MWBR19 05 Laif ahn Minischri Meetin Werkbuk Risaach Infamayshan

MAY 6-12

CHREZHAZ FAHN DI WERD A GAAD | 2 KORINTYANZ 4-6

“Wi Noh Giv Op”

(2 Korintyanz 4:16) Dat da wai wi neva giv op. Eevn doa wi badi di ways weh, stilyet di spirit eena wi di geh schranga ahn schranga evri day.

w04-E 8/15 25 ¶16-17

Wi Taiyad Bot Wi Noh Giv Op

¹⁶ Fi shoar, fi tek kayr a wi spirichwal helt veri impoatant. Eevn doa wi ga wahn kloas rilayshanship wid Jehoava Gaad, sohntaim wi mait geh taiyad eena wahn fizikal way. Bot, wi neva wahn geh taiyad a wership Gaad. Jehoava da di wan weh “gi schrent tu di taiyad wan ahn lata powa tu di wan weh week.” (Isaiah 40:28, 29) Di apasl Paal persnali mi ekspeeryens di chroot a dehnya werdz, ahn hihn mi rait: “Dat da wai wi neva giv op. Eevn doa wi badi di ways weh, stilyet di spirit eena wi di geh schranga ahn schranga evriday.”—2 Korintyanz 4:16.

¹⁷ Noatis di ekspreshan “evri day.” Dis meen fi mek yoos a Jehoava provizhan dehn evri singl day. Wahn faytful mishineri sista hoo mi serv fi 43 yaaz doz geh fizikali taiyad ahn geh diskorij fahn taim tu taim. Bot shee neva giv op. Ih seh: “Ai mek it wahn praktis fi get op erli, soh dat bifoa Ai du eniting, Ah spen taim di reed mi Baibl ahn pray tu Jehoava. Wen Ah du dis evriday, ih help mee fi bayr op eevn dong tu tudeh day.” Soh wi ku pen pahn Jehoava fi gi wi di powa wi need, yes “evri day,” pray tu ahn, an meditayt pahn ih kwalitiz an ih pramis dehn.

(2 Korintyanz 4:17) Dehn lee bit a chrobl weh wi di goh chroo fi dis shaat taim da noh notn tu di hoal lata gloari weh wi wahn geh, weh wahn laas fareva.

it-1-E 724-725

Noh Giv Op

Az Kristyanz ih impoatant fi noh looz sait a wi hoap, fi liv fareva widowt sin. Eevn if dehn persikyoot wi, notn kyaahn rab wi a wi hoap. (Roam 5:4, 5; 1Tes 1:3; Rev 2:10) Dehnya sofarin weh wi di fays rait now da notn kompyaa tu di gran pramis weh Gaad wahn fulfil eena di fyoocha. (Roam 8:18-25) Wid di hoap a liv fareva eena wi main, eni sofarin rait now, eevn if ih haad fi bayr, da fi wahn ‘shaat taim ahn da noh notn.ʼ (2Kor 4:16-18) Wen wahn persn memba dat ih chraiyalz weh ih di goh chroo da onli fi wahn lee wail, di Kristyan hoap weh ih bileev eena wahn help ahn fi noh giv op ahn fi kantinyu wership Jehoava.

(2 Korintyanz 4:18) Yu si, wee set wi haat pahn dehn ting weh wi kyaahn si, noh pahn dehn ting weh wi ku si. Dehn ting weh wi ku si noh laas lang, bot dehn ting weh wi kyaahn si wahn laas fareva ahn eva.

Saach fi Spirichwal Chrezhaz

(2 Korintyanz 4:7) Stilyet, eevn doa wee ga dis chreja eensaida fi wee week badi, weh da jos laik kaman klay pat, wee noa dat di reel grayt powa kohn fahn Gaad, ahn noh fahn wee.

w12-E 2/1 28-29

“Mek Jehoava Smail”

David Splane, weh da wahn memba a di Govanin Badi, mi eksplayn di teem Skripcha. (2 Korintyanz 4:7) Wat da dis chrezha? Da fi ga nalij er wizdom? “No,” di speeka mi ansa. “Di chrezha di apasl Paal mi-di taak bowt da di ‘speshal werkʼ fi ‘tel di chroot.ʼ” (2 Korintyanz 4:1, 2, 5) Brada Splane mi rimain di styoodent dehn dat di faiv monts weh dehn spen di stodi da-mi fi pripyaa dehn fi wahn speshal asainment eena di minischri. Da asainment da sohnting veri impoatant.

Di speeka eksplayn dat di ‘chrezha eensaida wee week badi, weh da jos laik kaman klay patʼ meen di fizikal badi weh noh perfek. Ih mi menshan di difrens a wahn kaman klay pat ahn wan weh mek fahn goal. Nobadi noh yooz datdeh pat aafn, bot, di kaman klay pat, pahn di ada han, geh yooz evri day. If wi put wahn chrezha eena di pat weh mek fahn goal, den aal wi wuda foakos pahn da di goal, noh soh moch di chrezhaz weh deh eensaid a it. Brada Splane mi tel dehn: “Unu styoodents noh fi waahn jraa no atenshan tu unuself. Az mishineriz, unu waahn dairek peepl tu Jehoava. Bee hombl laik sohn aadineri klay pat.”

