Aalwayz Bee Redi fi Jehoava Day

 1. Weh wi need fi du fi mek wi servaiv Jehoava day?

WEN di Baibl taak bowt “Jehoava day,” ih di taak bowt di taim wen Jehoava wahn sayv ih peepl ahn dischrai ih enimi dehn. Jehoava mi du dis eena di paas wen ih mi ponish sohn nayshan. (Isa. 13:1, 6; Ezek. 13:5; Zeph. 1:8) Eena fi wee taim, “Jehoava day” wahn staat wen di politikal leedaz dischrai Babilan di Grayt ahn den ih wahn finish aaf wid di waar a Armagedon. If wi waahn servaiv da “day,” wi haftu pripyaa now. Jeezas mi seh dat wi haftu pripyaa fi di “grayt chribyulayshan.” Pahn tap a dat, ih mi aalso seh dat wi haftu aalwayz “bee redi” far it.—Mach. 24:21; Look 12:40.

 2. Weh 1 Tesaloanyanz ku teech wi?

² Eena di fers leta weh Jehoava mek di apasl Paal rait tu di Tesaloanyanz, di apasl mi yooz sohn iloschrayshan fi help di Kristyanz fi aalwayz bee redi fi Jehoava day. Paal mi noa dat Jehoava day neva mi wahn kohn rait away. (2 Tes. 2:1-3) Bot hihn mi stil waan di Kristyanz fi bee redi fi da day jos laik if da mi tumaaro. Fi hihn advais gud fi wee tu. Mek wi luk pahn weh hihn seh bowt (1) how Jehoava day wahn kohn, (2) hoo noh wahn servaiv Jehoava day, ahn (3) weh wee ku du fi bee redi.

 3. Eena weh way Jehoava day wahn kohn laik wahn teef eena di nait? (Koment pahn di picha.)

³ “Jos laik wahn teef eena di nait.” (1 Tes. 5:2) Owta di chree iloschrayshan weh Paal mi yooz fi diskraib how Jehoava day mi wahn kohn, dis da di fers wan. Wahn teef yoozhwali moov faas an ih wuda chooz fi atak da nait wen peepl noh ekspek it. Jehoava day wahn kohn jos laik dat, wen moas peepl noh ekspek it. Eevn Jehoava peepl mait bee sopraiz fi si how faas tingz hapm, bot wi noh wahn geh dischrai laik Jehoava enimi dehn.

 4. Eena weh way Jehoava day wahn bee laik layba payn?

⁴ “Jos laik how layba payn kech wahn pregnant uman wen ih noh di ekspek it.” (1 Tes. 5:3) Wahn laydi weh pregnant noh noa di egzak taim wen ih baybi wahn kohn, bot shee noa dat ih wahn hapm. Wen da taim kom, ih wahn hapm sodn-wan ahn shee wahn ga lata payn weh ih wahn kyaahn stap. Jos laik dat, wi noh noa di egzak day ahn taim wen Jehoava day wahn staat. Bot wi noa fi shoar dat ih wahn kohn. Jehoava wahn dischrai di wikid peepl wen dehn lees ekspek it ahn non a dehn wahn eskayp.

 5. How Jehoava day wahn bee laik wen di daylait kohn?

⁵ “Laik wen di daylait kom een sodn-wan.” Di terd iloschrayshan weh Paal yooz aalso taak bowt teef weh kom een da nait. Bot dis taim, Paal mi-di foakos pahn how di daylait kom een sodn-wan pahn wahn teef. (1 Tes. 5:4) Wahn teef weh kohn da nait ku looz chrak a taim kaaz ih soh bizi. Soh ih mait nat eevn noatis wen di son kom op ahn dat ih wahn geh kech. Joorin di grayt chribyulayshan, dis da weh wahn hapm tu peepl weh di du tingz weh Jehoava hayt. Bot dat noh haftu hapm tu wee. Wi wahn bee redi if wi mek shoar dat wi noh du notn weh Jehoava hayt, an insted, foakos pahn “evriting weh gud ahn raichos ahn chroo.” (Ifee. 5:8-12) Di neks too iloschrayshan weh Paal mi yooz diskraib peepl weh noh wahn servaiv Jehoava day.

