Tölöök Inhānga Kahūich Mëtiv

5 Hē Yēsū nö meuk yik tömaṙôngö, yônlö ngaich anga-aṅ nö ikui ök tö runglöre; ngaich ūichngöre nö ikui e ngaich yihtöre yik mahaköp nö in ò. 2 Kaknyöre ngaich anga-aṅ nö haköpten cha nö ngö ṙô:

3 “Töṙamölōn yip cha-a tarik, yip tö ha-euk nö hòṅ hachō-ovkūö tö ngam Tēv* pön Pūlngö cha min ngam halīöngö.

4 Töṙamölōn yip cha-a, yip tö haṙivölōn pò cha min nö teūngen tö inreuskö alahare.

5 Töṙamölōn yip cha-a, yip töyāichö ellōn pò cha min nö amīnuvö töng panam.

6 Töṙamölōn yip cha-a, yip tö ha-euk hēk töhaṙëhe nômö tö ngam lanöökö pò cha min nö hatöö-öiṙen.

7 Töṙamölōn yip cha-a, yip tö aṙē-ěvlōn pò cha min nö teūngen töm miṙēḵlōn.

8 Töṙamölōn yip cha-a, yip tö hëtö ellōn pò cha min nö meuk ngam Tēv.

9 Töṙamölōn yip cha-a, yip vamī lanāmö pò cha min nö kūön ngam Tēv invëka.

10 Töṙamölōn yip cha-a, yip tötlēḵkaṙen tö kūö nup tölöök la-enre, pön Pūlngö cha min ngam halīöngö.

11 Töṙamölōn man më-eṅ yēḵ yip tarik nö ötlēḵkö elnang meh, pōyen tī inrē nö hakihten meh, ṙōlkangen ṙô inrē nöng sūöchkö inlahen meh nöng minyôny-aṅ, kūö meh öm hòṅ tömkörit chu. 12 Ṙamölōn pöri yī-ö öi pōyen ṙanamölōn pön pōyen nup raneushö yīö tö halēnkaṙen el halīöngö, ngatī tī yik misī nö ötlēḵken yik pròfět yik mu-urēhĕkūö yīö.

13 Yī-ö yin sāl ngih panam, yěn öt köp pöri min ngam sāl nö haṙeihu, mihôiṅ öi min hēk öi vī-i e nö haṙeihu? Hö-ö! Höng öt yanööluṙen ngaich öi in e. Lökten öi kavalngen e nö el talöktu ngaich rööntu kui angū-ö tö tarik.

14 Yī-ö yin hanātö ngih panam. Panam mi-i kui rôngö töt hanyunngen. 15 Rö-ö yin vē tarik nö tōttökūö ëāṅvö ngaich ṙāten u nö elkatòh kuvôkö, ṙāten u pöri nö ikui mīs hòn meuk ngam hanātö yip taṙòkhöre tarik nö el patī. 16 Hòṅ ngatī mineūkö an ngam hanātö yīö nö ikūö yip tarik, hòṅ cha nö meuk nup tölöök la-en yīö, ngaich ha-öiny ngam Yöng yīö ngam aṅ el halīöngö.

17 Uh yin ngö lōn tö Chu, öich yamih öich fumlalngen në Chööngö hēk në ṙô yik Pròfět inrē. Hö-ö Chin fumlālö u öich yih, mahateungngen u pöri. 18 Tökò-òṙô Chin tö yīö, sā ngam halīöngö töng panam nö öthō nö chuhngöre, ngatī min nö öt hěng hang milôhò nup Chööngö, nö öthō nö öt teungtökūö. Urēhěkūö u nö chuhngöre, teung pöri min minë chööngö nö ṙòkhöre. 19 Lökten yěn hěngtak fumlal në tö rahëichyen chööngö, ngatī ṙô inrē nö haköptö yip tahëng ngaich ötkô min anga-aṅ nö kuhēthötre nö im Pūlngö ngam halīöngö,* ngòh kamëken u pöri, ngatī ṙô inrē nö haköptö yip tahëng, mihôiṅ min anga-aṅ nö kuhēthötre nö im Pūlngö ngam halīöngö.* 20 Ngö ṙô Chin tö yīö, yēḵ nup tölöök la-en yīö nö öt mötlö tö nup la-en yik kamūich hēk tö yik Feresī inrē höng öthō min yī-ö teunghöt öi kuhēthötre öi im Pūlngö ngam halīöngö.

