LESN 57
Weh fi Du if Yu Mek Wahn Seeryos Mistayk?
Eevn doa yu lov Jehoava wahn lat ahn yu chrai reeli haad fi noh du notn fi hert ahn, dehn wahn ga taimz wen yu mek mistayks. Bot som mistayks moa seeryos dan adaz. (1 Korintyanz 6:9, 10) If dis hapm ahn yu mek wahn seeryos mistayk, noh ferget dat Jehoava stil lov yu. Hihn redi fi fergiv ahn help yu.
1. Weh wi need fi du if wi waahn Jehoava fergiv wi?
Peepl weh lov Jehoava geh reeli sad wen dehn mek wahn seeryos mistayk. Bot Jehoava komfert dehn wid di pramis weh hihn gi ih peepl, hihn seh: “Eevn doa yu sin dehn red laik blod, dehn wahn geh wait laik snoa.” (Isaiah 1:18) Soh if wi ripent fahn wi haat Jehoava wahn fergiv wi, ih noh wahn hoal notn gens wi. Bot weh ih meen fi ripent? Ih meenz dat bikaaz wi reeli sari fi weh wi du, wi stap du weh rang ahn wi bayg Jehoava fi fergiv wi. Den wi werk haad fi geh rid a eni rang tinkin er habits weh mi mek wi sin, ahn wi chrai liv bai Jehoava kleen standadz.—Reed Isaiah 55:6, 7.
2. Wen wi sin how Jehoava yooz di eldaz fi help wi?
Jehoava tel wi fi “kaal di kangrigayshan elda dehn” if wi mek wahn seeryos mistayk. (Reed Jaymz 5:14, 15.) Dehnya eldaz lov Jehoava an ih peepl, ahn Jehoava teech dehn how fi help wi soh dat wi ku fiks wi rilayshanship wid hihn.—Galayshanz 6:1.
How di eldaz help wi if wi mek wahn seeryos mistayk? Too er chree eldaz wahn yooz di Baibl fi help wi andastan dat weh wi du mi rang. Ahn dehn wahn inkorij wi ahn gi wi gud advais fi help wi noh mek di mistayk agen. If wahn persn mek wahn seeryos mistayk an ih noh ripent, den di eldaz wahn tek ahn owt fahn di kangrigayshan. Di eldaz du dis fi kip di ada bradaz ahn sistaz sayf, ahn fi noh mek enibadi eena di kangrigayshan staat tu du sohnting rang tu.
SAACH FI MOA
Geh wahn beta andastandin a how Jehoava help wi if wi mek wahn seeryos mistayk ahn laan how wi ku shoa dat wi tankful fi weh ih du.
3. Wi ku ga wahn gud rilayshanship wid Jehoava agen wen wi aanis
Di mistayk dehn weh wi mek hert Jehoava, soh wi need fi taak tu hihn bowt weh wi du. Reed Psalm 32:1-5, ahn den diskos dis kweschan:
Wai ih beta fi mek wi tel Jehoava bowt di mistayk dehn weh wi mek insteda chrai haid dehn?
Apaat fahn di taak tu Jehoava bowt weh wi du, wi wahn feel wahn hoal lat beta wen wi aks di eldaz fi help. Play di VEEDYO, ahn den diskos di kweschan.
How di veedyo shoa dat di eldaz mi help Canon kohn bak tu Jehoava?
Wi need fi bee aanis ahn noh hoal bak eniting fahn di eldaz bikaaz dehn di deh fi help wi. Reed Jaymz 5:16, ahn den diskos dis kweschan:
Wai ih eeziya fi mek di eldaz help wi wen wi aanis?
Taak tu Jehoava bowt weh yu du, bee aanis wid di eldaz, an aksep Jehoava lovin help
4. Jehoava shoa dat ih ga mersi wen sohnbadi mek wahn seeryos mistayk
If sohnbadi weh mek wahn seeryos mistayk noh waahn fala Jehoava standadz nohmoh, den ih wahn geh tek owt fahn di kangrigayshan, ahn wi noh kip kompni wid ahn nohmoh. Reed 1 Korintyanz 5:6, 11, ahn den diskos dis kweschan:
Di sayhn way how ees mek bred doa rayz, weh wuda hapm tu di kangrigayshan if dehn kip kompni wid sohnbadi weh noh waahn fala Jehoava standadz nohmoh?
Laik Jehoava hoo shoa mersi tu peepl weh mek seeryos mistayks, di eldaz reech owt fi help dehn wanz weh mi geh tek owt fahn di kangrigayshan. Wahn lata peepl kohn bak tu di kangrigayshan bikaaz eevn doa di disiplin hert dehn, ih help dehn fi si dat weh dehn du mi rang. (Psalm 141:5)
Wen wi luk pahn di way how Jehoava chreet peepl weh mek seeryos mistayks, how dat shoa dat ih fyaa, lov peepl, an ih ga lata mersi fi dehn?
5. Wen wi ripent Jehoava fergiv wi
Fi help wi andastan how Jehoava feel wen sohnbadi ripent, Jeezas mi tel wi bowt wahn iloschrayshan. Reed Look 15:1-7, ahn den diskos dis kweschan:
Weh dis teech yoo bowt Jehoava?
Reed Ezekiel 33:11, ahn den diskos dis kweschan:
Weh wahn persn need fi du fi shoa dat ih ripent?
Jos laik wahn shepad, Jehoava reeli kay bowt ih sheep
WEH YU WUDA SEH IF SOHNBADI TEL YU: “Ah frayd fi taak tu di eldaz. If Ah tel dehn bowt weh Ah du, dehn wahn tek mi owt fahn di kangrigayshan.”
WEH WI LAAN?
If wi mek wahn seeryos mistayk bot wi reeli sari ahn wi mek op wi main fi stap du weh rang, den Jehoava wahn fergiv wi.
Mek Wi Rivyoo:
Wai ih impoatant fi bee aanis ahn tel Jehoava bowt di mistayks wi mek?
Weh wi need fi du fi mek Jehoava fergiv wi sinz?
Wai wi need fi geh help fahn di eldaz if wi mek wahn seeryos mistayk?
FAIN OWT MOA
Laan how Jehoava shoa wahn man di kaina mersi weh Isaiah 1:18 taak bowt.
How eldaz chrai help di wanz weh mek wahn seeryos mistayk?
“How Eldaz Shoa Lov ahn Mersi tu Sinaz?” (Di Wachtowa, Aagas 2024)
Noatis how di eldaz shoa lov ahn mersi tu di wanz weh dehn tek owt fahn di kangrigayshan.
“How di Eldaz Ku Help Sohnbadi Weh Dehn Tek Owt Fahn di Kangrigayshan?” (Di Wachtowa, Aagas 2024)
Fain owt how wahn man kuda mi tel dat Jehoava di bring ahn bak tu di chroot, eena di stoari weh naym “Ah Mi Need fi Kohn Bak tu Jehoava”.