 6. Eena weh way moas peepl di sleep? (1 Tesaloanyanz 5:6, 7)

⁶ “Dehn peepl weh sleep.” (Reed 1 Tesaloanyanz 5:6, 7.) Paal mi kompyaa dehn wan weh noh wahn servaiv Jehoava day tu sombadi weh di sleep. Wahn persn weh di sleep noh noa weh di hapm rong ahn er humoch taim don paas. Soh, ih noh wahn noa if sohnting impoatant di hapm an ih wahn kyaahn du notn bowt it. Eena wahn spirichwal way, moas peepl tudeh di sleep. (Roam. 11:8) Dehn noh bileev dat wi di liv eena “di laas dayz” ahn dat di grayt chribyulayshan soon kohn eevn doa dehn ga aal di proof. Som a dehn mait lisn tu di gud nyooz bowt di Kingdom onli wen sohnting seeryos hapm rong di werl. Bot stilyet, wahn lata dehn mait chooz fi goh bak goh sleep insteda stay awayk. Eevn peepl weh bileev dat Gaad wahn dischrai ih enimi dehn, feel laik da day noh wahn kohn soon. (2 Peet. 3:3, 4) Bot wee noa dat di apasl Paal kongsl fi stay awayk di geh moa ahn moa seeryos evri day.

 7. How dehn wan weh wahn geh dischrai da laik sohnbadi weh jronk?

⁷ “Dehn peepl weh geh jronk.” Di apasl Paal mi seh dat di peepl weh wahn geh dischrai da laik wahn persn weh jronk. Wen sombadi jronk, ih tek tu lang fi riyak tu weh di hapm rong ahn, an ih noh mek gud disizhanz. Saym way soh, wikid peepl mek bad disizhanz ahn noh rispan tu Jehoava waanin dehn. Bikaaz dehn chooz fi bee Gaad enimi, dehn wahn geh dischrai. Bot Kristyanz lisn tu di kongsl fi bee sensabl ahn noh bee laik peepl weh jronk. (1 Tes. 5:6) Wahn ekspert weh stodi di Baibl seh dat wahn persn weh sensabl “stay kaam ahn noh geh fraitn. Ih tink schrayt soh dat ih ku mek wahn gud disizhan.” Wai wi need fi bee kaam ahn sensabl? Soh dat wi noh tek paat eena palitiks er geh involv eena di prablemz a dis werl. An az Jehoava day kohn kloasa, tingz wahn geh moa seeryos an ih wahn bee haada fi noh tek said. Bot wi noh haftu wori tu moch bowt weh wi wahn du wen tingz geh haada. Gaad hoali spirit wahn help wi fi bee kaam ahn sensabl soh dat wi ku mek gud disizhanz.—Look 12:11, 12.

 8. How di iloschrayshan da 1 Tesaloanyanz 5:8 diskraib di kwaliti dehn weh wi need fi help wi bee redi ahn sensabl? (Koment pahn di picha.)

⁸ “Put aan di ves . . . ahn mek wi put aan di helmit.” Paal seh wi fi bee laik soaljaz weh aalwayz redi fi waar. (Reed 1 Tesaloanyanz 5:8.) Wahn soalja sopoas tu aalwayz bee redi fi fait wen wahn waar di hapm. Saym way soh, wee fi bee redi fi Jehoava day ahn kip aan wi ves a fayt ahn lov, ahn di helmit a hoap. Dehnya kwaliti wahn help wi wahn lat.

