LESN 24

Weh di Baibl Seh Bowt Aynjelz?

Picha

Jehoava waahn mek wi noa bowt ih famili da hevn. Da famili inklood di aynjel dehn, ahn dehn da di “son dehn a Gaad.” (Job 38:7) Weh di Baibl seh bowt aynjelz? How dehn afek peepl? Ahn yu tink aal aynjelz da paat a Gaad famili?

1. Hoo da di aynjel dehn?

Jehoava mi mek di aynjel dehn bifoa ih mek di ert. Jos laik how wi kyaahn si Jehoava, wi kyaahn si di aynjel dehn weh liv da hevn. (Heebrooz 1:14) Dehn ga milyanz a aynjelz, an eech wan a dehn difrent. (Revilayshan 5:11) Dehn “obay [Jehoava] vais ahn du weh hihn seh fi du.” (Psalm 103:20) Eena Baibl taimz, Jehoava wuda sohntaim sen ih aynjel dehn fi diliva mesij ahn fi help ahn protek fi hihn peepl. Tudeh, di aynjel dehn gaid Kristyanz fi fain peepl weh waahn laan bowt Gaad.

2. Hoo da Saytan an ih deemonz?

Sohn aynjel neva stay faytful tu Jehoava. Di fers aynjel weh ton gens Gaad da “di wan weh dehn kaal Devl ahn Saytan; da hihn di fool op di hoal ert.” (Revilayshan 12:9) Saytan mi waahn rool oava adaz, soh hihn mi kanvins di fers too hyoomanz ahn laytaraan eevn ada aynjelz fi stap obay Gaad. Di Baibl kaal dehndeh wikid aynjel deemonz. Jehoava mi chroa dehn owta hevn dong tu di ert, ahn soon dehn wahn geh dischrai.—Reed Revilayshan 12:9, 12.

3. How Saytan an di deemon dehn chrai chrik wi?

Saytan ahn di deemonz chrik lata peepl chroo spiritizm. Spiritizm da wen peepl chrai kamyoonikayt wid spirits. Fi egzampl, sohn peepl reed horoskoap, er dehn wuda goh da wahn oabya man, sohnbadi weh pridik di fyoocha, er sohnbadi weh praktis majik. Adaz wuda luk fi medikal chreetment weh ga fi du wid spiritizm. Di deemon dehn aalso chrik peepl ahn mek dehn bileev dat dehn ku taak tu peepl weh don ded. Bot Jehoava waan wi: “Unu noh fi goh da enibadi weh chrai taak tu ded peepl, an unu noh fi geh help fahn peepl weh pridik di fyoocha.” (Leviticus 19:31) Hihn gi wi dis waanin fi protek wi fahn Saytan ahn di deemonz. Dehn da Gaad enimi, ahn dehn waahn hert wi.

SAACH FI MOA

Laan bowt di gud tingz weh aynjelz du, how daynjaros spiritizm daynjaros, ahn how wi ku protek wiself fahn Saytan ahn di deemon dehn.

Wahn aynjel di gaid too Jehoava Witnisiz weh di preech fahn hows tu hows.

4. Di aynjel dehn help peepl fi laan bowt Jehoava

Gaad aynjelz da noh di wan dehn weh preech tu peepl. Bot dehn mait gaid Jehoava servants fi fain peepl weh waahn laan bowt ahn. Reed Revilayshan 14:6, 7, ahn den diskos dehnya kweschan:

Wai wi need help fahn di aynjelz fi preech?
How ih mek yu feel fi noa dat di aynjel dehn ku gaid yu fi fain peepl weh waahn laan bowt di Baibl? Wai?

Sohn tingz weh ga fi du wid majik ahn spiritizm, inkloodin wahn weeji boad, wahn kristal baal, wahn buk bowt vampaya, sohn tarot kyaad, sohn dali, insens ahn brayslets.

5. Rijek eniting weh ga fi du wid spiritizm

Saytan ahn di deemonz da Jehoava enimi. Ahn dehn da fi wee enimi tu. Reed Look 9:38-42, ahn den diskos dis kweschan:

Weh di deemon dehn du tu peepl?

Wi noh waahn ga notn fi du wid di deemon dehn ahn wi noh waahn dehn ga eni powa oava wi. Reed Deuteronomy 18:10-12, ahn den diskos dehnya kweschan:

Eena weh way di deemon dehn chrai kanchroal wi ahn kamyoonikayt wid wi? Weh kaina tingz weh ga fi du wid spiritizm kaman wehpaat yu liv?
Yu tink ih gud dat Jehoava tel wi fi stay weh fahn evriting weh ga fi du wid spiritizm? Wai?

Play di VEEDYO, ahn den diskos dehnya kweschan.

VEEDYO: “Fait di Devl” (5:02)

Yu tink ih mi daynjaros fi mek Palesa put da brayslet pan ih lee daata han? Wai?
Weh Palesa mi need fi du fi protek ihself fahn di deemonz?

Chroo Kristyanz aalwayz stay weh fahn eniting weh ga fi du wid di deemonz. Reed Aks 19:19 ahn 1 Korintyanz 10:21, ahn den diskos dis kweschan:

Wai ih impoatant fi dischrai eniting weh ga fi du wid spiritizm?

Wahn laydi di bon difrent tingz weh ga fi du wid spiritizm.

6. Win di fait gens Saytan an ih deemonz

Saytan da di wan weh rool oava di deemonz. Bot di faytful aynjelz geh dairekshan fahn Maikl di aakaynjel, weh da wahn nada naym fi Jeezas. How powaful Maikl di aakaynjel? Reed Revilayshan 12:7-9, ahn den diskos dehnya kweschan: