MWBR19 09 Laif ahn Minischri Meetin Werkbuk Risaach Infamayshan

SEPTEMBA 2-8

CHREZHAZ FAHN DI WERD A GAAD | HEEBROOZ 7-8

“Wahn Prees Fareva ahn Eva, Jos Laik Melkizidek”

(Heebrooz 7:1, 2) Now, dis Melkizidek da-mi di king a Saylem ahn di prees a di moas hai Gaad. Da hihn mi gaan owt gaahn meet Aybraham ahn bles ahn wen ih mi-di kohn bak hoahn afta ih mi don win di waar gens di king dehn. ² Aybraham gi Melkizidek wan-tent a aala weh ih mi tek fahn di enimi dehn wen ih mi win di waar. Di naym Melkizidek meen “Di Raichos King.” Ahn laik how hihn da-mi di king a Saylem ahn Saylem meen “pees,” hihn da-mi di “King a Pees” tu.

it-2-E 366

Melkizidek

Melkizidek da-mi di King a wahn oal siti weh mi naym Saylem, ahn di “prees a di Moas Hai Gaad,” Jehoava. (Ge 14:18, 22) Hihn da-mi wan a di fers prees weh di Skripchaz taak bowt; hihn mi geh dis speshal pozishan sohn taim bifoa 1933 B.C.E. Di naym Saylem meenz “Pees,” ahn soh dat da wai Paal mi kaal ahn di “King a Pees,” bikaaz Melkizidek da-mi di king a Saylem. Bays pahn fi hihn naym, Paal mi aalso kaal ahn “Di Raichos King.” (Heeb 7:1, 2) Moas peepl agree dat Saylem mi deh wehpaa Jeroosalem deh now, ahn dats wai di naym Jeroosalem gat een di werd “Saylem,” ahn sohn peepl stil kaal it dat.—Ps 76:2.

Afta Aybram [Aybraham] mi win di waar gens Kedorlaomer ahn di groop a king weh mi sopoat hihn, Aybram mi gaan way dong da di Vali a Shayveh, er di “Vali a di king dehn.” Dehsoh Melkizidek mi bring owt bred ahn wain, an ih mi bles Aybraham an ih mi tel ahn: “Mek di Moas Hai Gaad, di Wan weh mek di hevn ahn di ert, bles yu Aybram, ahn prayz di Moas Hai Gaad hoo diliva yu enimi intu yu han!” Afta dat Aybraham mi gi di king ahn prees “wan-tent a evriting weh hihn mi tek,” weh da-mi di bes a weh hihn mi “tek weh fahn ih enimi dehn.”—Ge 14:17-20; Heeb 7:4.

(Heebrooz 7:3) Di Skripcha noh seh notn bowt Melkizidek ma ner ih pa, ner ih ansesta dehn, ner di biginin a ih laif ner di en. Hihn da laik di Son a Gaad; ih wahn bee wahn prees fareva.

it-2-E 367 ¶4

Melkizidek

Eena weh way Melkizidek laif noh ga wahn ‘biginin ner wahn enʼ?

Paal bring owt wahn reeli impoatant chroot bowt Melkizidek wen ih seh: “Di Skripcha noh seh notn bowt Melkizidek ma ner ih pa, ner ih ansesta dehn, ner di biginin a ih laif ner di en. Hihn da laik di Son a Gaad; ih wahn bee wahn prees fareva.” (Heeb 7:3) Jos laik evri ada hyooman, Melkizidek mi baan an ih mi ded. Bot di Skripchaz noh gat een no rekad a ih ma ner ih pa, ner eni a ih ansesta dehn, ner ih disendant dehn. Ahn eena dis sens, Melkizidek reprizent Jeezas, hoo serv az Hai Prees fareva. Jos laik how dehn noh ga no rekad a nobadi di serv az prees bifoa ner afta Melkizidek, sayhn way, nobadi laik Jeezas mi serv az Hai Prees bifoa Krais ner afta hihn. Pahn tap a dat, eevn doa Jeezas da fahn di chraib a Jooda ahn fahn Dayvid famili lain, fi hihn apointment az king neva ga notn fi du wid ih hyooman famili lain. Bot dehnya tingz da weh Jehoava mi pramis Jeezas chroo wahn vow.

(Heebrooz 7:17) Kaa dis da weh di Skripcha seh bowt hihn: “Yoo da wahn prees fareva ahn eva, jos laik Melkizidek.”

it-2-E 366

Melkizidek

Weh Krais Roal az Prees Reprizent. Eena wahn impoatant prafesi, Jehoava mi tel Dayvid bowt di vow weh ih mek tu Jeezas: “Yoo da wahn prees fareva ahn eva, eena di sayhn way how Melkizidek da-mi prees” (Ps 110:1, 4) Paal mi yooz dis koat fahn di buk a Psalms fi giv di Heebroo Kristyanz kanfidens dat di Mesaiya weh di Baibl mi prafesai bowt da “Jeezas . . fi wee hai prees fareva, sayhn laik how Melkizidek” da-mi king ahn prees.—Heeb 6:20; 5:10; si KOVENANT.

Saach fi Spirichwal Chrezhaz

(Heebrooz 8:3) Di werk weh evri hai prees fi du da fi aafa gif ahn sakrifais tu Gaad, soh fi wee hai prees haftu aafa sohnting tu.

w00-E 8/15 14 ¶11

Sohn Sakrifais Weh Pleez Gaad

¹¹ Paal mi seh, “Di werk weh evri hai prees fi du da fi aafa gif ahn sakrifais.” (Heebrooz 8:3) Noatis how Paal mi separayt di too aafrin weh di hai prees a Izrel dehn mi haftu du: wan da wahn “gif” aafrin, ahn di ada da wahn “sakrifais,” er wahn “sakrifais fi di peepl dehn sin dehn.” (Heebrooz 5:1) Naamali, peepl giv gif tu adaz fi shoa humoch dehn lov dehn, az wel az fi mek frenz er fi mek peepl laik dehn. (Genesis 32:20; Proverbs 18:16) Jos laik dat, wi kuda seh dat wahn lata di aafrin di Laa mi tel di Izrelait dehn fi mek da-mi laik wahn “gif” tu Gaad fi mek hihn aksep dehn ahn pleez wid dehn. Bot wen dehn mi sin gens di Laa, di prees mi haftu aafa op wahn “sakrifais fi di peepl dehn sin dehn.” Di fers faiv buk a di Baibl, maynli di buk a Exodus, Leviticus, ahn Numbers, gi wahn lata infamayshan bowt di difrent kaina sakrifais an aafrin dehn. Wail ih ku bee reeli haad fi laan er memba aala di deetaylz, som a di mayn points bowt di difrent kaina sakrifais dizerv wi atenshan.

(Heebrooz 8:13) Wen Gaad seh dat dis da wahn nyoo agreement, dat meen dat Gaad don mek di oal wan owt-daytid. Ahn eniting weh oal ahn owt-daytid wahn soon disapyaa.

it-1-E 523 ¶5

Kovenant

How di Laa weh Gaad mi Gi Moaziz mi Geh “owt-daytid”?

Eena wahn sens, Moaziz Laa mi geh “owt-daytid” wen Jehoava mi prafesai chroo ih prafit Jerimaiya dat hihn mi wahn mek wahn nyoo agreement. (Jer 31:31-34; Heeb 8:13) Eena 33 C.E., di Laa agreement mi geh kyansl owt bikaaz Krais mi geh put tu det pahn wahn taacha stayk (Kol 2:14), ahn di nyoo agreement mi tek ih plays.—Heeb 7:12; 9:15; Aks 2:1-4.

