Jun kʼakʼakʼ kichiʼil ri Molaj Ukʼwäy Bʼey

RI NMAQʼAʼ rchë ri miércoles 24 de enero, 2018, xyaʼöx jun utziläj rutzjol pa Betel rchë Estados Unidos chqä Canadá: xbʼix chë ri qachʼalal Kenneth Cook xok jun chkë ri Molaj Ukʼwäy Bʼey kichë ri Testigos de Jehová.

Ri qachʼalal Cook xaläx chqä xkʼïy pa tinamït Pensilvania (Estados Unidos). Jubʼaʼ ma nuʼän graduar riʼ rchë ri diversificado xtamaj ri kantzij chrij le Biblia rkʼë jun rachiʼil pa tijobʼäl. Pa 7 de junio, 1980, xqasäx pa yaʼ. Pa 1 de septiembre, 1982, xutikirsaj ru-precursorado regular. Kaʼiʼ junaʼ chrij riʼ, xskʼïx rchë xbʼesamäj pa Betel. Xutikirsaj rusamaj pa Wallkill (Nueva York) pa 12 de octubre, 1984.

Ri qachʼalal Cook 25 junaʼ xjeʼ Wallkill. Chkipan ri junaʼ riʼ ryä jalajöj ruwäch samaj xeruʼän pa imprenta chqä pa Oficina rchë Betel. Pa junaʼ 1996 xkʼuleʼ rkʼë jun qachʼalal ri rubʼiniʼan Jamie, ri xskʼïx chqä rchë xbʼesamäj Wallkill. Pa diciembre, 2009, xeqʼaxäx Patterson, pa Centro Educativo rchë ri Watchtower. Chriʼ ri qachʼalal Cook xyaʼöx pa departamento rchë Correspondencia rchë Redacción. Pa abril, 2016, taq ye kʼo wä Wallkill rma xejeʼ chik jun tiempo chriʼ, ri qachʼalal Cook xetaq pa Betel rchë Brooklyn. Y woʼoʼ ikʼ chrij riʼ xetaq pa Betel rchë Warwick. Pa enero, 2017, ri qachʼalal Cook xok jun chkë ri yetoʼö ri Comité rchë Redacción rchë ri Molaj Ukʼwäy Bʼey.