(2 Korintyanz 6:13) Ah di taak tu unu sayhn laik if unu da-mi mi oan pikni dehn. Oapm op unu haat tu wi noh, jos laik how wee mi du.

w09-E 11/15 21 ¶7

Mek Yu Lov fi Yu Bradaz Kip Di Groa

⁷ Wat bowt wee? How wee ku ‘oapm op wi haatʼ wen ih kohn tu shoa lov tu wan anada? Ih naamal fi dehn wan weh deh rong di sayhn ayj er weh ga di sayhn kolcha fi aalwayz waahn heng owt tugeda. Ahn dehn wan weh laik du di sayhn kaina tingz er hoo laik di sayhn kaina entataynment aafn spen lata taim tugeda. Bot wat if weh wi inchrestid eena difrent fahn weh ada Kristyanz inchrestid eena, ahn dat mek wi noh waahn heng owt wid dehn? Den, wi need fi ‘oapm op wi haat’ tu dehn wan. Ih mek lata sens fi mek wi aks wiself, ‘How aafn Ai werk eena di minischri er spen taim wid bradaz ahn sistaz weh Ah noh kloas tu? Wen Ah deh da di Kingdom Haal, Ai goh owta mi way fi meet nyoo peepl ahn chrai fi geh fi noa dehn? er Ai wayt til dehn proov dat den kud bee mai fren? Ai goh hayl op di oal ahn di yong bradaz ahn sistaz eena di kangrigayshan?ʼ

Baibl Reedin

(2 Korintyanz 4:1-15) Soh den, laik how da Gaad eena ih mersi gi wi dis speshal werk fi du, wi noh wahn giv op. ² Wee noh ga notn fi du wid dehn seekrit ahn shaymful tingz weh peepl du. Ahn wee noh di chrai fool nobadi, ner twis Gaad mesij. Gaad da wi witnis dat wi di tel di chroot, soh dat ada peepl ku noa dat wee di tel di chroot. ³ Ahn eevn if dehn ga sohn peepl weh noh andastan dis mesij weh wee preech, ih wuda bee dehn wan weh deh pahn dehn way tu dischrokshan. ⁴ Dehn noh bileev weh wee di seh, kaa Saytan, weh da di gaad a dis werl, don blain dehn aiy, soh dat dehn kyaahn si di lait a di Gud Nyooz bowt di gloari a Krais, weh shoa wi egzakli weh Gaad stan laik. ⁵ Yu si, wee noh goh rong di preech bowt fi weeself; wee preech bowt di Laad Jeezas Krais. Aal wee seh bowt fi weeself, da dat wee da fi unu servant fi Jeezas sayk. ⁶ Da Gaad da di Wan weh seh, “Mek lait shain fahn owta di daaknis!” Da hihn weh mek fi hihn lait shain eena fi wee haat. Ahn da lait weh di shain fahn Krais fays mek wi noa di gloari a Gaad. ⁷ Stilyet, eevn doa wee ga dis chreja eensaida fi wee week badi, weh da jos laik kaman klay pat, wee noa dat di reel grayt powa kohn fahn Gaad, ahn noh fahn wee. ⁸ Lata taim wi ga chrobl pahn evri said, bot dat kyaahn baks wi een soh dat wi noh ga no way owt. Eevn wen wi noh noa weh fi du, wi neva giv op. ⁹ Dehn persikyoot wi, bot Gaad aalwayz deh wid wi; dehn nak wi dong, bot wi aalwayz get op ahn goh agen. ¹⁰ Yes, wi aalwayz deh eena daynja a det sayka weh wi serv Jeezas. Fi wee badi shayr eena fi hihn det, soh dat fi hihn laif ku shoa eena wee tu. ¹¹ Kaa wail wi di liv, wi aalwayz di geh ekspoaz tu det soh dat peepl ku si Jeezas laif eena wi. ¹² Soh den, wee aalwayz di fays det soh dat unu ku noa spirichwal laif. ¹³ Da laik weh sohnbadi mi seh eena di Skripcha; dehn seh, “Ah mi bileev, soh Ah taak.” Wel, wee ga da sayhn kaina fayt, soh wee taak kaa wee bileev. ¹⁴ Wi noa dat di sayhn Gaad weh rayz op bak wi Laad Jeezas fahn di ded, wahn rayz wee op lang wid Jeezas; ahn den Gaad wahn kehr wee ahn unu da di sayhn plays weh hihn deh. ¹⁵ Yes, aala dis da fi fi unu sayk. Ahn az moa ahn moa peepl kohn fi bileev eena Krais, sayka di grays a Gaad, lata tanks wahn di goh op tu Gaad, ahn hihn wahn geh moa ahn moa gloari.

MAY 13-19

CHREZHAZ FAHN DI WERD A GAAD | 2 KORINTYANZ 7-10

“Wi Rileef Minischri”

(2 Korintyanz 8:1-3) Mi bradaz ahn sistaz, wi waahn unu noa bowt di grays a Gaad weh ih gi tu di cherch dehn da Masidoanya. ² Dehn mi-di goh chroo wahn lata chrobl ahn haad taim, bot stilyet dehn mi wilin fi giv, eevn doa dehn mi soh poa, ahn di jai weh dehn mi ga mi-di ron oava. ³ Ai deh ya fi tel unu dat aldoa nobadi neva tel dehn fi du it, dehn giv weh dehn kuda mi afoad, ahn eevn moa.

w98-E 11/1 25 ¶1

“Gaad Lov Wen Wi Hapi fi Giv”

