“Yu Wahn Deh Wid Mi Eena Paradais”

 1. Lee bit bifoa Jeezas ded, weh hihn mi tel di kriminal weh mi deh bisaid ahn? (Look 23:39-43)

JEEZAS ahn di too kriminal bisaid ahn mi sofa wahn lat bifoa dehn ded. (Look 23:32, 33) Dehnya too man mi-di insolt op Jeezas, soh fi shoar dehn da neva fi hihn disaiplz. (Mach. 27:44; Maak 15:32) Bot wan a dehn mi chaynj ih atichood. Hihn mi seh: “Jeezas, memba mi wen yu get eena yu Kingdom.” Den Jeezas tel ahn: “Ah di pramis yu tudeh, yu wahn deh wid mi eena Paradais.” (Reed Look 23:39-43.) Bot dehn noh ga no proof dat dis kriminal mi bileev di mesij bowt “di Kingdom a di hevn” weh Jeezas mi preech joorin ih minischri. Ahn Jeezas neva did seh dat di man mi wahn bee paat a di Kingdom da hevn. (Mach. 4:17) Jeezas mi-di taak bowt di Paradais weh wahn deh pahn ert eena di fyoocha. How wi noa dis?

 2. How wi noa dat di kriminal weh mi chaynj ih atichood da-mi wahn Joo?

² Ih pasabl dat di kriminal weh mi chaynj ih atichood da-mi wahn Joo. Hihn mi tel di neks kriminal: “Yoo noh frayd fi Gaad non ataal? Yoo di geh di saym kaina jojment laik hihn.” (Look 23:40) Di Jooz mi wership onli wan Gaad, bot peepl weh da neva Joo mi wership lata gaadz. (Ex. 20:2, 3; 1 Kor. 8:5, 6) If dehndeh kriminal da neva Joo, di kweschan mi wahn praabli bee sohnting laik, “Yoo noh frayd fi di gaad dehn non ataal?” Ahn memba, Gaad mi sen Jeezas tu “di peepl a Izrel weh da laik sheep weh laas,” noh tu peepl weh da noh Joo. (Mach. 15:24) Ahn Gaad mi mek di Izrelait dehn noa dat hihn mi wahn bring peepl bak tu laif. Di kriminal weh mi chaynj ih atichood mi praabli noa dis, bikaaz weh hihn mi seh shoa dat hihn mi bileev dat Jehoava mi wahn rezorek Jeezas fi rool az King a Ih Kingdom. Soh ih luk laik di man mi-di hoap dat Gaad mi wahn rezorek hihn tu.

 3. Weh yu tink di kriminal weh mi ripent mi-di tink bowt wen Jeezas menshan Paradais? Pleez eksplayn yu ansa. (Genesis 2:15)

³ Bikaaz di kriminal da-mi wahn Joo, fi shoar hihn wuda mi noa bowt Adam ahn Eev ahn bowt di Paradais weh Jehoava mi put dehn eena. Soh hihn mi praabli bileev dat di Paradais weh Jeezas mi taak bowt mi wahn bee wahn byootiful gyaadn rait ya pahn ert.—Reed Genesis 2:15.b

 4. Weh di werdz weh Jeezas mi tel di kriminal shuda mek wi tink bowt?

⁴ Di werdz weh Jeezas mi tel di kriminal shuda mek wi tink bowt weh laif wahn bee laik eena Paradais. Sohnting weh ku help wi da fi tink bowt di peesful way how tingz mi stan joorin Salaman roolaship. Di Baibl seh dat Jeezas da sohnbadi grayta dan Salaman. Soh wi ku ekspek dat Jeezas wahn werk lang wid di anointid Kristyanz fi mek di ert wahn byootiful Paradais. (Mach. 12:42) Dat da wai di “ada sheep” shuda waahn laan weh dehn need fi du soh dat dehn ku liv fareva eena Paradais.—Jan 10:16.