Baibl Reedin

(Heebrooz 7:1-17) Now, dis Melkizidek da-mi di king a Saylem ahn di prees a di moas hai Gaad. Da hihn mi gaan owt gaahn meet Aybraham ahn bles ahn wen ih mi-di kohn bak hoahn afta ih mi don win di waar gens di king dehn. ² Aybraham gi Melkizidek wan-tent a aala weh ih mi tek fahn di enimi dehn wen ih mi win di waar. Di naym Melkizidek meen “Di Raichos King.” Ahn laik how hihn da-mi di king a Saylem ahn Saylem meen “pees,” hihn da-mi di “King a Pees” tu. ³ Di Skripcha noh seh notn bowt Melkizidek ma ner ih pa, ner ih ansesta dehn, ner di biginin a ih laif ner di en. Hihn da laik di Son a Gaad; ih wahn bee wahn prees fareva. ⁴ Tink bowt how grayt Melkizidek mi grayt! Eevn Aybraham, weh da-mi di grayt ansesta a di peepl a Izrel, mi gi hihn wan-tent a aala weh hihn mi tek weh fahn di enimi dehn. ⁵ Now, di Laa weh Gaad gi Moaziz seh dat di peepl a Izrel fi gi wan-tent a aala weh dehn oan tu dehn wan weh da prees, weh kohn fahn Leevai famili lain, eevn doa aala dehn da Aybraham disendant dehn. ⁶ Bot dis man Melkizidek da neva eevn Leevai ansesta, ahn stilyet Aybraham, weh mi geh aala di pramis dehn fahn Gaad, mi gi ahn wan-tent a weh ih mi ga, ahn Melkizidek mi bles ahn. ⁷ Wi noh ga no dowt dat di wan weh gi di blesin, grayta dan di wan weh get it. ⁸ Now di prees dehn weh kohn fahn owta Leevai famili lain ahn weh kalek wan-tent a evriting, dehn da man weh wahn haftu ded. Bot Melkizidek grayta dan dehn, kaa di Skripcha teech wi seh dat hihn alaiv. ⁹ Wi kud eevn seh dat Leevai disendant dehn mi pay fi dehn wan-tent tu Melkizidek chroo fi dehn ansesta Aybraham. ¹⁰ Kaa eevn doa Leevai neva baan yet, hihn mi deh eena Aybraham kaa hihn da fahn Aybraham famili lain. ¹¹ Now, Moaziz Laa seh dat di prees dehn mi haftu kohn chroo Leevai famili lain, bot di werk weh dehn prees deh mi-di du, kudn bring bowt weh Gaad mi ga plan fi man. Soh dehn mi haftu ga wahn nada prees laik Melkizidek insteda wan weh kohn chroo Ayron famili lain. ¹² Wen Gaad chaynj di kaina prees dehn, di Laa mi haftu chaynj tu. ¹³ Di persn weh wi di taak bowt da wi Laad Jeezas Krais. Hihn kohn fahn wahn chraib weh nobadi fahn deh mi eva serv az prees. ¹⁴ Evribadi noa seh dat wi Laad da fahn di chraib a Jooda, ahn Moaziz neva seh notn bowt no prees di kohn fahn da chraib deh. ¹⁵ Now unu ku andastan eevn beta weh Ah di taak bowt. Kaa Gaad sen wahn nada prees weh stan laik Melkizidek. ¹⁶ Hihn neva kohn fi bee wahn prees sayka weh hihn mi kohn fahn Leevai famili lain laik weh di Laa seh, bot da mi chroo di powa a wahn laif weh noh ga no en. ¹⁷ Kaa dis da weh di Skripcha seh bowt hihn: “Yoo da wahn prees fareva ahn eva, jos laik Melkizidek.”

SEPTEMBA 9-15

CHREZHAZ FAHN DI WERD A GAAD | HEEBROOZ 9-10

“Wahn Picha a Gud Tingz Weh Wahn Kohn”

(Heebrooz 9:12-14) Wen Krais gaahn wans ahn far aal eena Di Moas Hoali Plays, ahn shed fi hihn oan blod fi free wi fahn wi sin fareva, da neva wid no blod fahn goat er kyaaf. ¹³ Now anda di oal way, if blod fahn goat ahn bul ahn di ashiz fahn wahn yong kow kuda mi mek peepl geh kleen, ¹⁴ den da humoch moa di blod a Krais wahn ku kleen fi wee kanshans fahn dehn ting weh wi du weh ku leed tu det, soh dat wi wahn ku wership di livin Gaad. Kaa chroo di powa a di Spirit weh wahn liv fareva, Krais aafa op fi hihnself az wahn perfek sakrifais fi fi wee sin dehn.

it-1-E 862 ¶1

Fagivnis

Akaadn tu di Laa weh Gaad mi gi di nayshan a Izrel, if wahn persn mi sin gens Gaad er enibadi els, ih wahn haftu fala sertn inschrokshanz if mi waahn geh fagivnis. Da persn mi need fi karek di rang weh ih mi du, ahn yoozhwali, ih wuda haftu prizent wahn blod aafrin tu Jehoava tu. (Le 5:5–6:7) Dats wai Paal mi seh dis: “Akchwali, akaadn tu di Laa weh Gaad gi Moaziz, nayli evriting mi haftu geh kleen wid blod weh geh shed, kaa if no blod noh geh shed, den Gaad noh wahn fagiv nobadi sin.” (Heeb 9:22) Akchwali, di blod a di animal sakrifais dehn kudn tek weh di peepl sin dehn ahn mek dehn kanshans geh kleen. (Heeb 10:1-4; 9:9, 13, 14) Pahn di ada han, bays pahn Jeezas Krais ransom sakrifais, di nyoo agreement mek it pasabl fi geh chroo-chroo fagivnis. (Jer 31:33, 34; Mach 26:28; 1Kor 11:25; Ifee 1:7) Eevn wail Jeezas mi deh pahn di ert, hihn mi heel wahn man weh mi kyaahn waak, ahn dis mi shoa dat hihn mi ga atariti fi fagiv wi a wi sin dehn.—Mach 9:2-7.

(Heebrooz 9:24-26) Kaa Krais neva gaan eena wahn hoali plays weh hyooman mek, weh da wahn kapi a di reel wan. No, ih gaan eena hevn ihself, fronta Gaad fi taak op fi wee. ²⁵ Ahn Jeezas neva gaan eena hevn fi aafa op ihself oava ahn oava agen needa, laik dehn hai prees dehn dong ya pahn ert weh doz goh eena Di Moas Hoali Plays evri yaa fi aafa op blod weh da neva fi dehn oan. ²⁶ Kaa den Krais mi wahn haftu sofa lata taim, fahn di taim wen Gaad mek di werl. Insteda dat, now wen di werl soon taim fi kohn tu wahn en, Krais kohn jos wan taim ahn nohmoh fi sakrifais ihself fi du weh wid sin fareva.

cf-E 183 ¶4

“Noh Stap Fala Mi”

⁴ Di Skripchaz noh taak bowt aal weh mosi mi hapm joorin da hapi taim wen Jeezas mi gaan bak da hevn fi deh wid ih Pa. Bot di Baibl menshan lang heda taim weh mi wahn hapm rait afta Jeezas mi gaan bak da hevn. Yu si, fi moa dan 1,500 yaaz, di Jooish peepl mi geh fi si wahn hoali serimoni hapm eech yaa. Pahn Atoanment Day eech yaa, di hai prees wuda goh eena di Moas Hoali sekshan a di templ fi sprinkl di blod fahn wahn sakrifais fronta di aak a di kovenant fi mek atoanment fi peepl sin dehn. Pahn da spesifik day, da laik di hai prees mi reprizent di Mesaiya. Jeezas mi mek di prafesi kohn chroo wen ih aafa op wahn perfek sakrifais wans ahn far aal taim. Hihn gaan fronta Jehoava chroan da hevn—di moas hoali plays eena di yoonivers—ahn ih prizent di valyu a ih ransom sakrifais. (Heebrooz 9:11, 12, 24) Yu tink Jehoava mi aksep it?