 9. How wi fayt ku protek wi?

⁹ Jos laik how wahn ves wuda protek wahn soalja haat, fayt ahn lov wahn protek fi wee haat. Dehnya kwaliti wahn aalso help wi fi kantinyu wership Gaad ahn fala Jeezas egzampl. Wen wi ga fayt, ih help wi fi bee shoar dat Jehoava wahn bles wi az lang az wi wership ahn wid aala wi haat. (Heeb. 11:6) Wi fayt wahn aalso help wi fi stay laayal tu Jeezas, wi Leeda, eevn wen wi di goh chroo wahn tof sichuwayshan. Wan way wi ku schrentn wi fayt da wen wi reed bowt di egzampl a bradaz ahn sistaz weh stay laayal eevn wen dehn goh chroo persikyooshan er ga moni prablemz. Wee ku avoid di daynja fi lov moni ahn mateeryal tingz if wi kapi di egzampl a bradaz ahn sistaz weh put spirichwal tingz fers eena dehn laif.b

10. How lov fi Gaad ahn fi wi nayba help wi fi noh giv op?

¹⁰ Lov aalso impoatant fi mek wi bee redi ahn sensabl. (Mach. 22:37-39) Lov fi Gaad wahn help wi fi kantinyu preech noh mata weh chalenjiz mait kom op. (2 Tim. 1:7, 8) Ahn lov fi peepl weh noh serv Jehoava wahn moov wi fi kantinyu preech eena wi naybahud, du foan witnisin, er rait leta. Wi noh giv op pahn dehn er stap hoap dat wan day dehn wahn staat du weh rait.—Ezek. 18:27, 28.

11. Wai ih impoatant fi lov wi bradaz ahn sistaz? (1 Tesaloanyanz 5:11)

¹¹ Wi aalso lov wi bradaz ahn sistaz. Wi shoa dehn dat wi lov dehn wen wi “inkorij wan anada ahn . . . bil op wan anada.” (Reed 1 Tesaloanyanz 5:11.) Wi help eech ada jos laik how soaljaz wuda help wan anada eena waar. Joorin wahn waar, ih pasabl fi mek wahn soalja hert wahn nada soalja weh di fait langsaid ahn. Bot dat wuda onli hapm bai mistayk. Saym way soh, wi wuda neva hert wi bradaz ahn sistaz fi spait er tek rivenj wen dehn hert wi. (1 Tes. 5:13, 15) Wi aalso shoa lov wen wi rispek di bradaz weh di tek di leed eena di kangrigayshan. (1 Tes. 5:12) Di kangrigayshan da Tesalonaika mi les dan wan yaa oal wen Paal mi rait ih leta tu dehn. Soh di bradaz weh mi-di tek di leed neva ga lata ekspeeryens ahn dehn praabli mi mek sohn mistayk. Stilyet, dehn mi dizerv rispek. Az di grayt chribyulayshan geh kloasa, wi wahn need fi pen pahn di eldaz eena wi kangrigayshan eevn moa fi gi wi dairekshan. Wen da taim kohn, wi mait kyaahn geh dairekshan fahn di werl hedkwaataz ahn di branch aafis nohmoh. Soh ih reeli impoatant fi laan fi lov ahn rispek wi eldaz now. Noh mata weh hapm, mek wi bee sensabl ahn noh foakos pahn di mistayk dehn weh di eldaz mait mek. Insted, wi waahn foakos pahn di fak dat Jehoava di gaid dehnya faytful bradaz chroo ih Son, Jeezas Krais.

12. How wi hoap protek wi tinkin?

¹² Jos laik how wahn helmit protek wahn soalja hed, wi hoap a salvayshan protek di way wi tink. Bikaaz wi ga schrang hoap, wi noa dat di tingz weh dis werl aafa noh wert notn. (Fil. 3:8) Wi hoap help wi fi stay kaam ahn bee sensabl, jos laik how ih mi help Wallace ahn Laurinda, weh serv da Africa. Wallace pa mi ded, ahn Laurinda ma mi ded tu. Dehn mi looz too peepl weh dehn lov eena jos chree weeks. Pahn tap a dat, dehn kudn goh hoam fi bee wid dehn famili bikaaz a di COVID-19 pandemik. Wallace seh: “Insteda tink bowt how dehn mi stan bifoa dehn mi ded, di rezorekshan hoap help mi fi tink bowt how dehn wahn bee wen dehn geh rezorek. Dis hoap help mi fi feel kaam wen Ah di feel reeli sad ahn wen Ah di mis dehn bad.”