 5. Weh yoo tink laif wahn bee laik eena Paradais?

⁵ Weh yoo tink laif wahn bee laik eena Paradais? Maybi yu wuda tink bowt wahn byootiful paak laik di gyaadn a Eedn. (Gen. 2:7-9) Er yu memba di prafesi weh Maika mi rait bowt Gaad peepl weh seh dat “eech wan a dehn wahn sidong anda ih oan vain ahn anda ih oan fig chree.” (Mic. 4:3, 4) Yu praabli tink bowt di vers dehn weh taak bowt how dehn wahn ga lata food pahn ert. (Ps. 72:16; Isa. 65:21, 22) Soh now yu di imajin yuself eena dis byootiful gyaadn. Yu di sidong da wahn taybl weh ful op a nais food, ahn yu ku smel di flowaz ahn plaants rong yu. Ahn da laik yu ku eevn hyaa yu famili ahn frenz di injai dehnself ahn di ga wahn gud taim, inkloodin som weh geh rezorek. Aala dis da noh wahn jreem. Wee ku bee shoar dat dehnya tingz wahn hapm rait ya pahn di ert. Pahn tap a dat, eena Paradais wi wahn ga werk fi du weh wi wahn injai.

 6. Weh kaina werk wi wahn injai eena Paradais? (Koment pahn di picha.)

⁶ Jehoava mek wi soh dat wi ku injai di werk weh wi du. (Eccl. 2:24) Fi shoar wi wahn bizi joorin Krais Towzn-Yaa Rool. Dehn wan weh servaiv di grayt chribyulayshan ahn di milyanz a peepl weh wahn kohn bak tu laif wahn need food, kloaz, ahn wahn plays fi liv. Ih wahn tek lata werk fi help dehn geh di tingz weh dehn need, bot ih wahn bee werk weh wi wahn injai. Jos laik how Adam ahn Eev mi sopoas tu tek kyaa a di gyaadn a Eedn, saym way soh, wee wahn ga di privilij fi mek dis ert bee wahn paradais. Aalso, imajin humoch wi wahn injai teech milyanz a peepl bowt Jehoava ahn fi hihn perpos. An ih wahn bee wahn amayzin taim wen wi tel faytful peepl weh mi liv lang bifoa Jeezas kohn pahn ert bowt aal weh mi hapm wail dehn mi ded!

 7. How Salaman roolaship help wi fi noa weh Paradais wahn bee laik?

⁷ Wi noa fi shoar dat eena Paradais wi wahn ga pees, aada, an evriting weh wi need. Wai wi seh dat? Bikaaz wen wi reed bowt Salaman roolaship, Jehoava help wi fi si weh laif wahn bee laik wen ih Son rool.

 8. How Psalm 37:10, 11, 29 mi kohn chroo eena di paas? (Si di “Kweschanz Weh Peepl Aks” aatikl eena dis saym magazeen.)

⁸ Jehoava hoali spirit mi mek King Dayvid rait bowt weh laif mi wahn bee laik wen wahn waiz ahn faytful king rool. (Reed Psalm 37:10, 11, 29.)c Yoozhwali, wen wi di taak tu peepl bowt Paradais, wi wuda reed Psalm 37:11. An ih mek sens fi mek wi du dat sins Jeezas ihself mi koat dis skripcha eena ih Sermon Pahn di Mongt. Da way deh hihn mi shoa dat dis pramis mi wahn kohn chroo eena di fyoocha tu. (Mach. 5:5) Bot weh Dayvid mi rait aalso mi-di rifaa tu weh laif mi wahn bee laik joorin Salaman roolaship. Joorin da taim, Gaad peepl mi ga pees an evriting weh dehn mi need eena di lan weh mi “ful op a milk ahn honi.” Gaad mi seh: “If unu kantinyu fi fala mi inschrokshan dehn . . . , Ai wahn mek unu ga pees eena di lan, ahn nobadi wahn mek unu feel frayd wen unu goh sleep.” (Lev. 20:24; 26:3, 6) Dehndeh pramis mi kohn chroo wail Salaman mi rool az king a Izrel. (1 Chron. 22:9; 29:26-28) Aalso, Jehoava mi pramis dat wikid peepl “wahn geh dischrai.” (Ps. 37:10) Aala dis mek wi noa dat Psalm 37:10, 11, 29 mi kohn chroo eena di paas ahn dat ih wahn kohn chroo eena di fyoocha.