Fi staat aaf, Paal mi tel dehn wan da Korint bowt weh di Masidoanyan dehn mi du, how dehn mi wilin fi giv, ahn dat di way how dehn mi rispan da-mi wahn gud egzampl fi fala. Paal mi rait, “Dehn mi-di goh chroo wahn lata chroblz ahn haad taim, . . . dehn mi wilin fi giv, eevn doa dehn mi soh poa, ahn di jai weh dehn mi ga mi-di ron oava.” Nobadi neva need fi tel di Masidoayanz fi help owt dehn bradaz. Bot pahn di ada han, Paal mi seh: “Dehn mi bayg wi wid aala dehn haat fi mek dehn ga di jai fi deh monks dehn wan weh di giv tu Gaad peepl dehn weh eena need.” Di wilin spirit di Masidoanyanz mi ga mi soh wandaful wen yu kansida dat den dehnself mi soh “poa.”—2 Korintyanz 8:2-4.

kr-E 209 ¶1

Di Rileef Minischri fi Help Gaad Peepl Weh Eena Need

DA-MI rong 46 C.E., ahn Judeeya mi deh eena di midl a wahn famin. Di Jooish falowaz a Krais weh mi-di liv deh neva ga moni fi bai food, sayka weh di prais fi tingz mi skai-hai. Dehn mi soh hongri dat dehn mi deh neks tu staav. Bot, dehn mi ekspeeryens how Jehoava protek ih peepl dehn eena wahn way weh no aada disaipl a Krais mi eva ekspeeryens bifoa. Da weh mi hapm?

(2 Korintyanz 8:4) Dehn mi bayg wi wid aala dehn haat fi mek dehn ga di jai fi deh monks dehn wan weh di giv tu Gaad peepl dehn weh ga need.

kr-E 209-210 ¶4-6

Di Rileef Minischri fi Help Gaad Peepl Weh Eena Need

⁴ Eena di sekant leta weh Paal mi rait tu di Korintyanz, hihn mi seh dat wahn Kristyan minischri ga too paat. Eevn doa Paal mi dairek ih leta tu di anointid Kristyanz, dehnya werdz stil aplai tudeh day tu di ada sheep. (Jan 10:16) Wahn paat a dis minischri da di “speshal werk fi help peepl geh rait wid Gaad,” er wi preechin ahn teechin werk. (2 Kor. 5:18-20; 1 Tim. 2:3-6) Di ada paat inklood di werk weh wi du fi help wi bradaz ahn sistaz, “Gaad peepl.” (2 Kor. 8:4) Dehnya too vers gat een di saym Greek werd di·a·ko·niʹa. Wai dis eevn impoatant?

⁵ Bai di yoos a di sayhn Greek werd fi di too sichuwayshan, Paal put di rileef werk lang wid di difrent kaina minischri weh di Kristyanz eena di kangrigayshan du. Erliya hihn mi menshan: “Difrent way deh fi serv, bot da di sayhn Laad wi di serv; ahn yu ga difrent way how evri bileeva serv Gaad, . . . da wan Spirit du aala dehnya ting.” (1 Kor. 12:4-6, 11) Az a mata a fak, Paal put di difrent kaina kangrigayshan minischri tugeda wid di ‘wership a Gaad.ʼ (Roam. 12:1, 6-8) Noh wanda hihn mi feel dat hihn mi haftu giv paat a ih taim “fi help Gaad peepl dehn”!—Roam. 15:25, 26.

⁶ Paal mi help di bradaz da Korint fi si wai di rileef werk da-mi paat a dehn minischri ahn wership tu Jehoava. Dis da how ih mi put it: Kristyanz weh du dis rileef werk du it bikaaz dehn di “obay di Gud Nyooz a Jeezas Krais.” (2 Kor. 9:13) Soh, bikaaz dehn waahn du weh Krais mi teech, ahn praktis dat, dehn help owt wan anada. Paal mi seh dat di kainis weh dehn mi shoa tu dehn bradaz ahn sistaz da notn shaat a how dehn shoa di “grays weh kyaahn don weh Gaad gi dehn.” (2 Kor. 9:14; 1 Peet. 4:10) Di Disemba 1, 1975, Watchtower mek dis koment bowt di rileef werk: “Wi shuda neva tink dat dis kaina servis noh impoatant tu Jehoava Gaad an ih Son, Jeezas Krais.” Yes, di rileef werk da wahn big paat a wi wership tu Gaad.—Roam. 12:1, 7; 2 Kor. 8:7; Heeb. 13:16.

(2 Korintyanz 9:7) Evribadi fi mek op dehn oan main az tu humoch dehn wahn giv. Dehn noh fi tink haad fi giv, er feel laik enibadi di presha dehn fi giv, kaa Gaad lov wen yu hapi fi giv.

kr-E 196 ¶10

How di Kingdom Werk Geh Fainans

¹⁰ Fos, wi giv kanchribyooshan bikaaz wi lov Jehoava ahn waahn du “weh pleez hihn.” (1 Jan 3:22) Yes, Jehoava hapi wen wi wership hihn ahn giv freeli fahn wi haat. Mek wi luk pahn weh Paal mi rait bowt dehn Kristyan weh giv owta weh dehn mi ga. (Reed 2 Korintyanz 9:7.) Wahn chroo Kristyan noh tink haad fi giv owta weh ih ga. Raada, ih giv bikaaz ih ‘don mek op ih main’ fi du it. Dis doa, da afta ih don kansida kyaaful-wan weh da di need ahn how ih kud help provaid fi da need. Wahn persn laik dat dyaa tu Jehoava, kaa “Gaad lov wen wi hapi fi giv.” Wahn nada chranslayshan seh: “Gaad lov dehn wan weh lov fi giv.”