(Heebrooz 10:1-4) Laik how di Laa weh Gaad gi Moaziz da-mi oanli wahn picha a di ting dehn weh mi fi kohn, ahn noh di reel ting dehn, di sakrifais weh dehn doz aafa yaa afta yaa, kuda mi neva mek dehn peepl weh doz kohn fi wership Gaad bee weh dehn sopoas tu bee. ² Now if dehn animal sakrifais kuda mi mek dehn peepl kleen fahn dehn sin wans ahn far aal, den dehn neva mi wahn feel gilti bowt dehn sin agen, ahn dehn neva mi wahn haftu aafa dehn sakrifais deh nohmoh. ³ Bot insted, di oanli ting weh dehn sakrifais doz du, da rimain peepl a dehn sin evri yaa, ⁴ kaa ih impasabl fi mek di blod a bul ahn goat tek weh sin.

it-2-E 602-603

Perfekshan

Weh Mek di Laa Weh Jehoava Mi Gi Moaziz Perfek? Di Laa weh Jehoava mi gi tu Izrel chroo Moaziz mi inklood inschrokshanz bowt di araynjment fi di prees dehn ahn fi di animal sakrifais dehn. Paal mi menshan dat eevn doa di Laa mi perfek bikaaz ih kohn fahn Gaad, di Laa, di prees dehn, ahn di sakrifais dehn kudn bring perfekshan tu di peepl weh mi deh anda di Laa. (Heeb 7:11, 19; 10:1) Raada dan bring freedom fahn sin ahn det, di Laa mi akchwali mek di peepl si how sinful dehn sinful. (Roam 3:20; 7:7-13) Aala dehnya provizhan mi serv dehn perpos; di Laa da-mi laik wahn “schrik teecha” weh mi leed peepl tu Krais, an ih da-mi wahn perfek ‘picha a ting dehn weh wahn kohn.ʼ (Gal 3:19-25; Heeb 10:1) Soh, wen Paal seh “Gaad du weh di Laa kudn du, kaa wee wid wi sinful haat kudn help wiself fi du weh di Laa seh” (Roam 8:3), hihn mi-di rifaa tu di fak dat di Jooish hai prees (hoo mi geh apointid bai di Laa fi bee in chaaj a di sakrifais dehn, ahn hoo mi geh fi goh intu di Moas Hoali plays pan Atoanment Day wid di blod a di animal sakrifais) neva aybl fi “sayv evribadi,” az Heebrooz 7:11, 18-28 eksplayn. Eevn doa di sakrifais dehn weh di prees mi aafa op mi mek it pasabl fi di peepl geh wahn gud standin fronta Jehoava, dehn mi stil noa dat dehn neva perfek. Di apasl mi rifaa tu dis wen ih seh dat di atoanment sakrifais dehn kuda “neva mek dehn peepl weh doz kohn fi wership Gaad bee weh dehn sopoas tu bee.” In ada werdz, dehn kanshans kuda neva bee kompleetli kleen. (Heeb 10:1-4; kompyaa Heeb 9:9.) Di hai prees neva aybl fi provaid di ransom prais weh dehn mi need fi geh chroo chroo freedom fahn dehn sin. Da onli chroo Jeezas Krais perfek sakrifais ahn fi hihn roal az prees wi ku geh chroo chroo freedom.—Heeb 9:14; 10:12-22.

Saach fi Spirichwal Chrezhaz

(Heebrooz 9:16, 17) Now wen sohnbadi ded ahn lef wahn wil, nobadi noh wahn geh notn til wen dehn ku proov seh di persn weh mek di wil ded fi chroo. ¹⁷ Wahn wil noh wot notn tu nobadi wail di persn weh mek stil alaiv; wen di persn don ded, den di wil ga powa.

w92-E 3/1 31 ¶4-6

Kweschanz Weh Peepl Aks

Paal mi seh dat fi mek wahn agreement ga valyu er ga powa bitween Gaad ahn hyoomanz, sombadi wuda haftu ded. Di Laa agreement da wahn egzampl a dis. Moaziz da-mi di midl man; di wan weh bring di agreement bitween Gaad ahn di nayshan a Izrel tugeda. Soh Moaziz mi ga wahn impoatant roal, ahn hihn da-mi di persn weh mi deel wid di Izrelait dehn wen dehn mi enta intu di agreement wid Jehoava. Jehoava da di wan weh mi kom op wid di Laa agreement, an ih mi yooz Moaziz az di persn hoo mi prizent dis kovenant tu di Izrelait dehn. Bot yu tink Moaziz mi need fi shed fi hihn oan blod fi mek di Laa agreement ga powa? No. Ih neva haftu, insteda dat, hihn mi aafa op animal sakrifais, ahn Jehoava mi aksep di animal blod insteda Moaziz wan.—Heebrooz 9:18-22.

Wat bowt di nyoo agreement weh Jehoava mek bitween ihself ahn spirichwal Izrel? Da Jeezas ga di grayt roal az di wan weh stan bitween Gaad ahn spirichwal Izrel; di midl-man. Eevn doa Jehoava da di wan weh mi mek dis agreement, Jeezas da di wan weh mi rispansabl fi kehr it owt. Jeezas da neva onli di midl-man, bot hihn aalso mi deel dairekli wid di fers amonk a Kristyanz weh mi fi enta intu dis agreement wen hihn mi deh pahn ert. (Look 22:20, 28, 29) Jeezas mi moa dan kwalifai fi provaid di sakrifais weh dehn mi need fi mek dis agreement ku werk. Dis sakrifais da neva blod fahn eni animal bot wahn sakrifais a wahn perfek hyooman laif. Soh Paal kuda mi rifaa tu Krais az di Wan weh mek di nyoo agreement kohn chroo. Afta “Krais . . . gaan eena hevn ihself, fronta Gaad fi taak op fi wee,” di nyoo agreement mi tek ifek.—Heebrooz 9:12-14, 24.

Now Paal noh mi-di seh dat di kovenant dehn mi kohn fahn Moaziz ahn Jeezas; dehndeh kovenant akchwali mi kohn fahn Gaad. Bot, Jeezas ahn Moaziz mi ga wahn impoatant roal fi play az di wan dehn hoo mi bring di peepl intu di difrent kovenant dehn wid Gaad. Eena eech kays, wahn blod sakrifais mi haftu aafa op fers. Eena Moaziz kays, hihn mi aafa op sohn animal sakrifais, an eena Jeezas kays, hihn mi aafa op ih oan laif az wahn sakrifais fi di peepl weh mi fi bee paat a di nyoo agreement.

(Heebrooz 10:5-7) Dat da wai, wen Krais kom eena di werl, ih tel ih Faada Gaad seh, “‘Yu neva waahn no sakrifais, er no gif, bot yu mi mek Ah ga wahn badi. ⁶ Yu neva pleez wid animal sakrifais er wen dehn aafa op eniting els fi dehn sin. ⁷ Soh den Ah seh, ‘Si, Gaad, Ai kohn fi du weh yoo waahn, jos laik weh rait dong bowt mi eena di Skripcha.ʼ”

it-1-E 249-250

Baptizm

Look mi seh dat Jeezas mi-di pray wen ih mi geh baptaiz. (Lk 3:21) Aalso, Paal, eena ih leta tu di Heebrooz, mi seh dat wen Jeezas mi kom “eena di werl” (dis neva di rifaa tu wen Jeezas mi baan ahn kudn reed ner eevn seh dehnya werdz, bot raada wen hihn mi prezent ihself fi geh baptaiz ahn staat ih minischri) ih mi-di seh di werdz weh rait dong eena Psalm 40:6-8 (LXX): “Yu neva waahn no sakrifais, er no gif, bot yu mi mek Ah ga wahn badi . . . Si, Gaad, Ai kohn fi du weh yoo waahn, jos laik weh rait dong bowt mi eena di Skripcha.” (Heeb 10:5-9) Jeezas mi baan intu di Jooish nayshan weh mi don deh eena wahn agreement wid Gaad, di Laa kovenant. (Ex 19:5-8; Gal 4:4) Ahn bikaaz a dis fak, Jeezas mi don deh eena wahn kovenant wid Jehoava wen hihn mi prizent ihself fi geh baptaiz bai Jan. Rait dehsoh, Jeezas mi-di du moch moa dan weh mi nesiseri fi hihn du akaadn tu di Laa. Hihn mi prizent ihself tu ih Pa, Jehoava, fi du weh ih Pa mi “waahn” ih du, fi aafa op ih oan badi weh Gaad mi “mek.” Dis mi geh rid a di araynjment fi sakrifais animalz; sohnting weh dehn mi haftu du akaadn tu di Laa. Paal mi seh: “Weh Gaad waahn da fi mek wee bee hoali chroo weh Krais aafa op fi hihn badi az wahn sakrifais fi sin, wans an far aal.” (Heeb 10:10) Jehoava perpos fi Jeezas aalso mi involv sohn aktiviti weh ga fi du wid di Kingdom. Jeezas aalso mi prizent ihself tu Gaad fi du dis werk. (Lk 4:43; 17:20, 21) Jehoava mi aksep ahn rekonaiz dat Jeezas mi-di prizent ihself fi du aala dis. Soh Jehoava mi anoint Jeezas wid hoali spirit ahn tel ahn: “Yoo da mi Son weh Ah oanli lov. Ah oanli pleez wid yu.”—Maak 1:9-11; Lk 3:21-23; Mach 3:13-17.

