Luagu saragu dan, hámarügüñein meha ha awinwandubaña luma yágüta sielu, gamadagua lan Heowá. Dan lárigiñe, aba ladügüniña Heowá gürigia ani aba giñe lagunbirahaniña tidoun likianpun. Ru lumuti giñe Heowá chansi le houn fiu lubúeingu ha úaraguabaña kéiburi Enoku, Noé, Abüraámü luma Hobu. Ani ariñagatu Bíbülia lumadagu lan meha Heowá hagía (Agu. 5:24; 6:9; Hob. 29:4; Isa. 41:8). Lau lásügürün dan, sigiti Heowá agunbirahaña lumadagu lun haganóun liñúarü (Ese. 37:​26, 27). Arufudati profesía le, weiri lan labusenrun Bungiu lun gamadagua hamá lubúeingu ha úaraguabaña luma. Ariñagati meha Heowá: “Nadügüba aban daradu hama lun nachoururun aban ibagari darangilati houn”. Lagunfuliruba meha dimurei le lau hóundarun kristiánugu ha hemenigibaña hawinwandun ubouagu hamoun kristiánugu anuadirúaaña lun heseriwidun úara liñúarü Heowá, kamá hamuga lídanñanu “aban fárüga” tidan aban kianpu (Huan 10:16). Ani lagunfuliruña profesía le uguñe weyu. w24.06 páh. 2 pár. 2, 4; páh. 3 pár. 5

Sun wagía ha lubúeingu Heowá, ídehatiwa tídangiñe sun wanigi lun lawanserun Larúeihan Bungiu ani lun wadügüni katei le, mégeitiwa ganigi (Mat. 6:33). Lidan dan le, mégeitiwa giñe ganigi lun gaganbadi wamá lun lilurudun Heowá luma lun wapurichihani uganu buiti luáguti Larúeihan. Uguñe weyu, hénrengutimarügaali lun aban gürigia lun mádaragun lan lungua lidoun katei lánina ubóu le ladüga wéiritimahali fánreinguaü hadan gürigia (Huan 18:36). Adügati katei le lun hagagibudagun saragu gefentiña luagu Heowá luma turobuli lánina maseinsuni, lagayuahóun hawagu o hadaürǘn ladüga hamahadun hídehan lidan katei lánina polítika o ladüga hamahadun lun hasudarahan. Ruti erei luma ganigi woun wasubudiruni luagu hénpulu lánina erei luma ganigi le harufudubei íbirigu ha luéigiñebaña lóubadina Larúeihan Bungiu. Lau ganigi máhati meha Hesusu lun ládaragun lungua lidoun polítika le lábugiñebei lagumadihan Satanási. (Mat. 4:​8-11; Huan 6:​14, 15) Súnwandan afiñe lan líchuguba lan Heowá ganigi lun. w24.07 páh. 3 pár. 4; páh. 4 pár. 7

Lau sun weiri lan lirun abahüdaguni le, adügaali Heowá lun labürüdǘn wabá tidan Bíbülia lun gunfuranda wamá aban lueirin inarüni: ka lan uagu weiri lubéi liyereegun figóu lun. Dísegüda lumutiwa figóu luéi Wáguchi hínsiñehabuti le siélubei ani figouméme lébunabei wóunwegun (Isa. 59:2). Ani ladügatima dísegüda lániwa figóu luéi Heowá, hanarime lubéi línsiñe figóu lun ánheli wuribati le adügagubei lungua Satanásime. Ligía meha lébunabei línchahani Mafia Adán tuma Ewa lun hafigounhan ani ligía giñe anihagua lubéi áluga lóuchaguniwa lun wábürühan lidoun figóu. Másiñati meha samina lan Satanási gáñeihali lan lau le ladügübei lidan fuluri-agei Edén. Le ibidiñebei lun, mama lan murusun ínsiñeni le lasandirubei Heowá. Masansirun lumuti Bungiu le labusenrubei houn ladügawagun Adán tuma Ewa. Hínsiñetiña gürigia lun Heowá, ligía weyuméme lubéi le lafigouhanbei Adán, aba líchugun Bungiu emenigini houn sun gürigia (Rom. 8:​20, 21). Subudi lumuti meha Heowá ñéinbaña lan gürigia ha hínsiñehabutiña lun hadan ladügawagun Adán ani háluahabei lan lídehan lidan hageindagun luma figóu. Keiti le aban lan Úguchili hínsiñehabuti Heowá ani ligía adügübaliwa, ladügübei meha sun liyaraati lun gayara lan wayarafadun lun luma lun wagañeiruni figóu luma óunweni. w24.08 páh. 3 pár. 3, 4