 9. Weh di kween a Sheeba mi seh bowt Salaman roolaship?

⁹ Di kween a Sheeba mi geh fi hyaa bowt di pees an evriting weh di nayshan a Izrel mi-di injai wen Salaman mi-di rool. Dis mi mek di kween chravl fahn faar fi reech Jeroosalem fi si wid ih oan too aiy weh aal Salaman mi-di du. (1 Ki. 10:1) Afta shee mi geh fi si how Salaman kingdom mi-di fongshan, shee seh: “Ah neva eevn geh di hoal stoari! . . . Yu peepl ahn yu servant dehn onli hapi bikaaz dehn aalwayz get fi deh rong yoo ahn fi lisn tu yu wizdom!” (1 Ki. 10:6-8) Bot di tingz weh di nayshan a Izrel mi injai wen Salaman mi-di rool da-mi jos wahn tays a aal di tingz weh Jehoava wahn du fi wee wen Fi Hihn Son, Jeezas, staat tu rool.

10. Wai Jeezas grayta dan Salaman?

¹⁰ Jeezas grayta dan Salaman eena evri way. Salaman neva perfek an ih mi mek sohn seeryos mistayk weh mi kaaz wahn lata prablem fi Gaad peepl. Bot Jeezas da wahn perfek Roola weh noh mek no mistayk. (Look 1:32; Heeb. 4:14, 15) Jeezas mi stay faytful tu Gaad eevn doa Saytan mi put ahn anda sohn haad tes. Krais shoa dat hihn wuda neva sin er du eniting weh wuda afek di peepl anda ih roolaship. Hihn da di bes King wee kuda eva gat!

11. Hoo wahn help Jeezas fi rool oava di ert?

¹¹ Jeezas wahn werk lang wid di 144,000 anointid Kristyanz, ahn dehn wahn tek kayr a evribadi ahn mek Jehoava perpos fi di ert kohn chroo. (Rev. 14:1-3) Dehn wahn ku andastan weh peepl pahn ert goh chroo, bikaaz dehn yoostu liv rait ya pahn ert ahn sofa chroo haad taimz tu. Bot weh werk dehnya anointid Kristyanz wahn akchwali du?

12. Weh werk Jehoava wahn gi di 144,000 fi du?

¹² Jeezas ahn di anointid Kristyanz wahn ga wahn lat moa werk fi du dan weh Salaman mi ga fi du. King Salaman mi onli haftu tek kyaa a di milyanz a peepl weh mi liv da Izrel. Bot, dehnya wanz weh wahn di rool eena Gaad Kingdom wahn help bilyanz a peepl weh liv aal rong di werl. Dat da wahn grayt privilij weh Jehoava gi di 144,000 fi chroo!

13. Weh speshal rispansabiliti di anointid wahn gat?

¹³ Jos laik Jeezas, di 144,000 wahn rool az king ahn serv az prees. (Rev. 5:10) Wen di Izrelait dehn mi haftu obay di Laa weh Gaad gi Moaziz, di prees dehn mayn rispansabiliti da-mi fi help di peepl fi ga gud helt an aalso fi help dehn fi stay kloas tu Jehoava. Di Laa da-mi laik wahn “shado a di gud tingz weh fi kom.” Soh wi ku seh dat Jeezas ahn di anointid wahn aalso help Gaad peepl fi stay helti ahn kloas tu Jehoava. (Heeb. 10:1) Wi noh noa egzakli how dehnya king ahn prees wahn taak tu di wanz weh liv rait ya pahn ert. Bot wi ku bee shoar dat wateva Jehoava du, dehn wan weh liv pahn di Paradais rait ya pahn ert wahn geh di dairekshan weh dehn need.—Rev. 21:3, 4.

14. Wat da di rilayshanship bitween di “ada sheep” ahn di “lee flak”?

¹⁴ Jeezas mi kaal dehn wan weh wahn rool wid ahn “mi lee flak.” (Look 12:32) Hihn mi aalso taak bowt wahn nada groop weh ih kaal di “ada sheep.” Dehnya too groop werk tugeda az wan flak. (Jan 10:16) Tudeh, dehndeh too groop di werk eena yooniti, ahn dehn wahn stay yoonaitid az di ert geh fi bee wahn paradais. Wen da taim kohn, di wan dehn weh mek op di “lee flak” wahn don deh da hevn, ahn di “ada sheep” wahn di injai laif pahn ert wid di hoap fi liv fareva. Bot dehn ga tingz weh di “ada sheep” haftu du now soh dat dehn ku kwalifai fi liv eena Paradais.

15. (a) How di “ada sheep” sopoat Krais anointid bradaz? (b) How yoo ku kapi di egzampl a di brada weh deh eena di faarmasi? (Koment pahn di picha.)

