud soh dat yu ku taak fahn yu haat.
Tink bowt hoo wahn di lisn tu yu. Tink bowt how di infamayshan weh yu wahn reed er teech wahn benifit dehn. Ahn tink bowt how yu ku prizent da infamayshan eena wahn way weh wahn help yu aadyans fi ga moa apreeshiayshan far it.
Put laif intu yu taak. Laivli op yu taak! Yooz nachral jeschaz, ahn shoa bai di luk pahn yu fays dat yu sinsyaa ahn dat yoo di feel yu taak tu.

Noh yooz di saym jescha aal di taim; dis ku dischrak yu aadyans. Moroava, dis da noh wahn gud habit fi mek wahn speeka gat. Mek yu jeschaz konk. Shoa eksaitment espeshali wen yu di teech mayn points ahn wen yu waahn get di aadyans fi du sohnting bowt weh dehn di hyaa. Bot memba, if yu taak wid wahn lata enerji an eksaitment fi di hoal prezentayshan er taak, yu jos wahn taiyad owt peepl.