Saach fi Spirichwal Chrezhaz

(2 Korintyanz 9:15) Wi kyaahn eevn fain werdz fi tel Gaad tanks fi di wandaful gif weh ih gi wi!

w16-E 01 12 ¶2

Bee Wilin fi Giv Bikaaz a Gaad “Wandaful Gif”

² Paal mi noa dat di wandaful pramis dehn weh Gaad mek wahn aal kohn chroo bikaaz a weh Jeezas don ded fi wee. (Reed 2 Korintyanz 1:20.) Soh, da “wandaful gif” wuda inklood aal di gudnis ahn blesin dehn weh Jehoava giv wi chroo Jeezas. Yes, da gif da moch moa dan weh wee kud imajin, wi kyaahn eevn put dehn feelinz intu werdz. How wee shuda feel fi geh wahn speshal gif laik dat? Ahn eena weh wayz dis shuda mek wi waahn pripyaa wi main ahn haat fi di Memoaryal a Krais det pahn Wenzdeh, Maach 23, 2016?

(2 Korintyanz 10:17) Da laik weh di Skripcha seh, “If sohnbadi fi boas, mek dehn boas bowt di gud werk weh di Laad du.”

g99-E 7/8 20-21

Ih Rang fi Mek Sohnbadi Boas?

Eena di Kristyan Greek Skripchaz, di verb kau·khaʹo·mai, weh chranslayt az “prowd, ful op wid jai, er fi boas,” ku geh yooz eena wahn negitiv er wahn pazitiv way. Paal seh, fi egzampl, wee mait bee “ful op a jai, kaa wee noa dat Gaad wahn gi wi fi wee paat eena fi hihn gloari.” Hihn mi rekomen aalso, dat: “If sohnbadi fi boas, mek dehn boas bowt di gud werk weh di Laad du.” (Roamanz 5:2; 2 Korintyanz 10:17) Dis meen fi tek praid eena Jehoava az wi Gaad, wahn feelin weh mait leed wi fi geh ful op wid jai oava fi hihn gud naym ahn repyutayshan.

Baibl Reedin

(2 Korintyanz 7:1-12) Mi dyaa fren dehn, Gaad mek aala dehn pramis tu wi, soh den, mek wi kip weh fahn evriting weh noh wahn mek wi badi ahn wi spirit kleen fahn sin. Mek wi du wi bes fi liv wahn hoali laif owta rispek fi Gaad. ² Unu mos oapm op unu haat tu wi, kaa wi neva du nobadi notn, wi neva leed nobadi aschray, ahn wi neva chaans nobadi. ³ Ah noh di seh dis fi kandem unu, kaa laik weh Ah seh, wi lov unu soh moch, dat wi wahn aalwayz deh tugeda wid unu weda wi livin er ded. ⁴ Ah ga kanfidens dat Ah ku taak free tu unu. Ah oanli prowd a unu, ahn unu inkorij mi wahn lat, ahn unu oanli mek mi hapi eevn doa wi di goh chroo soh moch chroblz. ⁵ Eevn wen wi mi kohn da Masidoanya, wi badi neva ga no chaans fi res. Chroblz mi-di kom aata wi fahn aal kaana. Peepl mi-di kwaaril wid wi pahn di owtsaid, ahn eena wi haat wi mi frayd bad. ⁶ Bot Gaad, weh da di Wan weh inkorij dehn wan hoofa haat hevi, mi inkorij wi wen Taitos kohn. ⁷ Ahn wi neva geh inkorij jos kaa hihn kohn, bot sayka di way how unu inkorij hihn. Ah mi oanli hapi wen ih tel mi humoch unu mi-di luk faawod fi si mi, ahn how unu mi sari bowt aal weh mi hapm, ahn how unu kudn wayt fi sopoat mi. ⁸ Eevn if di leta weh Ah mi rait tu unu mi hert unu feelinz, Ah noh sari dat Ah mi rait it. Fos, Ah mi feel bad bowt it, kaa Ah noa ih mi mek unu feel sad fi wahn lee wail. ⁹ Now Ah hapi, noh kaa Ai mi mek unu feel sari fi weh unu mi du, bot bikaaz unu unuself mi sari fi weh unu du, ahn dat mek unu ton fahn unu sin dehn. Ahn dat da di kaina sari weh Gaad waahn ih peepl dehn ga, soh wee neva du no damij tu unu eena no way. ¹⁰ Wen Gaad mek sohnbadi sari, ih mek dehn haat chaynj ahn den dehn ton fahn dehn sin dehn ahn geh sayv. Ah noh sari bowt dat. Bot wen yu sari laik how di peepl eena dis werl mek yu feel sari, ahn noh ton fahn yu sin dehn, ih oanli wahn leed tu spirichwal det. ¹¹ Luk how Gaad yooz di saro weh unu di feel sayka aal weh mi hapm. Ih mek unu eega fi proov seh dat unu reeli waahn unu haat kleen. Ih mek unu beks ahn worid ahn frayd. Ih mek unu waahn si mi. Ih mek unu waahn si di wan weh du rang geh ponish, ahn ih mek unu kay ahn waahn du evriting fi set tingz schrayt bitween wi. ¹² Di reezn wai Ah mi rait tu unu da neva fi paint owt hoo mi du rang er hoo mi geh rang du tu dehn. Ah mi rait tu unu soh dat Ah ku mek it playn tu unu, eena Gaad sait, humoch unu reeli kyaa fi wi.