Baibl Reedin

(Heebrooz 9:1-14) Now, eevn di fos agreement bitween Gaad ahn Izrel mi ga roolz bowt how dehn mi fi wership, ahn bowt wahn tent weh dehn mek dong ya pahn ert wichpaa dehn mi fi wership. ² Dis tent mi ga too room. Dehn mi kaal di fos room “Di Hoali Plays.” Wahn lampstan, wahn taybl, ahn di hoali bred dehn weh di prees dehn doz aafa tu Gaad mi deh een deh. ³ Di neks room mi deh bihain wahn kertn, ahn dehn mi kaal bak dehsoh “Di Moas Hoali Plays.” ⁴ Di goal alta weh dehn bon insens pan mi deh een deh. Di Agreement Baks mi dehdeh tu. Dat mi kova oava eensaid ahn owtsaid wid goal. Chree ting mi deh eena di goal baks. Yu mi ga wahn goal jaar weh mi ful op wid mana. Den Ayron waakin stik weh mi-di groa leef mi deh een deh tu; ahn di terd ting da-mi di too slab a stoan dehn weh di Ten Komanment dehn weh Gaad mi gi Moaziz mi rait pan. ⁵ Pahn tap a di goal baks dehn mi ga di figa a sohn beengz wid wing weh dehn kaal cherobim. Dehn mi dehdeh fi shoa dat di gloari a Gaad mi deh wid dehn. Dehn wing mi schrech owt oava di kova a di goal baks. Dis da di mersi seet. Bot dis da noh di taim fi eksplayn owt dehn ting tu unu. ⁶ Afta dehn don geh di plays redi laik dat, wid aala dehn ting eena plays, di prees dehn kuda mi goh eena di fos room evri day wehpaa dehn du dehn werk fi Gaad. ⁷ Bot da mi oanli di hai prees wuda goh eena di sekant room weh da-mi di hoaliyis paat a di tent. Ahn hihn oanli doz goh een deh wan taim fi di yaa, ahn ih kudn goh een deh widowt kehr een blod fahn di animal dehn weh dehn aafa op tu Gaad az sakrifais fi fi hihn sin dehn, ahn fi di sin dehn weh di peepl dehn neva meen fi du. ⁸ Di Hoali Spirit shoa wi dat Di Moas Hoali Plays neva mi wahn oapm op tu di peepl dehn az lang az dehn stil mi-di yooz di fos room wid aala di roolz ahn regulayshanz fi wership. ⁹ Dis ga wahn meenin fi wee tudeh. Ih shoa wi seh dat di animal sakrifais dehn ahn di gif dehn weh di prees dehn doz aafa op tu Gaad kyaahn mek di peepl dehn kanshans kleen. ¹⁰ Kaa aala dehn roolz bowt weh yu ku eet, ahn weh yu ku jrink, ahn difrent kaina serimoni fi wash yuself kyaahn du notn fi peepl. Dehn oanli wahn laas til wen Gaad chaynj dehn fi sohnting beta. ¹¹ Bot wen Krais kohn fi bee di hai prees, ih bring aala dehn gud ting dehn weh wi ga now. Di tent weh hihn serv eena op da hevn, grayta ahn moa perfek. Da plays da noh wahn tent weh no hyooman mek, ahn ih da noh paat a dis werl weh Gaad mek. ¹² Wen Krais gaahn wans ahn far aal eena Di Moas Hoali Plays, ahn shed fi hihn oan blod fi free wi fahn wi sin fareva, da neva wid no blod fahn goat er kyaaf. ¹³ Now anda di oal way, if blod fahn goat ahn bul ahn di ashiz fahn wahn yong kow kuda mi mek peepl geh kleen, ¹⁴ den da humoch moa di blod a Krais wahn ku kleen fi wee kanshans fahn dehn ting weh wi du weh ku leed tu det, soh dat wi wahn ku wership di livin Gaad. Kaa chroo di powa a di Spirit weh wahn liv fareva, Krais aafa op fi hihnself az wahn perfek sakrifais fi fi wee sin dehn.

SEPTEMBA 16-22

CHREZHAZ FAHN DI WERD A GAAD | HEEBROOZ 11

“Wai Ih Impoatant fi Ga Fayt?”

(Heebrooz 11:1) Now, di fayt weh wi ga eena Gaad da weh mek wi shoar seh dat wi ga weh wi di hoap fa; ih mek wi shoar a di ting dehn weh wi kyaahn si.

w16.10-E 27 ¶6

Shoa Yu Fayt Eena Jehoava Pramis Dehn

⁶ Eena di Baibl da Heebrooz 11:1, ih eksplayn weh ih meen fi ga fayt. (Reed Heebrooz 11:1.) Fayt foakos pahn too tingz weh wi kyaahn si: (1) “Weh wi di hoap fa”—dis inklood di fyoocha blesinz weh wi di wayt fa fi kohn chroo. Fi egzampl, Gaad pramis dat hihn wahn geh rid a aal wikidnis ahn dat wi wahn liv eena wahn paradais, bot dehndeh ting noh hapm yet. (2) “Di ting dehn weh wi kyaahn si.” Di ekspreshan “di ting dehn weh wi kyaahn si” eena di orijinal Greek langwij rifaa tu proof dat sohnting weh wi kyaahn si egzis fi reel. Fi egzampl, wi noa fi shoar dat Jehoava Gaad, Jeezas, ahn di aynjelz egzis. Wi shoar dat Gaad Kingdom di du tingz rait now eevn doa wi kyaahn seeʼt. (Heeb. 11:3) How wi ku shoa dat fi wee hoap noh shayki ahn dat wi chros Gaad Werd wen ih menshan tingz weh wi kyaahn si? Bai weh wi seh ahn du, bikaaz fayt widowt akshan ded.

(Heebrooz 11:6) Ahn nobadi kyaahn pleez Gaad if dehn noh ga fayt eena ahn, kaa enibadi weh waahn kohn tu Gaad haftu bileev dat hihn deh, ahn dat Gaad wahn gi gud tingz tu dehn wan weh saach far ahn wid aala dehn haat.

w13-E 11/1 11 ¶2-5

“Gaad Wahn Gi Gud Tingz tu Dehn Wan Weh Saach far Ahn”

Weh wi need fi du fi pleez Jehoava? Paal mi rait dat “nobadi kyaahn pleez Gaad if dehn noh ga fayt eena ahn.” Noatis, Paal neva seh dat ih haad fi pleez Gaad if wi noh ga fayt eena ahn. Bot Paal mi-di seh dat if wi noh ga fayt eena Gaad wi wahn kyaahn pleez ahn. Soh ih impoatant dat wi ga fayt if wi waahn pleez Gaad.

Weh kaina fayt Jehoava ekspek wi fi shoa? Fayt eena Gaad involv too tingz. Fos, wi “haftu bileev dat hihn deh.” Sohn ada Baibl chranslayshan seh wi “bileev dat hihn reel” er wi “bileev dat hihn egzis.” Yu tink ih pasabl fi pleez Gaad if wi noh shoar ih reel? Stilyet, chroo chroo fayt eena Gaad involv moa dan dat, bikaa eevn di deemon dehn bileev dat Gaad egzis. (Jaymz 2:19) Soh fi ga schrang fayt eena Jehoava, ih no onli meen dat wi bileev eena di chroo Gaad, Jehoava, bot dat wi tek akshan bays pahn weh wi laan, ahn dis wahn mek Jehoava hapi.—Jaymz 2:20, 26.