21 Ngaich yin hang nuk ṙô tö ngö, nuk ṙô yik mā misī: ‘Uh man fël tarik, ngòh famël tarik pöri, hòṅ kētö sanapṙô öp kamhôṅka min anga-aṅ yěn hatöönö.’ 22 Ngö ṙô pöri Chū-ö tö yīö, ngòh mahayunkö kumnyah lōnre tö yip holmaneukre nö ellōnre, nö sā hanūṙökūö tameūiyö ngaich kihngen min anga-aṅ pön hòṅ kētö sanapṙô yip kamhôṅka. Ngòh tarik inrē tötlamëkôre tö holmaneukre, ṙônyö nup töchōich inrē ṙô nup tötkô nö ṙônyu tö hī nö löknyö rōi litāk hī ngaich hòṅ kētö sanapṙô u min anga-aṅ, nö el öp Tökiröng Chūök Kamhôṅka; öp tarik inrē öp tö ngö ṙô töp holmaneukre, ‘Më-eṅ tökulō-ovö tötkòlô tinrīken!’ ngaich tö hòṅ keuheūtngöre inhetngö min anga-aṅ nö ikūö öp tameūiyö.*

23 Lökten yěm kētö nup kahëtöre öm el ngam mīs ngam Tēv ngaich in e më-eṅ öm fē-ělre töre öm rahëichyen kumnyahlōn öm in öp holmaneukre, 24 ṙāḵtö ngam kahëtöre më-eṅ ikūö ngam mīs. Ngaich urěh kiröönngöre ngaich halāmö höö na-a tö holre ngaich möl öm yihtöre öm kētö ngam kahëtöre tökētu.

25 Ka-eūyen nan an halāmö höö tö ngam tökunyaha elmat tö meh yēḵ nā ṙömöng el talöökö hòṅ ngam tökunyaha elmat min tö meh nö öt kēten meh nö ikūö öp kamhôṅka. Ngaich ngam kamhôṅka min nö kēten meh öm eltī öp tarik tö mihôiṅ nö chaphöt meh öm el chēl. 26 Tökô-òṙô Chin tö meh, pöm öthō min öm ṙānyu öm ṙā-ang el chēl, hanöng saha meh öl keuheūtnyöre tī tö ṙāi re.

27 Ngaich yin hang nuk ṙô tö ngö, nuk ṙô yik mā misī: ‘Uh man asěha.’* 28 Ngö ṙô pöri Chū-ö tö yīö tö ngòh tarik töng mahaköp matre nö ngëichkö ngòh kikānö nö hòṅ lōnu tö ò, töp lökten minë mufē elkuilōn ò ngaich nöng ötlöng. Ngaich anga-aṅ nö töng keuheūten nö asěhkö ngam kikānö nö ellōnre. 29 Yēḵ ngam lāhāmö mat meh nö löknguṙen tī tö meh öm köölö fālen,* piôknyen e më-eṅ, ngaich marôvat tī öm kavalngen e. Ĕhten öp min yěn höng hěnghang öp tūmö alaha meh tökēnyu, kūöre nö ötkòlô, töp inlahen ngam alaha meh min yěn keuheūthötre nö kavalhötvö nö el chūök Ötinkòlô.* 30 Yēḵ ngam lāhāmö kël meh nö löknguṙen tī tö meh, öm köölö fālen* rökngen e më-eṅ ngaich marôvat tī öm kavalngen e. Ĕhten öp min yěn höng hěnghang öp tūmö alaha meh tökēnyu kūöre nö ötkòlô, töp inlahen ngam alaha meh min yěn keuheūthötre nö kavalhötvö nö el chūök Ötinkòlô.*

31 Ngö ök inrē ṙô misī, ‘ngòh ṙamā-ang pīhöre tö kikānö, ngaich hòṅ kē-ěkūö ò anga-aṅ töp tö kūichö inrēvngö.’ 32 Ngö ṙô pöri Chū-ö tö yīö, tö öp tarik ṙamā-ang pīhöre tö kikānö nö öt kūö ò nö asěhka* tö tahëng ngaich anga-aṅ nöng vamīten ò nö töng asěhka. Ngaich yěn ōt öp tö hòṅ pīhövö tö ngam tö ṙā-ayö kikānö ngaich min anga-aṅ nö töng ma-asěha.