MAY 20-26

CHREZHAZ FAHN DI WERD A GAAD | 2 KORINTYANZ 11-13

“Paal Mi Ga ‘Sohnting Laik Wahn Big Prikl Eena Ih Badiʼ”

(2 Korintyanz 12:7) Bot fi kip mi fahn geh swel-hedid aafa di lata wandaful ting dehn weh Ah mi si, Ah mi geh sohnting laik wahn big prikl eena mi badi. Da mi wan a Saytan aynjel dehn weh dehn sen fi taament mi ahn kip mi hombl.

w08-E 6/15 3-4

Wen Ah Week, Da Den Ah Schrang

Wahn nada faytful servant mi bayg Jehoava fi tek weh wahn ‘big prikl eena ih badiʼ weh mi-di bada ahn. Paal mi bayg di Laad chree taim fi tek weh di prablem fahn ahn. Wateva mi-di bada Paal, da-mi laik wahn big prikl weh ih kudn tek owta ih flesh. Dis kuda mi mek ih looz ih jai eena ih servis tu Jehoava. Paal mi seh da-mi laik sohnbadi mi di taament ahn. Jehoava mi tel ahn seh: “Mai grays da aal weh yu need, kaa mai powa werk di bes wen yu week.” Jehoava neva tek weh di big prikl weh mi-di bada ahn. Paal mi haftu deel wid it, bot hihn mi seh: “Kaa wen Ah week, da den Ah schrang.” (2 Kor. 12:7-10) Weh dis mi meen?

(2 Korintyanz 12:8, 9) Ah bayg di Laad chree taim fi tek it weh fahn mi. ⁹ Bot di Laad ansa mi seh, “Mai grays da aal weh yu need, kaa mai powa werk di bes wen yu week.” Soh Ah oanli tu glad fi boas bowt di ting dehn weh mek Ah week, soh dat Krais powa ku werk chroo mee.

w06-E 12/15 24 ¶17-18

Jehoava Gi “Hoali Spirit tu Enibadi Weh Aks Ahn”

¹⁷ Bot di Laad ansa Paal seh: “Mai grays da aal weh yu need, kaa mai powa werk di bes wen yu week.” Paal mi seh: “Soh Ah oanli tu glad fi boas bowt di ting dehn weh mek Ah week, soh dat Krais powa ku werk chroo mee.” (2 Korintyanz 12:9; Psalm 147:5) Soh chroo Krais, Paal mi geh fi ekspeeryens Gaad powa, ih mi kova oava hihn laik wahn tent. Sayhn way soh tudeh, Jehoava ansa fi wee pryaaz ahn protek wi bikaaz ih mek wi feel sayf.

¹⁸ Aaf koars, wahn tent noh stap di rayn fahn faal er stap di breez fahn bloa, bot ih shelta wi fahn tingz laik di son ahn heet. Sayhn way tu, di protekshan weh wi geh fahn di ‘powa a Krais’ Jeezas noh stap di chraiyalz er haad taimz weh kohn gens wi. Stilyet, da wahn spirichwal protekshan weh gyaad wi fahn di tingz a dis werl weh kud haam wi ahn fahn di atak dehn fahn Saytan, hoo da di roola a dis werl. (Revilayshan 7:9, 15, 16) If yoo di deel wid wahn chraiyal weh ‘noh waahn lef yu,ʼ yoo kud bee shoar dat Jehoava noa weh yu di goh chroo ahn hihn ansa yu “krai fi help.” (Isaiah 30:19; 2 Korintyanz 1:3, 4) Paal mi rait: “Evri kaina tes weh unu goh chroo da di sayhn kaina tes dehn weh ada peepl goh chroo tu. Bot Gaad faytful, ahn hihn noh wahn mek di taim a testin geh soh bad dat unu kyaahn bayr it. Bot wen di tes kohn, Gaad wahn gi unu di schrent fi stan it, ahn ih wahn shoa unu wahn way owta it.”—1 Korintyanz 10:13; Filipiyanz 4:6, 7.

(2 Korintyanz 12:10) Soh den, fi sayka Krais, Ah hapi wen Ah week, er wen dehn insolt mi, er wen Ah goh chroo haad taim er eni kaina sofarin, er wen dehn persikyoot mi, kaa wen Ah week, da den Ah schrang.

w18.01 9 ¶8-9

“Hihn Gi Schrent tu di Wan Weh Taiyad”

⁸ Reed Isaiah 40:30. Wi mait ga lata skilz, bot wi stil kyaahn du evriting pahn wi oan schrent. Dat da wahn lesn aala wi haftu laan. Di apasl Paal kuda mi du wahn lata tingz, bot ih kudn du evriting ih mi waahn du. Wen ih mi tel Jehoava how ih mi feel, Jehoava tel ahn: “Mai powa werk di bes wen yu week.” Paal mi andastan weh Jehoava mi-di tel ahn. Dat da wai Paal mi seh: “Wen Ah week, da den Ah schrang.” (2 Kor. 12:7-10) Weh ih meen wen ih seh dat?

⁹ Paal mi riyalaiz dat ih kudn du evriting pan ih oan. Ih mi need help fahn Gaad. Jehoava hoali spirit kuda mi gi Paal powa wen ih mi feel week. An ih kuda mi gi Paal di powa fi du tingz weh ih kudn du pan ih oan schrent. Di saym ting ku hapm tu wee. If Jehoava gi wi fi hihn hoali spirit, wee ku bee schrang!