13. Weh wi ku du fi geh hoali spirit?

¹³ “Noh stap di hoali spirit fahn werk eena unu.” (1 Tes. 5:19) Di apasl Paal seh dat hoali spirit da laik wahn faiya weh deh eensaida wi. If wee ga Jehoava hoali spirit, den wi wahn eega fi du weh rait ahn wi wahn ga lata zeel fi werk haad fi Jehoava. (Roam. 12:11) Weh wi ku du fi geh hoali spirit? Wi ku pray far it, stodi Gaad Werd, ahn bee paat a Jehoava aaganaizayshan. Dis wahn help wi fi ga gud kwalitiz, weh da “di froot weh di hoali spirit bayr eena peepl.”—Gal. 5:22, 23.

14. Weh wi need fi du if wi waahn kantinyu ga hoali spirit? (Koment pahn di picha.)

¹⁴ Wen Jehoava gi wi ih hoali spirit, wi haftu du wi bes fi ‘noh stap di hoali spirit fahn werk eena wi.ʼ Jehoava onli gi ih hoali spirit tu peepl weh liv wahn hoali laif an avoid doti tinkin. Hihn wahn tek weh ih hoali spirit if wi kip di tink bowt doti tingz ahn du tingz weh rang. (1 Tes. 4:7, 8) If wi waahn kantinyu geh hoali spirit, wi noh fi “hayt di prafesi dehn.” (1 Tes. 5:20) Di werd “prafesi” eena dis kays di rifaa tu di mesij dehn weh Gaad gi wi chroo ih hoali spirit. Dis inklood prafesi weh taak bowt Jehoava day ahn di seeryos taim weh wi liv eena. Wi noh waahn tink er ak laik Jehoava day, er Armagedon, noh deh kloas. Insted, wi waahn liv wi laif eena wahn way weh shoa dat wi ekspek it fi kohn soon. Wi du dis wen wi stay bizi di ‘kip wi kandok hoali ahn shoa dat wi faytful tu Gaadʼ evri day.—2 Peet. 3:11, 12.

15. How 1 Tesaloanyanz 5:21 ku help wi fi noh geh fool op bai Saytan lai dehn?

¹⁵ Soon, Gaad enimi dehn wahn mek wahn anonksment dat “wi di liv eena pees ahn wi sayf!” (1 Tes. 5:3) Saytan an ih deemonz wahn deh bihain dis big lai, ahn peepl aal oava di werl wahn geh fool op. (Rev. 16:13, 14) Yu tink dis wahn fool Jehoava peepl tu? Dis noh wahn hapm tu wee if wi “chek [er, “tes”] evriting fi mek shoar ih karek.” (Reed 1 Tesaloanyanz 5:21; si di stodi noat dehn eena di Study Bible.) Di Greek werd weh geh chranslaytid az “chek evriting” di rifaa tu how peepl yoostu chek metal laik goal ahn silva fi mek shoar dehn reel. Saym way soh, wi need fi mek shoar dat wi chek evriting weh wi reed er hyaa. Dat mi impoatant fi di peepl da Tesalonaika, an ih wahn bee eevn moa impoatant fi wee az di grayt chribyulayshan kohn kloasa. Insteda bileev evriting weh peepl seh, wi waahn chek ahn mek shoar dat weh wi di hyaa ahn reed goh lang wid weh di Baibl ahn Jehoava aaganaizayshan teech. Da way deh, wi noh wahn geh fool op bai eni a Saytan an ih deemon dehn lai.—Prov. 14:15; 1 Tim. 4:1.

16. Wat da wi hoap, ahn weh wi shuda mek op wi main fi du?

¹⁶ Wi noa dat Jehoava peepl wahn servaiv di grayt chribyulayshan az wahn groop. Bot wi noh noa weh tumaaro wahn bring fi eech wan a wi. (Jay. 4:14) Ih noh mata if wi liv chroo di grayt chribyulayshan er if wi ded bifoa ih kohn, kaaz Jehoava wahn stil bles wi wid evalastin laif az lang az wi stay faytful. Di anointid wahn deh da hevn wid Jeezas, ahn di ada sheep wahn liv eena Paradais pahn ert. Mek wi foakos pahn wi wandaful hoap an aalwayz bee redi fi Jehoava day!