LESN 12

Weh Wahn Help Yu fi Kantinyu Stodi di Baibl?

Picha

Yu wahn geh wahn lata blesin wen yu stodi di Baibl. Bot fi sohn peepl ih noh mait aalwayz bee eezi. Sohntaim yu mait wanda if yu wahn aybl fi kantinyu stodi di Baibl. Wai ih wert di efoat fi kantinyu? Weh ku help yu fi bayr op eevn doa yu mait ga prablemz?

1. How Baibl stodi ku help yu?

“Di werd a Gaad alaiv an ih ga lata powa.” (Heebrooz 4:12) Di Baibl ku help yu bikaaz ih shoa di way how Gaad tink ahn feel bowt yoo. Ih help yu fi ga nalij, chroo wizdom, ahn hoap. Bot weh moa impoatant, da dat di Baibl ku help yu fi bee Jehoava fren. Wen yu stodi di Baibl yu di alow Gaad powa fi mek yu laif beta.

2. Wai ih impoatant fi noa di valyu a Baibl chroot?

Baibl chroots da laik preshos chrezhaz. Dat da wai di Baibl tel wi fi “bai chroot ahn neva sel it.” (Proverbs 23:23) Wen wi tink bowt di valyu a Baibl chroots, wi wahn werk haad fi kantinyu stodi—eevn wen wi di fays prablemz.—Reed Proverbs 2:4, 5.

3. How Jehoava ku help yu fi kantinyu stodi?

Az yu almaiti Kriyayta ahn Fren, Jehoava waahn help yu fi laan bowt hihn. Hihn ku gi yu “di dizaiya ahn di powa fi du weh hihn waahn.” (Reed Filipiyanz 2:13.) Soh, if yu feel dat sohntaim yu need moa dizaiya fi stodi er fi aplai weh yu di laan, hihn ku help yu. If yu need moa schrent fi deel wid yu prablemz er wid opozishan, hihn ku gi yu it. Pray tu Jehoava an aks ahn fi help yu kantinyu stodi di Baibl.—1 Tesaloanyanz 5:17.

SAACH FI MOA

Si how yu ku kantinyu stodi di Baibl eevn if yu ga wahn bizi skejul er if adaz deh gens yu. Den kansida how Jehoava wahn help yu fi noh giv op.

4. Mek yu Baibl stodi sohnting impoatant

Sohntaim wi mait feel laik wi tu bizi ahn wi noh ga inof taim fi stodi di Baibl. Weh ku help? Reed Filipiyanz 1:10, ahn den diskos dehnya kweschan:

Weh yoo tink da som a “di moa impoatant tingz” eena laif?
How yu ku mek yu Baibl stodi impoatant?

A. Di picha dehn: Wahn picha di shoa wahn bokit weh ful op wid sohn big stoan ahn san. 1. Wahn pail a san ahn wahn pail a big stoan. 2. Wahn bokit aalmoas ful op wid san. 3. Di big stoan dehn deh pan tap a di san an ih oava ful tu di grong.

B. Di picha dehn: 1. Di saym pail a san ahn di saym pail a big stoan. 2. Di saym bokit aalmoas ful op wid som big stoan. 3. Di san deh rong di big stoan an ih ful op di bokit tu di tap. Wahn smaal pail a san deh owtsaid a di bokit.

If yu ful wahn bokit wid san ahn den chrai fi put een stoan, di stoan dehn noh wahn fit
If yu put een di stoan fers, yu wahn ga spays fi put een moa san. Saym way soh, if yu put “di moa impoatant tingz” fers eena yu laif, yu wahn ku du weh moa impoatant ahn stil ga taim fi ada tingz

Wen wi stodi di Baibl ih satisfai wi spirichwal need—di need fi noa ahn wership Gaad. Reed Machyu 5:3, ahn den diskos dis kweschan:

How wi wahn benifit if wi mek wi Baibl stodi impoatant?

5. Noh giv op wen adaz deh gens yu

Sohntaim adaz wahn chrai fi diskorij yu fahn stodi di Baibl. Noatis Francesco egzampl. Play di VEEDYO, ahn den diskos dehnya kweschan.

VEEDYO: Blesinz Bikaaz Ah Neva Giv Op (5:22)

Wahn seen fahn di veedyo ‘Blesinz Bikaaz Ah Neva Giv Op.ʼ Francesco di waak weh fahn ih kloas frenz afta ih tel dehn dat hihn noh wahn spen taim wid dehn nohmoh.

Eena di veedyo, how Francesco frenz ahn famili mi rispan wen hihn mi tel dehn weh hihn mi-di laan?
Weh mi hapm bikaaz hihn neva giv op?

Reed 2 Timoti 2:24, 25, ahn den diskos dehnya kweschan:

How yu famili ahn frenz dehn feel bowt weh yoo di laan?
Akaadn tu dehnya vers, how yu shuda rispan wen sombadi noh hapi dat yu di stodi di Baibl? Wai?

6. Pen pahn Jehoava fi help yu

Az wi jraa kloasa tu Jehoava, wi dizaiya fi pleez hihn wahn geh schranga. Bot, wi mait stil fain it haad fi chaynj sohnting eena wi laif soh dat wi ku liv akaadn tu Jehoava standadz. If yu eva feel da way, noh giv op. Jehoava wahn help yu. Play di VEEDYO, ahn den diskos dehnya kweschan.

VEEDYO: Jehoava Ku Help Wi Chaynj (3:56)

Eena di veedyo, weh chaynjiz Jim mi mek fi pleez Jehoava?
Weh yoo laik bowt fi hihn egzampl?

Reed Heebrooz 11:6, ahn den diskos dehnya kweschan:

Weh Jehoava wahn du fi dehn wan weh “di chrai dehn bes fi du ih wil”?
Weh dis tel yu bowt how Jehoava feel wen hihn si yoo di chrai haad fi stodi di Baibl?

WEH YU WUDA SEH IF SOHNBADI AKS YU: “Weh yoo di stodi di Baibl fa?”

Wai yu wuda seh dat?

WEH WI LAAN?

Eevn doa ih noh mait bee eezi, yu stodi a di Baibl ku help yu fi injai laif fareva. Kantinyu fi pen pahn Jehoava, ahn hihn wahn bles yu.

Mek Wi Rivyoo:

Wai Baibl chroots preshos tu yoo?
How yu ku “mek shoar a di moa impoatant tingz”?
Wai yu shuda aks Jehoava fi help yu kantinyu stodi di Baibl?

Dayt Ah kompleet dis sekshan:

Weh Ah Ku Werk Pan

Kantinyu fi ga yu Baibl stodi at lees wans a week. If yu skejul chaynj, fain wahn nada taim fi du di stodi.

Sohnting els fi werk pan:

Your other goal

FAIN OWT MOA

Luk pahn foa difrent tingz weh help wahn lata peepl fi mek gud yoos a dehn taim.

“How fi Mek Gud Yoos a Yu Taim?” (Awayk!, Febiweri 2014)

Noatis how Jehoava mi help wahn uman weh mi chrai haad fi pleez hihn eevn doa fi shee hozban mi deh gens ahn at fers.

Jehoava Schrentn Wi fi Bayr Op (5:05)

Si how wahn man mi benifit bikaaz ih waif neva giv op.

Ah Mi Investigayt di Chroot (6:30)

Sohntaim dehn akyooz Jehoava Witnisiz fi brok op di famili dehn. Yu tink dat da chroo?

“Jehoava Witnisiz Brok Op Famili er Bring Dehn Tugeda?” (Web aatikl)