LIV YU LAIF AZ WAHN KRISTYAN

Sohnting Nyoo fi di Meetin Joorin di Week

Staatin eena Janiweri 2018, di meetin joorin di week wahn ga sohn stodi noat ahn meedya fahn di onlain New World Translation of the Holy Scriptures (nwtsty), eevn if dis stodi Baibl noh avaylabl eena yu langwij yet. Fi shoar dis infamayshan wahn help yu fi pripyaa eevn beta fi di meetin dehn. Bot moa impoatant dan dat, ih wahn help yu fi jraa kloasa tu wi lovin Faada, Jehoava!

STODI NOAT DEHN

Di stodi noat dehn wahn giv infamayshan bowt di kolcha, di plays, ahn koments bowt di werd dehn eena di orijinal langwij weh di vers mi rait eena.

Machyu 12:20

Smoakin wik: Di lamp weh dehn yoostu yooz bak den da-mi wahn smaal klay jaar weh ful op wid aliv ail. Wahn wik mi pul op di ail tu di flaym. Di Greek frayz “smoakin wik” mait di rifaa tu wahn wik weh di giv aaf smoak bikaaz paat a it stil di gloa red bot di flaym soon owt er don owt aredi. Di prafesi da Isaiah 42:3 mi prafesai dat Jeezas mi wahn shoa kompashan; hihn neva mi wahn owt di lee spaak a hoap eena dehn wan weh hombl ahn weh ada peepl chreet bad.

Machyu 26:13

Chrooli: Di Greek werd, a·menʹ, kohn fahn di Heebroo werd ʼa·menʹ, weh meen “mek ih bee soh,” er “fi shoar.” Lata taim, jos bifoa Jeezas seh sohnting er mek wahn prafesi er wahn pramis, ih wuda seh dis frayz. Ih mi du dis soh dat peepl kuda mi noa dat weh ih di seh da di chroot ahn dat dehn ku pen pan it. Di way how Jeezas mi yooz “chrooli,” er aymen, reeli speshal eena di saykrid raitin dehn. Wen ih mi seh it wan afta di neks (a·menʹ a·menʹ), laik aal chroo di Gaspl a Jan, dehn chranslayt weh Jeezas seh az “Ah di tel yu di chroot.”—Jan 1:51.

MEEDYA

Pichaz, payntin, sailent veedyo, ahn kaartoon fi bring owt difrent deetayl bowt weh deh eena di Baibl.

Betfayj, di Mongt a Alivz, ahn Jeroosalem

Dis shaat veedyo fala wahn road fi goh eena Jeroosalem fahn di ees, fahn di vilij weh tudeh naym et-Tur—weh sopoas tu bee Betfayj fahn di Baibl—tu wan a di haiya point dehn pahn di Mongt a Alivz. Betani deh ees a Betfayj pahn di ees said a di Mongt a Alivz. Wen Jeezas an ih disaipl dehn mi deh da Jeroosalem, dehn mi laik fi spen di nait da Betani. Tudeh, di tong weh naym el-ʽAzariyeh (El ʽEizariya ), wahn Arabik naym weh meen “Lazaros Plays,” dehdeh. Fi shoar Jeezas mi stay da Marta, Mayri, ahn Lazaros hows. (Mach 21:17; Maak 11:11; Look 21:37; Jan 11:1) Wen Jeezas mi-di chravl fahn fi dehn hows tu Jeroosalem, hihn maita mi fala wahn road jos laik di wan weh di veedyo shoa. Pahn Naisan 9, 33 C.E., wen Jeezas mi raid di dongki oava di Mongt a Alivz tu Jeroosalem, ih mi praabli lef fahn Betfayj ahn fala di road tu Jeroosalem.

Road fahn Betani tu Betfayj
Betfayj
Mongt a Alivz
Kijron Vali
Templ Mongt

Nayl Eena Wahn Heel Boan

Dis da wahn picha a wahn modl a wahn persn heel boan wid wahn aiyan nayl boar chroo it weh mi 11.5 cm (4.5 in.) lang. Dehn mi fain di orijinal wan eena 1968 wen saiyentis mi-di dig eena di naadan paat a Jeroosalem, ahn dehn dayt it bak tu eena Roaman taim. Dis da proof dat dehn mi yooz nayl fi faasn wahn persn weh dehn di eksikyoot aan tu wahn stayk weh mek owta wud. Dis da mosi jos laik di nayl weh di Roaman soalja dehn mi yooz fi faasn Jeezas Krais tu di stayk. Dehn mi fain di orijinal heel boan wid di nayl eena it eena wahn stoan baks weh dehn put di jrai op boan fi di ded persn afta ih flesh don ratn weh. Dis shoa wi dat eevn afta dehn kil sohnbadi pahn wahn stayk, di persn kuda geh beri aftawodz.—Mach 27:35.