Luagu-ǘrüwa 27 lidan ǘrüwa-hati
Áluaha huméi Larúeihan luma liricha Bungiu furumiñe (Mat. 6:33).
Dan meha le lóunwenbei Hesusu, aba meha hasandirun lani disipulugu aban lanarime íruni. Mámarügüñein meha hamada le hínsiñebei houn heferidira, féridi hamuti giñe hemenigin (Luk. 24:17-21). Danti le larufudagunbei Hesusu lungua houn lárigiñebei láguyugun, sügǘ ligía dan hama, aba lafuranguagüdüni houn lagunfuliruñein lan meha profesía le tídanbei Bíbülia. Ani ruti aban dasi súdiniti houn (Luk. 24:26, 27, 45-48). Danti le lamudeirunbei sielun, sánsihali meha íruni le hasandirubei lani disipulugu lun ugundanime. Gúndaatiña meha lau hasubudiruni wínwanyaali lan Hamaisturun ani líderagubaña lan agunfulira lau iseri hadasin. Ínchaha lumutiña ugundani ligía lun mararamagun lan halawahani Heowá (Luk. 24:52, 53; Adü. 5:42). Lun wáyeihaniña lani Hesusu disipulugu, mosu wíchuguni Larúeihan Bungiu furumiñe lidan wabagari. Ani lau sun megei wamá awanduni lun mararamagun lan weseriwidun lun Heowá, füramaseti woun ánhawa lan adügei labinirubadiwa lan saragu (Ari. 10:22). w23.01 páh. 31 pár. 15, 16
Taliihóun Bíbülia lubá Aritaguagülei: (Sügǘ le anügübei fulasu wéyuagu: 16 lidan hati nisán) Márükosu 16:2-8
Luagu-gádürü 28 lidan ǘrüwa-hati
Basaliraguayaba múame (Agu. 3:19).
Chóuruti mabusenrun wamá lun lasuseredun woun kei meha lasuseredun lun Adán luma tun Ewa, adián? Lun méiguadun wamá lidoun ligiaméme charati, mosu wasubudiruni Heowá buidu, línsiñedun ligaburi woun ani áfaagua wagíame lun gunfuranda wamani ligaburi lisaminan. Anhein wadüga, chóuruti laganwounduba lan ínsiñeni le wasandirubei luagu. Samina wamá luagun Abüraámü. Le meha lúgubu sandí lan Abüraámü aban óunwenbu ínsiñeni luagu Heowá le Lubungiute. Mebedaagunti meha Abüraámü lun Heowá ni íbini dan le hénrengu lubéi lun lun gunfuranda lani ka lan uagu lamuriaha Heowá luma lun ladügün ítaga katei. Adügarügü lumuti sun liyaraati lúntima lasubudiruni Heowá. Kéiburi dan meha le líchugunbei Abüraámü fe saminaali lan Heowá lagumuchun lau uburugu Sodoma luma Gomora. Furumiñe, hanufudeti meha Abüraámü lagünrinchagubaña lan Aguseragüdüti le Íñugutimabei lidan sun ubóu ha madurunbaña úara hama ha wuribabaña. Güreweiti meha lun Abüraámü lasaminarun ladügüba lan Bungiu aban katei ítarati, ligía ladügünbei fiu álügüdahani lun Bungiu lau saragu ǘnabuguni. Óunaba lumuti meha Heowá kada aban lídangiñe álügüdahani ligía lau gaguraasuni. Lásurunbei layanuhan Abüraámü luma Heowá, aba gunfuranda lani Abüraámü ariha lani Heowá le tídanbei hanigi gürigia ani maweiyasunbei lan agünrinchaguaña ha madurunbaña úara hama ha wuribabaña (Agu. 18:20-32). w22.08 páh. 28 pár. 9, 10
Wándaradi 29 lidan ǘrüwa-hati
Gürigia le gafiñerúadibei luagu mabahüdahan lumuti houn amu le ariñawagúbei lun (Ari. 11:13, TNM).
Lidan meha irumu 455 lubaragiñe lidaani Kristu, lárigiñe lábunawagunya lubarieirun Herusalén, aba líchugun gumadimati Heremíasi dasi houn fiu wügüriña ha gayaraati lafiñerúniwa hawagu lun hóunigiruni uburugu. Ananíasi aban hádangiñe, le meha gumadanbei Palasiurugu. Ariñagatu Bíbülia luagu Ananíasi: “Aban wügüri le gayaraabei lemenigidúniwa luagu, ani inebehabuti lun Bungiu sügǘ hau saragu gürigia” (Nee. 7:2). Ínsiñeni le lasandirubei Ananíasi luagu Heowá luma mabusenrun lan ladügün aban katei le auti magundan lan Heowá, ligía ínchahabalin lun lóunigiruni sun dasi le ichugúbei lun buidu. Líderagubadiwa giñe igaburi le lun lubúeingu wamá Bungiu ha gayaraati lafiñerúniwa hawagu. Ariha waméi likesin Tíkiku, aban meha lupaaná apostolu Pábulu le uágubei gayara lan lafiñerúniwa. Íderagua lumuti meha Tíkiku Pábulu darí lun lariñagun luagu aban lan iduhei le “íderagubaliwa buidu lidan luadigimari Wabureme” (Efe. 6:21, 22). Mámarügüñein meha lun lanügünu Tíkiku gárada houn kristiánugu ha Éfesubaña luma houn ha Kolosabaña lafiñera Pábulu luagu, afiñeti meha giñe luagu lun líchugun dǘgüdaguaü luma gurasu houn íbirigu burí ha. Haritaguagüda lumutiwa Tíkiku hawagun wügüriña úaraguatiña ani gafiñerúaditi hawagu ha íderagubaliwa óunigirei wamadagua luma Heowá uguñe weyu (Kol. 4:7-9). w22.09 páh. 9, 10 pár. 5, 6