LESN 34
Weh Wi Ku Du fi Shoa Jehoava Dat Wi Lov Ahn?
Yoo feel kloasa tu Gaad sins yu staat stodi di Baibl? Yu wuda waahn kantinyu schrentn yu frenship wid ahn? Memba dat di moa Jehoava si dat yu lov fi hihn di groa, di moa hihn wahn lov ahn kay fi yoo. How yu ku shoa hihn dat yu lov ahn?
1. How wi shoa Jehoava dat wi lov ahn?
Wi shoa Jehoava dat wi lov ahn wen wi obay ahn. (Reed 1 Jan 5:3.) Bot hihn noh foas nobadi fi du dat. Insted, hihn giv eech wan a wi di apachooniti fi disaid weda er nat wi wahn obay ahn. Wai? Bikaaz Jehoava waahn mek wi bee “obeedyant fahn [wi] haat.” (Roamanz 6:17) Dat meenz hihn noh waahn wi obay ahn bikaaz wi haftu, bot bikaaz wi lov ahn. Sekshan 3 ahn 4 a dis buk wahn help yu shoa yu lov fi Jehoava wen yu du tingz weh pleez hihn ahn kip weh fahn tingz weh noh pleez ahn.
2. Wai ih ku bee haad fi shoa wi lov fi Jehoava?
Di Baibl seh: “Di raichos wan fays wahn lata prablemz.” (Psalm 34:19) Fi egzampl, aala wi schrogl fi du weh rait bikaaz wi noh perfek. Pahn tap a dat, wi mait di fain it haad fi provaid fi wiself ahn wi famili, fi deel wid injostis, ahn fi deel wid ada prablemz eena wi laif. Wen wi goh chroo dehnya haad taimz, ih noh mait bee eezi fi du weh Jehoava aks wi fi du. Dat da bikaaz ih mait bee eeziya fi du weh rang. Bot wen yu stay faytful tu Jehoava an obay ahn, yu shoa dat yu lov hihn moa dan eniting els ahn yu laayal tu ahn. Wen yu du dat, hihn wahn stay laayal tu yoo ahn hihn wahn neva lef yu.—Reed Psalm 4:3.
SAACH FI MOA
Fain owt wai Jehoava hapi wen yu obay ahn, an si weh wahn help yu fi stay faytful tu ahn.
3. Saytan akyooz yoo
Di buk a Joab tel wi dat Saytan mi akyooz Joab an evribadi els weh waahn serv Jehoava. Reed Job 1:1, 6–2:10, ahn den diskos dehnya kweschan:
Wai Saytan seh Joab mi obay Jehoava?—Si Job 1:9-11.
Weh Saytan seh bowt evribadi, eevn yoo?—Si Job 2:4.
Reed Job 27:5b, ahn den diskos dis kweschan:
How Joab mi shoa dat ih reeli lov Jehoava?
Joab mi shoa dat ih lov Jehoava wen ih mi stay laayal tu hihn
Wee shoa dat wi lov Jehoava wen wi stay laayal tu hihn
4. Mek Jehoava haat hapi
Reed Proverbs 27:11, ahn den diskos dehnya kweschan:
How Jehoava feel wen yu waiz ahn chooz fi obay hihn? Wai hihn feel da way?
5. Yoo ku bee laayal tu Jehoava
Di lov weh wi ga fi Jehoava mek wi tel adaz bowt ahn. Ahn bikaaz wi laayal, wi du dis eevn wen ih noh eezi. Play di VEEDYO, ahn den diskos di kweschan dehn.
Yoo eva fain it haad fi tel adaz bowt Jehoava?
Eena di veedyo, weh mi help Grayson fi noh bee frayd fi taak op bowt weh ih bileev eena?
Ih eeziya fi bee laayal tu Jehoava wen wi lov weh hihn lov ahn hayt weh hihn hayt. Reed Psalm 97:10, ahn den diskos dehnya kweschan:
Fahn weh yu don laan, wat da sohn tingz weh Jehoava lov? Wat da sohn tingz weh hihn hayt?
How yu ku laan fi lov weh gud ahn hayt weh bad?
6. Wi benifit wen wi obay Jehoava
Di bes ting fi du da fi aalwayz obay Jehoava. Reed Isaiah 48:17, 18, ahn den diskos dehnya kweschan:
Yu tink wi ku chros dat Jehoava aalwayz noa weh bes fi wi? Wai yu wuda seh dat?
How yu don benifit fahn yu Baibl stodi ahn fahn weh yu laan bowt di chroo Gaad, Jehoava?
WEH YU WUDA SEH IF SOHNBADI TEL YU: “Gaad noh kay weh Ai du.”
Weh skripcha yu ku yooz fi shoa dehn dat weh wi du ku mek Jehoava feel hapi er sad?
WEH WI LAAN?
Yu ku shoa dat yu lov Jehoava wen yu obay ahn an stay laayal tu ahn eevn wen ih haad.
Mek Wi Rivyoo:
Weh yu laan fahn Joab egzampl?
How yu ku shoa Jehoava dat yu lov ahn?
Weh wahn help yu fi stay laayal tu Jehoava?
FAIN OWT MOA
Fain owt how yu ku bee laayal tu Jehoava ahn di kangrigayshan.
Laan moa bowt di reezn wai Saytan seh peepl serv Jehoava.
“Joab Stay Faytful tu Jehoava” (Di Baibl Gat Een Wahn Mesij fi Yoo! sekshan 6)
Si how eevn yong peepl ku shoa dehn lov fi Jehoava.
Mek Jehoava Hapi (8:16)
How wahn yong persn ku stay laayal tu Jehoava eevn wen ih fays presha fahn peepl ih oan ayj?