Cosa Yo Hace si Tan Bully Conmigo na Escuela?

Imagina este ecsena: No quierre mas anda na escuela si Thomas maskin cuando. Por causa este con el gendeh buen istoria que ya hace calayat el de suyu schoolmate acerca con ele tres meses ya el ya pasa. Ta pone sila con ele otro nombre. Tiene vez, tiene quien pega de suyu mano para cae de suyu maga libro y hace sale como accidente lang quel. O tiene quien rimpuja con ele y si bira ya le cara, no sabe le si quien quel ya hace. De ayer lang, mas ya queda grabe el bully cay ya ricibi amenazo si Thomas na social network . . .

Si etu si Thomas, cosa tu hace?

Tiene tu cosa puede hace! Gane, puede tu ganá contra con el tan bully maskin gendeh tu pelea kanila. Paquemodo?

• NO DAYUN RABIA. El Biblia ta habla: “El nuay juicio ta hace sale todo de suyu sentido, pero el un sabio ta controla con este.” (Proverbio 29:11) Si esta tu calmao maskin ya sinti tu duele, posible descanza ya aquellos quien tan bully contigo.

• NO MAN BALUS. El Biblia ta habla: “No devolve mal con mal.” (Roma 12:17) Mas queda lang grabe el situacion si man balus tu.

• EVITA NA PELIGRO. El Biblia ta habla: “El un sabio ta puede mira con el peligro y ta esconde.” (Proverbio 22:3) Evita con el maga gente quien posible causa problema y maga situacion que donde posible contigo man bully.

• PRUBA UN REACCION QUE GENDEH SILA TA EXPECTA. El Biblia ta habla: “El contestacion que calma ta quita rabia.” (Proverbio 15:1) Puede pa gane tu pruba man broma. Por ejemplo, si ta habla sila que bien gorda tu, puede tu habla, “Man diet ya yo mañana!”

• SALE. “Si silencio lang tu y despues sale, ta dale se mira que mature tu y mas animoso que con el quien ta pelea contigo,” ya habla si Nora, un 19 año. “Prueba se que ta puede tu controla con el de tuyu cuerpo—un cosa que gendeh ta puede hace el maga tan bully.”​—2 Timoteo 2:24.

• TIENE CONFIANZA NA CUERPO. Ta puede mira el maga tan bully si quien aquellos nuay confianza na diila cuerpo y quien gendeh imbisti. Pero, manada kanila hay deja ya contigo si mira sila que gendeh tu ta tiene miedo kanila.

• AVISA. Un maestra de antes el ya habla: “Ta habla yo con el maga estudiante que avisa si tiene quien tan bully kanila. Ese el justo cosa que debe hace y ayuda tambien este para gendeh man bully con otro.”