Sekant, wi haftu bileev “dat Gaad wahn gi gud tingz tu dehn wan weh saach far ahn wid aala dehn haat.” Wahn persn weh ga chroo chroo fayt shoar dat wen ih di giv evriting weh ih ga fi pleez Gaad, da noh fi notn ahn da noh wahn ways a taim. (1 Korintyanz 15:58) How wi ku pleez Jehoava if wi noh shoar dat ih ku help wi er dat ih eevn waahn du it? (Jaymz 1:17; 1 Peeta 5:7) Sohnbadi weh tink dat Gaad noh kyaa bowt dehn ner apreeshiayt weh dehn du, er hoo bileev dat Jehoava noh giv wi gud tingz, noh noa di Gaad weh di Baibl taak bowt.

Soh tu hoo Jehoava giv gud tingz? Paal seh dat da tu “dehn wan weh saach far ahn wid aala dehn haat.” Wan refrens fi sohn Baibl chranslaytaz seh dat di Greek werd fi “saach far ahn wid aala dehn haat” noh meen “fi goh owt di luk fi sohnting” bot raada, ih gi di aidyaa dat sohnbadi di kohn tu Gaad “fi wership ahn.” Wahn nada refrens werk seh dat dis Greek verb ku meen fi giv aal yu gat er du sohnting weh tek lata efoat. Jehoava giv gud tingz tu dehn wan weh ga chroo chroo fayt bikaaz dehn lov ahn, an dehn eega fi wership ahn.—Machyu 22:37.

(Heebrooz 11:33-38) Dehn du ting laik oavachroa lata kingdom ahn du weh rait, ahn soh dehn mi geh weh Gaad mi pramis dehn. Dehn mi shet laiyan mowt, ³⁴ dehn owt sohn wail faiya, ahn get weh fahn peepl weh mi waahn kil dehn wid soad. Aldoa dehn mi week, dehn geh schrent soh dehn kuda mi fait aaf hoal aami fahn aal kaina difrent konchri. ³⁵ Sohn laydi geh dehn lov wan rayz bak fahn di ded. Wahn lata dehnya peepl mi geh taacha kaa dehn mi raada ded dan fi geh dehn freedom, kaa dehn mi ga dehn hoap set pahn wahn beta laif wen dehn geh rayz op bak fahn di ded. ³⁶ Sohn nada wan, dehn mi tek mek papishoh, ahn dehn beet sohn wid wip, ahn chayn op sohn ahn put dehn eena jayl. ³⁷ Stil sohn neks wan geh stoan tu det, ahn geh saa eena too, ahn geh kil wid soad. Som a dehn doz goh bowt jres eena sheep skin er goat skin. Dehn mi hongri ahn poa; dehn enimi doz persikyoot dehn ahn chreet dehn bad. ³⁸ Dehn mi tu gud fi dis werl. Dehn doz wanda aal oava di mongtin ahn dezert dehn, di haid eena kayv ahn hoal eena di grong.

w16.10-E 23 ¶10-11

Schrentn Yu Fayt Eena Yu Hoap

¹⁰ Eena Heebrooz chapta 11, di apasl Paal lis aaf som a Gaad servants weh mi haftu bayr op anda chraiyalz, bot ih neva menshan di naym a som a dehn. Fi egzampl, hihn mi menshan sohn laydi hoo son dehn mi ded ahn laytaraan mi rezorek bak tu laif. Adaz, “mi geh taacha kaa dehn mi raada ded dan fi geh dehn freedom, kaa dehn mi ga dehn hoap set pahn wahn beta laif wen dehn geh rayz op bak fahn di ded.” (Heeb. 11:35) Wi noh noa fi shoar hoo Paal mi-di tink bowt. Ih pasabl, ih kuda mi-di rifaa tu Naybot ahn Zekaraiya, sins dehn mi geh stoan tu det. (1 Ki. 21:3, 15; 2 Chron. 24:20, 21) Danyel an ih fren dehn mi raada ded dahn stap bee laayal tu Jehoava. Dehn mi ga schrang fayt eena Gaad powa ahn dis mi help dehn, eena wahn sens, fi ‘shet di laiyan dehn mowtʼ an ‘owt di faiya.ʼ—Heeb. 11:33, 34; Dan. 3:16-18, 20, 28; 6:13, 16, 21-23.

¹¹ Bikaaz a Mikaiya ahn Jerimaiya schrang fayt, peepl “mi tek dehn mek papishoh, . . . ahn put dehn eena jayl.” Adaz, laik Ilaija, “doz wanda aal oava di mongtin ahn dezert dehn, di haid eena kayv ahn hoal eena di grong.” Aala dehn mi bayr op bikaaz dehn mi ‘shoar seh dat dehn mi ga weh dehn mi hoap fa.ʼ—Heeb. 11:1, 36-38; 1 Ki. 18:13; 22:24-27; Jer. 20:1, 2; 28:10, 11; 32:2.

Saach fi Spirichwal Chrezhaz

(Heebrooz 11:4) Da mi bikaaz a Aybl fayt eena Gaad mek hihn mi aafa op wahn beta sakrifais tu Gaad dahn weh ih breda Kayn mi aafa op. Gaad mi aksep Aybl sakrifais fi shoa dat Aybl da-mi wahn raichos man. Ahn aldoa Aybl ded lang taim, ih stil di taak tu wi bowt weh ih meen fi ga fayt eena Gaad.

it-1-E 804 ¶5

Fayt

Sohn Paas Egzampl a Peepl Weh Mi Ga Fayt. Evribadi fahn di “big krowd a peepl weh da witnis” (Heeb 12:1) mi ga wahn salid er gud reezn fi ga fayt eena Jehoava. Tek Aybl, fi egzampl. Hihn mi noa bowt Gaad pramis bowt wahn “seed” [ er, “pikni”] weh mi wahn brooz di “snayk” pahn ih hed. Hihn mi si di proof dat weh Jehoava mi seh mi wahn hapm tu ih payrents if dehn neva lisn mi did kohn chroo. Wen Adam an ih famili mi deh owta di gyaadn a Eedn, dehn mi haftu werk haad fi geh food fi eet. Gaad kers di grong soh dat food mi haad fi groa. Aybl praabli mi si dat Adam mi chreet ih waif bad ahn dat Eev praabli mi stil ga wahn schrang dizaiya fi ih hozban. Ih pasabl dat Eev mi taak bowt aal di payn weh shee mi feel wen ih mi pregnant ahn wen ih mi giv bert. Pahn tap a dat, Aybl mi si di cherob dehn ahn di soad weh mi deh pahn faiya weh mi-di spin fi stap enibadi fahn goh eena di gyaadn a Eedn. (Ge 3:14-19, 24) Aala dis da-mi laik evidens weh kanvins Aybl dat Gaad mi wahn sayv peepl eena di fyoocha chroo di “seed” weh hihn mi pramis mi wahn kohn. Soh, bikaaz a ih fayt eena Gaad, hihn mi ‘aafa op wahn sakrifais tu Gaad,ʼ wahn sakrifais weh mi beta dan di wan weh ih breda Kayn mi aafa op.—Heeb 11:1, 4.

(Heebrooz 11:5) Da mi bikaaz a Eenak fayt mek Gaad kehr ahn op da hevn widowt ded. “Sodn-wan, nobadi kudn fain ahn kaa Gaad kehr ahn.” Di Skripcha seh dat bifoa Gaad mi kehr Eenak, ih doz pleez Gaad.

wp17.1-E 12-13

“Hihn Mi Du Ih Bes fi Pleez Gaad”

Eena weh way Gaad mi kehr Eenak sohn way els ‘widowt ih dedʼ [er, “si det,” NW]? Ih pasabl dat eena wahn lovin way Jehoava mi mek Eenak ded widowt sofa. Dis way, ih neva ekspeeryens wahn vailent det. Eenak mi geh proof dat di way ih mi-di liv mi pleez Gaad. How? Jos bifoa ih mi ded, ih pasabl dat Gaad mi mek Eenak si wahn vizhan weh ih si di ert az wahn paradais. Afta Jehoava shoa Eenak dat hihn mi pleez wid ahn, ih mek ih faal asleep eena det. Paal mi seh dat Eenak ahn sohn ada man ahn uman weh ih mi rait bowt mi faytful til det. (Heebrooz 11:13) Afta dat, ih pasabl dat ih enimi dehn mi-di luk far ahn, bot nobadi kudn fain ahn. Maybi Jehoava mi put ih badi da wahn spat weh dehn kudn fain it soh dat dehn kudn disrispek ih badi er eevn chrai yooz it fi promoat faals wership.