Saach fi Spirichwal Chrezhaz

(2 Korintyanz 12:2-4) Ah mi noa wahn bileeva weh mi geh kehr op eena di haiyis hevn wehpaa Gaad liv, bowt foateen yaaz abak. Ah noh noa if di man mi eena ih badi, er if da oanli ih spirit weh gaan op—oanli Gaad noa. ³ Az Ah seh, oanli Gaad noa if dis man mi deh eena ih badi er nat. ⁴ Wel, hihn mi geh kehr op da Paradais, ahn op dehsoh ih yehr tingz weh no werdz noh deh az tu how fi seh dehn; tingz weh no hyooman mowt noh ga permishan fi seh.

w18.12 8 ¶10-12

Kweschanz Weh Peepl Aks

“Di haiyis hevn” weh Paal mi taak bowt da 2 Korintyanz 12:2 da praabli Gaad Kingdom wid Jeezas Krais ahn di 144,000 di rool. Di Baibl kaal dat di “nyoo hevn.”—2 Peet. 3:13.

Dis da di “terd,” er “haiyis hevn” bikaaz dis Kingdom soh moch beta dan eni ada govament.

Di “Paradais” weh Paal mi si eena ih vizhan praabli meenz (1) di fizikal Paradais weh di ert wahn bee eena di fyoocha, (2) di spirichwal paradais weh wahn egzis eena da taim, weh wahn bee beta dan di spirichwal paradais weh wi don di injai now, ahn (3) “Gaad gyaadn” eena hevn weh wahn egzis di sayhn taim. Ahn soh, di nyoo werl wahn bee di nyoo hevnz ahn di nyoo ert put tugeda. Ih wahn bee wahn nyoo araynjment, an ih wahn inklood di Kingdom govament eena hevn an aala di hyoomanz weh di serv Jehoava eena Paradais ya pahn di ert.

(2 Korintyanz 13:12) Greet wan anada wid wahn hoali kis.

it-2-E 177

Kis

Di “Hoali Kis.” Eena erli Kristyan taimz dehn mi ga sohnting weh dehn mi kaal wahn “hoali kis.” (Roam 16:16; 1Kol 16:20; 2Kor 13:12; 1Tees 5:26; 1Peet 5:14) Dat da mi how peepl weh da di sayhn seks doz greet wan anada. Dis kaina greetin weh di erli Kristyanz dehn mi du mi simila tu wahn oal Heebroo kostom wen den yoostu greet eech ada wid wahn kis. Eevn doa di Skripchaz noh reeli eksplayn dis, “hoali kis” er kis a lov shoa klyaa-wan di lov ahn yooniti weh mi deh monks di Kristyan dehn eena di kangrigayshan.—Jan 13:34, 35.

Baibl Reedin

(2 Korintyanz 11:1-15) Ah jos waahn unu kantinyu fi bayr payshens wid mi wail Ah goh hed taak laik wahn fool. ² Ah feel jelos fi unu sayhn laik how Gaad ihself wuda feel jelos oava unu. Ah pramis fi giv unu tu wan hozban, weh da Krais, az wahn hoali, verjin braid. ³ Bot Ah frayd dat sohnbadi wahn leed unu aschray fahn di chroo lov weh unu ga fi Krais, sayhn laik how di snayk mi chrik Eev. ⁴ Kaa ih luk laik unu redi fi bileev enibadi weh preech bowt wahn nada Jeezas ada dahn weh wee mi preech tu unu. Ahn unu redi fi geh wahn nada spirit, ahn unu redi fi aksep wahn difrent Gud Nyooz fahn di wan weh unu mi aksep fahn wee. ⁵ Now, Ah noh tink dat eni a dehn soa-kaal “big taim apasl” beta dahn mee. ⁶ Ah mait kyaahn taak az gud az dehn, bot Ah noa az moch az dehn. Wi shoa dis oava ahn oava eena evriting. ⁷ Ah mi preech di Gud Nyooz tu unu widowt pay. Ah mi hombl miself jos soh dat Ah kuda mi lif unu op. Unu tink seh dat da-mi wahn sin? ⁸ Da jos laik Ah mi teef fahn di ada cherch dehn wen Ah mi aksep dehn sopoat soh dat Ah kuda mi serv unu widowt chaaj unu notn. ⁹ Ahn wen Ah mi deh wid unu, Ah neva ga nof fi liv aafa, bot Ah neva aks nobadi fi notn, kaa mi fren dehn da Masidoanya mi gi mi evriting weh Ah mi need. Soh, Ah neva yet aks unu fi eniting, an Ah wahn neva aks unu needa. ¹⁰ Az shoar az di chroot a Krais deh eena mi, Ah noh wahn stap boas bowt dat aal oava Akaiya. ¹¹ Ahn wai dat? Kaa Ah noh lov unu? No, Gaad noa dat Ah lov unu. ¹² Ah wahn goh hed du weh Ah di du, soh dat dehn soa-kaal apasl kyaahn boas seh dehn di du di sayhn werk laik weh wee di du. ¹³ Peepl laik dehndeh weh laik boas da faals apasl weh di fool unu op ahn di paas dehnself aaf laik dehn da Krais apasl. ¹⁴ No wanda, kaa eevn Saytan hihn ku mek fi hihnself luk laik wahn aynjel a lait. ¹⁵ Soh, da noh wahn big ting if fi hihn servant dehn wuda du di sayhn ting ahn priten seh dehn da Gaad servant dehn weh di du weh rait. Pahn di en, dehn wahn get egzakli weh dehn dizerv fi weh dehn du.