¹⁵ Di kriminal weh mi ripent neva ga di chaans fi shoa humoch ih mi tankful fi weh Jeezas mi du far ahn. Pahn di ada han, wee weh da paat a di “ada sheep” ga lata apachooniti fi shoa how wi feel bowt weh Jeezas du fi wee. Fi egzampl, wi shoa Jeezas dat wi lov ahn bai di way how wi chreet fi hihn anointid bradaz. In fak, Jeezas mi seh dat bays pahn dat, hihn wahn joj ahn noa hoo da ih sheep. (Mach. 25:31-40) Wan way wee sopoat di 144,000 da wen wi eega fi help dehn eena di preechin werk ahn wen wi teech adaz fi bee fi hihn disaiplz. (Mach. 28:18-20) Dat da wai wi waahn yooz di Baibl stodi toolz weh wi gat, laik di Injai Laif Fareva! buk. If yu noh di kandok wahn Baibl stodi wid sohnbadi rait now, chrai mek it yu goal fi aafa wahn Baibl stodi tu az moch peepl az pasabl.

16. Weh wi need fi du now fi bee redi fi liv anda Gaad Kingdom?

¹⁶ Wi noh waahn wayt fi bee di kaina persn weh Jehoava waahn fi liv da Paradais. Fahn now wee ku werk haad fi bee aanis eena weh wi seh ahn du, ahn fi ga self-kanchroal eena evriting. Ahn wi ku bee laayal tu Jehoava, tu wi marij mayt, ahn tu wi bradaz ahn sistaz. If wi obay Jehoava fahn now eena dis wikid werl, ih wahn bee eeziya fi mek wi obay ahn wen wi liv eena Paradais. Wi ku aalso divelop skilz ahn ga gud habits weh shoa dat wi di geh redi fi wen wi liv eena Paradais. Yu ku fain sohn egzampl eena di aatikl “Yoo Redi fi Wen Gaad ‘Gi Wi di Ertʼ?” eena dis saym magazeen.

17. Wai wi shudn alow wahn sin weh wi komit eena di paas fi diskorij wi?

¹⁷ Aalso, wi shuda chrai haad fi let goh a eni gilt weh wi ga fi seeryos sinz weh wi komit eena di paas. Bot, wi wuda neva waahn tink dat bikaaz wi ga di ransom sakrifais ih aarait fi mek wi “kip aan di sin.” (Heeb. 10:26-31) Wi ku bee shoar dat if wi reeli sari fi di seeryos sin weh wi komit, aks Jehoava ahn di eldaz fi help, ahn chaynj wi kandok, Jehoava wahn fergiv wi. (Isa. 55:7; Aks 3:19) Memba weh Jeezas mi tel di Farisee dehn: “Ai kohn fi sayv sinaz, noh raichos peepl.” (Mach. 9:13) Memba dat di ransom sakrifais ga di powa fi kova aala wi sin dehn.

18. Weh yoo wuda waahn taak bowt wid di kriminal weh mi ded langsaid Jeezas?

¹⁸ Yoo ku si yuself eena Paradais di taak tu di kriminal weh mi taak tu Jeezas? Fi shoar di too a unu wahn taak bowt how graytful unu graytful fi Jeezas sakrifais. Yoo praabli wuda aks ahn bowt weh mi hapm joorin di laas fyoo owaz a Jeezas laif pahn ert ahn how hihn mi feel wen Jeezas ansa ahn. Maybi hihn mait aks yoo weh ih mi feel laik fi liv joorin di laas dayz a Saytan sistem. Ih wahn bee wahn grayt privilij fi stodi Gaad Werd wid peepl laik hihn!—Ifee. 4:22-24.

19. Wai ih noh wahn bee boarin fi liv eena Paradais? (Koment pahn di picha pahn di kova.)

¹⁹ Laif eena Paradais wahn neva bee boarin. Wi aalwayz wahn ga lata inchrestin peepl fi geh fi noa ahn lata gud werk fi du. Bot di bes paat wahn bee fi geh kloasa tu wi Faada, Jehoava, an injai aal di gif weh hihn gi wi. Bot wi wahn neva stap laan bowt Hihn an aal weh ih mek. Evri day wi wahn lov Gaad moa ahn moa. Wi reeli tankful tu Jehoava ahn Jeezas fi gi wi di pramis a evalastin laif eena Paradais!