Baibl Reedin

(Heebrooz 11:1-16) Now, di fayt weh wi ga eena Gaad da weh mek wi shoar seh dat wi ga weh wi di hoap fa; ih mek wi shoar a di ting dehn weh wi kyaahn si. ² Da sayka wi ansesta dehn fayt eena Gaad mek dehn kuda mi pleez ahn. ³ Da bikaaz a wi fayt eena Gaad mek wi andastan dat Gaad jos seh it, ahn di hoal yoonivers kohn fi bee. Ahn wi noa dat di ting dehn weh wi ku si mi mek owta ting weh wi kyaahn si. ⁴ Da mi bikaaz a Aybl fayt eena Gaad mek hihn mi aafa op wahn beta sakrifais tu Gaad dahn weh ih breda Kayn mi aafa op. Gaad mi aksep Aybl sakrifais fi shoa dat Aybl da-mi wahn raichos man. Ahn aldoa Aybl ded lang taim, ih stil di taak tu wi bowt weh ih meen fi ga fayt eena Gaad. ⁵ Da mi bikaaz a Eenak fayt mek Gaad kehr ahn op da hevn widowt ded. “Sodn-wan, nobadi kudn fain ahn kaa Gaad kehr ahn.” Di Skripcha seh dat bifoa Gaad mi kehr Eenak, ih doz pleez Gaad. ⁶ Ahn nobadi kyaahn pleez Gaad if dehn noh ga fayt eena ahn, kaa enibadi weh waahn kohn tu Gaad haftu bileev dat hihn deh, ahn dat Gaad wahn gi gud tingz tu dehn wan weh saach far ahn wid aala dehn haat. ⁷ Ahn da mi bikaaz a Noawa fayt eena Gaad mek Gaad waan ahn bowt sohnting weh hihn neva si hapm yet. Ih bil wahn aak weh hihn ahn ih famili geh sayv eena. Noawa fayt eena Gaad mi shoa dat di ada peepl dehn eena di werl mi wikid, ahn dat hihn mi raichos eena Gaad sait. ⁸ Da mi bikaaz a Aybraham fayt eena Gaad mek ih obay Gaad wen Gaad kaal ahn, ahn tel ahn fi goh da wahn lan weh Gaad mi seh mi wahn bee fi hihn. Ih lef fi hihn oan konchri ahn set owt widowt eevn noa wichpaa ih mi gwehn. ⁹ Da mi bikaaz a Aybraham fayt eena Gaad mek ih reech di lan weh Gaad mi pramis ahn, ahn liv deh eena tent laik wahn aylyan. Ih son Aizak ahn Aizak son Jaykop mi liv di sayhn way tu, kaa Gaad mi gi dehn di sayhn pramis. ¹⁰ Aybraham mi-di liv soh kaa hihn mi-di luk faawod fi liv eena wahn siti weh mi bil pahn wahn fongdayshan weh wahn laas fareva, weh Gaad ihself mi plan owt ahn bil. ¹¹ Da mi bikaaz a Aybraham fayt eena Gaad mek hihn ahn Sayra kuda mi ga wahn baybi aldoa dehn mi don oal aredi; ahn pahn tap a dat, fahn di biginin, Sayra kudn geh pregnant. Bot Aybraham mi stil bileev dat Gaad mi wahn kip ih pramis. ¹² Soh, wahn hoal nayshan mi wahn kohn chroo dis wan man, Aybraham, weh mi don tu oal fi ga pikni. Dis nayshan mi wahn ga soh moch peepl dat sayhn laik how yu kyaahn konk di staar dehn eena di skai, ahn di grayn a san dehn pahn di seeshoa, yu wahn kyaahn konk dehn needa. ¹³ Evri wan a dehn peepl weh wi mi-di taak bowt mi don ded. Dehn mi ga fayt, eevn doa dehn mi ded widowt geh weh Gaad mi pramis dehn. Bot dehn mi hapi jos fi si evriting weh Gaad mi pramis dehn fahn faar, ahn dehn mi noa seh dat dehn da-mi jos laik aylyan ahn schraynja di liv ya pahn dis ert. ¹⁴ Peepl weh taak laik dat mek it playn seh dehn di luk fi wahn konchri weh dehn ku bilangz tu. ¹⁵ If dehn mi-di taak bowt di konchri weh dehn mi-di kohn fram, dehn wuda mi fain wahn way fi goh bak deh. ¹⁶ Bot dehn mi-di luk fi wahn beta hoam da hevn. Dat da wai Gaad neva shaym a dehn wen dehn kaal hihn fi dehn Gaad, kaa hihn don geh wahn siti redi fi dehn da hevn.

SEPTEMBA 23-29

CHREZHAZ FAHN DI WERD A GAAD | HEEBROOZ 12-13

“Disiplin Proov Dat Gaad Lov Wi”

(Heebrooz 12:5) Unu don faget weh Gaad mi seh tu unu aredi, wen ih mi taak tu unu laik ih oan pikni dehn fi inkorij unu? Ih mi seh, “Mi son, noh tek it lait wen di Laad ponish yu, ahn noh geh diskorij wen ih karek yu.

w12-E 3/15 29 ¶18

Wi Noh fi Luk Bak Pahn di Tingz Bihain Wi

¹⁸ Wen Wi Geh Kongsl Weh Hert Wi. Wat if wi staat tu tink eena wahn negitiv way bowt kongsl weh wi mi geh eena di paas? Ih noh onli hert wi wen wi di tink bowt it bot ih mek di sichuwayshan wos tu. Wi ku “geh diskorij.” (Heeb. 12:5) If wi rifyooz fi lisn tu kongsl ahn wi eeda “tek it lait” er wi “geh diskorij” bikaaz wi aksep it bot den giv op, di rizolt wahn bee di saym—wi noh di alow di kongsl fi reech wi deep dong eena wi haat fi help wi fi chaynj. Ih moch beta if wi lisn tu weh Salaman mi seh, “Aksep disiplin; noh let it goh. Hoal aan tu it kaaz ih meen yu laif.” (Prov. 4:13) Jos laik wahn jraiva weh fala di road sain dehn, mek wi aksep di kongsl, aplai it, ahn moov faawod ahn kantinyu di serv Jehoava.—Prov. 4:26, 27; reed Heebrooz 12:12, 13.

(Heebrooz 12:6, 7) Kaa di Laad karek dehn wan weh ih lov, ahn ih ponish dehn wan weh da fi hihn oan pikni dehn.” ⁷ Unu fi bee payshent wen unu di goh chroo ponishment. Dat da how Gaad chreet ih pikni dehn. Wich pa deh weh noh karek ih pikni dehn?

w12-E 7/1 21 ¶3

“Wen Unu Pray, Unu fi Seh, ‘Faadaʼ”

Wahn lovin Pa disiplin ih pikni dehn, bikaaz ih kyaa bowt di kaina persn dehn wahn ton owt fi bee wen dehn groa op. (Ifeezhanz 6:4) Sohntaim, wahn lovin Pa haftu bee schrik, bot ih noh wahn disiplin ih pikni dehn eena wahn kruwil way. Sayhn way, wi hevnli Faada si dat wi need disiplin. Bot wen Jehoava disiplin wi, da aalwayz owta lov fi wi. Ih wahn neva gi wi disiplin eena wahn kruwil way. Jeezas mi ak jos laik ih Pa wen hihn mi giv disiplin. Wen Jeezas disaipl dehn mi sloa fi tek di kongsl, hihn neva rof dehn op er chreet dehn eena wahn kruwil way.—Machyu 20:20-28; Look 22:24-30.

