Job

17 “Ang akong espiritu nahugno,+ ang akong mga adlaw nahurot;

Ang lubnganan maoy alang kanako.+

 2 Tino nga adunay pagyagayaga batok kanako,+

Ug ang akong mga mata nagasud-ong sa ilang pagkamasuklanon.

 3 Palihog, ibutang ang akong garantiya diha kanimo.+

Kinsa pa ang makiglamano+ kanako ingon nga pasalig?

 4 Kay ang ilang kasingkasing gitakpan mo gikan sa pagkamaalamon.+

Mao nga ikaw wala magabayaw kanila.

 5 Mahimong sultihan niya ang mga higala nga kuhaon ang ilang bahin,

Apan ang mga mata mismo sa iyang mga anak moawop.+

 6 Ug gibutang niya ako ingon nga panultihon+ sa mga katawhan,

Mao nga ako nahimong luwaanan sa nawong.+

 7 Ug gumikan sa kagul-anan ang akong mata nalubog+

Ug ang tanan kong mga sangkap nahisama sa landong.

 8 Ang mga tawong matul-id nagatutok niini sa kahibulong,

Ug bisan ang inosente masuko tungod sa apostata.

 9 Ang matarong padayong mangupot pag-ayo sa iyang dalan,+

Ug ang mahinlo ug mga kamot+ padayong magatubo sa kusog.+

10 Apan, kamong tanan mahimo nang magpadayon. Busa palihog umari kamo,

Sanglit ako walay nakaplagan nga maalamon taliwala kaninyo.+

11 Nangagi na ang akong mga adlaw,+ nangagun-ob na ang akong mga plano,+

Ang mga tinguha sa akong kasingkasing.

12 Padayon nilang gipakagabii ang adlaw:+

‘Ang kahayag haduol gumikan sa kangitngitan.’

13 Kon ako magpadayon sa paghulat, ang Sheol maoy akong balay;+

Diha sa kangitngitan+ pagabuklaron ko ang akong higdaanan.

14 Ngadto sa gahong+ ako motawag, ‘Ikaw maoy akong amahan!’

Ngadto sa ulod,+ ‘Akong inahan ug akong igsoong babaye!’

15 Nan, hain na man ang akong paglaom?+

Ug ang akong paglaom​—⁠kinsay nakakita niini?

16 Ngadto sa mga trangka sa Sheol kini sila manaog,

Sa dihang kitang tanan moadto sa abog.”+