MAY 27–JOON 2

CHREZHAZ FAHN DI WERD A GAAD | GALAYSHANZ 1-3

“Ai Mi Haftu Tel Ahn tu Ih Fays”

(Galayshanz 2:11-13) Bot wen Peeta kohn da Antiyak, Ah mi hafu tel ahn tu ih fays dat weh ih mi-di du neva rait. ¹² Fos, hihn doz aalwayz eet lang wid di bileeva dehn weh da noh Joo, bot az soon az Jaymz sen sohn Jooish man deh, Peeta haal bak ahn neva waahn eet wid dehn agen. Ih mi frayd fi dehn kaa dehn bileev dat Jooz noh fi eet wid peepl weh noh serkomsaiz. ¹³ Pahn tap a dat, di ada Jooish bradaz mi-di falafut Peeta tu, di priten jos laik hihn; ahn eevn Baanabas anaal mi geh haal eena di ting ahn mi-di goh aan laik dehn.

w17 04-E 27 ¶16

Yoo Di Fala Jehoava Sens a Jostis?

¹⁶ Reed Galayshanz 2:11-14. Peeta mi mek di fyaa a man chrap ahn. (Prov. 29:25) Eevn doa Peeta mi ga Jehoava hoali spirit, an ih mi noa how Jehoava tink bowt di sichuwayshan, hihn mi stil frayd fi weh di Jooz weh mi serkomsaiz fahn di kangrigayshan da Jeroosalem wuda mi tel ahn. Paal mi aalso deh da di meetin da Jeroosalem eena 49 C.E., ahn soh hihn mi tel Peeta fays-tu-fays wen ih mi deh da Antiyak dat weh ih mi di du neva rait. (Aks 15:12; Gal. 2:13, ftn.) Now, da how di Kristyanz weh da neva Joo, hoo dis mi afek, mi wahn rispan tu how Peeta mi gaahn aan? Dehn mi wahn alow dehnself fi geh stombl bai fi hihn bihayvya? Yu tink Peeta mi wahn looz ih privilij dehn bikaaz a dis?

(Galayshanz 2:14) Wen Ah si dat dehn neva mi-di ak akaadn tu di chroot weh dehn laan fahn di Gud Nyooz bowt Jeezas Krais, Ah tel Peeta fronta evribadi, “If yoo weh da wahn Joo ku liv laik dehn wan weh da noh Joo ahn noh bada wid di Jooish Laa, den wai yu waahn foas dehn fi liv laik di Jooz dehn den?”

w13-E 3/15 5 ¶12

Fi Dehn Wan Weh Lov Jehoava, “Notn Kyaahn Mek Dehn Stombl”

¹² Peeta mi shoa dat hihn mi ga fyaa a man, weh mi kaaz ahn fi stombl sohntaimz. Stilyet, hihn mi stay laayal tu Jeezas ahn Jehoava. Fi egzampl, hihn mi seh dat hihn neva noa Jeezas, noh jos wan taim, bot chree taimz. (Look 22:54-62) Layta, Peeta neva ak laik wahn Kristyan ataal. Hihn onli gaan aan bad wid di bileeva dehn weh neva serkomsaiz ahn weh da neva Joo. Peeta neva chreet dehn fyaa, laik dehn neva az gud az di Jooish Kristyan dehn weh mi serkomsaiz. Di apasl Paal, doa, mi si di mata klyaa-wan, dat ih mi rang—no plays neva deh eena di Kristyan kangrigayshan fi dehn goh aan soh wid wan anada. Dehn fi mi-di chreet evribadi di sayhn way. Di way how Peeta mi bihayv mi rang. Bifoa tingz kuda mi gaahn eni ferda ahn kaaz divizhan bitween di bileeva dehn, Paal mi haftu giv Peeta dairek kongsl fays-tu-fays. (Gal. 2:11-14) Yoo tink Peeta mi feel bad bowt dis ahn stap serv Gaad? Non ataal. Hihn mi tek Paal kongsl tu haat ahn mi kwik fi aplai weh Paal mi tel ahn, soh ih kuda mi kip aan di du di Laad werk.

Saach fi Spirichwal Chrezhaz

(Galayshanz 2:20) Da jos laik Ah ded wid Jeezas Krais pahn di kraas. Ahn da noh reeli mee di liv nohmoh, bot da Jeezas Krais di liv eena mee. Ahn di way Ai di liv mi laif now da bai di fayt weh Ah ga eena Gaad Son, weh lov mi ahn mi gi ih laif fi mi.

w14-E 9/15 16 ¶20-21

Stay Laayal tu Gaad Eevn “Anda Chraiyalz”

²⁰ How bowt di atak dehn weh wi reeli kyaahn si. Fi egzampl, how yoo wuda chrai deel wid di feelin a diskorijment? Wan a di bes way fi deel wid dis da fi meditayt pahn di ransom sakrifais. Dis da mi egzakli weh Paal mi du wen hihn mi feel dong. Ih mi noa dat Krais mi ded, noh fi dehn wan weh mi perfek, bot fi sinaz. Ahn Paal da-mi wahn sina. Az a mata aaf fak, hihn mi rait: ‘Bai di fayt Ah ga eena Gaad son, weh lov mee ahn mi gi Ih laif fi mee.ʼ (Gal. 2:20) Yes, Paal mi aksep di ransom. Hihn mi noa dat hihn kuda mi benifit fahn di ransom.