(Heebrooz 12:11) Non a wi noh injai ponishment wail wi di goh chroo it, kaa ih hat wi. Bot laytaraan, if di ponishment mek wi laan fi obay, den wi wahn laan fi du weh rait ahn liv eena pees.

w18.03 32 ¶18

“Lisn tu Disiplin ahn Geh Waiz”

¹⁸ Ih payn wi wen wi geh disiplin, bot di payn weh wi feel wen wi rijek disiplin eevn wos. (Heeb. 12:11) Mek wi luk pahn di egzampl a Kayn ahn King Zedikaiya. Wen Kayn haychrid mi groa tuwaadz Aybl, ih mi waahn kil ahn. Soh Jehoava mi waan Kayn. Ih tel ahn seh: “Wai yu soh beks ahn sad? If yu du gud, yu noh tink Ah wahn bles yu? Bot if yu noh du gud, sin deh da yu doa an ih kyaahn wayt fi kanchroal yu; yoo tink yu ku kanchroal it?” (Gen. 4:6, 7) Kayn neva lisn ahn dat mi mek ih komit wahn seeryos sin. Bikaaz Kayn rijek disiplin ih sofa! (Gen. 4:11, 12) Ih kuda mi sayv ihself fahn aala da chrobl, if ih mi onli aksep di waanin fahn Jehoava.

Saach fi Spirichwal Chrezhaz

(Heebrooz 12:1) Now, laik how wi ga dis big krowd a peepl weh da witnis rong wi weh don shoa wi how fi ga fayt eena Gaad, den mek wi geh rid a evriting weh ku kip wi bak, espeshali di sin weh noh waahn let wi goh. Mek wi ron di rays weh deh heda wi, ahn mek wi noh giv op.

w11-E 9/15 17-18 ¶11

Mek Wi Ron di Rays ahn Noh Giv Op

¹¹ “Dis big krowd a peepl weh da witnis” da noh laik peepl weh di wach wahn rays fahn faar, er di luk aan pahn dehn fayvrit playa er teem di play. Raada, eech wan a dehn mi deh eena di rays. Dehn mi ga sokses di ron di rays tu di en. Aldoa dehn aal ded now, wi ku kompyaa dehn tu wahn rona weh ga lata ekspeeryens weh ku inkorij wahn nyoo rona weh jos staat owt. Imajin how wahn rona wud feel if ih si sohn ekspeeryens rona di wach hihn di ron. Yu tink ih wuda waahn du ih bes er giv aala weh ih gat eena di rays? Dehnya witnis weh Paal taak bowt shoa wi dat noh mata how haad ih haad fi ron eena di spirichwal rays, wi ku win. Soh bikaaz a di gud egzampl a “dis big krowd a peepl weh da witnis,” di Heebroo Kristyanz weh mi liv joorin Paal taim kuda mi ga korij ahn ron di rays ahn noh giv op. Ahn wi ku du di saym tudeh.

(Heebrooz 13:9) Noh mek aal kaina difrent teechin di fool unu op. Ih beta fi geh schrent fahn di grays a Gaad dahn fahn aala dehn roolz bowt food, weh noh help non a dehn wan weh fala dehn.

w89-E 12/15 22 ¶10

Aafa Op Sakrifais Weh Pleez Jehoava

¹⁰ Paal mi tel di Heebroo Kristyanz dat dehn noh fi ‘mek aal kaina difrent teechinʼ fahn di Jooish rilijan “fool dehn op.” (Galayshanz 5:1-6) Dehn shudn fala dehndeh teechin. Bot “ih beta fi geh schrent fahn di grays a Gaad” soh dat dehn kuda mi stan op schrang eena di chroot. Ih luk laik som a dehn mi-di aagyu bowt food ahn bowt sakrifais, bikaaz Paal mi seh dat dehn kyaahn hoal aan tu di chroot jos di fala “aala dehn roolz bowt food, weh noh help non a dehn wan weh fala dehn.” Dehn onli kuda mi benifit dehnself if dehn mi wership Jehoava ahn shoa apreeshiayshan fi di ransom sakrifais. Ih neva mi wahn help dehn fi benifit ataal spirichwali if dehn mi kantinyu fi aagyu bowt food ahn bowt sertn selibrayshan dayz. (Roamanz 14:5-9) Wen Jeezas mi giv op fi hihn laif, di sakrifais dehn weh di Izrelait dehn doz aafa op anda Moaziz Laa neva ga valyu nohmoh.—Heebrooz 9:9-14; 10:5-10.

Baibl Reedin

(Heebrooz 12:1-17) Now, laik how wi ga dis big krowd a peepl weh da witnis rong wi weh don shoa wi how fi ga fayt eena Gaad, den mek wi geh rid a evriting weh ku kip wi bak, espeshali di sin weh noh waahn let wi goh. Mek wi ron di rays weh deh heda wi, ahn mek wi noh giv op. ² Mek wi kip wi aiy pahn Jeezas, kaa wi fayt di pen pahn hihn fahn staat tu til wi reech di en. Hihn gaahn chroo di shaym a mek dehn nayl ahn pahn di kraas [stayk], ahn ih neva tink notn a it, kaa ih noa dat pahn di en ih mi wahn mek ahn hapi fi du it. Ahn now, ih di sidong pahn di rait han said a Gaad chroan. ³ Soh, tink bowt aala di terabl ting dehn weh Jeezas mi haftu put op wid fahn aala dehn sinful peepl, den unu noh wahn geh diskorij ahn giv op. ⁴ Aftaraal, non a unu neva yet mi haftu gi unu laif eena di fait gens sin. ⁵ Unu don faget weh Gaad mi seh tu unu aredi, wen ih mi taak tu unu laik ih oan pikni dehn fi inkorij unu? Ih mi seh, “Mi son, noh tek it lait wen di Laad ponish yu, ahn noh geh diskorij wen ih karek yu. ⁶ Kaa di Laad karek dehn wan weh ih lov, ahn ih ponish dehn wan weh da fi hihn oan pikni dehn.” ⁷ Unu fi bee payshent wen unu di goh chroo ponishment. Dat da how Gaad chreet ih pikni dehn. Wich pa deh weh noh karek ih pikni dehn? ⁸ If Gaad noh karek unu laik how ih karek aala ih pikni dehn, den dat meen seh dat unu da noh reeli fi hihn pikni dehn ataal. ⁹ Ahn bisaidz, wee rispek fi wee hyooman faada dehn wen dehn ponish wi, rait? Wel den, da humoch moa wi shuda put wiself anda di ponishment a wi Faada eena hevn ahn liv fareva! ¹⁰ Wi hyooman faada dehn mi ponish wi di bes way dehn mi noa how fi wahn fyoo yaaz, bot Gaad karek wi fi wi oan gud, kaa ih waahn mek wi hoali laik hihn. ¹¹ Non a wi noh injai ponishment wail wi di goh chroo it, kaa ih hat wi. Bot laytaraan, if di ponishment mek wi laan fi obay, den wi wahn laan fi du weh rait ahn liv eena pees. ¹² Soh den, unu lif op unu taiyad han dehn, ahn mek unu shayki fut dehn stan op schrang! ¹³ “Kip di waak pahn wahn schrayt road,” soh dat dehn wan hoofa fut week weh di fala unu noh wahn geh weeka, bot insteda dat, dehn wahn geh heel. ¹⁴ Chrai fi liv eena pees wid evribadi, ahn du unu bes fi liv wahn hoali laif, kaa widowt dat nobadi noh wahn si Gaad. ¹⁵ Mek shoar dat non a unu noh ton unu bak pahn di grays a Gaad. Ahn noh mek non a unu geh bita laik wahn paizn plaant weh tek root ahn spred ih paizn tu evribadi weh deh rong unu. ¹⁶ Noh mek non a unu bee laik Eesaa, weh doz sleep rong ahn neva ga no rispek fi notn weh hoali. Hihn sel aala fi hihn raits az di oalda son fi wan degeh meel. ¹⁷ Unu noa dat aftawodz ih mi waahnt it bak kaa ih mi waahn ih pa blesin. Bot notn neva deh weh Eesaa kuda mi du, eevn doa ih baal ahn baal kyaahn don, ahn bayg ih pa. No amonk a sari neva werk. Ih mi tu layt.

