STODI AATIKL 15
Weh Wi Ku Laan Fahn Jeezas Miraklz?
“Hihn gaahn chroo di hoal ayrya wid di gud nyooz an ih mi heel peepl.”—AKS 10:38.
SANG 13 Krais, fi Wee Egzampl
WEH WI WAHN DISKOS?a
1. Eksplayn weh mi hapm wen Jeezas mi du ih fers mirakl.
JOS imajin weh mi hapm eena 29 C.E. rong di taim wen Jeezas fers staat ih minischri. Jeezas, ih ma Mayri, ahn som a ih disaiplz mi geh invaitid tu wahn wedn da Kayna. Dis da-mi wahn vilij weh mi deh naat a Nazaret, weh da-mi Jeezas hoamtong. Mayri da-mi frenz wid di famili a di braid ahn di groom, soh shee mi-di help tek kayr a di peepl weh mi kohn da di wedn. Bot joorin di wedn, wahn prablem mi kom op. Dehn mi ron owta wain. Dis mi wahn bee wahn big prablem, bikaaz ih mi wahn bring shaym tu di famili ahn di yong kopl.b Maybi dehn mi ga lat moa peepl dan weh dehn mi invait. Mayri hori gaahn tel ih son: “Dehn noh ga nohmoh wain.” (Jan 2:1-3) Weh Jeezas mi du? Hihn mi du wahn amayzin mirakl. Ih ton waata intu “di bes wain.”—Jan 2:9, 10.
2-3. (a) Wat da sohn mirakl weh Jeezas mi du? (b) How wee ku benifit wen wi stodi Jeezas miraklz?
2 Jeezas mi du wahn lat moa mirakl joorin ih minischri pahn ert.c Ih mi yooz ih powa fi du miraklz weh mi help towznz a peepl. Fi egzampl, wid jos too mirakl hihn mi help oava 27,000 peepl, if wi inklood di laydi ahn pikni dehn weh mi dehdeh tu. Di fers mirakl da wen ih mi feed 5,000 man, ahn laytaraan ih mi feed 4,000 man. (Mach. 14:15-21; 15:32-38) Wen Jeezas mi feed di peepl dehndeh too taimz, ih mi heel wahn lata sik peepl tu. (Mach. 14:14; 15:30, 31) Jos imajin how di peepl mi feel wen dehn geh fi si di miraklz weh Jeezas mi du fi feed di peepl ahn heel dehn!
3 Wi ku laan wahn lat fahn di miraklz weh Jeezas mi du. Eena dis aatikl, wi wahn si weh difrent lesn wi ku laan fahn dehndeh mirakl weh ku schrentn wi fayt. Wi wahn aalso laan how wi ku kapi Jeezas egzampl fi bee hombl ahn shoa kompashan tu adaz.
SOHN LESN WEH WI KU LAAN BOWT JEHOAVA AHN JEEZAS
4. Hoo Jeezas miraklz teech wi bowt?
4 Di miraklz weh Jeezas mi du wahn teech wi sohn lesn weh wahn schrentn wi fayt, noh jos eena Jeezas bot eena fi hihn Pa tu. Aftaraal, da Jehoava gi Jeezas di powa fi du dehndeh miraklz. Dis da weh Aks 10:38 seh: “Gaad mi anoint ahn [Jeezas] wid hoali spirit ahn giv ahn powa. Ahn Gaad mi deh wid ahn; an hihn gaahn chroo di hoal ayrya wid di gud nyooz an ih mi heel peepl weh di Devl mi-di kaaz fi sofa.” Jeezas mi kapi ih Pa egzampl eena wahn perfek way. Evriting weh Jeezas mi seh ahn du shoa how ih Pa tink ahn feel. Dis inklood di miraklz weh Jeezas mi du. (Jan 14:9) Mek wi luk pahn chree lesn weh wi ku laan fahn Jeezas miraklz.
5. Weh mi moov Jeezas fi du miraklz? (Machyu 20:30-34)
5 Fers, Jehoava ahn Jeezas lov wi wahn lat. Wen Jeezas mi deh pahn ert, hihn shoa humoch ih lov peepl wen ih mi yooz ih powa fi du miraklz fi help peepl weh mi-di sofa. Wahn taim, dehn mi ga too blain man weh mi-di hala owt fi mek Jeezas help dehn. (Reed Machyu 20:30-34.) Di Baibl seh dat Jeezas “mi feel sari fi dehn” ahn den ih mi heel dehn. Di Greek verb weh wi chranslayt az “feel sari fi dehn” shoa dat Jeezas mi feel wahn deep payn eena ih haat wen ih si peepl di sofa. Dis kompashan weh Jeezas mi feel shoa humoch ih lov peepl, ahn dat mi moov ahn fi feed peepl weh mi hongri ahn kyoar wahn man weh mi ga leprosi. (Mach. 15:32; Maak 1:41) Wi ku bee shoar dat Jehoava, di Gaad a “kompashan,” an ih Son lov wi wahn lat, ahn dehn feel wi payn wen wi sofa. (Look 1:78; 1 Peet. 5:7) Dehn kyaahn wayt fi geh rid a aala di prablemz ahn sofarin weh hyoomanz di goh chroo.
6. Weh kaina powa Gaad gi Jeezas?
6 Sekant, Gaad mi gi Jeezas di powa fi solv aal di prablemz weh hyoomanz di fays. Di miraklz weh Jeezas mi du shoa dat hihn ga di powa fi fiks prablemz weh hyoomanz kuda neva fiks pahn dehn oan. Fi egzampl, Jeezas ga di powa fi free wi fahn sin, weh da di mayn reezn wai wi geh sik, geh oal, ahn ded. (Mach. 9:1-6; Roam. 5:12, 18, 19) Jeezas miraklz proov dat hihn ku kyoar “aal kaina” siknis an eevn rezorek di ded. (Mach. 4:23; Jan 11:43, 44) Hihn aalso ga di powa fi kaam dong big staam an ih ku free peepl fahn di deemon dehn. (Maak 4:37-39; Look 8:2) Ih soh komfertin fi noa dat Jehoava gi Jeezas da kaina powa, noh chroo?
7-8. (a) How Jeezas miraklz mek wi chros di pramis dehn bowt di fyoocha? (b) Wich mirakl yoo di luk faawod tu eena di fyoocha?
7 Terd, wi ku chros dat aal di pramis dehn bowt di fyoocha wahn kohn chroo wen Gaad Kingdom staat tu rool. Di miraklz weh Jeezas mi du wen hihn mi deh pahn di ert teech wi weh hihn wahn du fi di hoal ert az King a Gaad Kingdom. Mek wi luk pahn sohn blesin weh wi wahn soon injai wen Krais rool oava di ert. Wi wahn injai perfek helt bikaaz hihn wahn geh rid a evri dizeez ahn disabiliti weh mek peepl sofa. (Isa. 33:24; 35:5, 6; Rev. 21:3, 4) Nobadi wahn sofa bikaaz dehn hongri er bikaaz a nachral dizaasta. (Isa. 25:6; Maak 4:41) Dis wahn bee wahn hapi taim bikaaz dehn wan weh deh eena “di toom dehn” wahn kohn bak tu laif. (Jan 5:28, 29) Wich mirakl yoo di luk faawod tu eena di fyoocha?
8 Wen Jeezas mi du miraklz, hihn mi shoa dat ih mi hombl ahn dat ih ga kompashan fi adaz. Dehndeh da kwalitiz weh aala wi need fi ga. Mek wi luk pahn too egzampl a how Jeezas mi shoa dehndeh kwaliti. Di fers wan da wen hihn mi gaahn da di wedn da Kayna.