²¹ Da sayhn way a tinkin—dat di ransom da wahn persnal gif fahn Jehoava—ku help yoo wahn lat. Dis noh meen dat di chroblz weh wi fays wahn jos disapyaa. It mait bee dat sohn a wi mait haftu deel wid wi prablem dehn rait op tu di en a dis sistem. Bot memba dis: dehn wan weh noh giv op wahn geh di praiz. Wi deh soh kloas tu di day wen Gaad Kingdom wahn geh gloarifi ahn bring pees ahn perfekshan bak tu aal hyoomanz. Soh mek op yu mayn wan taim fi goh intu dis Kingdom—eevn chroo lata chraiyalz ahn chribyulayshanz.

(Galayshanz 3:1) Unu Galayshanz, unu schupid ay! Sohnbadi mosi oabya unu. Ah shoa unu playn playn egzakli weh Jeezas mi du fi unu wen ih ded pahn di [stayk].

it-1-E 880

Wahn Leta tu di Galayshanz

Paal seh, “Unu Galayshanz, unu schupid ay!” Weh Paal mi rait ya da neva tu wahn spesifik rays a peepl fahn di naadan ayrya da Galatia. (Gal 3:1) Raada, Paal mi-di skoal sertn bradaz ahn sistaz eena di kangrigayshan dehn fi alow dehnself fi geh fool op bai dehn wan monks dehn weh mi-di fala di Jooish rilijan. Di Jooz mi-di goh aan soh self-raichos bikaaz dehn mi-di fala di roolz a di Jooish Laa raada dan di get rait wid Gaad chroo di nyoo agreement hihn mi provaid. (2:15–3:14; 4:9, 10) Az wahn rays, “di cherch [kangrigayshan] dehn eena Galaysha” (1:2) weh Paal mi rait wahn leta tu mi mek op a Jooz ahn peepl weh da neva Jooz. Di peepl dehn weh da neva Joo da-mi peepl weh jain di Jooish rilijan. Som mi serkomsaiz, ahn som a dehn neva serkomsaiz. Ahn som a dehn mi kohn fahn di Keltik peepl. (Aks 13:14, 43; 16:1; Gal 5:2) Eevn doa aala dehn mi kohn fahn difrent bakgrong, Paal mi rifaa tu dehn az di Galayshan Kristyanz bikaaz dehn mi liv eena di ayrya naym Galaysha. Di leta weh Paal mi rait mi veri frenli kaaz ih mi noa di Kristyanz gud; di wan dehn weh mi liv eena di sodan paat a Galaysha. Ih neva soh fameelya wid di wan dehn eena di naadan paat, kaaz ih neva vizit dehn bifoa.

Baibl Reedin

(Galayshanz 2:11-21) Bot wen Peeta kohn da Antiyak, Ah mi hafu tel ahn tu ih fays dat weh ih mi-di du neva rait. ¹² Fos, hihn doz aalwayz eet lang wid di bileeva dehn weh da noh Joo, bot az soon az Jaymz sen sohn Jooish man deh, Peeta haal bak ahn neva waahn eet wid dehn agen. Ih mi frayd fi dehn kaa dehn bileev dat Jooz noh fi eet wid peepl weh noh serkomsaiz. ¹³ Pahn tap a dat, di ada Jooish bradaz mi-di falafut Peeta tu, di priten jos laik hihn; ahn eevn Baanabas anaal mi geh haal eena di ting ahn mi-di goh aan laik dehn. ¹⁴ Wen Ah si dat dehn neva mi-di ak akaadn tu di chroot weh dehn laan fahn di Gud Nyooz bowt Jeezas Krais, Ah tel Peeta fronta evribadi, “If yoo weh da wahn Joo ku liv laik dehn wan weh da noh Joo ahn noh bada wid di Jooish Laa, den wai yu waahn foas dehn fi liv laik di Jooz dehn den? ¹⁵ “Wee wiself da baan Joo; wee da noh dehn peepl weh da noh Joo weh da soa-kaal ‘sinaz.ʼ ¹⁶ Stil wee noa dat wahn persn noh get rait wid Gaad sayka weh ih kip di Jooish Laa, bot sayka weh ih bileev eena Jeezas Krais. Ahn eevn wee weh da Jooz mi hafu bileev eena Krais Jeezas soh dat wee kuda get rait wid Gaad chroo wi fayt eena hihn, ahn noh sayka weh wi kip di Laa. Kaa nobadi kyaahn get rait wid Gaad kaa ih kip di Laa.” ¹⁷ “Soh den, wat if wee di luk fi get rait wid Gaad chroo wi fayt eena Jeezas Krais, ahn den fain owt wi stil di sin? Dat meen dat Jeezas inkorij wi fi sin den? No, sa! ¹⁸ If Ai goh bak goh bil op bak weh Ah don tayr dong—Ah meen if Ah goh bak goh kip di Jooish Laa fi get rait wid Gaad—den Ah reeli di sin fi chroo. ¹⁹ Wen Ah doz chrai kip di Laa, dat neva wahn geh mi rait wid Gaad, soh sayka dat, Ai ded tu da Laa now soh dat Ah ku liv fi Gaad. ²⁰ Da jos laik Ah ded wid Jeezas Krais pahn di kraas. Ahn da noh reeli mee di liv nohmoh, bot da Jeezas Krais di liv eena mee. Ahn di way Ai di liv mi laif now da bai di fayt weh Ah ga eena Gaad Son, weh lov mi ahn mi gi ih laif fi mi. ²¹ Ai wuda neva put dong di grays weh Gaad shoa wi. If wi ku get rait wid Gaad kaa wi kip di Laa, den Jeezas Krais ded fi notn.”