SEPTEMBA 30–AKTOABA 6

CHREZHAZ FAHN DI WERD A GAAD | JAYMZ 1-2

“Di Way Weh Leed tu Sin ahn Det”

(Jaymz 1:14) Bot temtayshan kohn tu evri wan a wi wen fi wee oan wikid haat haal wi wan said ahn sweet-taak wi fi sin.

g17.4-E 14

Temtayshan

Wen sombadi geh temtid, da bikaaz dehn dizaiya sohnting—espeshali sohnting weh rang. Fi egzampl, yu mait di du sohn shapin ahn sohnting kech yu aiy. Now yu waahnt it bad. Di aidyaa kraas yu main fi jos tek it ahn tink dat nobadi wahn noa. Bot yu kanshans tel yu no! Soh yu tek owt da aidyaa owta yu main ahn yu kantinyu yu shapin. Bai da taim, di temtayshan noh hoal yu atenshan nohmoh, soh yu kom aaf az di wina.

WEH DI BAIBL SEH

Yu da noh wahn bad persn jos bikaaz yu geh temtid. Di Baibl seh dat aala wi ekspeeryens temtayshanz. (1 Korintyanz 10:13) Weh reeli mata da how wi ak er deel wid di temtayshan. Som mait alow di rang dizaiya fi stay eena dehn main, den soona er layta dehn giv een tu it. Adaz chrai tek owt da rang dizaiya owt dehn main rait away.

“Bot temtayshan kohn tu evri wan a wi wen fi wee oan wikid haat haal wi wan said ahn sweet-taak wi fi sin.”—Jaymz 1:14.

(Jaymz 1:15) Afta wi wikid haat don los ahn geh pregnant, ih baan sin. Ahn wen sin geh big ahn don du ih ting, ih kil wi.

g17.4-E 14

Temtayshan

Di Baibl shoa wi wat da di steps weh leed tu sin. Jaymz 1:15 seh: “Afta wi wikid haat don los ahn geh pregnant, ih baan sin.” If wi stay di tink bowt rang dizaiyaz, afta wahn wail wi wahn reech wahn point weh wi kyaahn stap wiself fahn sin, jos laik wen wahn pregnant uman bowt fi baan wahn baybi. Da dis point, shee kyaahn stap weh di hapm. Bot, wi noh haftu bee wahn slayv tu rang dizaiyaz. Yes, wi ku ga di powa fi rijek rang dizaiyaz.

Saach fi Spirichwal Chrezhaz

(Jaymz 1:17) Evri gud ahn perfek gif kohn fahn da tap, fahn wi Faada weh mek di lait. Ahn hihn noh chaynj evri now ahn agen laik shado.

it-2-E 253-254

Lait

Jehoava da “wi Faada weh mek di lait.” (Jaymz 1:17) Hihn noh onli “gi di son fi lait op di day, di laa dehn a di moon ahn di staar dehn fi lait op di nait,” (Jer 31:35) bot aalso aal di spirichwal lait er andastandin wi injai kom fahn hihn tu. (2Kor 4:6) Fi hihn judishal laa an ih Werd da wahn lait weh gaid husoeva wilin fi yooz it. (Ps 43:3; 119:105; Pr 6:23; Isa 51:4) Wahn saamis seh: “Da lait fahn yu mek wi ku si lait.” (Ps 36:9; kompyaa Ps 27:1; 43:3.) Jos laik how erli da maanin di lait fahn di son staat tu geh braita ahn braita til ful daylait, wizdom fahn Jehoava mek di way a di raichos wan dehn di geh braita ahn braita. (Pr 4:18) Soh wen wi aksep ahn fala Gaad standadz, wi di waak eena ih lait. (Isa 2:3-5) Pahn di ada han, if wahn persn foakos pahn rang tinkin, den ih deh deep eena spirichwal daaknis. Noatis weh Jeezas seh: “Bot if dehn di luk pahn loan bad ting, den da loan daaknis wahn di kom eena yu haat. Ahn if di lait weh deh eena yu ton daaknis, den ih wahn oanli daak fi chroo!”—Mach 6:23; kompyaa De 15:9; 28:54-57; Pr 28:22; 2Peet 2:14.

(Jaymz 2:8) Now, unu di du di rait ting if unu reeli di obay da wan perfek komanment eena di Skripcha weh seh, “Lov yu nayba jos laik how yu lov yuself.”

it-2-E 222 ¶4

Laa

Di “Perfek Komanment.” Di perfek komanment [“raiyal laa,” NW] grayta ahn moa impoatant dan eni laa weh man mek ahn weh ga fi du wid how peepl fi chreet eech ada. (Jay 2:8) Di prinsipl bihain di Laa weh Gaad mi gi tu Moaziz da lov; ahn “lov yu nayba sayhn laik how yu lov yuself” (di perfek komanment) da di sekant komanment. Soh di hoal a Moaziz Laa, an evriting weh di oal taim prafit dehn mi rait, kom op tu jos too komanment. (Mach 22:37-40) Aldoa Kristyanz noh deh anda Moaziz Laa, dehn obay di perfek komanment er laa fahn wi King, Jehoava, an ih Son, Jeezas Krais. Dis araynjment da paat a di nyoo kovenant.

Baibl Reedin

(Jaymz 2:10-26) Enibadi weh obay evriting weh di Laa seh bot dehn mes op pahn wan lee paat, dehn gilti a brok aala di komanment dehn eena di Laa. ¹¹ Di sayhn Gaad weh mi seh, “Yu noh fi cheet pahn yu hozban er yu waif,” mi seh tu, “Yu noh fi merda.” Eevn if yu noh ga seks wid nobadi eksep di persn weh yu marid tu, bot yu ton rong ahn merda sohnbadi, yu stil di brok di Laa. ¹² Unu mos taak ahn ak laik peepl weh noa dehn wahn geh joj bai di way dehn lov wan anada. Dat da di Laa weh set wi free. ¹³ Enibadi weh noh ga no mersi, Gaad wahn joj dehn widowt mersi tu. Mersi aalwayz beet jojment! ¹⁴ Mi bradaz ahn sistaz, weh gud ih wahn du if unu seh dat unu bileev eena Gaad, bot unu noh shoa it bai di way unu liv? Unu tink da kaina fayt ku sayv unu? ¹⁵ Sopoaz wan a unu brada er unu sista noh ga notn fi wayr er eet, ¹⁶ ahn unu tel ahn seh, “Gaad bles yu. Ah hoap ting werk owt fi yu. Tek kayr a yuself. Ah hoap yu eet gud.” Weh gud dat wahn du far ahn if unu noh help ahn owt wid weh ih need? ¹⁷ Sayhn way, if wahn persn noh du notn fi shoa dat dehn bileev Gaad, den di fayt weh dehn ga ded, ahn dehn noh wot notn. ¹⁸ Bot now sohnbadi kuda seh, “Yoo ga fayt an Ai ga akshan.” Wel, shoa mi fi yoo fayt widowt akshan, an Ai wahn shoa yu fi mee fayt bai weh Ai di du. ¹⁹ Yu seh yu bileev eena di Wan chroo Gaad. Gud fi yoo! Eevn di deeman dehn bileev dat Gaad deh, ahn dehn chrimbl. ²⁰ Yoo fool-fool man. Yoo waahn mek Ai shoa yu dat fayt widowt akshan noh gud fi notn? ²¹ Tink bowt wi grayt-grayt-grayt-granfaada Aybraham. Memba di taim ih mi wahn sakrifais ih oan son Aizak pahn di alta? Da sayka weh ih mi du mek Gaad mi kansida ahn fi bee raichos. ²² Yu si, da mi fi hihn fayt ahn fi hihn akshanz weh mi-di werk tugeda. Ahn sayka weh ih mi du, ih shoa dat ih mi bileev Gaad fi chroo. ²³ Ahn weh di Skripcha mi seh mi kohn chroo. Ih mi seh, “Aybraham mi bileev Gaad, ahn Gaad aksep ahn az wahn raichos man,” ahn dehn mi kaal ahn Gaad fren. ²⁴ Soh unu si dat wahn persn get rait wid Gaad bai weh dehn du; da noh oanli bai dehn fayt. ²⁵ Eevn Rayhab, weh da-mi wahn prastichoot, mi get rait wid Gaad sayka weh shee mi du. Shee mi tek kayr a di Izrelait spai dehn ahn help dehn eskayp bai wahn nada road. ²⁶ Soh jos laik how fi yoo badi ded if ih noh ga di spirit eena it, rait soh fayt widowt akshan ded.