WAHN LESN BOWT HOW FI BEE HOMBL
9. Akaadn tu Jan 2:6-10, weh mirakl Jeezas mi du da di wedn?
9 Reed Jan 2:6-10. Yu tink Jeezas mi reeli haftu du wahn mirakl wen di peepl mi ron owta wain da di wedn? No. Dehn neva ga no prafesi eena di Baibl weh seh dat di Mesaiya mi wahn du wahn mirakl fi mek wain. Bot, jos put yuself eena da sichuwayshan. How yoo wuda mi feel if dehn mi ron owta food da yu wedn? Jeezas haat mi gaahn owt tu di famili, espeshali di braid ahn di groom. Hihn neva waahn mek dehn feel shaym. Soh, laik weh wi mi menshan eena di biginin a dis aatikl, hihn mi du wahn mirakl. Hihn mi ton bowt 103 gyalan (390 leeta) a waata intu di bes wain. Maybi hihn mi mek soh moch wain soh dat som kuda mi lefoava fi mek di yong kopl yooz wahn nada taim. Er maybi da mi fi mek dehn sel it soh dat dehn ku ga sohn moni fi dehnself. Dis kopl mosi mi soh tankful fi weh Jeezas mi du!
Bee hombl laik Jeezas ahn noh boas bowt di tingz weh yu du (Paragraaf 10-11)e
10. Weh impoatant deetaylz wi ku fain eena Jan chapta 2? (Koment pahn di picha.)
10 Mek wi luk pahn sohn impoatant deetaylz eena Jan chapta 2. Yu mi noatis dat da neva Jeezas ful op di stoan jaar dehn wid waata? Insted, hihn mi aks di servants fi du it, bikaaz ih neva wahn jraa atenshan tu ihself. (Vers 6, 7) An afta Jeezas mi ton di waata intu wain, hihn neva kehr som a di wain tu di man weh mi in chaaj a di wedn. Insted, hihn mi aks di servants fi kehr it. (Vers 8) Fi shoar, Jeezas neva tek wahn kop a wain ahn hoal it op front evribadi di boas ahn seh, ‘Tays som a dis nais wain weh Ai jos mek!ʼ
11. Weh wi ku laan fahn Jeezas mirakl?
11 Weh wi ku laan fahn di mirakl weh Jeezas mi du fi ton waata intu wain? Wi laan wahn lesn bowt how fi bee hombl. Jeezas neva boasi bowt da mirakl. In fak, hihn neva boasi bowt eniting weh hihn mi du. Insteda dat, hihn mi hombl an ih mi aalwayz gi di gloari ahn prayz tu ih Pa. (Jan 5:19, 30; 8:28) If wee kapi Jeezas ahn stay hombl, wi noh wahn boasi bowt di tingz weh wi du. Noh mata weh privilij wi mait ga eena Jehoava servis, wi noh waahn boas bowt wiself. Insted, wi waahn prayz Jehoava, di wandaful Gaad weh wi serv. (Jer. 9:23, 24) Mek wi giv Jehoava aal di prayz an aana weh ih dizerv, bikaaz widowt fi hihn help wi kyaahn du notn.—1 Kor. 1:26-31.
12. Wat da wahn nada way how wi ku kapi Jeezas ahn bee hombl? Yooz di egzampl eena di paragraaf.
12 Mek wi luk pahn wahn nada way how wi ku kapi Jeezas egzampl ahn bee hombl. Tink bowt dis: Wahn elda tek wahn lata taim fi help wahn yong ministeeryal servant fi pripyaa ih fers poblik taak. Bikaaz di elda mi tek wahn lata taim fi help di yong brada, hihn mi gi wahn gud taak weh di kangrigayshan mi reeli injai. Afta di meetin, sohnbadi kohn tel di elda: ‘Da brada gi wahn nais taak, noh chroo?ʼ Yu tink di elda need fi seh dat hihn mi haftu spen wahn lata taim di help di yong brada? Er hihn ku bee hombl ahn seh: ‘Yes, ih du gud fi chroo! Ah onli prowd a ahn.ʼ Wahn hombl persn noh wahn tek prayz fi di gud tingz weh ih du fi adaz. Ih inof fi noa dat Jehoava si an apreeshiayt weh wi du. (Kompyaa Machyu 6:2-4; Heeb. 13:16) Fi shoar, Jehoava hapi wid wi wen ih si dat wi waahn bee hombl laik Jeezas.—1 Peet. 5:6.