33 Ngaich yin inrē öi hang nuk ṙô tö ngö, nuk ṙô yik mā misī: ‘Uh man kilēḵngôre yěm ötkô öm hateung nup ṙôre, hateungngö nup ṙôre pöri më-eṅ yěm kilēḵngôre öm ikūö Yāvē.’* 34 Ngö ṙô pöri Chū-ö tö yīö: Uh man chūöku ṙô kilēḵngôre, un rēhěn nö im halīöngö tön kantēra ngam Tēv an angū-ö; 35 un rēhěn nö ing panam tön ranöönöröön ò an angū-ö; un rēhěn nö i Yērūsalem, tön elpanam ngam tökiröng Rācha an angū-ö. 36 Un rēhěn im elkuire ṙô, tön rö-ö man kô hěng miköchö vahī tö tö-isoh hēk tösah keūyöre. 37 Hökngen nup ṙô yīö pöri nöng ‘tö Hòṅ’ hēk ‘tö Hö-ö’ pön höng ṙamā-ang in ngam Satān* nup tömööḵngöre tö u.

38 Hang nuk tö ngö yin ngaich ṙô: ‘Mat ṙënngen tö mat, kanap ṙënngen tö kanap.’ 39 Ngö ṙô pöri Chū-ö tö yīö: Uh man hòṅ havahalvahre in yip tötlöök, yěn hòṅ fatāk ngam lāhāmö arëkūö meh öp tarik, ngaich havöötö ngam lātavē arëkūö re më-eṅ hēk öm in ò. 40 Yěn tarīkuvö tö hòṅ chuh el chūök kamhôka, kūö ò nö hòṅ kēngö ngam inyut meh, kē-ěkūö ò më-eṅ inrē tö ngam vanön meh; 41 ngaich yěn ngö ṙô öp töhěngtak mā nö in meh, hěng kilomitör* rô-òlkūö man öm keun ngih kum chu tölangan, ngaich nët kilomitör rô-òlkūö më-eṅ öm holröön ò nö kiröön. 42 Kē-ěkūö öp mahavëkökūöre man, yēḵ ò nö havëkö* hötṙeh re nö in meh, um sōḵ öm kē-ěkūö ò.

43 Hang ök tö ngö yin ngaich ṙô: ‘Hangenlōn man tö holre ngaich kunyaha elmat tö yip tö kunyaha elmat tö meh.’ 44 Ngö ṙô pöri Chū-ö tö yīö: Hangenlōn yin tö yip tö kunyaha elmat tö yīö, yip tötlamëkôre tö yīö, örheūheu yī-ö öi vë-elkui cha, 45 yēḵ yīö min öi ngatī inlahen, ngaich hameuktöre yī-ö min öi kūön ngam Yöngre aṅ el halīöngö, kūö ò nö hayangtö mat ngam tavūöi nö ikui yip tölöök hēk tötlöök inrē, tīntö ngam kumṙah nö ikui yip tölöök hēk tötlöök inrē. 46 Pò yīö min yēḵ yīö höng hangenlōn tö yip töhangenlōn töre asuh öp min raneushö yīö, yěi ngatī? Hö-ö aich vē mahamūl ṙāi kinëhöt chehen nö ngatī inlahen? 47 Yēḵ yīö min öi höng salām yip holmaneukre, asuh öp tömööḵngöre la-en yīö yěi ngatī? Hö-ö aich vē tahëng mihëṅṙö nö ngatī inlahen? 48 Lökten yin öi teung im hanangenlōn öi sā ngam Yöngre aṅ el halīöngö nö teung nö im hanangenlōn.