Ibidiñeti woun ida luba lan lagunfulirun fiu lídangiñe profesía le tídanbei Bíbülia (Dan. 12:8, 9). Lau sun lira, íbini ua lan gunfuranda wamani sunsuinagubei ida luba lan lagunfulirun aban profesía, úati mini lan lira magunfulirunbei lan. Chouru wamuti luagu ariñageina lubéi lan Heowá le wemegeirubei wasubudirun woun, lidan dan le wemegeirubei wasubudiruni, ítara kei ladügüni lidan dan le sügühalibei. Hariñaguba néchanigu: “Lídanñein darangilaü luma achoururuni sun katei” (1 Tesa. 5:3). Ábameti hábürühan urúeigu ubouaguna tuagun sun relihión to mama inarünitu ani ábame hagumuchun tau sunsuinagubei (Aruf. 17:16, 17). Lárigiñe, ábame hábürühan hawagun lumutuniña Bungiu (Ese. 38:18, 19). Ábameti lagumeserun Arümahedón le lagumuhóun wuribu (Aruf. 16:14, 16). Chouru wamuti lagunfuliruba lan katei le yarafa madise. Lubaragiñe lasuseredun, lunti wasigirun arufuda eteingiruni lun Wáguchi le siélubei lau wetenirun lun lagunfulirun profesía le tídanbei Bíbülia, íderagua wamañame amu gürigia lun hadügüni ligiaméme. w23.08 páh. 13 pár. 19, 20

Dan meha le layanuhanbei apostolu Pábulu luagu lubuidun burí igaburi lánina afiñeni, emenigini luma ínsiñeni, gumuti ariñageina: “Ínsiñeni, wéiritimabei lídangiñe ǘrüwagubei” (1 Ko. 13:13). Ka uagu lariñagei katei le? Ladüga lídanme iseri ubóu, memegeirunhadiwame wafiñerun luagu le füramase lubéi Bungiu libügürü, gúnfulihalimega emenigini le. Ánheinti ínsiñeni, súnwandan mégeibadiwa lan lun warufuduni dandu luagu Heowá kei houn gürigia wáledi. Ani aganwoundeina luba ínsiñeni le lun súnwandan dan. Dan le warufudun ínsiñeni, warufuduña kristiánugu wamá ha inarünitiña. Ariñagati meha Hesusu houn lani apostolugu: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:35). Lanwoun lira, adügati ínsiñeni lun lidan wamá aban. Ligía meha lariñagunbei Pábulu ínsiñeni lan “íchugubalin sun katei lidan aban” (Kol. 3:14). Abürühati meha apostolu Huan houn líbirigu kristiánugu: “Le hínsiñehabuti lun Bungiu, lunti giñe hínsiñe lan líbiri lun” (1 Huan 4:21). Ligíati, dan le warufudun ínsiñeni houn wábirigu, warufuduña giñe ínsiñeni lun Heowá. w23.11 páh. 8 pár. 1, 3

Ariñagatu Bíbülia ítara liña lan wabagari keisi kristiánugu kei aban éibaaguni. Hame agumuchuti éibaaguni le, heresibirubei ibagari magumuchaditi keisi afayeiruahaü (2 Tim. 4:7, 8). Mosu wáfaagun saragu lun wasigirun lidan éibaaguni le ladüga yarafatimahadiwa lidoun lébeha. Írida lumuti meha apostolu Pábulu ka lan gayaraabei líderaguniwa lun wachülürün. Ariñagati: “Gidá waméi sun le eredehabaliwa wawariua […], adüga waméi éibaaguni le wabaabei lau erei”. Mariñagunti Pábulu manügünbadiwa lan ni kata, le lariñagubei, lunti lan wagidaruni furumiñeguarügü anügüni le memegeirun wamuti wawariua. Ladüga adügati burí ihürügu le lun hámaru lan wéibaagun luma lun labuchadun wawagu. Lun wasigirun lidan éibaaguni le, lunti warihini anhein wanügüña lubéi somu anügüni le memegeirun wamuti, ígiragüda wamaamugei lau lóufudagun. Ánheinti anügüni le wemegeirubei, siñati wígiruni. Anhein hamuga wígira, gayaraabei wasagarún lídangiñe éibaaguni (2 Tim. 2:5). w23.08 páh. 26 pár. 1, 2