WAHN LESN BOWT HOW FI SHOA KOMPASHAN
13. Akaadn tu Look 7:11-15, weh Jeezas mi si wen ih reech kloas tu di siti a Nayn, ahn weh hihn mi du?
13 Reed Look 7:11-15. Tink bowt weh mi hapm bowt wan an a haaf yaaz afta Jeezas mi staat ih minischri. Hihn mi-di chravl tu Nayn, wahn siti eena Gyalilee weh neva deh faar fahn Shoonem, wehpaat Ilaisha mi rezorek wahn wido son bowt 900 yaaz erliya. (2 Ki. 4:32-37) Wen Jeezas mi reech kloas tu di siti gayt da Nayn, hihn mi si wahn finaral di goh da di bering grong. Dis mi reeli sad bikaaz wahn wido mi looz ih wan an onli son. Bot shee neva deh bai ihself; wahn big krowd a peepl mi-di goh lang wid ahn. Soh Jeezas stap di finaral an ih du sohnting amayzin fi di ma weh mi-di krai fi ih son. Ih rezorek di laydi son. Dis da di fers owta di chree rezorekshan weh Jeezas mi du weh geh menshan eena di Gaspl dehn.
Kapi Jeezas egzampl ahn shoa kompashan fi peepl weh sad bikaaz sohnbadi weh dehn lov ded (Paragraaf 14-16)
14. Weh impoatant deetaylz deh eena Look chapta 7? (Koment pahn di picha.)
14 Mek wi luk pahn sohn impoatant deetaylz weh deh eena Look chapta 7. Yu mi noatis dat fers Jeezas mi “si” di ma ahn den “ih mi feel sari far ahn”? (Vers 13) Jeezas mi praabli si ahn di krai wail shee mi-di waak kloas tu ih son badi, ahn dis mi mek Jeezas haat gaahn owt tu ahn. Jeezas neva jos feel sari fi di ma; hihn mi shoa ahn kompashan. Fi shoar, Jeezas mi taak tu ahn eena wahn saaf ahn kaam way wen ih tel ahn: “Noh krai.” Den, Jeezas mi du sohnting fi help ahn. Ih mi bring di wido son bak tu laif an ih “giv ahn bak tu ih ma.”—Vers 14, 15.
15. Weh wi ku laan fahn di mirakl weh Jeezas mi du?
15 Weh wi laan fahn Jeezas mirakl wen ih mi rezorek di wido son? Wi laan dat wi need fi shoa kompashan fi peepl weh feel sad bikaaz sohnbadi weh dehn lov ded. Da chroo, wi kyaahn rezorek di ded laik weh Jeezas mi du. Bot wi ku kapi Jeezas ahn shoa kompashan tu adaz weh di goh chroo dis terabl payn. Fers, wi need fi luk kyaafuli fi si how wi ku help, ahn den seh er du sohnting fi help dehn feel beta.d (Prov. 17:17; 2 Kor. 1:3, 4; 1 Peet. 3:8) Wi noh haftu seh er du wahn lata tingz. Eevn lee tingz ku inkorij ahn komfert dehn.
16. Weh wi laan fahn di ekspeeryens eena di paragraaf? (Koment pahn di picha.)
16 Luk pahn dis egzampl. Sohn yaaz abak wahn sista mi si wahn neks sista di krai wail dehn mi-di sing da wahn meetin. Di sang da-mi bowt di rezorekshan hoap ahn da neva tu lang sins di neks sista daata mi ded. Laik how di sista mi noa weh dis ada sista di goh chroo, shee hori gaahn saida ahn, ih hog ahn, an ih sing di res a di sang wid ahn. Laytaraan, di sista weh mi looz ih daata seh: “Dat da wen Ah mi feel dis grayt lov fi mi bradaz ahn sistaz.” Shee mi soh hapi dat ih gaahn da meetin da day. Ih mi seh: “Di Kingdom Haal da wehpaat wi geh di help weh wi need.” Wi ku bee shoar dat Jehoava si an apreeshiayt evri lee ting weh wi du fi shoa kompashan fi dehn wan weh sad ahn weh “feel diskorij.”—Ps. 34:18.
