Wazithathu, 1 ka Julho
Lavani kuziva kuranda ka Txizimu.—Vaef. 5:17.
Hi hanya ka “timbimo to karata” ati ti nemelako kuhanya ka tona. (2 Tim. 3:1) Se loko Jehovha a si se gumisa mafu awa o biha e tisa mafu a maphya, wutomi wu na ya masoni ngu kukarata. Ngu toneto, ndinene ku ti wotisa tiya: ‘Ani ni wonetela mani ti to e ni vhuna ni ku ni tsimbitisa?’ Kaleko, m’bhali wa Masalmo a txhamusete lisima lo wonetela Jehovha ngako hi txi lava kuvhunwa ngu ngene. (Mas. 123:1-4) A wombile ti to ngako hi txi wonetela Jehovha, hi fana ni txithumi atxi txi wonetelako nyamne wa txona. Ti mahisa kutxani? Txithumi txi wonetela nyamne wa txona, mwendo kuthemba ene ti to e txi ninga sakudya ni ku txi vhikela. Kambe, txithumi txi fanete txi simama txi wonetela nyamne wa txona kasi ku txi ziva ati a ti lavako, se txi gwita txi maha toneto. Ngu kufana, ti lava hi gonda kwati Bhiblia ti to hi pfisisa ati Jehovha a ti lavako, se hi gwita hi maha toneto. Ngu toneto hi nga tsaniseka ti to Jehovha a na hi vhuna ngako hi txi lava txivhuno. w18.07 9-10 ¶1-2
Wazina, 2 ka Julho
Ngako Mwanana a txi mi thusa, mi na va mi di thusekile kha ditshuri.—Joh. 8:36.
Jesu a ti womba-womba ngu kukhululeka ka txionho, i ku kukhululeka ka wukhumbi wu vathu va ku ka wona kukhukhela kale. (Joh. 8:34) Hi ka wukhumbi wa txionho ngu nzila yihi? Txionho txi hi maha hi maha timhaka to biha. Txi nga hi vhalela kumaha ati i ku ta tinene mwendo kuhiseka ka mthumo wathu. Wuyelo ya toneto ngu karateka, kuxaniseka hambi ni lifo. (Var. 6:23) Mbimo yi txionho txi no va txi ti fuvisilwe hi na ta va ni mkhululeko wa ditshuri awu Adhamu ni Evha va nga ti nawo. Mapswi a Jesu aya ma ku khene “ngako mi txi zumba ka ditina dangu” ma kombisa ti to hi txi lava kukhululwa ngu ngene ti lava hi maha to kari. (Joh. 8:31) Ngu tihi ti hi nga ti mahako? Kota Makristu ya ma nga tiningetela, hi ti lekile hipuni hi tumela kuamukela mihingano yi Jesu a nga yi vekela vagondiswa vakwe. (Mat. 16:24) Nga ha Jesu a nga thembisa ngu kona, hi na khululwa mbimo yi yi tako, mbimo yi hi no amukela yotshe wuyelo ya digandelo da mtirulo. w18.04 7-8 ¶14-16
Wazixanu, 3 ka Julho
Ngawe wekha u zivako timbilu ta vanana va vathu.—2 Mak. 6:30.
Jehovha wa pfisisa matipfelo a vathu vakwe, hambiku mbimo yimwani va nga vako ni mawonelo o huma hanzila. Wona txikombiso txa Jona. Txizimu txi ti mu rumile ku ya txhumayela didungula da wululami ka didhoropa da Ninivha. Aku Vaninivha va nga tilaya, Txizimu txi to sawula kwa mbi va lovisa. Kambe, Jona kha tsaka ngu toneto. Ene a to “swireka ngutu” nguko wuprofeti wakwe wa ku Ninivha a ndi na loviswa wu ti thindekile. Hambiko, Jehovha a timisete e vhuna Jona kutshukwatisa mawonelo akwe. (Jona 3:10–4:11) Ngu mbimo, Jona a ti pfisisile e tshumela e thumiswa ngu Jehovha kubhala matimu oneyo ti to me hi vhuna. (Var. 15:4) Nzila yi Jehovha a thumisanako ngu yona ni vathu vakwe ya hi tsanisa ka ti to ene a ni mpfela-wusiwana ka vathu vakwe. Ene wa kuwona kupandiseka ni kuxuphwa ku mmweyo ni mmweyo wathu a mananako nako. Ene wa pfisisa mialakanyo yathu, matipfelo athu ni ti hi si ti kotiko kumaha. Ni ku Txizimu “kha txi na kutumela ti to [hi] txi dukwa ngu si si ku txitimwi ka mtamo [wathu].” (1 Vak. 10:13) Mapswi awa ma hi tsanisa ngu ditshuri! w19.03 16 ¶6-7