WAHN STODI PROAJEK WEH KU SCHRENTN YU FAYT
17. Weh wi laan eena dis aatikl?
17 Wen wi stodi bowt Jeezas miraklz weh deh eena di Gaspl dehn, ih mek wi ga schranga fayt. Di Gaspl dehn teech wi dat Jehoava ahn Jeezas lov wi soh moch, ahn dat Jeezas ga di powa fi fiks aala di prablemz weh wi fays. Ih aalso help wi fi chros dat Gaad pramis dehn wahn kohn chroo wen Gaad Kingdom staat rool oava di ert. Wen wi reed bowt dehndeh miraklz, wi ku meditayt pahn how wi ku kapi Jeezas kwalitiz. Maybi yu ku stodi bowt Jeezas ada miraklz fi Famili Wership er joorin yu persnal stodi. Az yu stodi dehndeh miraklz, saach fi sohn ada lesn weh yu ku laan, ahn shayr dehn wid adaz. Dat wahn mek yu ga inkorijin kanvasayshanz wid yu bradaz ahn sistaz.—Roam. 1:11, 12.
18. Weh wi diskos eena di neks aatikl?
18 Kloas tu di en a Jeezas minischri, hihn mi rezorek wahn kloas fren. Dis da-mi di terd ahn di laas rezorekshan weh hihn mi du joorin ih minischri. Dis rezorekshan mi difrent fahn di ada too bikaaz fi hihn fren mi don ded fi foa dayz. Weh ada lesn wi ku laan fahn da mirakl? Ahn how wi ku schrentn wi fayt eena di rezorekshan hoap? Wi wahn fain di ansa tu dehndeh kweschan eena di neks aatikl.
SANG 20 Yu Sen Yu Preshos Son
a Ih amayzin fi reed bowt aala di miraklz weh Jeezas mi du. Fi egzampl, hihn mi kaam wahn big staam, hihn mi heel sik peepl, an ih bring di ded bak tu laif. Dehndeh da noh jos stoari, bot dehn ku teech wi sohn impoatant lesn. Eena dis aatikl, wi wahn stodi bowt som a dehndeh mirakl ahn si weh lesn wi ku laan fi mek wi fayt geh schranga. Wi wahn aalso laan moa bowt Jehoava ahn Jeezas kwalitiz weh wee ku kapi.
b Wahn man weh stodi Baibl hischri seh dat joorin Baibl taimz peepl yoostu tink dat da mi fi dehn rispansabiliti fi shoa haspitaliti tu adaz, ahn dehn mi need fi mek shoar dat dehn ges geh moa dan weh dehn mi need. Soh espeshali da wahn wedn, dehn mi haftu mek shoar dat dehn ga moa dan inof food ahn jrink fi dehn ges.
c Di Gaspl dehn gat een oava 30 mirakl weh Jeezas mi du. Jeezas mi du lat moa miraklz, bot di Baibl noh lis dehn wan bai wan. Fi egzampl, wahn taim “aala di peepl fan di siti” mi kom owt kohn meet Jeezas an “ih kyoar di wan dehn weh mi sik.”—Maak 1:32-34.
d If yu waahn laan moa bowt how fi komfert dehn wan weh sad bikaaz sohnbadi weh dehn lov ded, si di aatikl “Comfort the Bereaved, as Jesus Did” eena di Novemba 1, 2010, kapi a The Watchtower.
e DI PICHA: Jeezas di stan op eena di bakgrong wail di yong kopl an aala dehn ges di injai di wain weh Jeezas mi mek.